Read Lashi 1Korinthians 1 Bible Online

1Korinthians 1 - Lashi bible

1Korinthians 1

¹Mangsoo vho: ngei ziyo' dakhyoo" Khristu Yesu da" lagyo: aya moo: khe: too" shau" da- ngoo Polu yo' ngoonu" da" mang: nhung" phoo, Sosteni gi

²Korinthu voo mo Mangso da" phung moo: boo mo, yo' joyoo khyi, khang" moo" mo, ngoonu" yo' nyangnu" da" Aseing: nghoid nyid da- ASEING Yesu Khirstu ri noku loem khau: da- Yesu Khristu khyo" wigi: Mangso da" gyeungshang: byumyu" bue" loo wa shid re" khe: yu zi shoug" bang: dangain" mo, jhang khyoo: dang: pyeung: kaid.

³Ngoonu" da" phoo, Mangsoo yo' ASEING Yesu Khristu jang" mo,- ngei pyo: myenjham" khyoo: gi dajo, jo, baja" o".

⁴Ngoo gi nanu" ri Khristu khoug: khyo" Mangsoo nanu" ri byid: da- main, kaid jeju" shid re" nga" Mangsoo ri: khanham we' jeju" boin: coung" ngei nyid.

⁵Nanu" gi Yesu Khristu yo' dadeing: daloem: za: bue" jo, bye: yoomo- nanu" gi nhoid' khoin" thui: moo: we' phajhi" juyi: dangain" jang" moo: we' khyoo: khaid ja: khang" moo" moo: yoo" mo, di mo, bue" lo boem bye.

⁶Ngoonu" kho" kyo" kaid da" Khristu da" khyoo: ngei bu: ludang: gi ri- nanu" moo: geing: geing: teing teing agyi: zoug jo, bye.

⁷Houg: yoomo ngoonu" da" ASEING Yesu Khristu thu' myang loo wa ziri: dalang" nyid da" ayo, moo- nanu" moo: ashau" kham: yu da" main, kaid jeju" gi ci" we' aboo loo.

⁸Ngoonu" da" ASEING Yesu Khristu doem ju" re" wigi- Tarha" dang: phyed' lo da" bidnyid moo- yooboo foin: cang aboo loo: sho'- nyang: gi nanu" ri lo" thang moo: ju" sho'- geung: teung jo, nhang: wa zi nghoid.

⁹Ngoonu" da" Aseing: ein: da"- nya: zoo: Yesu Khristu yo' shau" zoem" khoug: goo" baja" ga- nanu" ri khe: yu da" Mangsoo koem gi:-loem gi" su: nyang: nghoid nyid.

¹⁰Mang nhung yi we"- ngoonu" da" ASEING Yesu Khristu da" amying" akhang" yo' nanu" dangain" bang: ri ngoo mho' sang: kaid. Nanu" moo: emyid, aveing" goo" wigi- byo, sain" lo" zi abue" loo wa shid re nanu" ji, sang: da" khyoo: moo- nyang: cang" nyang: sham" shoin" goo" ge'. Nanu" da" myid soin: lo" khyoo: moo- nheigloem: dadeing: dakhaid za: koid nyid ge'.

¹¹Ci: yoomo ga: ri- nga" mang: nhung" yi we"- nanu" myeing" tid myoo: go" nyid da" khyoo: ri- khloe da" yheom: mo byu yi dayham" bang: gi ngoori bang bang nyang: re" tid kyo" boem bye.

¹²Ngoo hid: su" ein: tid yu" ba'- Nanu" mo byu dayham" bang: gi" Ngoo gi Polu da" cang zoo nghoid- Ngoo gi Apolu da" cang: zoo: nghoid. Ngoo gi Kepha da" cang: zoo: nghoid- Ngoo gi Khristu da" cang: zoo: nghoid ga: wigi: nanu" dayug yo" dayug gi adu, go" khyo" tid ngeig: go" nyid boem ago".

¹³Khirstu gi adu, atoem koid pyam' zi shoug" bye: la" (Lo, lhid" khyo" lhed" to" da" gootu: xang: shid" mougsoug" moo- Khristu gi adu, atoem yo" phyed, pyam' zi anghoid ga: bo jo,) Polu gi nanu" shid re" pyeing:" zeing moo: shid: kham: bye: la" Nanu" gi Polu da" myeing khyang" mo Babtisma yu bye: go" la"

¹⁴Khirstu yo' Ge-u mo lai lho: wigi- nanu" mo hang" ri we' ngoo gyid myhoeb akham byid: yoomo- Mangso jeju" ri coung" byid: nyid.

¹⁵Houg: su" nghoid yoomo nanu" gi nga" da" myeing khyang" mo Babtisma yu bye: ga- hang" we' ayo" tid nghoid ago".

¹⁶(O" nghoid, Stephain yo' nya: yhoem: byu yi ri we'- ngoo gyid myhoeb kham byid: bye. Hau: tho' gooji bang" ri gyid myhoeb kham byid: zi ngoo asoo" loo.)

¹⁷Khasu" wim gari- Khristu ngoori nhang: kaid da" khyoo: gi Babtisma cang kham byid: yen" wa shid mo anghoid. Hau: da" ludang: gi ri- cang kho" kyo" yen" wa shid re" Khristu gi ngoori nhang: kaid. Nghoid loug we'- Khristu gi pyeing:" zeing tho' moo: shid: kham: jang" mo yoem: vhoo" gi akoem: za: abue" lo" byug wa shid re"- byu da" nhoid, khoin" thu: yoem: vhoo" ri aci: loo: za: ngoo kho" kyo" yen.

