Read Lashi Roma 3 Bible Online

Roma 3 - Lashi bible

Roma 3

¹Houg su" nghoid yoomo Yuda byumyu" yigi nghi zain byumyu" yi tho' moo ci: noem je ngoid' boin:" Nyanu" da sho" yid thang: yham" yoomo ce: akyu" bo?

²Akyu" gi shoid' khang" moo" bo. Xang: shid" mo yuda byumyu" yigi Mangso: da" mungdang: ri loem" khou boem.

³Ngoid' loug houg: bang: dayham" gi Mangso: dang: theing khoin" to" myhid' yoomo - Mangsoo: we' nya: dang: theing khoin" to" myhid' bye: ein: tid wa la".

⁴Gyeing" ga: rigi houg: su" ayo" tid. Byu yug khang" moo" mhoug nghoid loug we' - Mangsoo: gi deingmain" wa zi nghoid. Jhoem: mungdang: moo- nang tid to" dang: gi deing byeung" loo wa. Tarha" dang: phyed nyid" ri nang za: oung: loo" wa.- ga: lhid" to" ziyo' dakhyoo" ti" nghoid.

⁵Nghoidloug we' byu dayham" gi - ngoonu" zei shoid' vhang: khyoo: gi - Mangso: da deungmain" khyoo: ri je myang loo nhang: zi nghoid la". ngoonu" ri dam kaid' zigi atarha" ein: wigi ngoonu" tid wa la". (Hidsu" ngoo tid zi gi - byu yi lhoung tid zi yo" dakhyoo" ti" nghoid)

⁶Mangsoo: ri atarha" ein: cekhyo" we' ayo" tid. Gyeing" nyang: Mangsoo: atarha" nghoid rigi he: mougmyid ri khakhyo" tarha" dang: phyed wa la".

⁷Gyeing" nyang: Mangso: deingmain" khyoo: ri ngoo adeung amain" nghoid loug we' nya: deingmain" khyoo: ri je bang myang nhang: khyo" wigi mang" so: da" myonhoo: phung" yoeb ri je doug bang nhang: la". Ciwim gari ngoo yooboo shoid' vhang: su dayug khyo" yooboo dam kaid' zi shau" kham ca" wa la".

⁸Ge zi bue" loo wa shid' re" age moo" ri ngoonu" zei: shang ein: ciwim atid' go" Hidsu" nyang: ngoo tid ga: byu dayham" gi - cang joeb' yooboo foin: lho: - ngoori roi" boem bye. Houg: bang: gi yooboo dam kham: moin: zi yo" dakhyoo" ti"- gyeing" gyeing" nyang: shau" kham: boem wa.

⁹Hougsu" nghoid loug we' ngoonu" Yuda byumyu" yi gi - tungbau byumyu" yi da tho' moo ci jegi mo nghoid la". Jege khyoo: ci aboo. Yuda byumyu" we' tungbau byumyu" we' yooboo yoem: so' khoug: moo danyid da" khyoo: ri nanu" ri ngoo toin" shid' bye.

¹⁰Jhoem: mungdang: moo tid zigi - Mangso shid' khoin" moo deingbyeing" su: dayug we' anyid.

¹¹Deingmain" tarha" ri si su: we' anyid. Mangsoo: ri noku su: we' anyid.

¹²Byu dangain" mo gi Mangsoo: ri nung phug pyam' bye: - nyanu" dangain" mo, khyoo: vhang: byug boem bye. Ge da" moo" zei su anyid - dayug we' anyid.

¹³Nyanu" da khyung" kang: gi - phang to" da loeb duang: nghoid nyid. Lhangmyu no, dug - nyanu" da" nhoid' khoug: moo bo jo,

¹⁴Nyanu" da nhoid' khoug: gi - gye" kho" ziyo' nheing" myeing" nheing" thui: yo" byeung" jo.

¹⁵Nyanu" gi - shid: nhang: wa zi yo" byu kang: ri said' wa lo, myab ago".

¹⁶Nyanu" ju" lo" joyoo khang" moo" moo- lhu: shoin' lhu: phyo' zi yo" - kougshu: khyoo: za: koid'.

¹⁷Nyanu" gi myenjham" ngei pyo: khyoo: ri ase' boem.

¹⁸Nyanu" mo: Mangsoo: ri gyoug voem nheigloem: yo' phau" myang: khyoo: abo boem- ga: wigi lhid" to".

