Read Lashi 2~KORINTHU 6 Bible Online

2~KORINTHU 6 - Lashi bible

2~KORINTHU 6

¹Nanu" gi Mangsoo da" jeju" yo" kham: yu mo, nghoid ziyo' dakhyoo" ti"- hau: jeju" ri amyib afoo" akoid pyam baja"- ngoonu" gi Mangso da" moozoo" bo pang" zei nyid mo, khyo" wigi nanu" ri mho' sang kaid zi nghoid.

²Tam" gyoo: ge" - Mangsoo tid zigi Ngo nanu" ri jeju" byid: wa ayo, ju" loo lang" nanu" da" mho' yoid thui: ri ngoo tam" gyoo: byid bye. Ngoo nanu" ri khyoid yu wa da" bidnyid ju" lo uri Nanu" ri ngoo pang" thoug byid:- bye ga: wigi nyang: tid nyid. Mangso da" jeju" kham: yu wa zigi - akhid" lang" ge eung: da" ayo, nghoid bye- Yu" ge"-Akhid" lang" khyoid yu da" bidnyid nghoid nyid.

³Ngoonu" zei: lo da" moozoo" yo' sen: lho"- hang" nghoid loug we' yooboo foin: lho:" juang" yi zi abue" loo" nhang: noug yoomo ngoonu" gi hang" khyoo: moo we' thei, leung jang" abui" nhang: sho' yoem: kaid nyid boem.

⁴Kyi" kyeug jam jau khyoo:- shid: gyoin, noogyoin khyoo:- yau: khe" khyoo: joem ri gyi: sheung: nheigloem: yo' kham: zeung: wigi ngoonu" zei: lo da" klhyoo: khaid khang" moo" moo ngoonu" gi Mangso da" join' lang: jhang yi nghoid da" khyoo: ri datoin" shid boem.

⁵Ngoonu" gi youg baid zi-thung" lhoung zi mung" byu yi lu: fu: khyoo:- shau". Moo" zei: jang" moo dougnoo: jang: ayo oo"- yhoeb' agyi: khyoo:- zoo: noem ashug" zo: zi thoung" shau" lo boem.

⁶nheigloem: young" khyoo:- yeug se' koung khyoo:- kham: zeung: khyoo: yo' nheung khyeug shoo" myen: khyoo: khyo" we' gyeungshang: da" Venyi da jeju" khyoo: khyo" -afain" da" jheddab myid khyo" we'

⁷Ngoonu" kho" kyo" da" deungmain" mungdang: yo' Mangso da" yoem: vhoo" khyo" we' ngoonu" gi Mangso da" deizoo: lang: jhang yi nghoid da' khyoo: ri toin" shid lid loo bye. ngoonu" gi Venyi khyoo: yo" sen: da" gyipui" moo vang zain: wa ziyo' ngoonu" gungdu: ri lhoem: zung" lhug yu wa shid re" ngoonu" gi hau deungmain" da: khyoo: ri gyikhoo: koid lho: cid: lo boem bye.

⁸Ngoonu" gi coung" byid: nghei, byid: zi we' juang" yi pyam zi we-shau" nyid boem. Ngoonu: ri mhoug zoo: mhoug shug yen" mo, ga: we' jho: ago". Nghoid lug we' ngoonu" gi deingmain" da" dang ri da tid.

⁹Ngoonu" gi-hang" we' aboin: ase' mo, ti nghoid loug we' fu" nheung: too" mo, shid: mang yhang: te" mo, nghoid loug we' Akhid" nyhang" myang nyid ziyo' dakhyoo" ti"- ngoonu" dadei nyid mo, nghoid. Shid: gyoin shau" nghoid loug we' ngoonu" said pyam zi ashau" boem.

¹⁰Koug shu" zi shau" boem nghoid loug we' ngoo gi khanham we' dagau yi nyid sho" jhen" bang: yhang: ti" nghoid loug we' byu myoo" sho' ri yoo: zoo: yo" shug nhang" mo, nghoid- ci" ayoo" mo, yhang: ti" nghoid loug we' ngoonu" gi gyeung" nyang"- jo, moo jo, ri seung: ci" mo, ngoid.

¹¹Korinthu' voo mo jheddab da" bidnoem yi we"- ngoonu" gi nanu" ri di: bang" za" tid bye- ngoonu" gi ngonu" da" emyid ri hain" lam: khyo" nyang:- nanu" shid mo khoem: phang too: bye.

¹²Nanu" loem: she' ngoonu" da" jheddab e" myed ri-nanu" jhang aju: sho' khoem" myhed" to" ago".

¹³Nanu" da" nheigloem: khoem" duang: ri phang hain" too" ge' akhid" ngoo nanu" ri nga" zoo yi ri yhang: ti" tid sang: nyid. Nanu" we' ngoonu" ri-houg: yo' du khyo" myid khyoo: ri doem phug tu" kaid ge'.

¹⁴Aloem" ajeung" mo, yo" dage" shoin" lho: moo" acoem' zei: goo. Khasu" wim gari dage" shoin" lho: moo" coem voin, wa zi age bui". jo ziyo: shoid' da" zi gi dage" se' zoem" khoug: wa, la". Bid bang yo' moug: coid gi khasu" koid dage" se' jo, wa lha".

¹⁵Khristu yo' satan gi Khasu" wim wigi e" myed se' zhung" goo wa Loem" jeung" su: dayug yo' aloem" jeung" da" byu dayug gi khasu" se' du goo" wa lha".

¹⁶Mangsoo da" noku yhoem: gi goug ngu shoolhoo joem yo' khasu" koid lho" e" myed se' zhung" goo" wa lha"., Khasu" wim gari ngoonu" gi dadei nyid da" Mangso noku yhoem: moo" joem nghoid nyid boem. Mangsoo nyang: tid zigi-Ngoo gi nga" byumyu" yi moo nga" yhoem: koid wigi nyangnu" moo bo nyid wa zi nghoid. Ngoo gi nyangnu" da" Mangsoo bue" nyid a zi nghoid wigi nyangnu" gi nga" byumyu" yi bue" lo boem wa nghoid- ga: wigi tid nyid.

¹⁷Houg: su" nghoid yoo mo Aseing: gi Nanu" gi nyangnu" ri to" pyam' kho' wa ziyo' nyangnu" mo nanu: da" gungdu: ri goo" zu: xen' gam, gang: goo" loo: ge'. Anyhoin: athoug" zi ce" ja: ri we' azang" thung" go". Houg: lang:" she, ngoonanu" ri lhoem: kham: yu wa zi nghoid.

¹⁸Nanu" da" nya: phoo ngoo byui" wa nghoid wigi nanu" gi nga" da" yuggi zoo: yo' myiyi: zoo: yi bui" wa zi nghoid- ga: wigi athang agoin yoem: moo" bo da" Aseing: gi da tid nyid.