Read Lashi 2~KORINTHU 11 Bible Online

2~KORINTHU 11 - Lashi bible

2~KORINTHU 11

¹Ngoo dajhi ko" go da" khyoo: ri nanu" seing: kham, byid: ngoo vho: nyid Jeju" yo'' gyeung" nyang: kham, zeung: byid: ge'.

²Mangsoo gi nanu" da" atho' moo aloem" athoo: myid bo nyid ziyo' dakhyoo" ti"- ngoo we' nanu" da" atho' moo aloem" athoo: myid bo nyid. Nanu" gi Khristu nyang: yo' loxo' ikoin deungkhu: de wa shid re" ngoo dang: myid: to" da" zoomyi: zoo: yo' du nyid.

³Eva gi lhang: myu: da" phajhi" juyhi: yo' mhau' mhid" phyo' shau: yhang: ti"- nanu" we' nanu" myid to" khyoo: ri lhu: phyo' pyam zi shau" lho: nanu" da" joeb byeung" gyeung: shang: emyid yo' Khristu moo nheigloem: zug- loem" jeung" zei: so' khyoo:- she: pyam goo" wa ziri gung youg yau nyid.

⁴Khasu" wim gari nanu" jang" moo byu dayug yug ju" re" wigi ngoonu" akho" kyo" yu" da" gootu: Yesu dayug da" khyoo: kho" kyo" da" uri nanu" gi goug goug yi yi loem: kham: yu ago". Hau: lho: nanu" gi ngoonu" jang" mo, yo" kham: yu bye: da" Venyi yo' ngeibu: ludang: ri to" pyam lho: adu go" da" Venyi yo' ngeibu: ludang: ri lhoem: kham: yu nyid goo" nhung: lha".

⁵Ngoo gi houg: nanu" gyi: thang da" lagyoo: yi ga: coung" nghei tu: to' da" lagyoo: yi tho' moo dajhi' khyalhang" ngi, su: anghoid ein: ngoo jho: nyid.

⁶Ngoo gi kho" kyo": khyoo: moo akung su: to' nghoid loug we' gyeung: nyang: ngoose' kung khyoo: moo gi hougsu" anghoid ngoonu" gi ayo, loem: khang" moo" moo bue" lo, da" akhyoo" azoo" dangain" jang" moo he: khyoo: dangain" nanu" ri bang bang si' nang boem bye.

⁷Ngoo gi nanu" ri coung" nghei tu: to' kaid wa shid re" ngoo nya: gung ri gi khyo, nyhoem: pyam lho: aphoug" amho, loo:-Mangso da" ngeibu: ludang: nanu" ri kho" kyoo" bye. Hougsu" koid khyoo: gi ngoo moo shoid khyoo: nghoid la".

⁸Ngoo nanu" jang" moo moo" voin, nyid da" ayo, gu: moo gootu: voo, mo phung bang gi ngoori pang" thoug ago, hau: zigi nanu" ri pang" thoug wa shid mo gootu: phung: mo ngoo, lhoid yu zi nghoid ein: shang.

⁹Hau: tho' moo gootu: ngoo gi nanu" yo, dage" nyid nyid da" ayo, moo ngei sheung: ca" lo da" u ri pang" thoug yu wa shid re" ngoo nanu ri phibu, apu' yu". Makedoni mung" mo ju" re" da" mang: nhung" yi koem gi ngoo ca" gu: dangain" ci: ri byid: ago". lailoo bye: da" ayo, moo we' nanu" ri yoovoin alid: nhang" yhang: ti" - ju" loo wa da" ayo, moo we' ngoo nanu" ri khanham we' yoolid: afoin: wa.

¹⁰Khristu da" deung main" da" dang: ngoo moo bo jo, ziyo' dakhyoo"- ngoo hidsu" phau: khuang da" khyoo: ri Akhaia mung" joyoo khyi, khang" moo" khyoo: hang: we: yo' toem, jham" loo" nhang: wa zi anghoid ein: wigi ngoo dang: soo" byid: to.

¹¹Ngoo hidsu" ein: tid zigi ngoo nanu" ri ajheddab yoomo nghoid la". ngoo nanu" ri jheddab zigi Mangsoo se' nyid.

¹²ngoonu" koid ziyo' dakhyoo" ti"- nyangnu" we' lhoung koid yu" ga: wigi gootu: lagyoo: yi tid phau: khuang jang: yoo" baja"- akhid" ngoo koid yhang: ti"- xo' lho: we ngoo koid shi" wa.

¹³Hau: byu yi gi deungmain" da" lagyoo, yi anghoid boem. nyangnu" gi Khristu da" lagyo: gyeung" yhang: ti: bui" sho' akug void lho: mhau' fain" koid yen" mo, nghoid ago".

¹⁴Hidsu" koid da" khyoo: gi mau" pho khyoo: anghoid. satan joem lang" gi bidbang mo moug: lagyoo: yi da" alhoo: se' shab, ci: ashi" go.

¹⁵Houg: su" nghoid yoomo nya: da" deizoo: yi nyang: lang" we' deungmain" da" khyoo: ri kho" kyo" sagsi: kham da" dei zoo: yi yo' yu" du sho' ayid void mhau zi gi mau" pho khyoo: anghoid. Lo" thang moo gi nyangnu" cang koid yen" ziyo' dakhyoo: ti"- nyangnu" shau" kham zo: boem wa zi nghoid.

