Read Lashi Roma 9 Bible Online

Roma 9 - Lashi bible

Roma 9

¹Ngoo gi Khristu yo' nyid. Ngoo amhoug - main" da" dang: ri tid. Ngoo main: da" dang: ri da tid da" khyoo: gyeungshang: da" Venyi: vhoeb' khang" khyo" wigi nya: ung: jeung" nheigloem: gi thangcab nghoid.

²Nga" da" nheigloem: gi nga" byumyu" - nga" suid" shoo" yi da" shid' re" - myid myoo: ung: loug nyid. Atho' tid sho' nheig moo no nyid.

³Ngoonu" da" akyu" shid' re" - ngoo gi Mangso: da" nheing" myeing" ri we' - Khristu mo gang: goo" nau da" nheigloem: bo.

⁴ngoonu" gi Mangsoo: khyen' yu to" da" byumyu" nghoid. Mangsoo: gi nyanu" ri zoo: gi joem khyo" coung" nghei tu: to' to" lho: nya: da" myonhoo: phung" yoeb, ri yo" bo kham: zoo: wa akhang" byid to. Mangsoo: gi nyanu" yo" dang: theing go" to" zi ri we' - tarha" byid: to" zi ri we' - deingmain" da" noku khyoo: ri we' - yo" yu lho: - nyanu" gi Mangso: da" dang: theing" khoin" joem ri yo" too" mo, nghoid.

⁵Ngoonu" gi Yuda byumyu" phoug" phyid" mo xo' gyoo" loo mo nghoid. Khristu we' - byuxeig khyo" ga: ri gi houg: bang: da" byukung: nghoid. Jo, moo jo, - nyid moo nyid ri vhoeb' khang" da: Mangsoo: gi - apyaid' atoo: moo myonhoo: phung yoeb dabo nyid baja" o" - Amen.

⁶Mangso: da" dang: theing khoin" gi - abui" loo wa ein: ngoo atid' noug. Khasu" wim ga: ri Israela byumyu" dangain" gi Mangsoo: khyen: yu to" da" byu yi anghoid.

⁷Hau tho' moo Abraham: mo ko' gyoo" loo mo dangain" mo gi Abraham: nya: myid: nya: zoo: gyeing" yi anghoid. Mangsoo: gi nang gi Isag mo za amyed ashen yi yo" loo wa ga wigi Abraham: ri tid to".

⁸Dakhyo" doem ein: rigi xangsu: gungshoo" khyo" khu: loo mo dangain" gi Mangsoo: nya: zoo yi anghoid. Mangsoo: dang: theing to" khyo" khu: loo mo za: Mangso: da" nya: zoo: agyeing" yi nghoid.

⁹Mangsoo: gi - ayo byeung" loo lang" ngoo ju" ri" wa. Sa: ra: gi yuggi zoo khu: ri" wa. - ga: wigi Abraham ri dang: theing to".

¹⁰Hau: tho' moo Rebedkha: da nya: zoo: eig yug gi - ngoonu" nya: phoug" Isag da" nya: zoo: tang: nghoid. Eif' yug goin" gi Mangsoo: akhyen: yu.

¹¹Houg: yoomo nya: eig yug akhu: loo shi" da" uri - ge da moo" - akhyeing" ashoeb' da moo" ci: akoid' shi" re nyang: -Mangsoo: gi Rebedkha: ri - re" zoo mang: moo" gi nya: nhung" ri shau" zei: zhoo" wa - ga: tid too" bye. Mangsoo: hid: su" ga: tid to" khyoo: gi - Aseing nyang myid to" zi yo" dakhyoo" ti" Mangmoo" ri akhyen: yu looza: nya: nhung" ri khyen: yu da" khyoo: toin" shid' wa shid' re" nghoid.

¹³Jhoem: mungdang: moo ngoo gi Yaku ri khyen: yu - Eso" ri gi khyen: pyam' ga: bo.

¹⁴Houg: su" koid' da' khyoo: ri Mangsoo: gi - atarha" ein yo" tid wa la". Ce: khyo" we' hougsu" ayo" tid.

¹⁵Mangsoo: gi Moshe ri - Ngoo nheig khyeug wa su: ri nheig khyeug wa. Jeju" koid' noug su: ri jeju" koid' wa. - ga: tid nyid.

¹⁶Houg: yoomo Mangsoo da khyen: yu khyoo: gi byu yi vho: da" khyo" anghoid. Byu xangsu: yi yoem yo" kaid' jang" khyo" we' anghoid. Mangso: nheig khyeug jang" mo za: danghoid.

¹⁷Mangsoo: gi Phara U Khokham" ri tid zi gi - nang ri kho: kham" zeing khyo" ngoo tu: to' to" da" khyoo: gi - nang moo nga" da phung yoeb ri thoin" shed' wigi - Moug myid gyab goin" moo nga" myeing fu" loo" nhang: wa shid' re" nghoid. ga: tid da" khyoo: jhoem mungdang: moo bo.

¹⁸Houg: yoomo Mangsoo: gi nyang: nheig khyeug wa yug ri nheig khyeug lho: - Nyang: u" loem' thain: nhang: wa su: ri u" loem' thain: nhang.

