Read Lashi 1Korinthians 13 Bible Online

1Korinthians 13 - Lashi bible

1Korinthians 13

¹Ngoo gi byu da" dang: yo' mau lagyoo: yi da" dang- aja" ja: se' tid nghoid loug we'- jheddab nheigloem: abo rigi- baid' myheung da" mang" thui: yo' myeing tei" to" da" shab, sheing: yo' dadu nyid.

²Ngoo gi lapi: se' pe: ziyo'- no, da" dang: kang dangain" ziri- se' myab, thang da" phajhi" aja" ja: yo' joeb, byeung" lho: wigi- boem, ri yo" doin: shu" pyam sho' da"- loem" jeung" emyid, boo nghoid loug we'- jheddab da" nheigloem: abo rigi: ngoo ci" we' anghoid.

³Ngoo yo" da" nga" ziyoo soid gain' dangain" ri- ngoo cang gam byid: pyam lho: wigi-Ngoo nya: gung doem: ri: we' myi: moo: yo" nghe, pyamsho' da" xoin" yo" to' pyam ri nghoid loug we'-jheddab nheigloem: abo rigi: nga" shid re" ce" akyu" we' aboo.

⁴jheddab, da" nheigloem: gi nheigloem: sheung: nyid- nheig khyeug nyid- no" zo, zi aboo- phau: khuang nghoid boin- khyoo: aboo.

⁵Jheddab nheigloem: gi se' phoug" se' myang:- nya: akyu" ashoo- nheig yoo: ung: jhen: khyoo: aboo- jheddab da" nheigloem: gi sube' da" yooboo ri axoem" too.

⁶Jheddab da" nheigloem: gi adeing: amain" ziyo' akhyeing" ashoeb da" khyoo: moo: agoug loo: za: hau: deingmain" khyoo: moo: gau, yi nyid.

⁷Jheddab da" nheigloem: gi khanham we' asoem" kham' khyoo: ajo,- khanham we' loem" jeung" nyid- khanham we' nheig byu nyid- khanham we' kham' zeung: nyid.

⁸Jheddab nheigloem: gi apyaid' atoo: moo: dajo, jo- gye" no, da" mungdang: joem, gi daso, moo: bei: lo" byug wa dang: aja: ja: se' tid khyoo: nghoid rigi- no: lo" byug wa lasi laleig khyoo: we' lai lo" byug wa zi nghoid.

⁹Khasu" wim ga: ri ngoonu" da" lasi laleig jeju" jhung: shug joem yo' Venyi vang byid: lho: lapi: dang: khyo" kho" kyo" da" mungdang: joem gi ajoeb byeung" nghoid da.

¹⁰Nghoid loug we' hau: joeb, byeung" zi ju" ri" lang" gi ajoeb abyeung" zigi: bei: lo" byug wa zi nghoid.

¹¹Ngoo zooshang: nghoid shi" ayo, moo: gi ngoo zooshang: myeing" kaid nyid. zoonu" myid boo - zoonu" ti" myid soin: thu' nyid. akhid" ngoo ludaid' bue" loo lang"- zooshang: aved, ri ngoo to" pyam.

¹²Akhid" ngoo myang nyid zigi- bang teing moo- yoeb, yoeb, za: date: myang nyid. Thang: phyang" ngoonu" gi myo, moo: gyo' gyo' nyang: shau" myang goo" wa. Akhid" ngoo se' khyoo: gi ajoeb abyeung" za: danghoid- Hau: uri: gi Mangsoo ngoori: se' yhang: ti"- ngoo we' joeb, byeung" sho' se' wam: bye.

¹³Akhid" koem gi loem" jeung da" khyoo- nheig byu joyoo yo' jheddab nheigloem: ein: zi soem" ja: jo, nghoid loug we' hau: gu: moo: je" gyi: thang zigi- jheddab nheigloem: nghoid.