Read Lashi Roma 5 Bible Online

Roma 5 - Lashi bible

Roma 5

¹Ngoonu" gi loem" jeung" khyoo: khyo" wigi Mangsoo: da" shid' khoin" moo deingbyeing" mo yo" bue" loo bye: yoomo ngoonu" da" Aseing Yesu Khristu khyo" Mangso: da shid' khoin" moo ngei pyoo: myenjham" khyoo: ri ngoonu" yo" kham zo: boem bye.

²ngoonu" gi Aseing Yesu ri loem" jeung" bye: yoomo Yesu gi ngoonu" ri Mangsoo: jeju" bid shoem: khoug: khyoo: shu" vang loo" bye. Hau: jeju" ri akhid" ngoonu" kham zo: nyid boem bye. Hougsu" nghoid yoomo ngoonu" gi Mangso: da" myonhoo: phung" yoeb ri yo" thoin" pang wam: bye: ein: nheig byu zi yo" phau: khuang myid boem bye.

³Sho" jhen: koug shu: nyid loug we' ngoonu" gau yi ngei pyo: nyid. Sho" jhen: koug shu: da" khyoo: ri yo" zeing: oung: pyam' wa khyoo:

⁴Zeing: oung: lo" da" khyoo: gi Mangsoo: yo" tain" tab nhang: - hau: tain" lo" khyoo: gi nheig shid" nheig byu khyoo: ri bui" nhang: zi ngoonu" se' boem bye.

⁵Hidsu" nheig deig nheig byu khyoo: gi - ngoonu" ri neig loem: byo yoin" nhang: wa zi anghoid - Khasu" wim ga ri Mangsoo: gi ngoonu" ri nyang: byid: da jeju" gyeungshang: venyi: dang khyo" nyang khayhi' jheddab khyoo: ri toin" shid' too" yoomo nghoid.

⁶ngoonu" gi nheig nhei: yoo ayoo" wim nyid da u" ri Khristu gi Mangsoo: khyen: to" ayo, akhyeing: moo akhyeing" ashoeb' mo da" shid' re" shid: kham bye.

⁷Deingmain" su dayug shid' re" voem" shid: kham byu nyid wa gye au:. Nghoidloug byu gi dayug shid' re" voem" shid: kham: wa su: gi gyeing" gyeing" nyid ri nyid wa.

⁸Nghoidloug we' ngoonu" gi yooboo shoid' mo danghoid nyid shi" uri Khristu gi ngoonu" shid' re" shid: kham too" bye. Houg khyo" Mangsoo: gi ngoonu" ri khayhi' jheddab da" khyoo: toin" shid' too" bye.

⁹ngoonu" gi Khristu shid: kham da" khyoo: khyo" Mangso: da" shid' khoin" moo deingbyeing" mo khyo" yo" vang loo" wa nghoid bye: yoomo Mangsoo: nheig yo: nyid jang" mo nyang khyo" yo" loid byoin loo" wa zi deing" deing nghoid nyid bye.

¹⁰ngoonu" gi Mangso: gyivoo nghoid nyid loug we' nya: zoo: ri shid: kham: nhang: khyo" ngoonu" ri bidnoem bui" nhang: bye. Akhid" ngoonu" gi Mangso: da" bidnoem bui" loo bye: yoomo dei nyid da" Khristu khyo" wigi khyoid' yu khyoo: shau" yu wa zi deing bye.

¹¹Hid: kyeing" za anghoid - Mangsoo: gi ngoonu" Aseing Yesu Khristu khyo" wigi Mangso: da" bidnoem bue" nhang: bye yoomo gau yi cang bo boem bye.

¹²Yooboo gi byu dayug khyo" he: mougmyid moo ju" vang loo bye. Hau yug shoid' da" yooboo mo shid: da" khyoo: bue" loo bye. Hougsu" nghoid yoomo byumyu" bain sho' mo, gi yooboo shoid' yoomo shid: loo" ca" boem bye.

