Read Lashi Roma 8 Bible Online

Roma 8 - Lashi bible

Roma 8

¹Hougsu" yoomo Khristu Yesu dadeing: za: nyid mo gi tarha" dang: phyed' khyoo: aboo loo.

²Khasu" wim gari - Khristu Yesu yo' dadeing: daloem: za nyid nhang: da" venyi: yo" tarha" gi shid: lo" khyoo: yo" yoobo da tarha" mo ngoori lhoid pyoin' kaid' bye.

³Byu xangsu: gung sho" nheigloem: yoem: neing: khyoo: yoomo - Moshe da tarha" wi ayo" voin vu da" moo" ri Mangsoo: gi voin vu pang" byid: bye. Mangsoo: gi byu xangsu: gungshoo" zei: shoid' moozoo" khyoo: tid yooboo dang: phyed' wa shid' re" nya: zooti" ri nhang: kaid' bye. Hau: nya: zooti" zoo: gi yoobo tarha" ri phyo' shoin' pyam' wa shid' re" xangsu: byugung re" void yu bye.

⁴Hid: su" Mangsoo: yoovoin yu lho: bo voin vu da" deingmain khyoo: gi ngoonu" gi xangsu: gungshoo" nheigloem: khyo" anghoid loo: za: venyi da" myid vho: khyoo: khyo" - kangso' dei da" ngoonu" gi Moshe da" tarha" ri yo" cang pyeing wa shid' re" nheig shid: jang: nghoid.

⁵Gungsho" nheigloem: wigi koid' nhang: da" moozoo" yo' dakhyoo" ti" - kangso' dei nyid mo gi - gungshoo" nheigloem: vho: khyo" za: nheigloem: zhug se' boem ago". Nghoidloug we' venyi khyoo: shid' khyo" cang koid' loo" mo gi venyi vho: ngei da khyoo: cang nyid mo, gi - nya gung ri nyang: yo" vhoeb khang" mo, nghoid.

⁶Xangsu: gungshoo" nheigloem: khyo" vhoeb khang" su: gi - kangso' soem" wa nghoid. Venyi vho: da" khyo" vhoeb' khang" too" su: gi - kangso' yo" lho: myenjham" ngei pyoo: wa.

⁷Xangsu: gungshoo" nheigloem: za: dabo nyid su: gi - Mangso: gyi nghoid. Houg: te" nheigloem: za dabo nyid su: gi Mangso: mungdang: ri acang su: nghoid. Gyeing" nyang: ayo" cang su: nghoid.

⁸Nyang: nya: gungsho" nheigloem: khyo" za: cang loo" mo gi Mangso: nheigloem: yo" azhoung" goo".

⁹Hougsu" nghoid loug we' Mangso: da" venyi gi nanu" da" ung: khoug: moo bo nghoid rigi nanu" gi gungshoo: nheigloem: lhu: nhau khyo" acang loo: venyi wi lhu: poin" lhu: nhau jhoug" byid: da" khyoo: moo cang loo" goo" wa. Khristu da" venyi aboo mo, hang" we' Khristu yo" dajhi' we' asen.

¹⁰Nghoidloug we' nanu" moo Khristu re" loung" jo nghoid ri gi - yooboo koid' yoomo nanu" da" gungdu: shid: wa khyoo: yhe: loo" loug we' khasu" wim ga ri young" gyeing" da" venyi gi nanu" ri kangso' dei nyid nhang: wa nghoid. Khasu" wim ga: ri nanu" gi Mangso: da" shid' khoin" moo deingbyeing" mo bue" wa amyeing" yoo" yoomo nghoid.

¹¹Aseing Yesu shid: jang" mo doem dei to'' loo nhang: da Mangso: venyi gi nanu" da akhoug: moo bo nyid rigi Yesu Khristu ri shid: jang" mo doem dei to'' loo nhang: da" Aseing gi nya: da" venyi khyo" wigi nanu" da" xangshid" gungdoem: joem ri we' doem dei to'' loo nhang: wa zi nghoid.

¹²Houg: yoomo mang: nhung" yi we" -Mangso: da" venyi wigi jhau" mho' byid: zi yo" dakhyoo" ti" Myid soin: zei so' nyid boem ca". Gungshoo" vho: khyo" akoid' nyid goo".

¹³Gyeing" nyang: nanu" gi nyang: nya: gungshoo" vho: da" khyo" za cang lho: kangso' dei nyid rigi shid: lo" boem wa. Nghoidloug: we' nanu" gi nyang: nya: da" akhyeing" ashoeb' da" asam" aveid ri Venyi wigi bo pang" thoug khyo" bain' sho' she: pyam' boem nghoid rigi dei da" kangso' yo" boem wa.

