Read Lashi 1Korinthians 16 Bible Online

1Korinthians 16 - Lashi bible

1Korinthians 16

¹Yuda meing: moo: nyid da" Mangso phung byu yi ri pang" thoug yu wa da" alu ngei ri khyu: wa shid re" nanu" moug soug" yo' lhid" byid kaid da" khyoo: yo' sen: lho: Galati meing: mo da" phung byu yi ri ngoo pyeung: kaid ziyo' dakhyoo" ti" nanu" we' zei: so' voin vu, nyid ge'.

²Ngoo ju" re" da" uri- alu ngei gootu: akhyu: ca" loo: wa khyo"- Labain nyid khang" moo"- nanu" yug khang" moo" gi nyang: nya: yoo" zoo: yoo" shug khyo" cang lho: wigi- alu ngei ri kho' gam, zheung" young: too" lang" ge'.

³Ngoo ju" re" da" ayo, moo- nanu" khyen: nyeung to" da" byu yi ri- pyeing: dang: yo' being" si' byid: da" moug soug" ri lhid" wigi- hau: alu ngei ri Yerusalem khyoo: yhe: di" wa shid re"- ngoo zheung: nhang: kaid wa nghoid.

⁴Ngoo re" ri gi wa yhang: ti" nghoid rigi- nyangnu" we' ngoo yo' dage" yo" bo cang ri" wa nghoid.

⁵Ngoo gi Makedoni meing: agung khyo" kho' lai loo" lang"- ngoo gi nanu" jang" moo: ju" ri" wa. Khasu" wim gari- ngoo Makedoni meing: khyo" jang: loo" ca".

⁶Nanu" yo' dayo, daboin: myang" sho' shau" zoem" nyid khoo' abe- hau: zigi: ngam" yo, nghoid wa. Hau: thang: ri khakhyo" nghoid loug we' gyung: doem xo' so" lo" ri- nanu" ngoori: yo" pang" thoug kaid wa ziri: myid byu to.

⁷Ngoo gi nanu" jang" moo: te: jang: lo" khyo" gi anau koid. Aseing akhang" byid: nghoid rigi- ngoo nanu" yo' dayo, daboin: myang" sho' shau" zoem" khau: nyid wa ein: myid: byu nyid.

⁸Pentikoti pui" bidnyid ju" sho' Ephesu voo moo" moo: ngoo nyid nyid shi" wa zi nghoid.

⁹Khasu" wim ga: ri hau: voo gung moo: ngoori- thoutheung da" gyivoo yi myoo" sho' nyid nyid ago". Nghoid loug we' akyu" bo wigi- gyi: sheung: sho' zei: wa da" moozoo" myoo" sho' zei: soo" wa ge' da" ayo, akhyeing: bo jo.

¹⁰Timothi gi nanu" jhang khyoo: ju" re" lo da" uri- nanu" moo: nyang: nheigloem: myen, myen, shau" nyid sho'- nyang: ri goug goug yi yi lhoem: kham: yu ge'. Khasu" wim ga: ri nyang: gi ngoo yo' dakhyoo" ti" Aseing da" moozoo" ri voin, vu, nyid su: nghoid.

¹¹Hang" we' nyang: ri ayu" nge pyam goo" baja" nya: gyung: khyoo: moo: xo' loo: xo' yo" so" loo baja"- nanu" gi nyang: ri pang" thoug byid: kaid boem ca. Houg: su" Khristain mang: nhung" yi yo' dage" nga" jhang khyoo: yo" doem tau" ju" loo wa nghoid ein- ngoo nheig byu nyid zi nghoid.

¹²Akhid" gi mang: nhung" phoo, Apolu yo' sen: lho: wigi- tid shang ein: rigi- gootu: da" mang: nhung" yi yo' dage" nyang: nanu" jhang khyoo: re" lam" shau" koin' wa shid re" ngoo nyang: ri daso' so' jhoin" nyid nghoid loug we' akhid" da" ayo, moo: gi nyang: gi ri" wa shid re"- dajhi, we' myid' akhyang: shi" nghoid da. ge bue" da" ayo, moo: gi nyang: re" loo wa zi nghoid.

¹³Khanham" nghoid loug we' zed" lhid' zoore" nyid ge'- hau: loem" jeung da" khyoo: moo: geing: geing: teing teing dayab, jo, ge'. Agyug avoem, da" nheigloem: bo nyid ge'. yoem: zeing so' moo" yo' byeung" nyid ge'.

¹⁴Nanu" zei: so' da" moozoo" dangain" ziri- jheddab nheigloem: yo' zei: so' voin vu, nyid ge'.

¹⁵Nanu" gi Stephen yo' nya: yhoem: byu yi da" khyoo: ri se' nyid boem ago". Nyangnu" gi Akhaia meing: mo xang: shid" Khristain bue" loo mo, nghoid wigi- Mangso da" byu yi ri doo" zho" da" moozoo" moo- ab nung" da" ikoin deungkhu: byu yi, nghoid ago".

¹⁶Hid: yhang: te" da' byu yi yo' nyangnu" yo' dage" pang" thoug doo" zhoo" doo" jhoug nyid bang: da" khyoo: shu" lo" jang" moo- bo cang yhi: ge" ein: ngoo nanu" ri mho' sang: kaid.

¹⁷Stephen- Photunatu yo' Akhaiaku nyangnu" ju" ri" yoomo- nanu" ri myang yhang: ti" ngoo gau, yi nyid. Nanu" ri goug nhang: bye: ziyo' dakhyoo" ti" ngoori we' goug nhang: bye.

¹⁸Nyangnu" gi nanu" da" emyid ri ngei pyoo: nhang: yhang: ti" nga" nheigloem: ri we' pyoo: nhang: abye: go. Hid: yhang: te" da" byu yi rigi- gooki" lid' khyo" xoem" too" ge da" byu yi nghoid ago".

¹⁹Asi meing: mo phung: byu yi gi nanu" ri vhu" kaid ago". Akula yo' Priska eig yug yo' nyangnu" da" yhoem: moo: coem zeing: foem nyid da" phung byu yi we'- Khristain jhed' nheigloem: yo' nanu" ri gye" vhu" kaid ago".

²⁰He: da" joyoo moo: zheung: nyid da" Khristain mang: nhung" dangain" bang: we'- vhu" kaid ago". nanu" nyang: cang: nyang: we' myenjham" da" khyo" vhu" go" nyid ge'.

²¹Polu jang" mo, vhu" kaid da" dang: ein: wigi:- Ngoo Polu gi ngoo nya: lo, yo' he: moug soug" ri lhid" kaid zi nghoid.

²²Byu dayug yug gi hau: Aseing ri ajheddab nghoid rigi- nyang: moo: nheing" khoin" zang" jo, baja"- ngoonu" da" Aseing we" myab, gyoo" ri" we'.

²³Aseing Yesu da" jeju" gi nanu" yo' dage" dajo, jo, baja" o".

²⁴Nga" da" jheddab da" emyid, gi Khristu Yesu moo: nanu" dangain" mo, yo' dage" dajo, jo, baja" o".