¹⁸Khasu" wim ga: ri Khristu gi pyeing:" zeing tho' moo: shid: kham: ein: da- hau: pyeing:" zeing da" dang: kang: gi kangso venyi: soem" loo" mo, shid re" gi ce" akhyoo" avang da" dang: za: bue" nyid. Nghoid loug we' khyoid khyi: yu zi shoug" bang: da" shid re" koem gi Mangso da" yoem: moo" so' moo" nyang: nghoid bye.

¹⁹Khasu" wim gari- hau: jhoem: mungdang: moo- Phajhi" boo mo, da" phajhi" ri- ngoo lhu: nhoung mhoin, pyam wigi- se' yeig da" zoug: yi da" lasi, laleig ri ngoo cishu: anhang: pyam' byid: wa nghoid- ga: lhid" to".

²⁰Houg: su" nghoid yoomo- lasi, laleig phajhi" boo su: ga: zigi: khayoo: nyid lha" Mougsoug" lhid" da" sara: ga: zi khayoo: nyid lha" He: mougmyid tho' moo: dang: yo" tid shi, goo" su: ga: zi- khayoo: nyid la" Mangsoo gi he: da" mougmyid tho' mo phajhi" juyi: ri- akoo" afang: anyhoin: athung" zi bue" loo" nhang: bye: anghoid la"

²¹Khasu" wim ga: ri byu xangsu: yi gi nyang: nya: da" phajhi" juyi: yo' za: Mangsoo ri se' loo baja" ga:- Mangsoo gi nyang: phajhi" khyau" too" bye. Hau: da" gung khyoo: moo- Mangsoo gi ngoonu" kho" kyo" da" akoo" apyoid' da" mungdang: yo' loem" jeing" loo mo, ri khyoid yu wa shid re" myid phyed' to" abye.

²²Yuda byu yi gi sagsi: bui" nhang: wa shid re"- alhoo: again' ri vho: nyid ziyo'- Heleni byu yi gi lasi, laleig phajhi" ri sho: nyid boem ago".

²³Ngoonu" koem gi pyeing: zeing tho' moo: shid: kham bye: Khristu da" khyoo: ri kho" kyo" nyid boem. Hidsu" kho" kyo" da" mungdang: gi Yuda yi shid re" nheigloem: thei, leung joyoo nghoid wigi- tungbau byumyu" yi shid re" ce" akhyoo" abo da" dang: za: nghoid nyid.

²⁴Nghoid loug we'- Mangso khe: yu shau" da" Yuda yi shid re" gi hau: mungdang: gi Mangso yoem: so' yo' Mangso phajhi" juyi: nghoid da- Khristu nyang: nghoid bye.

²⁵Khasu" wim gari- sube" wigi: yu" myang ri- Mangso da" akoo" apyoid' da" zigi- xangsu: byu yi da" phajhi" juyi: tho' moo: je" wigi- gyi: da" phajhi" nghoid jo, Mangso yoem: neing: zigi- xangsu: byu yi yoem: boo ga: mo, tho' moo: yoem: je bo nyid.

²⁶Akhid" gi mangnhung" yi we"- nanu" ri Mangsoo khe: yu da" ayo, mo khyoo: joem ri myid yu" ge' Xangsu: byu yi da" myojid" khyo" yu" kaid shang ein: rigi- nanu" gi phajhi" lasi, laleig boo mo, Amyeing" akhang" yoo" mo, zau: byumyu" mo thu loo mo, myoo" sho' bo zi anghoid.

²⁷Nghoid loug we' Mangsoo gi zhoo: gyi: koid khyo"- phajhi" lasi, laleig boo bang: ri: sho' thu' nhang: wa shid re" mougmyid mo, akoo" apyoid, mo, ga: soin: too" bang: ri khyen: yu bye. Yoem: moo" boo bang: ri sho' thu' nhang: wa shid re-mougmyid moo: yoem: neing: bang: ga: soin: too" mo, ri khyen: yu bye.

²⁸Mougmyid moo: gye" nyang: akhyag nghoid ga: myid ci: mo, ri- phyo' shoin' pyam wa shid re" yu" nge khyo' to" da" ci" asoin: bang: ri khyen: yu abye.

²⁹Hid: yhang: ti" koid da" khyoo: gi Mangso da" shid khoin" moo- hang" we' ayo" phau khuang wa shid re" nghoid nyid.

³⁰Mangsoo gi ngoonu" ri- Khristu yo' dadeing: daloem: za: bue" loo nhang: bye: yoomo Mangsoo gi Khristu ri ngoonu" da" phajhi" lasi, laleig bue" loo nhang: bye. nyang: khyo" wigi: Mangso da" shid khoin" moo- deing byeung" bang: yo" bue" loo bye- Mangso da" gyeungshang: byumyu" yo" bue" lo boem bye: ziyo'- ngoonu" gi lhoid pyoin kaid zi we' shau" boem bye.

³¹Houg: su" nghoid yoomo- jhoem: mungdang: moo: tid to" ziyo' dakhyoo" ti hang" nghoid loug we'- phau: khuang nau rigi- Aseing wigi: zei: bye: da" moozoo" yoomo- phau: khuang nyid goo" baja".