Read Lashi 1Korinthians 14 Bible Online

1Korinthians 14 - Lashi bible

1Korinthians 14

¹Hougsu" nghoid yoomo- jheddab da" nheigloem: ri yo" yu sho'- yoem: kaid nyid ge'. Venyi jeju" jhung" shug joem ri vho: ngei nyid ge'. Je" wigi: hau: mungdang: ri kho" kyoo" wa da" jeju" jhung: shug ri vho: ngei nyid ge'.

²Gooki" lid' da" dang: ri se' tid su: gi gooji yo' doem' go" nyid zi anghoid. Mangsoo yo' doem' go" nyid zi nghoid. Khasu" wim ga: ri nya: da" dang: ri hang" we' ase' gyoo: byid nyang: gi Venyi yoem: vhoo" yo" sen: lho: dang: kang: no, da"- deingmain" khyoo: ri tid nyid zi nghoid.

³Nghoid loug we' Mangso da" mungdang: ri kho" kyo" nyid su: gi byu yi ri geung: teung loo" nhang: da" dang:- yoem: byid: da" dang:- nheig teing ung: teing byid: da" dang: ri tid nyid.

⁴Gooki" lid' da" dang: aja: ja: ri tid nyid su: gi nya: gung doem: ri za: da te: yo" geung" teing nhang:- nghoid loug we" Mangso da" mungdang: ri kho" kyo" nyid su: gi hau: da" phung: goin" ziri: yo" geung: teing loo nhang: nyid.

⁵Nanu" nyid moo: nyid bang: gi gooki" lid' da" dang: tid wa ziri- ngoo vho: ngei nyid- nghoid loug we' Mangso mungdang: ri yo" kho" kyoo" wa da"- yoem: vhoo" yo' sen: da" jeju" ri je" yo" yu nhang: nau nyid. Khasu" wim ga: ri gooki" lid' da" dang: ri se' tid su: gi nyang: tid da" dang: kang: ri- phoid kyoo" su: nyid ri she'- hau: phung: ri dayo" geung: teing nhang. Hougsu" anghoid rigi- Mangso mungdang: kho" kyoo" su: gi gooki" lid' da" dang: se' tid su: tho' moo: phoung" je, dab, nyid.

⁶Houg: yoomo mang: nhung" yi we"- Akhid" ngoo nanu" jang" moo: ju" re" lho: gooki" lid: da" dang: aj" a: ja: tid nghoid loug we'- Mangso jang" mo lapi: dang:- lasi laleig da" dang:- Venyi: wigi: fang byid: da" mungdang: jhoug" byid: mhoo, byid: da" dang:- ngoo nanu" ri atid nghoid rigi- nanu" shid re" ce: akyu" boo wa la" ce" akyu" we' aboo.

⁷Khoolhang anghoid lang" gi teing yhang: te" kangso abo baid myheung ja: ri yu" shang. Hougsu" baid myheung da" thui: ri bang bang abaid myheung rigi- kha: yug gi khasu" ga: gyo: kho' yu wa la"

⁸Laboo" ri moid' su: gi nya: thui: ri se' gyo: kho' wa khyo"- bang bang za: amoid nghoid rigi- kha: yug gi gyi too, wa shid re" se' nyheing soin' wa lha"

⁹Houg: yo' dakhyoo" ti" gooki" lid' da" dang: aja" ja: yo' nanu" tid nyid da" dang: gi bang" bang anghoid rigi- kha: yug khasu" ga: se' gyo: yu wa la" Nanu" da" dang: khoin" joem gi lid moo: bo, dang: lo" byug wa zi nghoid.

¹⁰He: moug: myid tho' moo: myeing" aja" ja: boo nghoid loug we'- ce: ja: byumyu" yi da" myeing" nghoid loug we'- dang: kang: abo zi gi ajo.

¹¹Nghoid loug we'- ngoo ase' gyo: da" byumyu" myeing" kaid da" zigi- nga" shid re' tung boug nghoid wigi- ngoo we' hau: youg shid mo tung: boug za: bue" nyid wa nghoid.

¹²Nanu" gi Venyi jhung: shug ri vho: ngei nyid boem yoomo- hau" da phung: gyi: sheung: loo wa shid re"- geung: teing nhang: da" Venyi jhung: shug ri je" wigi: yo" ci: yhung: wa shid re"- ziyoo jo, nu" dangain" tho' moo: je" wigi:- cang sho: yu nyid ge'.

¹³Hougsu" nghoid yoomo- gooki" lid da" dang: aja: ja: tid nyid su: gi nyang: nyang: tid nyid da" dang: akang: ri se' phoid: kyoo" jeju" yoem: vhoo" yo" yu wa shid re" nyang: akyu" mho' nyid baja".

