Read Lashi 1Korinthians 4 Bible Online

1Korinthians 4 - Lashi bible

1Korinthians 4

¹Ngoonu" gi Mangso no, thang da" yhoem" nghoeb, to" deingmain" khyoo: ri- yu" nyheing wa shid re" khyen: to" da"- Khristu dei zoo: yi nghoid ga: nanu" myid yu, eung: nyid da.

²Houg: su" yoovoin yu lho: wigi- voin vu, nhang: da" dei zoo: yi moo: boo ca" da" nheigloem: daja" gi Aseing da" atho' moo: zid" lhid' lho: nheigloem: zung" ca" da" khyoo: nghoid.

³Akhid" nanu" moug: myid, byu yi da" azhang khyo"- ngoori: tarha" dang: phyed khyoo: moo- ngoo ce" yhoug: gyen: atoo". Ngoo nya: gung ri we' ngoo ce: tarha" dang: phyed khyoo: ajo.

⁴Khasu" wim gari- nga" phug soo" lheig myid yu" khyoo: moo- gyeing: gyeing: za: danghoid. Nghoid loug we' hau: khyoo: gi ngoo yooboo ayoo" ein: khyoo: ri sagsi: kham' nyid zi anghoid. Ngoo ri tarha" dang: phyed su: gi hau: Aseing nghoid nyid.

⁵Houg: su" nghoid yoomo ayo, aju" shi" ri- nanu" dayug yo' dayug gi hang" ri nghoid loug we' tarha" dang: aphyed byid: nyid goo. Lo" thang bidnyid moo: tarha" dang: phyed wa da" Aseing ju" ri" sho' dalang" nyid ge'. Nyang: gi moug: coid khoug: moo: yhoem" to" da" moozoo" ri we'- byu yi da" nheigloem: khoug: moo: zau" to" da" myid soin: khyoo: ri we'- thoid' shoug thu' loo wa zi nghoid. Hau: bidnyid ri byu yug khang" moo" gi nyang: yo' moin: yi" da" Mangso wigi: coung" nghei ngi: shab, khyoo: ri shau" kham: yu boem wa zi nghoid.

⁶Mang: nhung" yi we"- nanu" shid mo, ge da" khyoo: ri myid yu" zoore- He: da" khyoo: moo: ngoo yo' Apolo da" khyoo: ri dang: tu, khyo" wigi- tid kyo" zi nghoid. Hougsu" tid kyo" zigi: young" du da" tarha" ri cang pyeung nyid ge ga: da" dang: khyang" mo da" dang: kang: ri- nanu" se' gyo: yu wa shid re" nghoid. Nanu" mo, dayug rigi: khyeig nghoid khyo" myid gyi: to" lho: dayug rigi: aphoug" akhyoid akoid nyid goo.

⁷Kha: youg wigi: nang ri- sube" tho' moo: je nghoid ga: tid nyid la" nanu" yo" da" zi dangain" gi Mangsoo byid: to" zi anghoid goo" la" Hougsu" nghoid ri nanu" yo" yu to" da" zi dangain" gi jeju" jhung: shug anghoid yhang: ti" nanu" phau: khuang nghoid boin: khyoo: gi ce: noem' yoomo koid nyid go" lha"

⁸Akhid" nanu" moo: ca" moo: ca" joeb byeung" sho' yoo" bye: anghoid goo" la" Nanu" yo" de, lo bye: go" la" Nghoid bye: ngoonu" gi nanu" yo' dage" khokham yo" bui" sho'- nanu" gyeing nyang: khokham bue" yu" ge mhai".

⁹Khasu" wim gari- meing zain: pa moo: oung: lo wigi- doem: yain: do, lo shoug da" uri:- said pyam shoug" wa da" thung: byu yi rigi:- thang: moo: cang yain: loo nhang: ziyo' dakhyoo" ti" Mangsoo gi byu xangsu: yi yo' mouglagyoo: yi shid' khoin" moo" coem yu" yu" goo" baja" ga- ngoonu" lagyoo: yi ri gam, thang: moo: nyid nhang: sam" ein: ngoo shau" myid yu.

