Read Lashi 1Korinthians 6 Bible Online

1Korinthians 6 - Lashi bible

1Korinthians 6

¹Nanu" nyang: cang" moo" ze" bui" go" nghoid rigi- Mangso byu yi da" dang: phyed byid: zigi: kham: yu wa gung khoo- ci: yoomo tungbau tarha" agyi yi jhang khyoo: voem" yhi: go" lha"

²Mangso da" byu yi gi moug: myid ri tarha" dang: phyed wa bang: nghoid ziri: nanu" asi' goo" la" Moug: myid ri lang" dang: phyed wa bang: nanu" ciwim- moo" zoo: ri lang" dang: ayo" phyed byid: goo" la"

³Ngoonu" gi mouglagyoo: yi ri dang: phyed byid: wa mo, nghoid ziri- nanu" asi' goo" la" Houg: su" nghoid rigi: moug: myid mo khyoo: joem ri je" wigi: tarha" dang: yo" phyed byid: wa zi anghoid goo" la"

⁴Houg: yhang: te" da" moo" thu' lo da" uri- phung: yo' ci: asen: - phung: moo: ce: akho akhang" ayoo" bang: ri- tarha" dang: phyed nhang: wa goo" la"

⁵Nanu" sho' wa shid re"- ngoo hidsu" tid zi nghoid. Khristain phung: byu mang: nhung" nyang: cang"- myeing" myo: lo da" uri- nanu" da" khoug: moo- Tarha" dang: yo" se' phyed zi atham: thang phajhi" bo byu dayug khyalhang" gi nyid goo" wa nghoid.

⁶Akhid" gi Aseing Yesu ri aloem" ajeung" bang: da" shid khoin" moo- Khristain mang: nhung" nyang: cang" yung" shug go" nyid goonhung: lha"

⁷Hid: yhang: ti" nanu" nyang: cang" da" akhoug: moo- yung" shug go" zi thu' lo da" khyoo: gi nanu" bain" sho' soem" gyo" lo" da" khyoo: ri toin" shid, nyid bye. Nyang: cang" nyang: youg: sang: go" da" khyoo: moo- asoem" kham, pyam ziyo'- koid' zo: zi kham, khyoo: gi je genyid anghoid goo" la"

⁸Nanu" gi hougsu" kham, zeung: pyam wa da" gung khoo- nanu" Khristain mang: nhung" nyang: cang" shoid' go" lho: dalhoid zoo: go" nyid goo" nhung" lha"

⁹Akhyeing" ashoeb bang: gi Mangso mungdain ayo" vang seing: wa ziri: nanu" nyang: deing" deing se' nyid bye. Khyoo: avhang: goo"- youg: shoo: goo" mo, phara" soolhoo: no mo, sube" myi: lhoid mo, yug gi nyang: cang aved avhu: koid goo" mo

¹⁰Khoug" mo, fain" mo, vhoo: boo myo, no, bang- yhid: ya: vang bang: juang" yi gei sang: shang pyang: yen" mo,- khoug" mo, mhoug mo,- hid: bang: mo hang" we'- Mangso mungdain ri yo" seing: boem wa zi anghoid.

¹¹Nanu" mo dayham" gi houg: yhang: te" da" moo" zei: lai loo mo, za: nghoid abye: go- nghoid loug we' nanu" gi yha" da" Aseing Yesu Khristu da" myeing khyang" yo' we'- yha" Mangso Venyi yo' we'- ced" khyoid ced" young" ziri: shau" wigi- Mangsoo ri ab pyam bye: mo,- Mangso shid khoin" moo: deing: byeung" bye: bang:- bue" lo boem bye.

¹²Nanu" mo byu dayug yug gi"- Ngoo gi ce" noem ri we' koid wa da" akhang" yo" ga: wigi: tid wa zi nghoid. Nanu" tid ziyo' dakhyoo" deing wa nghoid loug we' dangain" gi re" da" shid mo ge zi anghoid. Ngoori: join, yo" koid nhang:-

¹³Zoo: noem gi voem: shid re"- voem: doug: gi zoo: noem shid re, ga: wigi: byu dayug yug tid wa nghoid- nghoid houg: gi deung nyid- nghoid loug we' Mangsoo gi hau: eig ja: goin" ziri: lhu: phyo' shoin pyam wa zi nghoid. Hau" gung deom: koem gi aved avhu: moozoo" shid re" anghoid loo: za: hau: Aseing ri coung" nghei wa shid re" nghoid- Mangsoo we' gung shoo" moo: ca" nyid khyoo: ri dabyid: nyid.

¹⁴Mangsoo gi hau" Aseing ri shid: jang" mo doem dei to' loo nhang: khyo" wigi- ngoonu" ri we' nya: da" yoem: zeing mo doem dei to' loo nhang: wa zi nghoid.

¹⁵Nanu" da" gung doem: joem gi-Khristu da" gung doem mo akung: ako'' joem nghoid ziri- nanu" si' go" la" Hougsu" nghoid ri Khristu da" ako' dakung: ri khyu, yu lho: shava myhi' da" akung: ako'' moo: xo' loo" nhang: wa la" Hougsu" we' age bui" wa.

¹⁶Shava myhi' yo' hau: gung doem: ri poung" pyam su: gi hau: shava myhi' yo' gung doem: daloem: za: bue" loo" bye: ziri: nanu" asi' goo" la" Jhoem: mungdang: moo nya: eig yug gi gung doem: daloem: za: bui" wa nghoid ga: tid to.

¹⁷Nghoid loug we' nya: gung doem: ri- Aseing yo' shoin" deung: too" su: gi Venyi khyoo: khyo" Aseing yo' gung doem: daloem: za: nghoid nyid.

¹⁸Youg: shoo: go" da" moozoo" ri jang" pyam nyid ge'- byu wigi: zei: shoid da" yooboo dangain" gi nya: gung doem: ri shoid zi anghoid- nghoid loug we' soem" lid' sho: khyo" youg: da" yooboo yoo" su: gi nya: gung doem: ri nyang: shoid vhang: nyid su: nghoid.

¹⁹Nanu" da" gung doem: gi nanu" moo: bo nyid da" Mangsoo byid: hau: gyeungshang: da" Venyi noku yhoem: nghoid ziri- nanu" asi' loo goo" la"

²⁰Hau: Aseing gi nanu" ri aphoug" phyed' lho: qei yu too" mo, nghoid- Hougsu" nghoid yoomo- nanu" da" gung doem: yo' Mangso da" myonhoo: phung" yoeb, ri thu ri" nhang: wa shid re" ci: yhoung: nyid ge'.