Read Lashi GALATI 3 Bible Online

GALATI 3 - Lashi bible

GALATI 3

¹Akoo" apyoid' da" Galati byu yi we"- pyang" zeing tho' moo Yesu Khristu shid: Kham: bye: da" khyoo: ri nanu" da" myonhoo: moo bang bang yo" myang sho' ngoo tid shid kyoo" bye: ri-nanu" ri hang" wigi mhoug cid" zho" lho: jhu, phyo' zi shau" go" la".

²Hau: Mangso da"Venyi ri nanu" yo" yu bye: zigi toung: to" da" tarha" ri nanu" yo" cang pyeing yoomo nghoid go" la". Hougsu" anghoid lang" ngei bu: lu dang: ri shaug" gyoo: yoomo tam" gyo: lo jang" mo nghoid la". hau: khyoo: dakhaid za: ngoo nanu" da" nhoid, mo, shaug" gyoo: nau.

³Nanu" gi khasu" wim wigi hid: yhi' ko" fang: nyid go" Nanu" gi hau: Venyi moo loem khau: wigi ayang: qei" shed" lo boem lho: akhid" gi nanu" da" gung shoo" yoem: vhoo" moo leom khau: lho: wigi ze" pain' loo" noug go" la".

⁴Nanu" nya: kham, zo: lid loo bye: da" jeju" aja: ja: ri akoem: za: dakham, zo: pyam' go" la". Gyeing" nyang: houg: su" thoung" shau" lo da" khyoo: gi nanu" shid re" akoem: ayo" bui".

⁵Mangsoo gi hau: Venyi ri nanu" atho' moo gyoo" ri nhang: lho: wigi mau" pho" alhoo: again joem ri toin" shid byid: zigi hau: toung: to" da" tarha" ri cang pyeing yoomo nghoid la". Hougsu" anghoid lang" hau: ngei bu: lu dang: ri nanu" shau" gyo: lho: loem" jeung" yoomo bue" lo zi nghoid la".

⁶Abraham da" thoung" shug lo da" khyoo: joem ri myid yu" ge'. jhoem: mungdang: moo Abraham gi Mangsoo ri loem" jeing" yoomo Mangsoo gi nyang: ri deing byeung" su- ga: wigi lhoem: yu, ga: tid to".

⁷Hougsu" nghoid yoomo Mangsoo ri loem" jeing" bang: gi Abraham da" zoo: myid: agyeing" yi nghoid da" ziri nanu" se' gyoo: ca" nyid boem bye.

⁸Hau: jhoem: mungdang: we' Mangsoo gi loem" jeung" ziyo' tungbau byumyu" yi ri deing byeung" nhang: wa,, ga: wigi tid too" bye- Hougsu" wigi jhoem: mougsoug" gi" Byumyu" bain sho' bang: gi nang yoomo-ngilhoo, dang khab, boem wa,, ga: wigi Abraham ri hau: ngei bu: lu dang: ri tid kyoo" bye.

⁹Abraham gi loem" jeing yoomo mainkaid jeju" yo" yu ziyo' dakhyoo" ti"- loem" jeing" bang: hang" nghoid loug we' nyang: yo' dakhyoo" ti" mainkaid jeju" ri shau" kham: yu boem.

¹⁰Hau: toung: to" da" tarha" cang pyeung da" khyoo: ri myid loem nyid mo, hang" nghoid loug we' tarha" dang: phyed' da" akhoug: moo boo mo, nghoid nyid Khasu" wim gari jhoem: mungdang: gi hau: tarha" moo lhid" too" matoo" yo' dakhyoo" ti"- khanham we' ayo" cang pyeing bang: hang" nghoid loug- tarha" dang phyed' zi shau" wa,, ga: lhid" to".

¹¹Jhoem: mougsoug" moo Mangsoo ri loem" jeing" yoomo nya: shid khoin" moo deing byeung" su:- nghoid ga- soin: byid: zi shau" su: za: shau" dei nyid wa,, ga: lhid" too" yoomo hau: toung: to" da" taha" ri cang pyeung ziyo' Mangso da" shid moo hang" we' yo" deing byeung" zi anghoid ein: da" khyoo: gi bang bang nyang nghoid nyid bye.

¹²Nghoid loug jhoem: mougsoug" moo toung: to" da" tarha" moo tid too" moo to" gu: ri cang byeung" su: gi kangso' dei nyid wa zi nghoid,, ga: wigi tid yoomo toung: to" da" tarha" gi leom" jeung" khyoo: yo" ci: asen: zi nghoid nyid.

¹³Seig zeing moo jen" lhang" too" shau" su: hang" nghoid loug we' Mangsoo da" tarha" dang: phyed' zi shau" su: nghoid nyid, ga: wigi jhoem: mougsoug" moo tid to" ziyo' dakhyoo" ti"- Khristu gi ngoonu" da" shid re" tarha" dang: phyed zi shau" byid: khyo" wigi toung: to" da" tarha" dang: phyed jang" mo ngoonu" ri khyoid khyi: yu bye.