¹⁴Mangso: da venyi khyoo: shid' u" she: da zi ri kham: yu da" byu yi gi Mangso: da" nya: zoo: yi nghoid bye.

¹⁵Mangso: jang" mo nanu" yo" kham yu da" young" gyeing" da" venyi nanu" ri join, doid loo" nhang: zi anghoid. Gyoug da" nheigloem: ri kaid' bye: zi we' anghoid. Young" gyeing" venyi gi ngoonu" ri Mangso: da nya: zoo: yi yo" bui" nhang: yoomo ngoonu" gi Mangsoo: ri - Phoo we" - nga" phoo we" ein: yo" yoid da" akhang" yo" yu boem bye.

¹⁶Ngoonu" gi Mangso: da nya: zoo: yi yo" bui" lo da" khyoo: ri young" gyeing" venyi nya: gung nyang: lang" ngoonu" da" venyi yo" dage" sagsi kham: nyid.

¹⁷Ngoonu" gi Mangso: da" nya: zoo yi nghoid yoomo nya: da" byumyu" shid' re" nyheing to" da" mainkaid jeju joem ri ngoonu" shau" kham: zo: boem wa. Khristu da shid' re" Mangsoo: nyheing to" zi ri we' bo shau" kham: zo: boem wa. Khasu" wim ga: ri ngoonu" gi Khristu yo" dage" yaukhe" kyi" khyeug noo bo kham: nghoid ri - nyang: yo" dage" nya: myo nhoo: phung" yoeb bo shau" vang kham: zoo: wa nghoid.

¹⁸Akhid" he: da" pyaid moo ngoonu" thoung" shau" nyid da" koug shu: sho" jhen: khyoo: gi thang: phyang" pyaid Mangsoo: gi ngoonu" ri shau" kham: zoo: nhang: wa da" myo nhoo: phung" yoeb yo" citham: atu' yu" ein: ngoo loem" jeing" nyid.

¹⁹Moug: myid goin" mo phain" too" shau" su: gi Mangsoo: nya: zoo: yi ri thu' myang loo nhang: wa da" moozoo" joem ri gye nheig byu myid lang" nyid boem.

²⁰Mangsoo: gi he mougmyid ri akoem: bue" loo wa shid' re" yoobo dang: phyed' byid: - Hougsu" dang: phyed' da" khyoo: gi mougmyid nyang: vhoo: yoomo anghoid. Mangsoo: nyang: dang: phyed' yoomo nghoid. Nghoidloug we' nheig byu jang: jo shi".

²¹Hau da nheig byu jang: gi danyid" da" bidnyid ri he phain" too" shau" da mougmyid gi - fain" vo byo yoin da' zi wigi myheig tei" to" jang mo loid byoin lo" lho: - Mangso: da nya: zoo: yi yo" da ge" loid byoin khyoo yo" myo nhoo: phung" yoeb ri shau" kham: zoo: wa.

²²Phain" too" shau" da mougmyid goin" gi - zoo: khu: noo no, da u" ri yhang: te" da" kyi" khyeug da" jam jau kyiyang myeing khyo" akhid" nyid" ju" sho' kham: zo: yau: nyid da khyoo: ngoonu" se'.

²³Phain" too" shau" da moug: nyid za anghoid. Mangso: da xang: shid" mo jhung: shug nghoid da" venyi ri shau" kham: yu da" ngoonu" we' Mangso: da nya: zoo yo" bui" wa da akhang" ri we' ngoonu" da" gungdu: goin" bain' sho' khyoid' yu shau" ri we' - lang" nyid zoo" re" kyiyang myeing nyid boem.

²⁴Ngoonu" gi nheig byu khyo" wigi khyoid' yu zi shau" nghoid loug we' nheig byu jang: ri nganu' myang nghoid rigi hau: da" nheig byu jang: gi gyeing" gyeing" da" nheig byu jo yoo anghoid.. Bain myang bye zi ri hang" su: nheig se' byu nyid loo wa.

²⁵Nghoidloug we' ngoonu" gi amyang yu shi" da" zi ri - loem" jeung" nheig byu nyid nghoid ri gi hau da zi ri nheigloem: sheing" sheing" lang" nyid.

²⁶Dalheing: dam nyang: young" gyeing" venyi gi yoem: neing: nyid da ngoonu" ri pang" thoug wa shid' re" gyoo" lo zi nghoid. ngoonu" gi akyu" khasu" mho' wa zi ase' boem yoomo nghoid: wigi ayo" tid kyo" da" kyiyang myeing: da" khyoo: ri venyi nya: gung du nyang: Ngoonu" da" shid' re" Mangso: jhang bo pang" mho' byid: nyid.