¹⁴Khasu" wim ga: ri ngoo gi myeing" aja: ja: khyo" akyu" mho' nyid da" ayo, moo- gyeing" nyang: nga" da" venyi gi akyu" mho' nyid nghoid loug we'- nga" nheigloem: gi hau: jang" moo: aboo.

¹⁵Houg: ri ngoo khasu" koid wa lha" Ngoo gi nga" Venyi yo' akyu" mho' lho: wigi- nga" emyid, yo" we' akyu" mho' wa zi nghoid. Nga" Venyi yo' ngoo jikhoin" khoin" wigi- nga" emyid, yo' we' jikhoin" khoin" nyid wa zi nghoid.

¹⁶Nanu" gi Venyi khyo" za: Mangsoo ri jeju" boin: da" dang: tid nghoid rigi- akyu" mho' phung: moo: bo nyid da"- phung: byu dayug gi nanu" tid da" dang: ri ase' gyoo: yoomo- nanu" da" jeju" boin: akyu" mho' da" dang: ri- khasu" wigi: Amen, ga: yo" bo tid wa la"

¹⁷Jeju" ri boin: coung" da" nanu" akyu" mho' dang: gi khayhi' gi nghoid loug we'- byu gootu: shid re" geung: teing" nhang: da" akyu" gi ci: yo" yu boem wa zi anghoid.

¹⁸Nanu" hang" da" atho moo: we'- gooki" lid' da dang: aja" ja: ngoo se' tid yoomo- Mangsoo ri ngoo coung" nghei nyid.

¹⁹Nghoid loug we'- noku akyu" mho' nyid uri- gooki" lid da" dang: aja" ja: khyeing" moin" yo" tid wa tho' re" gi byu gooji yi ri jhau" byid: wa shid re"- se' gyo: da" dang: khoin" wim: khoin" za: yo' ngoo je" wigi: tid nau nyid.

²⁰Mang: nhung" yi we"- myid soin: yu" ca" da" khyoo: moo: zooshang ti" akoid nyid goo" akhyeing" ashoeb khyoo: moo gi zooshang: ti" bui" nyid ge'. Myid soin: yu" khyoo: moo: gi nheig boo ludaid' bue" nyid loo: ge'.

²¹Hau: jhoem: mungdang: moo: lhid" to" zigi- Nga" da" byumyu" yi ri- myeing" aja" ja: kaid mo, da" khoin" thui: yo' ngoo tid wa zi nghoid. Hougsu" nghoid lang" gi nga" da" byumyu" yi gi ngoori: tam" gyo: goo" zi anghoid ga: tid.

²²Hougsu" nghoid yoomo- gooki" lid da" dang: tid da" yoem: vhoo" gi aloem" ajeung" bang: shid re"- sagsi: alhoo: nghoid nyid. Loem" jeing" bang: shid re" anghoid. Mangso mungdang: yo" kho" kyo" da" jeju" yoem: so' jhung: shug koem gi loem" jeing" bang: shid re"- sagsi: alhoo: nghoid. Aloem" ajeung" bang: shid re" anghoid.

²³Hougsu" wigi- hau: da" phung: goin" bang: zeung: foem: nyid boem: wigi- dangain" bang: gi gooki" lid da" myeing" aja: ja: khyo" tid go" nyid boem ri- ase' gyo: da" yu" maya" byu yi gi houg: su" anghoid lang" aloem" ajeung" bang: ju" vang lo rigi- nanu" dangain" koo" myeing" kaid nyid boem, ga: wigi: nyangnu" tid boem wa zi anghoid goo" la"

²⁴Nghoid loug we' byu yug khang" moo" gi Mangso mungdang: kho" kyo" nyid boem nghoid rigi- aloem" ajeung" bang- hougsu" anghoid lang" yu maya" byu yi ju" vang lo boem nghoid rigi- nyangnu" shoug" gyo: da" mungdang: yoomo- nyangnu" gi yooboo yoo" bang: nghoid ziri- goolhoo: nyang: se' gyo: boin: gyeung: lo" boem wa zi nghoid.

²⁵Nyangnu" shoug" gyo: da" mungdang: joem yoomo- nyangnu" da" nheigloem: emyid, khoug: moo: tarha" dang: kho' nyid zi shau" wigi- nyangnu" zau" to" da" age, khyoo: gi bang thu loo wa nghoid wigi- nyangnu" gi boe, no" lho: Mangsoo ri loem, khau: ziyo'- Gyeing" nyang: Mangsoo gi ngoonu" yo' dage" he: khyi, moo: nyid nyid nhung ga: yhen: yu boem wa zi nghoid.

