Read Lashi 1Korinthians 12 Bible Online

1Korinthians 12 - Lashi bible

1Korinthians 12

¹Mang: nhung" yi we"- nanu" mougsoug" khyo" lhid" wigi myid: kaid da" gyeungshang: Venyi: da" jeju" jhung: shug yo' sen: wigi hau: da" deungmain" khyoo: nanu" ri tid kyoo" wa nghoid.

²Nanu" gi tungbau byumyu" yi danghoid nyid boem shi" ayo, moo: khyoo: aja" ja: moo: khyoo: vhang: vhang: loo" bang: nghoid boem wigi- kangso abo da" soolhoo: joem ri- noku lai lo boem bye: ziri: nanu" nyang: si' gu nghoid.

³Mangsoo ri nghoid loug we'- Mangso Venyi wigi: khyoo: shid' vhu" she: zi shau" kham: yu nghoid rigi-" Aseing Yesu ri mau: goin' baja",, ga: avoem" tid. Gyeungshang: da" Venyi wigi- khyoo: shid' vhu" she: ziri: ashau" kham: yu su: gi Aseing Yesu gi Aseing nghoid ga- hang" we' ayo" yhen: yu nyid wa khyoo- ngoo nanu" ri si' nhang: nau.

⁴Akhid" Venyi jeju" jhung shug aja" ja: boo nghoid loug we'- hau" jeju" jhung: shug joem ri- Venyi dayoug wigi: kyeing byid: nyid zi nghoid.

⁵Dei zhoo' dei jhug wa moo" aja" ja: boo nghoid loug we'- yo" zhoo" yo" jhoug da" Aseing gi dayug za: date: nghoid.

⁶Moozoo" jid: zoo" zei: loo" wa da"- yoem: so' myoo" sho' ja: boo nghoid loug we'- dangain" ziri: pang" thoug voinvu, nyid da- gooki" lid' da" moo" zo" shid re" yoem: so' kaid byid: nyid su gi Mangsoo dayug za: danghoid.

⁷Dangain" bang: shid mo akyu" boo baja" ga: byu yug khang" mo" nheigloem: ung: khoug: moo- gyeungshang: da" Venyi loung" jo, bye: ziri- khyoo: aja: ja: khyo" toin" shid' nyid.

⁸Khasu" wim gari- byu dayug rigi- hau: Venyi gi phajhi" mungdang: kho" kyoo" wa yoem: byid: nyid. Gootu: dayug ri hau: Venyi: gi lasi laleig da" mungdang: se' kho" kyo" da" yoem: vhoo" kaid byid nyid.

⁹Hau: lho: wigi- gootu: dayug rigi:- hau: Venyi wigi: loem" jeung" da" nheigloem: kaid byid: nyid. Gootu: dayug ri hau: Venyi: gi noo phyoo yo" byang" ge da" yoem: vhoo" kaid byid: nyid.

¹⁰Hau: Venyi wigi nyang- dayug rigi: mau" pho" alhoo: again yo" koid shug wa da" yoem: vhoo"- gootu: dayug rigi: lapi: wa da" akhang" gootu: dayug rigi- Venyi mo yo" yu da" yoem: vhoo" yo' Venyi khyo" anghoid da" jhung" shug joem ri se' yu" phoid: kho' se' da" yoem: so'- Gootu: dayug rigi:- myeing" aja" ja: se' kaid da" yoem: so' yo' gootu: dayug rigi: tid da" dang: khoin" mo dang: kang: joem ri se' phoid: kyo" da" yoem: vhoo" byid: to.

¹¹Nghoid loug we' hau: jeju" yoem: vhoo" joem gi hau: venyi dayoug wigi: za: bui" nhang: nyid yoomo- nyang: myid vho: ziyo' dakhyoo" ti"- dayug yo' dayug ri- gooki" lid' da" jhung: shug gootu: tu: ngab sho'- gam, byid: to" boem bye.

¹²Khristu gi akung: ako'' myoo" sho' dab, da" dayug kyeung" da" gung doem: yo' du nyid. Hau: gung doem mo akung: ako'' joem gi myoo" sho' daboo nghoid loug we'- gung doem: gi dayug kyeung" nghoid.

¹³Houg: yo' dakhyoo" ti"- nyhang" dangain" mo, gi Yuda yi nghoid loug- Yuda byumyu" yi anghoid loug we'- join' yi nghoid loug join' anghoid mo, nghoid loug we'- Venyi: dayug mo za: Babtisma ri zheung: kham' yu lho: dagung dashoo" za: bue" lo boem bye: ziyo'- dangain" bang: da" nheigloem: ung: khoug: moo: hau: Venyi dayug riza: coem, kham: yu boem bye.

¹⁴Khasu" wim gari- hau: gung doem: moo: akung: ako'' daloem: za: anghoid- myoo" sho' bo nyid.

