Read Lashi 1Korinthians 15 Bible Online

1Korinthians 15 - Lashi bible

1Korinthians 15

¹Mang: nhung" yi we"- ngoo nanu" ri kho" kyo" lho: wigi- nanu" we' lhoem: kham: yu bye: ziyo'- hau: jang" moo: nanu" da" loem" jeung myid' geung: geung: teing teing nghoid jo, bye: ziyo'- hau: ngei bu: lu dang: gi ri ngoo nanu" ri doem tid poin" nau.

²Hau: ngei bu: lu dang: ein: zigi: ngoo nanu" ri kho" kyo" yu" bye: da" mungdang: nghoid. Nanu" gi hau: ngei bu: lu dang: moo: geung: geung: teing teing nghe: khau: nyid boem nghoid rigi- nanu" khyoid yu zi shau" boem wa nghoid. Hougsu" anghoid rigi- nanu" da" loem" jeung khyoo: gi amyed, afoo" loem" jeung" pyam zi za: danghoid wa.

³Khasu" wim gari- ngoo kham: yu bye: da" akhyag thang da" khyoo: joem ri- ngoo nanu" ri tid kyo" kaid bye- Hau: khyoo: gi jhoem: mungdang: moo: lhid" to" ziyo' dakhyoo" ti" Khirstu gi ngoonu" da" youg: noo yooboo shid mo shid: kham: byid: bye.

⁴Nyhoeb, pyam zi nyang: shau" lho: wigi- jhoem: mungdang: moo: tid to" ziyo' dakhyoo" ti" soem" nyid" soem" myen, ri doem dei too' loo bye.

⁵Petru jang" moo: thu' shug byid: bye- hau: thang: ri cang: zoo: daxe: eig yug bang: jang" moo" thu' myang shug bye.

⁶Hau: thang: ri dalheung: dam'- nyang: thang: moo: cang yu" bye: da"- mang: nhung" yi 500 yug bang: jang" moo: dalheing: dam' dam' thu' myhang shug bye. Nyang: nau" mo, myoo: loo boug gi akhid" kangso dei nyid ashi" go, dayham" bang: koem gi yhoeb, pyo: lo' byoug boem bye.

⁷Hau: thang: ri Yaku, jang" moo- hau: thang: ri lagyoo: yi dangain" bang: jang" moo- nyang: thu' shug bye.

⁸Lo" thang jang" moo: gi ngoo bidnyid abyeung" shi" ri khu: lo da" zooshang: te" su: jang" moo: we' nyang: thu' shug bye.

⁹Khasu" wim gari- lagyoo: yi moo: nge thang su: ngoo nghoid. Mangso da" phung: ri shen" yhen bye: yoomo- lagyoo: ein: wa zi lang amoin: loo.

¹⁰Hougsu" nghoid loug we'- Mangso jeju" yoomo- ngoo gi he: yam" nghoid nyid. Nyang: ngoori: byid: da" jeju" gi akoem: anghoid loo-gootu: lagyoo: yi tho' moo: ngoo moo" ri je" voin, vu, bye. Hougsu" yo" koid da" khyoo: gi nga" da" yoem: so' khyo" anghoid- ngoo yo' dage" moo" zei: nyid da"- Mangso jeju" yoomo za: date: nghoid.

¹¹Hougsu" nghoid yoomo- ngoo nghoid loug we' gootu: lagyoo: yi nghoid loug we'- he: da" mungdang: ri za: ngoonu" kho" kyo" tid fu" lo" ziyo'- nanu" we' hau: ziri: loem" jeing" lo abye: go.

¹²Akhid" Khristu gi shid: jang" mo doem dei to loo bye: khyoo: ngoonu" kho" kyo" nyid uri- shid: byug bye: bang: doem dei to lo khyoo: ajo,- ga: wigi: nanu" mo dayham" gi khasu" gi yo" tid nyid go" lha"

¹³Hau: dang: dajo Khristu gi shid: da" jang" mo doem dei to loo nhang: zi ashoug" shi" khyo" danghoid nyid.

¹⁴Hau: lho: Khristu gi shid: da" jang" mo adoem dei to' loo nhang: shi" nghoid rigi- ngoonu" we' ci: kho" kyoo" joyoo ajo. Nanu" we' ce: loem" jeing" wa khyoo: ajo.

¹⁵Hau: tho' moo: goo" tu- ngoonu" gi Mangso khyoo: moo: mhau, da" sagsi: yi bue" lo" boem bye. Khasu" wim ga: ri Mangsoo gi Khristu ri shid: jang" mo doem dei to' loo nhang: bye: ein:- ngoonu" tid boem bye. Gyeing" nyang shid: bye: bang: ri- kangso dei nyid jang" khyoo: adoem tu: to' kaid nghoid rigi- Mangsoo gi Khristu ri shid: jang" mo doem tu: to' kaid wa zi anghoid.

