Read Lashi Roma 4 Bible Online

Roma 4 - Lashi bible

Roma 4

¹Hougsu" nghoid yoomo ngoonu" Abraham: da" khyoo: ri myid yu" boem shang - nyang: thoung" shau" lo khyoo: gi hid vhoo: moo lhid" to".

²Nyang: gi nyang: koid' - ge da" leig yu jang: yoomo Mangsoo: da shid' khoin" moo deingbyeing" khyoo: dayo" yu nghoid rigi - nyang: moo myo nhoo: sho: lho: phau: khuang cang bo. Nghoidloug we' nyang: gi Mangsoo: sheud' khyoo: gi hougsu" myonhoo: sho: phau: khuang khyoo: akoid'.

³Jhoem: mungdang: moo Abraham: gi Mangsoo: ri loem" jeing" yoomo Mangsoo: gi nyang: ri deingbyeing" su: ga: soin: byid bye: ga: tid to.

⁴Byu dayug yug gi moo" daja: ri zei: lho: - vhukung: phoug" ngei ri yo" yu lang" hau: da" ngei gi subi" jeju" koid' da" ngei anghoid loo za: nyang: kham: zoo eung: yoomo yo" yu ngei nghoid.

⁵Nghoidloug we' xangsu: byu yi gi nyang: nyang cang da" ge khyoo: ri aloem loo za: Mangsoo: ri za: loem" jeung" nghoid rigi Mangsoo gi nya: da" loem" jeung" khyoo: ri yu" lho: wigi nyang: ri yooboo ayo" ga: dang: phyed' soin: teing to' wa he: khyo" wigi Mangsoo: gi xangsu" byu ri lhoem: kham: yu nyid.

⁶Geda" akyang" nheigloem: mo anghoid ga: wi Mangsoo: gi deingbyeing" mo agyeing" khyo" soin: byid: khyoo: ri yo" kham: yu su gi ngi lhoo bye: ga tid kyo" jang" moo David Khokham" gi

⁷Tarha" shoid' da" jang" mo Mangsoo: lhoid' pyoin' zi yo' nya: yooboo mo yo" loid, byoin loo" sugi ngi lho'.

⁸Nya: yooboo ri Aseing wigi alhid" xoem" too" sugi ngi lho' ga wigi tid to".

⁹David khokham" toin" shid' to" da" ngi lho' khyoo: gi sho" yid thang: yham" mo, za: yo" la". Anghoid. sho" yid thang: ayham" mo we' yo" yu boem. ngoonu" tid kyo" da jhoem: dang: yo" dakhyoo" ti" Abraham: gi Mangsoo: ri loem" jeing" yoomo Mangsoo: gi nyang: ri deingbyeing" su: ga: soin: byid: bye.

¹⁰Hid: yhang: ti" Mangsoo: gi Abraham: ri deingbyeing" su: nghoid ga: soin: byid uri - Abraham: gi sho" yid thang: yham" bye la". Ayham" shi" la". bain kham: thang: ri anghoid akham: shi" u" ri nghoid bye.

¹¹Nyang: ri Mangsoo: houg: su" soin: byid: thang: ri Abraham: gi sho" yid thang: yham" da: khyoo: ri kham bye. Hau: sho" yid thang: yham" da moo" gi Mangsoo: Abraham: da' loem" jeung" khyoo: ri yu" lho: sho" yid thang: ayham" shi" mo deingbyeing" da byu ga: soin: byid: shau" da" thang" cab' nghoid. Hougsu" nghoid yoomo Abraham: gi athang: yham" da" moo" akham: yu nghoid loug we' Mangsoo: ri loem" jeung" shoid' khyo" deingbyeing" su: nyang: nghoid bye. Deingbyeing" mo ga: Mangsoo: soin: byid: shau" byu dangain" mo da" venyi phoo jhung: bui" loo bye.

¹²Nyang: gi shooyid' thang: yham" mo da" nya: phoo we' nghoid. Dakhyo" ein: rigi nyang: gi shooyid thang: yham" zi kham: yu su: za: anghoid ngoonu" phoo Abraham: sho" yid thang: ayham" shi" mo Mangsoo: ri loem" jeung" lho: - kangso' dei so" yen" su: nghoid.

¹³Mangsoo: gi Abraham: yo' nya: zoo: yi ri mougmyid ri shau" seing: wa ga: dang: soo" byid: to" - hau: dangsoo" gi Abraham: Moshe tarha" ri cang nyid yoomo anghoid. Ciwim gari Mangsoo: ri loem" jeung" yoomo nyang: ri deingbyeing" su: nghoid ga: Mangsoo: soin: yu yoomo nghoid.