¹⁵Khyid: gi ngoo lo, anghoid yoomo- gung doem: yo' ci: asen: ga: wigi: tid nghoid rigi- houg: su" tid yoomo nyang: gi gung doem: yo' ci" we' asen: khyo" anghoid.

¹⁶Hau: lho: wigi- nookhyab, gi" ngoo gi myojid" anghoid yoomo- gung doem: yo' ci: asen, ga: tid nghoid ri houg: su" tid yoomo gung doem: yo' ci: asen: khyo" anghoid.

¹⁷Dagung goin" myojid" za: nghoid rigi- khakhyo" se' shoug" gyoo: wa. dagung goin" nu khyab, za: te: nghoid rigi- khakhyo" se' nam yu" wa lha"

¹⁸Akhid" Mangsoo koem gi nyang: vho: ziyo' dakhyoo" ti"- akung: ako'' daloem: yo' daloem: ri- nya: joyoo yo' joyoo moo: tab, too" byid: bye.

¹⁹Hau: lho: dangain" gi ako' daloem: za: te: nghoid rigi- gung doem: daloem: za: ayo" bui".

²⁰Akhid" koem gi akung: ako'' myoo" sho' boo nghoid loug we'- gung doem: daloem: za: date: nghoid.

²¹Houg: su" nghoid yoomo myojid" gi" lo, nang rigi: ngoo avhoo: loo, ga: wigi: age tid. Vhuloem we'- " khyid: re" eig yug ri ngoo aci: noo" loo, ein: wigi: age tid.

²²Hau: tho' moo: je" wigi- gung doem: mo, yoem: neung: yhang: te" da" akung: ako'' aboo loo: za: ngoonu" ayo" nyid boem nghoid da.

²³Gung doem: mo houg: yhi' gyeing akyu" abo yhang: te" da- akung: ako'' joem ri je" wigi- yhoug: gyen: khyo" wigi- yu" coung: nyid boem. Ngoonu" da" ayung" alho, da" akung: ako'' joem ri- je" yung" sho' ngoonu" lhoo, yhung byid: nyid boem bye.

²⁴Yung" gu nghoid da" akung: ako'' rikoem gi lhoo, yhung byid: aca" loo. Myo, nhoo: abo da" akung: ako'' rigi- je" wigi: myonhoo: yoo" nhang: wa shid re" Mangsoo nyang: hau: ziri: lhoo, yhung byid: to.

²⁵Hougsu" nghoid yoomo- gung doem: mo da" akung: ako'' joem gi nyang: cang" nyang:- suid" kho' go" khyoo: aboo loo: za: houg: yhang: te" adu, go" da" akung: ako'' joem gi dayoug shid re" dayug- seing" kho" gung youg youg go" se' nyid boem.

²⁶Houg: yhang" te" da" akung: ako'" daloem: gi noo, phyoo" jam, jau gye" shau" nyid uri- akung: ako'' gootu: we' houg: yo' dage" bo no nyid bye. Akung: ako' daloem: ri coung nghei, byid: zi shau" nghoid rigi- gootu: akung: ako'' joem dangain" we'- hau: da" gau yi ngei bu: khyoo: ri bo, shau" kham: yu nyid boem.

²⁷Akhid" nanu" dangain" bang: gi Khristu da" gung doem joem nghoid boem wigi- yug khang" moo" gi houg: mo akung: ako'' joem nghoid.

²⁸Mangsoo gi hau: da" phung: moo- daloem: ein: jang" moo: Lagyoo: yi-eig loem" ein: joyoo moo gi Lapi: yi- soem" loem: joyoo moo: gi Sara yi hau: thang: ri alhoo: again toin" shid' mo hau: thang: moo: byu gooji ri yo" pang" yo" thoug khyoo: se' toin" shid' mo hau: thang: moo:-noo phyoo" joem ri se' gai gi byid: da" yoem: boo bang- mung main: dang: se' tid da" ludaid' yi yo' gooki" lid' da" dang: aja: ja: se' tid mo, ri we'- nya: joyoo moo: nyid nhang: bye.

²⁹Nyangnu" dangain" bang: gi lagyoo: yi nghoid go" la" dangain" bang: lapi: nghoid go la" Nyangnu" dangain" bang: gi sara yi nghoid boem la" dangain" bang: gi alhoo: again yo" koid shug go" la"

³⁰Nyangnu" dangain" bang: gi noo phyoo" ri se' byang" ge da" jeju" yoo" bang: nghoid la" Nyangnu" dangain" bang: myeing aja: ja: se' kaid go" la" dangain" bang: gi tid nyid da" dang: kang: ri se' phoid: kyoo" bang: nghoid go" la"

³¹Houg: su" nghoid yoomo- nanu" gi je" gyi: da" jeju" jhung: shug ri yo" kham: yu wa shid re"- nheig nhei: vho: ngei nyid ge'. Ngoo gi nanu" ri je" gyi: da" khyoo: zeing dakhaid ri toin" shid' shi" wa.