Read Lashi 2~KORINTHU 1 Bible Online

2~KORINTHU 1 - Lashi bible

2~KORINTHU 1

¹Mangsoo myid vho" ziyo' dakhyoo"- Khristu Yesu da" Lagyoo: ngoo Polu yo' ngoonu" da" mang: nhung" Timothi gi Korinhtu voo mo Mangso da" phung yo' Akhaia mung" goin" jang" mo Mangso da" byu dangain" bang: ri vhu" kaid.

²Ngoonu" da" phoo Mangsoo yo' Aseing: yesu Khristu gi jeju" yo' ngei pyo: myenjham" da" khyoo: nanu" ri dabyid: nyid baja" o".

³Nheig khyeug nheigloem: yo' byeung" wigi pang" thoug khyoo: aja: ja: byid: nyid da" Aseing: Yesu Khristu da" nya: phoo mangsoo ri nyhang: nu" jeju" boin: coung" nghei nyid boem shang.

⁴Ngoonu" yaukhe" kyi" khyeug khyoo myoo" sho' shau" nyid uri Mangsoo gi ngoonu" ri pang" thoug yu bye.Hougsu" nghoid yoomo ngoonu" gi_ Mangso jang" mo ngoonu" yo" kham: yu bye da" pang" thoug byid: da" jeju" yo' nyang:- yau: khe" jam jau aja: ja: shau" nyid da- byu gooji ri doem yo" pang" thoug byid: boem bye.

⁵Nyhang" nu" gi Khristu kham zo: bye da" myo: tham: da" kyi" khyeug yau: khe" khyoo: joem ri-bo kham zo: boem zi yo" dakhyoo" ti"- Khristu khyo" Mangso pang" thoug da" jeju" azeung ri we-ngoonu" bo shau" kham: zo: nyid boem bye.

⁶Ngoonu" shid: gyoin noogyoin thoung" shaug" zo: da" khyo gi nanu" ri: nheig teung ung: teung da" jeju" yo' khyoid khyi yu da" khyoo: ri shau" kham: zo: ri nanu" we' hau: jeju" ri yo" kham: yu wigi Ngoonu" kham zeung: nyid da" yau: Khe kyi" khyeug khyo yo du go" da" yau: khe" kyi: khyeig da" khyoo rinanu" we' nheigloem: gyi: sheung: ziyo' kham: yu wa yoem: vhoo" yo" yu nyid boem bye.

⁷Nanu" gi ngoonu" thoug" shau" nyid da" kyi" khyeug khyoo: moo-nanu" we' bo shau" nyid ziyo' dakhyoo" ti"- ngoonu" shau" kham: yu da" nheig teung ung: teung da" jeju" ri we' shau" bo kham yu nyid zeri ngoonu" si yoomo nanu" moo ngoonu" da" nheig byu to" khyo gi khanham we' dageung: teung jo.

⁸Mangnhung: yi we"- Asia mung" moo ngoonu" thoung" shau" yu" bye shid gyoin noogyoin, da" khyoo: nanu" ri doem tid poin" nau.ngoonu" da" tho' moo doin: zeug lo da" kyi" khyeug jam jau ein: da" yoovoin, gi-gye" gyi: ziyo' gye" lid: zi nghoid yoomo ngoonu" gi kangso' xo' dei nyid wa zilang" gi-nheig byu jang: aboo loo: sho' nghoid lo" boem bye.

⁹Ngoonu" gi shid: wa dam byid: shau" bye: mo, nghoid ein: lang" gi-nyang: nya: gungri soin: pyam boem bye. Nghoid loug we' hidsu" bue" lo da" khyoo: gi-ngoonu" gi nyang: nya: gung riAloem loo: za: shid: byug bye: bang: ri doem dei loo nhang: su:- Mangsoo ri za-lloem nghe: khau: nyid wa zi za: danghoid lo.

¹⁰Nyang: gi houg: yhang: te" da" gyoug pho" shid: no khyoo: mo ngoonu" ri yo" khyoid yu bye: yoomo akhid" we' khyoid yu shi" wa ein: wigi ngoonu" nyang: ri damyid byu lang nyid boem shi".

¹¹Houg: yoomo Mangsoo gi ngoonu" hougsu" akyu" mho' da" dang: ri tu" byid: wigi - ngoonu" ri mainkaid jeju" byid: shi" wa zi nghoid. Byu myoo" sho' mo, we' ngoonu" kham: yu bye: da" mainkaid jeju" yoomo jeju" ri coung" nghei nyid boem wa zi nghoid.