¹⁶Mangsoo gi bain shid: bye: bang: ri- adoem tu: to kaid nghoid rigi- Khristu ri we' doem tu: to' kaid wa zi anghoid.

¹⁷Khirstu gi doem tu: to' dei kaid zi ashau" rigi- nanu" da" loem jeung" khyoo: gi loem shoid da" khyoo: za: nghoid lho: nanu" gi nanu" nya: da" yooboo moo: danoeb, jo, boem shi" wa.

¹⁸Hau: tho' moo: goo tu- Khristu ri loem" jeung" lho: shid: lo" byug bye: bang: we'- soem" byug zi shau" boem bye.

¹⁹He: pyaid' moo: za: Khristu moo: nheig byu jo yoo bo nghoid rigi- moug: myid byu yi dangain" moo- je" ci: abui" adoid' mo, bue" boem bye.

²⁰Nghoid loug we'- gyeing" nyang: bue" loo bye: khyoo: gi Khirstu gi shid: bye: jang" mo doem dei to' loo nhang: zi shoug" bye- houg: yoomo nyang: gi yhoeb, pyo: loo" mo' mo xang: shid" zei: lo da" ashi" bue" loo bye.

²¹Khasu" wim gari- byu dayug yoomo- shid: loo" no lo" zi bue" lo yhang ti" byu dayug yoomo we' shid: bye: bang: shid re" doem dei to' loo wa khyoo: bue" loo bye.

²²Xangsu" byu yi dangain" mo, gi Adam yo' dayug za: nghoid nyid boem yoomo- shid: lo" boem bye.Houg: yo' dakhyoo" ti" Khirstu yo' dayug za: nghoid nyid boem bye: yoomo- shid: bye: jang" mo kangso dei nyid jang" khyoo- doem tu: to' kaid zi shau" boem wa nghoid bye.

²³Nghoid loug we'- byu yug khang" moo" gi nyang: nya: da" too' eung: da" ayo, moo: doem tu: to' kaid wa zi nghoid. Khristu gi dangain" mo, da" shid' khyoo: doem dei to' loo" bye- hau: thang: ri Khristu doem ju" re" da" ayo, mo nyang: yo' sen: bang: doem dei to' loo wa zi nghoid.

²⁴Khristu gi Venyi soobyoo, dangain" ri vhoeb khang" mo, yo' yoem: zeing so' moo" boo bang: dangain" ziri- oung: doid' pyam lho: hau: mungdain ri nya: phoo Mangso da" lo, moo: ab byid: pyam wa. Hau: thang: ri she' lo" thang da" bidnyid ju" loo wa zi nghoid.

²⁵Khasu" wim ga: ri Mangsoo gi gyi phung dangain" ziri: oung: lo" lho: Nya: da" khyid: voo: khoug: khyoo: kaid pyam da" ayo, ju" sho'- Khristu gi vhoeb khang" nyid wa zi nghoid.

²⁶Lo" thang jang" moo: oung: doid' pyam wa da" gyi voo phoo, gi shid: zoug: nghoid nyid.

²⁷Jhoem: mungdang: moo: Mangsoo gi ziyoo jo, moo jo, ri- nya: khyid: voo: khoug: moo: kaid pyam bye ga: tid to. Ziyoo jo, moo: jo, ga: tid jang" moo- jo, moo jo, ri Khristu da" akhoug: moo: kaid pyam da" Mangsoo nya: gung nyang:- koem gi abo da" khyoo: bang bang myang nyid.

²⁸Nghoid loug we ziyoo jo, moo jo, ri- Khristu vhoeb khang" nyid da" akhoug: moo- bain kaid to" thang: rigi- hau: nya: zoo: nyang- Nya: gung doem ri ziyoo jo, moo jo, ri- nya: da" akhoug: moo: kaid too" byid: da" Mangso da" vhoo: moo- to" too" wa zi nghoid. Hougsu" wim Mangsoo gi jo, moo: jo, dangain" da" atho' moo: vhoeb khang" nyid wa zi nghoid.