²⁶Houg: yoomo mang: nhung" yi we"- ngoo tid nau khyoo: gi hidsu" nghoid. Nanu" noku wa ga: zeung: foem: to" uri- dayug gi jihkoin" shu" vhu" shi: baja" Gootu: dayug gi jhau" byid: khyoo- gootu: dayug gi Mangso jang" mo yoeb, myang dang hau: lho: gootu: dayug gi gooki" lid' da" dang: yo' tid da" mungdang- hau: lho: dayug gi hau: mungdang: da" dang: kang: ri phoid: kyo" da" moo" ri voin, vu, nyid ge'. Nanu" zei: da" moo" dangain" gi hau: phung ri pang" thoug geung: teing nhang: da" shid re zei: so' nyid ge'.

²⁷Byu dayug yug gi gooki" lid' da" dang: ri tid wa nghoid rigi- myo: thang gi byu eig yug - hougsu" anghoid lang" gi soem" yug dayoug thang: moo: dayug tid wigi- dayug gi hau: da" dang: kang: ri phoid: kyoo" baja".

²⁸Nghoid loug we'- dang: kang: ri phoid: kyoo" wa da" byu anyid nghoid rigi- gooki" lid' da" dang: aja: ja: tid nau nghoid ri- hau: phung moo: nyang: gi sam" zoo: nyid lho: wigi- nya: gung doem: yo' Mangsoo ri nheigloem: khoug: moo: za: tid nyid baja".

²⁹Mangso mungdang: kho" kyoo" wa shid re" yoeb, myang kham: yu da" byu eig yug dang: tid wigi- gooji yi gi nyangnu" tid da" dang: ri- myid soin: yu" nyid goo" baja".

³⁰Nghoid loug we' hau: phung moo: bo zhoung: jo, da" byu dayug yug gi Mangso jang" mo mungdang: daja: ja: yo" yu nghoid rigi- dang: tid nyid su: no: loo" baja".

³¹Nanu" dayug yo' dayug gi jhau" mho' yu ziyo' yoem: yu" yu wa khyo"- nanu" dangain" bang: dayoug thang: moo: dayug - Mangso mungdang: ri yo" kho" kyo" nyid boem ago".

³²He: da" Mangso mungdang: kho" kyo" da" jeju" jhung: shug gi kho" kyoo" su: da" vhoeb khang" da" akhoug: moo: nghoid nyid ca.

³³Khasu" wim gari- Mangsoo gi ngoonu" ri- anhung akhoid' khyoo: moo: anyid nhang: nhoug looza- ngei pyoo: myenjham" ziyo'- ngeiloug jen" yisoem" si: khyo" danyid nhang: nau.

³⁴Mangso da" byu phung: yi dangain" jang" moo- cang nyid da" akyoo" again yi: dakhyoo" ti" myiyi: yi gi hau: zoeb, phung: moo: sam" zoo: nyid nyid goo" baja" nyangnu" gi dang: tid wa da" akhang" ajo, Yuda be" da" tarha" moo: tid to" ziyo' dakhyoo" ti" nyangnu" gi shu" vhu" shi: mo, age, koid.

³⁵Nyangnu" gi khyoo: daja: ja: ri si' nau boem nghoid rigi- yhoem: moo: nyangnu" da" yhoem: seing: phoo, be" jang" mo myid: yu goo" baja". Phung zoeb, phung moo: myiyi: zoo: dayug yug dang: tid wa zigi: asho' ashid: danghoid nyid.

³⁶Mangso da" mungdang: gi nanu" jang" mo thu' lo zi nghoid go" la" Hougsu" anghoid lang" nanu" jang" moo: kyeing" hau: mungdang: ju" lo zi nghoid go" la"

³⁷Byu dayug yug gi nyang: nya: da" gung doem: ri- Mangso da" lagyoo: nghoid- hougsu" anghoid lang" gi Venyi jhung: shug yo" yu su: nghoid ga: shau" myid yu nghoid rigi- Aseing da" amyeing" yo' he: moug soug" ri ngoo lhid" kaid ziri: se' gyoo: baja".

³⁸Byu dayug yug gi he: khyoo: ri atam" gyo: nghoid rigi- nyang: ri ci: we' asoin: byid: go"- nyang: tid dang: ri we' hang" atam" gyoo: byid: goo.

³⁹Hougsu" nghoid yoomo mang: nhung" yi we"- nanu" gi Mangso mungdang: ri- kho" kyoo" wa khyoo: moo: myid loem" lho: wigi- vho: ngei nyid ge'. Nghoid loug we' gooki" lid' da" myeing" aja: ja: kaid su: ri we' atoem: pyam byid: goo.

⁴⁰Khyoo: khaid gu: khang" moo" ri- yu" du yu" young" khyo"- voin, vu, yoem: kaid wa su: ca" nyid.