¹⁹Hougsu" nghoid loug we' Mangsoo: gi byu xangsu: yi ri cisu" wim yooboo yo" foin: wa lha". Hang" gi Mangsoo: vho: da" khyoo: ri yo" ngeig pyam' wa lha". ga wigi ngoori myid: noug mo boo wa.

²⁰Bid noem phoo we" nang gi khate" su: nghoid lho: wigi Mangsoo: ri hidsu" yo" myid: lha". Phain" too" su: wigi phain" to" Aseing ri - Aseing nang ci koid' ngoonu' ri phain" to" ein: yo" myid: wa lha".

²¹Oug" koid su: da" myid u" nug ri nyang: vho: khyo" oug" khu' ri yo" koid to" anghoid la". Nyang: gi Myid u" nug dathung" mo za - oug" gi oug" gang: yo" koid thu anghoid la".

²²Mangsoo: we' - houg: yo" dakhyoo" ti" koid. Mangsoo: gi - yo: phoin: myo nhoo: toin" shid' lho: nya yoem vhoo" phung" ri se' lo boem wa shid' re" - vho: ngei nyid. Nghoidloug we' nheig yo: zi thoung" shau" lho: byo yoin" shid: joem: loo" moin: mo ri gye kham zeing: yau: nyid.

²³Hau tho' mo gootu: Mangsoo: gi nyang: nheig khyeug nyid mo ri nya: da" joeb byeung" myonhoo: phung" yoeb ri shau" myang nhang: wa shid' re" vho: ngei nyid. Houg: bang: gi Mangso: da myo nhoo: phung" yoeb yo" bo vang kham: zoo: nhang: wa da" shid' re" - Mangsoo: nyang: nyheing too" mo, nyang: nghoid bye.

²⁴ngoonu" gi Yuda byumyu" khoug: mo za: anghoid. Tungbau byumyu" khoug: mo we' Mangsoo: khe: yu too" mo nghoid.

²⁵Hoshe da" jhoem: dang: moo Mangsoo: gi - Nga" da" byumyu" anghoid mo ri nga" byu phung: ein wa. Ngoo ajhed' dab da" byumyu" ri - ngoo jheddab da" byumyu" ein: wa.

²⁶Kha: jo yoo mo nghoid loug we' nanu" gi nga" da" byu phung: anghoid ga shau" tid mo gu: gi - dadei nyid da" Mangso: da" nya: zoo: yi - ga wigi - myheing zi shau" boem wa - ga wigi tid to".

²⁷Israela byumyu" yo" sen: lho: - Esaia gi - Israela amyu" yi gi - panglai mid' doem: myhoo: myo: loug boem nghoid loug we' - nyangnu" khoug: mo dayham" za: khyoid' yu zi shau" wa.

²⁸Khasu" wim ga: ri Mangsoo: gi mougmyid tho' moo nyid da" byu dangain" ri anoo: atheing: loo: hain: hain: tarha" dang: phyed' byid: wa yoomo nghoid ga: kho" kyo" lid: lo.

²⁹Hau tho' mo apyaid' atoo: mo yoem: moo" bo da Mangsoo: gi ngoonu" da" byumyu" dayham" ri khyam" sa ato' byid: nghoid rigi - ngoonu" gi Sodam yo" Gomora ti" thoung" shau" goo" wa ga: akhang: re lapi: Esaia tid kyoo" khare" zi yo" dakhyoo" ti" nyang: bue" loo bye.

³⁰ngoonu" tid nau da khyoo: gi hid: su" nghoid. Mangso: da" shid' khoin" moo deingbyeing" mo bue" loo wa shid' re" - yoem: akaid' da: tungbau byumyu" yi gi - Aseing Yesu ri loem jeing" loem" jeung" khyoo: khyo" - Mangso: shid' khoin" moo deingbyeing" mo yo" bue" lo da akhang" yo" yu boem.

³¹Nghoidloug we' - khyen: too" shau" da" byumyu" yi gi Mangso: da" shid' khoin" moo deingbyeing" mo yo" bue" lo da" tarha" ri sho: yen" nghoid loug we' ashug" myang boem.

³²Ce: noem wim amyang lha". Nyanu" zei: da" moozoo" gi - Mangsoo: ri loem" jeung" jang" moo ayang: aqei" loo: - nyanu" da" tarha" cang pyeung da" jang" moo za: ayang: qei" yoomo nghoid. Houg: su" nghoid yoomo - nyanu" gi jhoem: mungdang: moo toin" shid' to" da" - lug loem: moo thoung" lieng abye: go.

³³Jhoem: mungdang: moo- Tam" gyoo: ge' - byu yi thoung" thoe: leung loo" nhang: wa shid' re" lug daloem: ri Zion boem tho' moo ngoo zhug too" wa. Byu yi gi hau: lug loem: ri thoung" lho: leung: loo" goo" wa. Nghoidloug we' hau: lug loem: ein: da Khristu ri nheigloem: ung: khoug: bain" sho' loem" jeing" su: gi - Khanham we' nheigloem: byo loo" wa zi anghoid.- ga: wigi bo jo da.