²⁹Akhid" shid: loo" bye: bang: shid re"- nyangnu" da" gung thid' khyo" wigi- Babtisma yu da" byu yi khyoo: gi khasu" nghoid la" Ce: noem ri nheig byu lho: koid go" la" dayham" loem" jeung" nyid ziyo' dakhyoo" ti" shid: byug bye: bang: kangso doem yo" dei nyid wa khyoo: tu: to' kaid khyoo: aboo lo zi deung nghoid rigi- shid: byug bye: bang: shid re"- ga: wigi: ci yoomo hid: bang: Babtisma yu boem la"

³⁰Yha" da" shid re" tid shang ein: rigi- ciyoomo ayo, loem: khang" moo" moo- gyoug dain' ci, mau" khyoo: ri ngoonu" kham' zo: nyid boem la"

³¹Mang: nhung" yi we"- ngoo gi nyid" khang" moo" shid: gyoin' noogyoin' za: dathoung" shau" nyid. Yha" da" Aseing Yesu Khristu moo: daloem: dadeing: za: nghoid da- yha" da" kangso moo: nanu" da" atho' moo: phau: khuang myonhoo: shoo: yoomo- ngoo hidsu" yo" tid zi nghoid.

³²Byu da" myeing" khyo" tid rigi- Ephesu voo moo" mo da" myeing khuid" zeig ni joem yo' ngoo zain: go" zigi: nga" shid re"- ce: akyu" bo la" shid: byug bye: bang: ri adoem tu: to' dei loo nhang: nghoid rigi- dang: khyang jo, ziyo' dakhyoo" ti"- nyangnu" zoo: pyo: shug pyo: nyid boem shang ci yoomo ga: ri- nab, yo nyid" ngoonu" shid: lo" boem wam: bye.

³³Nanu gi khyoo: avhang: goo" age da" luzoem" cang" yi: ge da" asam" aved' ri lhu: phyo' pyam byid: nyid.

³⁴Nheig boo ung: gyeung: da" khyoo: moo- doem boin: gyeung: loo loo: ge'. Nanu" koid nyid da" yooboo khyoo: ri she: pyam khoo, loo: ge'. Nanu" mo byu dayham" bang: gi Mangsoo ri asi' nghoid ago". Ngoo hidsu" ein: tid da" khyoo: gi nanu" ri sho' thu' nhang: wa shid re" nghoid.

³⁵Shid: bye: bang: ri- kha khyo" wigi: doem dei tu: to' kaid wa lha" khayhang: te" da" gung doem: doem yoo" wa lha" byu dayug yug gi: myid: loo wa zi nghoid.

³⁶Koo" pyoid' we" nang gi myid jang: moo: gug myoug: cab, ri sho" kaid ri- hau: myoug: shi" cab, gi ayoin" lo" rigi: yug thu' loo wa zi nghoid.

³⁷Nang myid' jang: moo: sho" kaid da" myoug shi" cab, gi sung: soo: gug shi" anghoid lang"- gootu: shivoo: myoug: shi" da cab, cab, za: nghoid. Thang: ri youg thu' re" da" agam, joem gi akhang nang sho" kaid da" myoug: shi" cab, gi anghoid loo.

³⁸Mangsoo gi vho: ngei da" gung doem byid nyid- nyang: gi myoug: shi" cab, khang" moo" ri- nyang: vho: ngei da" gung doem: byid: nyid.

³⁹Kangso dei nyid bang: da" gung doem: gi daja: za: anghoid. xangsu: byu yi da" gung shoo" gootu- gougnyhoug joem da" gung shoo: gootu- ngho' joem da" gung shoo" gi gootu- ngoo do' joem da" gung shoo" gi gootu: nghoid nyid.

⁴⁰Moug: khung: moug: di yo' sen: da" gung doem joem- moug myid yo' sen: da" gung doem joem- ga: wigi: jo, jo- moug: khung: moug: di yo' sen: da" gung doem: joem da' young" khyoo gi moug: myidmo, gung doem young" khyoo: yo' shai" jo.

⁴¹Bid' we' young" bang khyoo: nyang: gootu: yo"- lham" moo" we' nya: young" du, khyoo: jo- kyi: joem we' nyangnu" da' young" khyoo: gootu: tu: yo" ago- kyi: joem moo: lang" ri dacab, yo' dacab, da' young khyoo: adu, goo" nghoid da.

⁴²Shid: byug bye: bang: ri- kangso doem kaid byid: lho: tu: to' kaid da" uri: we'- houg: yo' dakhyoo" ti" nghoid nyid. Hau: gung doem: ri myhoeb, pyam uri:- houg: gi shid: se' da" gung doem nghoid- nghoid loug we' doem dei tu: to' kaid uri da" gung doem: gi ase' shid: lo da" gung doem nghoid wa nghoid.

⁴³Nyhoeb, pyam uri: gi ayung" alho, aco' ajhoid- ce: yoem: we' aboo lo: zi nghoid. Doem dei tu: to' kaid uri: gi gye" young" lho, ziyo' yoem: moo" so' moo" bo da" zi nghoid wa.