¹⁶Hau: lho: ngoo doem poug tid nau khyoo: gi ngoori goo, su: nghoid ein: hang we' age soin: yu. Nghoid loug we' nanu" hougsu" soin" yu bye: yoo: we' thang thang ngoori agoo dayug khyo" lhoem: kham yu ge,- Hougsu" ngoo we' phau: khuang da" dang: dajhi' tid ba.

¹⁷Gyeing" nyang: ga: ri akhid" ngoo tid phau: khuang nyid da" khyoo: gi Mangsoo tid nhang: nau da" khyoo: anghoid. Hidsu" tid phau: khuang nyid khyoo: moo ngoo ri gyeung" nyang agoo dayug yang ti: - tid phau: khuang nyid khyoo: nghoid.

¹⁸Nghoid loug we' byu myoo" sho' bang: gi byu yi koid da" khyoo: moo phau: khuang myonhoo: shoo: yoomo-ngoo we' khuang wa nghoid.

¹⁹Nanu" nyang: phajhi" soungboo yoomo goo mo, ri gau yi ziyo' kham zeung: nyid goonhung: lha".

²⁰Nanu" gi nanu" ri pyeung" zoo: mo, - nanu" da" ahto' moo vhoeb mo: nanu" ri tei" khyo, lho: myheug yu bang:- nanu" ri yu" nge pyam mo, nanu" da" myonhoo: ngi nhang: mo, hang" ri we' nanu" kham, zeung: nyid ago".

²¹Nanu" gi houg: yhang: te" khyoo: ri koid wa shid re" yoem: nu: khyoo: ri yhen: yu wa shid re" lang" gi sho' boem bye. Nghoid loug we' byu dayug yug - khyoo: daja: ja: moo phau: khuang nghoid rigi ngoo we' afang: akyi: su: ti" voem" tid nyid.

²²Nyangnu" gi Hebre byu yi nghoid boem lha". ngoo we' nghoid. Nyangnu" gi Abraham da" akung: ako'' bang: nghoid la". ngoo we' nghoid nyid.

²³Nyangnu" gi Khristu da" deizoo: yi nghoid go" la". koo" su: da" dang: yhang: te" zi gi nghoid. Nghoid loug we' ngoo gi-nyangnu" tho' moo je ge da: deizoo nghoid. Ngoo gi nyangnu" tho' moo moozoo" ri je" zei: su nghoid. Nyangnu" tho' moo je"`wigi myoo" sho' lheung: thung: loung" yu bye. nyangnu" tho' moo voosi" je" shau" kham, zoo: bye: shid: gyoin' noogyoin, myoo" sho' lheung: ngoo shau" yu" bye.

²⁴Yuda byu yi ngoori soem" xe goug: dam dam byid zi, wim lheung: shau" yu" bye.

²⁵Roma yi wigi baidzi soem" lheung: shau" lho: lugzeung: wigi du" zi dalheung: shau" bye. Lhid' byo, yoin" jang: moo we' soem' lheung: bo bye. dalheung: gi Panglai moo nayi: eigxe: myid: loem: ju" sho' myu: dang: yen" zi we' shau" yu " bye.

²⁶Ngoo gyung: so" yen" zi myoo" sho' lheung: moo gyid je: lo wigi shau" da" shid: gyoin'- khyangtoug: shau" da" shid: gyoin'- ngoo nya: da" Yuda byumyu" yi koid byid: da" shid: gyoin- tungbau byumyu"' yi koid byid: da: shid: gyon- voothoem" yi moo thoung" shau" da" shid: gyoin'- siyoo soogam moo shau" yen" da" shid: gyoin- mhau' da" mang: nhung" yi koid da' shid: gyoin noogyoin myoo" sho' shau" lid lo yu" bye.

²⁷Moozoo" yo" yau: khe" zi yhoeb, ashug" zo: zi myo" sho myen- zooyoid gyid shed shau" zi myo sho' lheung:- zookhoo: ayoo" loo- khau: nghi" jang: ajo- shoo" cen: doem: boi" lo shid: gyoin' joem ri sahu" nyid.

²⁸hau: tho moo gootu- phung byu yi dangain" bang: shid' re" myid myoo: ung: loug da" khyoo joem gi nyid" khang" moo" ngoo moo yau: khe: jam jau lo nyid.

²⁹Yoem: nu: su: dayug yug bo ri ngoo we' yoem nu zi shau" nyid. byu dayug yug yooboo moo leung vang lo" ri ngoo nheig koug myid myo: nyid.

³⁰Ngoo phau: khuang wa nghoid rigi ngoo khayhi' yoem: nu: da" khyoo: ri phau: khuang wa zi nghoid.

³¹Ngoo mhau' fain" da" dang: atid nyid ziri ASEING Yesu da" nya: phoo Mangsoo gi se' nyid. Hau: Aseing: Mangso da" myeingkhyang" gi khanham we' ngi lho, nyid baja" o".

³²Damasku voogung moo ngoo nyid a uri Khokham" areta da" vhoo: mo mung" zoug: phoo gi ngoori myheung yu wa shid re" vogung khoem" duang: joem moo goem leom ri zung" nhang: to".

³³Nghoid loug we' phungbyu yi gi ngoori gyoin, moo kaid lho: vogung vang" khyam: tho' khyo" shu: khyo kaid wigi nya: da" lo, mo yo" loid, loo" bye.