¹²Ngoonu" da" nheigloem: khoug: moo gyeung" nyang: phau: khuang wa khyoo: dakhaid bo. Hau: zigi he: da" moug: myid tho moo ngoonu" da" kangso' dei nyid khyoo:- je" wigi nanu" yo' tei" xo' zoem" khau: da" khyoo: moo byu da" se' yeug khyoo: moo anghe: khoug: loo: za: Mangso da" jeju" yoem: vhoo" khyo" ngoonu" gi Mangsoo byid: da" deungmain" gyeungshang: da" nheigloem: gye" myed wigi vhoeb khang" khyo" moo" zei: lo" khyoo: nghoid.

¹³Akhid" ngoonu" lhid" foin: kaid da" mougsoug" joem moo nanu" nghab lho: se' gyo: yu wa khyoo: za: date: lhid" kaid.

¹⁴Ngoonu" da" ASEING Yesu Khristu doem ju" re" da" bidnyid moo-ngoonu" gi nanu" yoomo phau: khuang joyoo boo wa ziyo' dakhyoo" ti"- nanu" we' ngoonu" yoomo phau: khuang: joyoo boo baja"- akhid" ngoonu" da" khyoo:-da khyam" dayam za: nanu" se' gyo: too" nghoid loug we' joeb byeung" sho' se' gyo: lo boem wa ziri ngoo nheig byu nyid.

¹⁵He: khyoo: ri nheig shid: nheig deug ziyo: -nanu" eig lheung: mo da" jeju" yo" yu goo" baja"- nanu" jang" moo shi" ju" ri" wa ein:- xang: shid" ri ngoo nheig byu nyid.

¹⁶Khasu" wim gari Makedoni mung" khyoo: yhe: lo" u" we' houg: mo doem tau" lo uri we' nanu" moo vang lo lho: Yuda mung" khyoo: yhi: wa gyung: khyo: shid re" we-nanu" jang" mo pang" thoug khyoo: yo" yu baja" ein: ngoo myid too" bye.

¹⁷Akhid" hid: su" nyheung soin' lo" khyoo: moo ngoo gi ageing: teung da" fain" loo bo da" nheigloem: bo la". ngoo nheig byu da" khyoo: ri nyheung soin" lo" da" uri nyang: nya: akyu" shoo: wa da" myid soin: khyoo: yo' zei: so' koid lo" la". Ayo, daloem: moo za:-nghoid bye:- ga: we' anghoid o" ga" we' dang: bya: tid bye: la".

¹⁸Gyeung" nyang: Mangsoo gi deungmain" khyoo: ri tid nyid ziyo' dakhyoo" ti"- ngoo nanu" ri byid: da" dang: theung khoin" we'-nghoid zi' anghoid zi lhu: lheug da" dang: bya: gi anghoid.

¹⁹Khasu" wim gari nanu" ri ngoo yo' Sila eig yug Timothi kho" kyo" da" Mangso nya: zoo: Yesu Khristu gi nghoid ziyo' anghoid ziri lhu: lheug da" alhu: alheug su: anghoid. Gyeung" nyang: ga: ri nyang: gi Mangsoo da" myid vho" khyoo: ri" nghoid ga: tid byid: da' Aseing: nghoid nyid.

²⁰Nyang: gi Mangso da" dang: theung khoin" danggain" da" shid re" nghoid ein: da" agung nghoid nyid. Hougsu: nghoid yoomo ngoonu" gi Mangso da" myonhoo: phung" yoeb ri thu' loo nhang: wa shid re" Yesu Khristu moo A men, ein: boem bye.

²¹Nanu" yo' ngoonu" ri Yesu Khristu moo dayug za: bui" sho' kangso' dei nhang" su: gi Mangsoo nyang: za: nghoid nyid.

²²Mangsoo nyang:- ngoonu" ri goo" zu: xen: khyen: yu wigi-nya: byumyu" yi nghoid bye: da" laxoem" dazid' thoung" tab byid: bye: ziyo' ju" loo wa ayo, moo ngoonu" shau" kham: yu wa da" jeju" dangain" shid re" ama, kham byid: ziyo' ngoonu" da" nheig loem: khoug: moo hau: gyeungshang: da" Venyi foid shoin" kaid byid: bye.

²³Korinthu voo khyoo:- ngoo adoem ri loo: wa" ein: ngoo myid phyed, to" khyoo: gi-nanu" ri khyam" sa byid: noug yoomo nghoid da" khyoo:- nga" nheigloem: ri si' byid: da" mangsoo gi nga" da" sagsi" nghoid nyid.

²⁴Nanu" ce" ja: ri loem" jeung" boem ca" ein: wigi ngoonu" amyeung" byid: to" zi anghoid. Nanu" geung: geung: teung teung hau: loem" jeung" khyoo: moo yab jo, boem bye: ziri ngoonu" se' boem bye. Ngoonu" gi nanu" da" ngei pyo: gau yi da" khyoo: joem ri she, -nanu" yo' dage" moozo" ri coem voin vu, nyid zi nghoid nyid.