¹⁴Gyeing" nyang: Moshe tarha" ri yo" cang mo za: - dang: soo" khoin" ri shau" kham: zoo: wa ein: rigi - Mangsoo: ri loem" jeung" khyoo: gi akoem: za: te: nghoid lho: Mangso: dang: soo" khoin" gi akoem: we' ce akyu" aboo loo.

¹⁵Moshe da tarha" gi Mangso: da" nheig yoo: yoo" bue" nhang: nghoid loug we' tarha" ajo rigi tarha" shoid' ga: zi we' ajo.

¹⁶Hougsu" nghoid yoomo Abraham: da nyamyid nyazoo: yi dangain" mo gi - Mangso: da" dang: soo" khoin" aphoug" asang: loo: kham: zo: da" akhang" jo da" khyoo: sagsi yo" kham: - loem" jeung" da" tho' moo ayang: qei" lho: dang: soo" khoin" too" byid bye. Hau: dang: soo" khoin" gi Moshe da" tarha" ri cang mo shid' re" za nghoid. Abraham: yhang: ti" Mangsoo: ri loem" jeung" mo shid' re" we' nghoid. Khasu" wim ga: ri Abraham: gi ngoonu" dangain" mo da" venyi: phoojhung: nghoid.

¹⁷Ngoo gi nang ri byumyu" myoo" sho' mo da" nya: phoo bui" nhang: bye: ga: jhoem: mungdang: moo tid to" ziyo' dakhyoo" ti" nghoid.Hougsu" Mangsoo: dang: soo" khoin" too" yoomo - Hauda dang: soo" khoin" gi deing nyid. Mangsoo: gi Abraham loem" jeung" da" Mangsoo: shid' mo doem dei loo nhang: da" Mangsoo yo' xang: shid" ri ci: ajo, jang" moo jo, loo nhang: wa shid' re" amyeing" byid da" Mangsoo: nghoid.

¹⁸Abraham gi nheig tei" jang: ci: ajo, lo jang" molang" loem" jeung" nheig byu nyid yoomo nyang: gi byumyu" myoo" sho' mo da" phoo jhung: bue" lo. Jhoem: mungdang: moo nya: da" byumyu" akung: ako'' yi gi moug khung kyi: myhoo' myoo: wa ga: zi yo" dakhyoo" ti" bue" loo bye.

¹⁹Hau: ayo moo Abraham: gi apyaid' dashoo: zain koo: bo lho: nya: da" gung du: gi shid: loo: yid danghoid lo sara: we' zoo: age boo lo: khyoo: ri si' nghoid loug nya: da" loem" jeung" khyoo: gi geing: geing: teing teing dabo jo.

²⁰Nyang: gi khanham we' Mangso: da" dang: soo" khoin" ri loem shoid' jeung" shoid' aloem" jeung" da" myid aboo. Mangsoo: ri loem" jeung" khyoo: khanham we' ashe: pyam. Mangsoo: ri loem" jeung" nyid yoomo yoem so' byeung" lo. Houg: yoomo nyang: gi Mangsoo: ri coung" nghei" byid: nyid.

²¹Mangsoo: gi nyang: tid to" da" dang: soo" khoin" ri yo" bue" loo nhang: wa" ga nyang bain" bain loem" ci.

²²Hougsu" leom jeung" ci: yoomo Mangsoo: gi Abraham: ri deingbyeing" su: amain" khyo" kham: yu bye.

²³Mangsoo: gi nyang: ri deingbyeing" su: amain" khyo" kham: yu bye: ga: da" dang: gi Abraham: dayug kyeing" ri za: yeing lho: lhid" to" zi nghoid.

²⁴ngoonu" ri we' yeing lho: lhid" to" zi nghoid. Khasu" wim ga: ri ngoonu" da Aseing" Yesu Khristu ri shid: jang" mo doem dei to'' loo nhang: da" Mangsoo: ri ngoonu" nyang: ri loem" jeung" yoomo ngoonu" ri we' deingbyeing" mo, amain" khyo" Mangsoo: gi lhid" xoem" too" bye.

²⁵Mangsoo: gi nyang ri ngoonu" da yoobo shid' re" shid: kham: nhang: bye. Hau: thang: ngoonu" ri deing byeung" mo amain" khyo" nyang: yo kham: yu baja" ga: nyang: ri shid: jang" mo doem dei to'' loo nhang: bye.