¹⁰Khasu" wim ga: ri ngoonu" gi Khirstu yoomo- koo" pyoid joem bue" byug bye Nanu" koem gi Khristu yo' daloem: za: nghoid nyid jang" moo- Phajhi" boo mo, nghoid nyid abye: go. Ngoonu" gi ce"- yoem: we' aboo- nanu" koem gi yoem: gye" boo mo, nghoid- ngoonu" gi juang" yi zi shoug" mo, nghoid. Nanu" koem: gi coung" nghei ngi: shab, zi shoug" mo, nghoid ago".

¹¹Akhid" da" ayo, moo: ju" sho'- ngoonu" gi zooyoid, gyid shid- shoo" cen: doem: baid' said' ziri: shau" nyid wigi- nyid wa joyoo we' ayoo" loo: za: dakhyi, mo zi dakhyi, moo: so" lam" yen" bang: nghoid nyid boem.

¹²Ngoonu" nya: lo, yo' yoem: kaid lho: moo" zei: zo: boem- ngoonu" nheing" myeing" nheing" thui: shau" boem loug we' mainkaid byid: da" dang: gi tid. Pyi: sho: shen" yhen zi shau" boem nghoid loug we' kham zeung: nyid boem.

¹³Ngoonu" ri juang" yi gei sang: zi shau" boem nghoid loug we'- ngei pyo: dang: thui: yo' datid sang: nyid boem- ngoonu" gi akhid" ju" sho'- moug: myid mo boid, shoid' boem yo' subi" she: pyam lhu: sain" to" da"- phoojoid phalhoug: boem te" zi danghoid lo: boem.

¹⁴Nanu" ri sho' thu' nhang: wa shid re"- ngoo he: da" moug soug" ri lhid" kaid zi anghoid. Ngoo jheddab da" zooshang: yi ri yhang: ti" ngoo nanu" ri tid poin" tid kyeung" da" khyoo: nghoid.

¹⁵Khasu" wim gari- nanu" Khristain kangso dei yhe: lo" da" khyoo: moo- nanu" ri jhau" byid: wa shid re" sara: damoin koo: nyid nghoid loug we'- nanu" da" nya: phoo gi dayug kyeing" za: date: nghoid. Ngoo gi hau: ngei bu: lu dang: gi ri kho" kyo" khyo" wigi- nanu" ri Khristu yo' shoin" deung: lo" da" kangso khyoo: moo- ju" loo" nhang: zi nghoid nyid da" nanu" nya: phoo bui" bye.

¹⁶Houg: yoomo nga" da" akhyoo" bo cang loo mo, bui" goo" baja" ein:- ngoo nanu" ri mho' tung" pain: nyid.

¹⁷Hau: khyoo: yoomo- ngoo gi Khristain kangso dei da" khyoo: moo- nga" da" jheddab ziyo'- nheigloem: zung" da" zooshang- Timothi ri nanu" jhang khyoo: ngoo nhang: kaid bye. Nyang: gi Khristu Yesu yo' shoin" deung: da" kangso aseig moo- ngoo cang lo" da" tarha" yo' joyoo khyi khang" moo" moo: nyid da- phung: byu yi ri- ngoo jhoug" byid: bye: da" tarha" joem" ri- boem myid boin: loo nhang: wa zi nghoid.

¹⁸Nanu" jang" moo: ngoo aju" ri" loo: wa yhang: ti" jho: lho: nanu" mo dayham" bang: gi phau: khuang nghoid boin: nyid boem bye.

¹⁹Nghoid loug we' hau: Aseing nhang: kaid nghoid rigi- ngoo nanu" jang" moo: phyed' za: doem yo" ju" ri" wa zi nghoid. Hau: ayo, moo: houg: yhang: ti" phau: khuang nghoid boin: nyid mo, da" nhoid yhoo: yoem: so' ri za: we' anghoid- nyangnu" da" yoem: vhoo" yoem: so' ri we' ngoo shau" phoid: sho: yu wa zi nghoid.

²⁰Khasu" wim gari- Mangso da" mungdain gi nhoid yoem: so' anghoid- yoem: so' vhoo" goo: nghoid nyid.

²¹Ngoo gi nanu" jang" moo: voosi" ci: lho: ri" wa la" Hougsu" anghoid lang" gi jheddab nu" nham, da" nheigloem: yo' ju" ri" wa la" Nanu" kha: loem: ri vho: nyid go" la"