¹³Moshe da" tarha" ajo, shi" mo xang: su: byu yi yooboo shoid' bye: - nghoid loug we' hau uri tarha" ajo, shi" yoomo Mangsoo: gi xangsu: byu yi da" yooboo ri axoem" too".

¹⁴Nghoidloug we' shid: lo" da tarha" gi Adam da" bidnyid mo wigi Moshe da" bidnyid ju" sho' byu dangain" ri vhoeb' khang" ci: bye. Hau: da byu dangain" mo gi Adam: yhang: ti" Mangso: da" tarha" ri rhoi lho: yooboo akoid' nghoid loug we' nyanu" ri nyang: shid: da" tarha" gi vhoeb' khang" zeing: ci bye. Hau: Adam: gi thang: phyang" ju" ri" wa Aseing: da" vhoid ri voin su: nghoid.

¹⁵Nghoidloug we' hau: eig yug gi adu goo". Mangsoo: gi akyu" jeju" koid' da" khyoo: yi we' Adam: yooboo koid' zi gootu: tu: nghoid yoomo nya: eig yug gi adu goo" da. Byu dayug shoid' vhang: yooboo mo - byu bain sho' mo shid: wa khyoo: bue" lo ga khyoo: gi deing nyid. Nghoidloug we' Mangsoo: da" lhoid byoin jeju" gi gootu: byu dayug nghoid su: Aseing Yesu Khristu da jeju" khyo" byu myoo" sho' mo, mainkaid jeju" gi - gootu: tho' mo je ge zi nghoid.

¹⁶Mangsoo: byid: da" jhung: shug da" akyu" xo' lo zi yo" byu dayug zei: shoid' da" yoobo akyu" gi adu goo" - Hau: thang: ri byu dayug yooboo koid' da" uri - yooboo yoo" bye: ga: dang: phyed' byid: bye. Nghoidloug we' - Adam: thang: ri kangso' xo' dei lo da" byumyu" myoosho' mo yooboo zei: shoid' da" uri gi - amoin: ayi" loo: nghoid loug we' - yooboo ayoo" ga: wigi dang: phyed' byid.

¹⁷Byu dayug shoid' da" yooboo gi - shid: lo" da khyoo: ri bue" loo nhang: nghoid rigi gootu byu dayug nghoid da" Khristu Yesu koid' da" moozoo" gi khayhi' je gyi: myo: tham: wa lha". Mangsoo: da" joeb byeung" da" jeju" zeing ri we' Mangso: da" shid' khoin" moo deingbyeing" mo yo" bue" lo da" jeju" ri we' shau" kham: yu da byu dangain" mo gi Khristu khyo" oung: doid lo" da" kangso' yo" dei boem wam bye.

¹⁸Houg: nghoid yoomo byu dayug gi - yooboo shoid' yoomo xangsu: byu bain sho' mo yooboo dam shau" zi yo" dakhyoo" ti" byu gootu: dayug gi deingbyeing" yoomo xangsu: byu dangain" mo yoobo dam kaid' wa ga: dang: phyed' jang: mo yo" loid lo" lho: nyanu" ri kang byid: bye.

¹⁹Byu dayug gi Mangso: da" dang: ri atam" gyo: da" akhyoo" gi byu dangain" mo yooboo yoo" mo bue" lo zi yo" dakhyoo" ti" byu dayug Mangso: da" dang: ri tam" gyo akyu" yoomo byu dangain" mo Mangso: da" shid' khoin" moo- deingbyeing" mo yo" bue" loo wa.

²⁰Shoid' vhang: moozoo" je myo: loo wa shid' re" Moshe tarha" gi ju" vang loo bye. Nghoidloug we' yooboo myo: lo joyoo mo Mangso: jeju" gi je myo: loo bye.

²¹Yooboo gi byu ri yo" shid nhang: da" dangkang: nghoid ziyo' dakhyoo" ti" ngoonu" Aseing Yesu Khristu khyo" wigi Mangso: da" jeju" akhyoo" again gi ngoonu" ri apyaid' ato: kangso' khyoo: shu" yhe: lo" lho: deingbyeing" mo yo" bue" loo nhang: da" dangkang: nghoid.