²⁷Byu da" nheigloem: ri myang: byid: da" Mangsoo: gi venyi: da" nheigloem: ri we' bo si byid:. Khasu" wim ga ri young" gyeing" Venyi gi Mangsoo: vho: zi yo" dakhyoo" Aseing nya: byu yi shid' re" bo mho' toung" bain: nyid yoomo nghoid.

²⁸Mangsoo: gi jheddab yoomo Aseing: myid vho: zi yo" dakhyoo" khe: khyen: yu shau" mo ri thoung" shau" zoo: wa da" moo" dangain" mo akyu" bo thu' loo wa shid' re" Aseing gi nyangnu" yo" dage" zei: so' khyoo: ri ngoonu" se'.

²⁹Mangsoo: gi - nyang: khyen yu too" mo, ri nya: zoo: Yesu yhang: ti" bue" loo wa shid' re" nghoid.

³⁰Houg: yoomo Mangsoo: gi nyang: khyen: thu' too" mo ri khe: yu. Hougsu" khe: yu too" mo nya: shid' khoin" moo deingbyeing" mo agyeing" khyo" kham: yu lho: nya: myonhoo: phung yoeb ri - nyang: yo" dage" yo" bo kham: zoo: wa akhang" byid bye.

³¹Tho' moo tid lid lo da" khyoo: ri agung kaid' lho: dang: thang: said' loo wa. Mangsoo: gi ngoonu" thang: dab jo rigi hang" we' ngoonu" ri yo" ung: wa zi anghoid.

³²Mangsoo: gi nya: zoo: gyeing" ri - vhoo" abyid' looza: - ngoonu" dangain" mo shid' re" gung leig xoin" to' pyam' bye: nhung. Ngoonu" shid' re" nya: zoo: ri byid: da" Aseing gi zi jo, moo jo, ngoonu" ri noug noug za: abyid: loo: khasu" se' nyid wa la".

³³Mangsoo: khyen: to" da byu yi ri - yooboo hang" yo" foin: wa lha". Nyanu" moo yooboo abo da" khyoo: ri Mangsoo: nyang: thoid' shid' tid fu" too" bye.

³⁴Houg: yoomo nyangnu" ri hang" we' yoobo dam yo" byid: wa zi anghoid. Shid: kham: da" zi za anghoid. Shid: jang" mo doem dei to'' lo da" Aseing Yesu Khristu gi Mangso: da lo yo shoid' moo zhoung: jo lho: ngoonu" da" shid' re" bo mho' tung" bain: byid: nyid.

³⁵Houg: yoomo - ngoonu" ri Khristu da" jheddab jang" mo - hang" yo" kang" pyam' wa lha". Yau: khe" khyoo myid myoo: ung: loug khyoo: - shen" jhen' khyoo: - zooyoid gyid shid' khyoo: - myoung: joid sho" jhen: da" khyoo: - shid: gyoin noo gyoin thoung" shau" khyoo: said' pyam' shau" da" khyoo: yi gi yo" kang" wa la".

³⁶Aseing da" shid' re" - ngoonu" gi nyid" khang" nyid" shid: gyoin noo gyoin yo" dathoung" shau" nyid. Said' wa ga: tei" to" da" yang joem yhang: ti" ngoonu" ri subi" houg: su" soin: too" bye.- ga: da" jhoem: mungdang: yo" dakhyoo" ti" nghoid nyid.

³⁷Nghoidloug we' agang: alain loo" nhang: tho' moo gootu: ngoonu" gi hau khyoo: dangain" yo" thoung" shau" goo" wa jang" moo ngoonu" ri jheddab da Aseing: khyo" wigi atho' tid oung: doid loo" bye.

³⁸Khasu" wim ga: gi ce: zi we' ngoonu" ri nya: jang" mo ayo" kang" pyam'. Shid: khyoo: nghoid loug we' - kangso' dei khyoo: nghoid loug we' -mau lagyoo: yi nghoid loug we' - moug: khung: tho' mo vhoeb khang" mo, nghoid loug we' - yoem: vho" yoem: so' nghoid loug we' - lid: loo" bye zi nghoid loug we'.

³⁹Moug: khung: tho' mo zi nghoid loug myid thi" khoug: mo, zi nghoid loug we' - ngoonu" da" Aseing Yesu' Khristu khyo" wigi Mangsoo: toin" shid' da" jheddab jang" mo - ngoonu" ri yo" kang" pyam' zi anghoid.