Read Lashi 1Korinthians 5 Bible Online

1Korinthians 5 - Lashi bible

1Korinthians 5

¹Akhid" nyid" Khristain byu yi anghoid tungbau byu yi lang" akoid yu" da- myiyi: yuggi aved, avhu: koid da" khyoo:- nanu" moo: bo nyid zi- subi" khyag nyang: tid fu" go" nyid ziri: ngoo shoug" gyo. Byu dayug gi nya: myhi' thang yo' shoid' go" nyid khyoo: ri ngoo shoug" gyo.

²Houg: yhang: ti" dakoid nyid zi-nanu" dayo" phau: khuang nyid shi" goonhung: lha" Hougsu" koid nyid wa gung khoo- nanu" moo: kougshu: emyid, yo' houg: su" koid nyid su: rigi: nanu" da" zoem" khau: phung: mo khaid thu' pyam ca" nyid ago".

³Ngoo gi gung shoo" nanu" yo' ve: gang: nyid nghoid loug we'- nheigloem: Venyi moo: gi nanu" yo' dage" nghoid nyid wigi- ngoo nya: gung du: nyang- nanu" jang" moo: ju" nyid bye: yhang: ti" hougsu" akhyeung" da" moo" zei: nyid su: tho' moo- Aseing Yesu da" myeing khyang" mo, ngoo je: yang: tarha" dang: phyed' kaid bye.

⁴Nga" da" Venyi moo: ngoo nanu" yo' shoug" go" wigi nanu" zeung: foem: nyid jang" moo- nyhang" yo' dage" nghoid nyid da" Aseing Yesu Khristu da" amyeing" akhang" yo' hau: yug ri nya: gung du: shoin, mhoin' pyam wa shid re" satan da" loo, moo: ap byid: pyam ca". Hougsu" nghoid lang"- Aseing da" bidnyid moo: nya: da" kangso Venyi: ri yo" khyoid yu wa zi nghoid nyid.

⁶Nanu" gi nghoid boin: lho: phau: khuang nyid wa zigi- ajoo aeung: da" moo" nghoid doo, cid" dajhi, kyeung" zigi:- zooyho, loem: goin" ziri: gyi: myo: boung: loo" nhang: kaid- ga: da" dang: khyang" ri nanu" ashoug" gyo: yu" goo" la"

⁷Nanu" dangain" bang: gyeungshang: bang: bue" loo wa shid re" doo, cid" axoug" ga: da- youg: noo yooboo ri shoem" shoung: pyam ge'. Houg: lang" nanu" gi doo, cid" abo da" zooyho, khi, zeing yhang: ti" nanu" yo" bue" loo wa zi nghoid. Nanu" hougsu" yo" bue" lo ziri- ngoo khyag nyang: si' bye. Khasu" wim gari- Khristu ga: da- yha" da" lhid: kaid da" pui" koid wa zi gi jen" jen" nyang: nghoid nyid bye.

⁸Houg: yoomo- youg: noo yooboo yo' akhyeing" ashoeb da" asam" aved' ga: da- doo, cid" axoug" bo da" zooyho, khi, anghoid loo: za: gyeungshang: da" nheigloem: emyid, yo' deung: byeung" ga: da" doo, cid" abo zooyho, khi, yo' lhai: kaid da" pui" ri koid shang.

⁹Xang: shi" lheing: ngoo nanu" jhang khyoo: lhid" kaid da" moug soug" moo- myiyi: yug gi aved avhu: moo" zei: mo, yo' azoem" goo" wa shid mo ngoo pyeung: kaid bye.

¹⁰Hougsu" pyeung: kaid jang" moo- he: moug: myid da" young: shoo: mo, vhoo: boo myo, no, bang- khoug" mo, phara" soolhoo: no' bang: yo' age, zoem" ein: ngoo atid noug- nyangnu" ri jang" pyam ca" ga: nghoid rigi- nanu" gi he: da" moug: myid mo shang sho'- phang: thu' loo" ca" goo" wa.

¹¹Akhid" ngoo tid nau khyoo: gi nya: gungdu: ri Khristain byu nghoid ga: lho: wigi- youg: shoo: go" khyoo: moo: cang- myo, no, vho: bo phara" soolhoo: ri bo no"- sube" gei sang: shang pyang: lho: yhid: ya: vang ziyo' khau" yen" bang: yo' azoem" khoug: goo" ein: zi nghoid. Houg: yhang: te" su: yo' dage" zhoung: lho: voem: we' ashoin" zoo: goo.

¹²Khasu" wim gari- Khristain phung: byu anghoid da- xangsu: byu yi ri- tarha" dang: phyed' byid: wa zigi: ngoo yo' ci: asen- Mangsoo gi nyangnu" ri tarha" dang: phyed' lo wa nghoid.

¹³Nghoid loug we'- nanu" gi phung: khoug: mo bang: ri tarha" dang: yo' phyed' byid: ca" anghoid goo" la" Jhoem: mungdang: moo: lhid" to" ziyo' dakhyoo" ti"- akhyeing" ashoeb da" byu rigi- nanu" mo wigi: khaid thu' pyam ge'.