⁴⁴Nyhoeb, pyam uri: gi moug: myid gung shoo" za: date: nghoid. Deom dei tu: to' kaid uri: gi Venyi gung doem bui" wa zi nghoid. Moug: myid mo gung doem: ri yo" jo, yoomo- Venyi gung doem: we' yoo" ca" nyid.

⁴⁵Jhoem: mungdang: moo: tid to" ziyo' dakhyoo" ti" xang: shid" mo Adam: gi kangso dei da" xangsu: byu khyo" phain" so: too" bye- nghoid loug we' thang: mo da" Adam gi khang: so' dei loo: nhang: da Venyi: nghoid nyid.

⁴⁶Venyi gung doem: shi" xang: shid" moo: ju" re" zi anghoid - moug: myid mo da" gung deom: gi xang: shid" nyid lo wigi- thang: ri she, Venyi gung doem: nyid lo.

⁴⁷Xang: shid" mo da" byu Adam gi myid zhoo" yo' phain" to" wigi- myid jang: tho' moo: byu nghoid. Thang: re da" Adam koem gi moug: khung: moug di khyo" ju" re" zi nghoid nyid.

⁴⁸Moug: myid yo' sen: da" byu yi gi myid zhoo" phei" yo' phain" too" shoug" su: yo' du, go" nyid- moug: khung: yo' sen: bang: gi moug: khung: khyo" gyoo" lo da" byu yo' du go nyid.

⁴⁹Myid' zhoo" phei" yo' koid da' byu yo' du, go" da" gung du: ri ngoonu" void, ci: ziyo' dakhyoo" ti" moug: khung: khyo" gyoo" re" da" byu yo' du, go" da" gung doem: ri we'- ngoonu" void, ci: boem wa nghoid.

⁵⁰Mang: nhung" yi we"- ngoo nanu" ri tid kyoo" nau da" dang: gi suid" shoo" yo' phain" so: to" da" gung doem: gi Mangso mungdain ri- agyid asoo: khyo" ayo" kham: yu ziyo'- se' shid: byug da" gung doem: gi ase' shid: byug da" gung doem: ri ayo" seing: yu.

⁵¹Tam" gyo: yu" ge'- dang: kang: no, da" deingmain" da" khyoo: dakhaid - nanu' ri ngoo tid kyoo" ba, - nyhang" dangain" bang: jha" shid: byug wa zi anghoid.

⁵²Nghoid loug we'- lo" thang da" laboo" myeung lo da" uri- nyeigdain tung" myo, damyeig mo:- nyhang" dangain" bang: yo, zoo: ti" yoem" khyoid' loo" khari" wa nghoid. Khasu" wim gari- hau: laboo" zeing moid' kaid da" uri- shid: byug bye: bang: ri khanham we' ashid: loo: wa shid re"- doem dei tu: to' kaid wa ziyo'- nyhang" dangain" mo, gi yo, zoo: ti" yoem" khyoid' loo" khari" boem wa nghoid.

⁵³Khasu" wim gari- boeb, yoin" loo" se' da" gung doem: gi aboeb ayoin" lo: gung doem: ri zhoung" yu lo" ziyo'- shid: da" gung doem gi ase' shid: lo: da" gung doem: ri void, yu wa zi nghoid.

⁵⁴Hougsu" he: da" khyo: bue" lo da" bidnyid moo- se' shid: lo" zigi: ase' shid: lo: jang" khyoo:- yo, zoo: ti" yoem" khyoid' loo" khari: lang" gi jhoem: mungdang: moo: shid: zoug: phoo, we"- nang gi joem: gyo" loo" bye- oung: doid' lo" khyoo: gi nang ri zhoeb, myhau: pyam bye ga: tid to" zigi: byeung" loo wam: bye.

⁵⁵Shid: zoug: we"- nang oung: lo" khyoo: gi khayoo: lha" Shid: zoug: we"- re" da" dug gi kha: khyoo: lha"

⁵⁶Shid: zau: da" dug gi hau: youg: noo yooboo mo yo" yu, zi nghoid. Youg: noo yoobo da" yoem: koem gi hau: toung: to" da" tarha" mo yo" yu.

⁵⁷Nghoid loug we'- Aseing Yesu Khristu khyo" wigi- ngoonu" ri oung: doid' loo" nhang: da" Mangso jeju" koem gi khayhi' gyi: sheung: jo, lha:

⁵⁸Hougsu" nghoid yoomo- ngoo jheddab da" mang: nhung" yi we"- geing: geing: teing teing theung shang" yab, jo, ge'- hau: Aseing da" moozoo" moo- nanu" zei: lo" khyoo: gi amyid' aji anghoid ziri se' nyid boem yoomo- hau: Aseing shid re" zei: so' da" moozoo" moo- nanu" khanham we' yoem: phain" thoug shang" voin, vu, nyid ge' o".