¹⁹Tarha" moo bo da" zi dangain" gi - tarha" khoug: moo nyid mo shid' re" za: danghoid da" khyoo: - byu yi da" kyiyang myeing da" nhoid' joem ri nghoeb' pyam' byid: wa zi yo" - xangsu: byu dangain" gi - Mangso: da" tarha" dang: phyed' da khyoo: ri kham nhang: wa shid' re" nghoid. da" zi ri akhid" ngoonu" se boem bye.

²⁰Tarha" ri cang lo" khyo" - hang" we' Mangso: da" shid' khoin" moo deingbyeing" jang" moo ayo" ju. Tarha" gi - nyang: nyang: shoid' da" yooboo ri nyang: nyang: si wa shid' re" nghoid.

²¹Hougsu" nghoid loug akhid" uri - Mangso: da" shid' khoin" moo- xangsu: byu yi khasu" koid' lho: yo" deingbyeing" wa da" khyoo: ri - toin" shid' too" bye. Hau: zigi tarha" cang khyoo: khyo" anghoid. He: da" khyoo: ri - Moshe da" tarha" yo" lapi: yi da mungdang: gi sagsi: kham byid: nyid.

²²Mangso: da" shid' khoin" moo byu xang: su yi gi Khristu Yesu ri loem jeung" khyo" za: deingbyeing" khyoo: yo" lo. Byu gi Mangso: shid' khoin" moo Khristu ri loem jeing" mo, dangain" gi dayhang: ti" nghoid.

²³Byu yug khang" moo" gi yooboo yoo" mo, za: nghoid wigi Mangsoo: khyoid' yu khyoo: mo ve: gang: lo" byug boem bye.

²⁴Xangsu: byu yi ri yooboo mo loid' byoin loo: nhang: da" Khristu Yesu khyo" Mangsoo: gi ce: phoug" asang: da" jeju" jhung: shug khyo" wigi xangsu: byu yi ri deing byeung" mo ga: lhoem: kham: yu bye.

²⁵Khristu shid: kham: khyoo: khyo" xangsu: byu yi gi yooboo mo yo" loid' loo" wa shid' re" Mangsoo: gi hau Aseing ri gung leig xoin" gyeing" khyo" nyang: soin' phyed pyam' bye. Xangsu: byu yi gi Khristu ri loem" jeung" khyoo: khyo" youg noo yooboo mo yo" loid lo" boem bye. Mangsoo: gi Khristu ri gungleig xoin" gyeing" ga: soin: pyam' da" khyoo: gi nya: shid' khoin" moo xangsu: byu yi deingmain" daingbyeing" mo agyeing" khyo" khasu" koid' lhoem kham: yu da" khyoo: ri toin" shid' wa shid' re" nghoid. He pyaid he yo, ju" sho' Mangsoo: gi nheigloem: sheing: sheing: zeing: kham nyid lho: byu yi shoid' da" yooboo ri we' khyoid' pyam' byid.

²⁶Nghoidloug we' akhid" da" pyaid ayo moo Mangsoo: gi nya: deingmain" khyoo: ri toin" shid' wa shid' re" xangsu: byu yi da yooboo ri xoem" too" bye. Mangsoo: gi nyang: nya: gung nyang: deingmain" su: nghoid da" khyoo: ri we' Aseing Yesu ri loem" jeung" loo mo dangain" ri deingbyeing" mo, nghoid ein: kham: yu wa da" khyoo: ri we' toin" shid.

²⁷Houg: yoomo ngoonu" gi ci: phau: khuang cang bo la". Ngoonu" phau: khuang jang: ci ajo, tarha" ri ngoonu" cang yhi: yoomo anghoid. loem" jeung" khyo" za: danghoid.

²⁸Loem jeung" khyoo: khyo" za Mangso da shid' khoin" moo deingbyeing" khyoo: dayo" yu yoomo toung: to: da: tarha" mo ayo" yu da" khyoo: ngoonu" akhid" se boem bye.

²⁹Mangsoo: gi Yuda byumyu" yi da" Mangsoo: za danghoid la". Tungbau byumyu" yi da" Mangsoo: gi abo nghoid la". Tungbau byumyu" Mangsoo: gyeing" gyeing" nghoid.

³⁰Mangsoo: gi dayug kyeing" nyid. Nyang: ri loem" jeung" khyoo: ayang: qei yoomo Yuda byumyu" yi ri deing byeung" mo ga: lhoem: kham yu. Hougsu" loem" jeung" da" tungbau byumyu" yi ri we' deingbyeing" mo ga: lhoem kham yu.

³¹Hougsu" nghoid ri ngoo nu" gi loem" jeung" khyoo: khyo" tarha" ri she: lhei" pyam boem wa la". Ashe: lhei" tarha" ri je geing: teing nhang: wa khyoo: nghoid.