¹⁴Yesu hid: su" koid da" khyoo: gi Abraham kham: yu da" Mangsoo dangsoo" yo" sen: da" mainkaid jeju" ri tungbau byu yi we' Yesu Khristu khoug: khyo" yo" kham: yu wa ziyo' ngoonu" nghoid loug hau: loem" jeung" khyoo: khyo" Mangso da" dang: soo" byid: to" Venyi ri shau" kham: yu wa zi nghoid.

¹⁵Nga" mang nhung" yi we"- nyid" khang" moo" thoung" shau" nyid da" khyoo: jhoem, ri ci: lho: dang: tu, daloem: ri ngoo tid ba,- byu eig yug gi moo" daja: ri myid veing" go" lho: dang: soo" too" go" da" mougsoug" lhid" go" ci: thang: ri hau: da" ziri hang" we' nya: myid khyo" yo" phyo' pyam' wa zi anghoid- yo" kaid' lung: wa zi anghoid.

¹⁶Akhid" Mangsoo gi nya: da" dang: soo" khoin" gi Abraham yo' nya: myid: nya: zoo: yi ri byid: too" bye- jhoem: mougsoug" gi nya: myid: nya: zoo: myoo" sho' byu yug myoo" sho' ga: dang: ri aci- re" myid: zoo: ein: da" dayug ri kyeing" tid nyid wigi hau: zigi Khristu ri tid nyid zi nghoid.

¹⁷Houg: yoomo ngoo tid nau khyoo: gi hidsu" nghoid nyid Mangsoo gi Abraham yo' dang: theing bain too" go" thang: ri hau: ziri cang pyeing wa da" dang: soo" too" bye- zain nyid myid: sho: soem" xi: zain' myang" thang: ri bue" lo da" toung: to" da" tarha" gi hau: dang: theing khoin" ri ayo" ze" phyo' pyam ziyo' hau: dang: soo" khoin" ri we' ayo" yoeb, yu.

¹⁸Khasu" wim gari Mangso da" jeju" agyid asoo: gi hau: toung: to" da" tarha" ri nghe: khau: lho: dayo" yu nghoid rigi hau: jeju" agyid asoo: gi nya: da" dang: soo" khoin" yo' ci: asen: byug loo- nghoid loug Mangsoo gi dang: soo" khoin" yoomo Abraham ri hau: jeju" agyid asoo: byid: abye:.

¹⁹Hougsu" nghoid rigi toung: to" da" tarha" myid yeung to" khyoo: gi-ce: noem nghoid nyid lha". tung: to" tarha" ri Mangsoo loung: kaid' too" byid: da" khyoo: gi shoid vhang: lo" da" khyoo: ri toin" shid' wa shid re" nghoid wigi hau: zigi dang: soo" to" da" Abraham da" nya: myid: nya: zoo: aju" ri" shi" da" ayo, gyoo: moo ju" sho' geung: teung jo, wa shid re" nghoid nyid Hau: toung: to" da" tarha" gi moug: lagyoo: yi da" lo, mo wigi lhed: kaid' byid: da" agyo: byu dayug khyo" wigi byid: bye.

²⁰Nghoid loug we' dayug kyeing" nyid rigi agyoo: moo lagyoo: gi aca"- Mangsoo dayug kyeing" za: koid bye.

²¹Hougsu" wigi toung: to" da" tarha" gi Mangso da" dang: soo" khoin" joem yo' adu goo" ein: tid nau la". Hougsu" anghoid o"- Khasu" wim gari kangso' yo" dei loo nhang: da" tung: to" tarha" ri xangsu: byu yi yo" yu to" nghoid boem rigi nyangnu" hau" tarha" ri cang pyeing" yoomo Mangsoo shid moo yo" deing byeung" loo" goo" wa.

²²Nghoid loug we' mougmyid gyab goin" gi hau: youg: noo yoobo wigi nghoeb, boem" pyam' bye, ga: wigi jhoem: mougsoug" moo tid nyid hougsu" nghoid yoomo Yesu Khristu ri loem" jeung khyo" wigi byid: wa ga: da" dang: soo" jeju" agyid asoo: ri loem" jeing" bang: ri byid: nyid.

²³Nghoid loug hau: loem" jeing wa da" ayo, aju" shi" uri ngoonu" hau" loem" jeung" myid yo' nyid da" ayo, moo ju" sho' toung: to" da" tarha" gi ngoonu" dangain" mo, ri thung: lung" byu yi ri yhang: ti" lhoung to.

²⁴Hougsu" nghoid yoomo ngoonu" gi leom" jeung" yoomo deing byeung" loo goo" baja" ga: toung: to" da" tarha" ngoonu" ri jhoug" byid: da" sara: khyo" wigi Khristu ju" re" jang" moo ju" sho' ngoonu" da" sara: bui" byid: bye.

²⁵Nghoid loug we' hau: loem" jeung khyoo: gi akhid" ju" ri" bye yoomo jhoug" byid: da" sara: nghoid da" tarha" khoug: moo ngoonu" anyid boem loo.

²⁶.Khasu" wim gari Khristu Yesu khoug: moo loem" jeung nyid boem bye: yoomo nanu" dangain" bang: gi Mangso da" nya: myid: nya: zoo: yi nghoid boem bye.

²⁷Nanu" gi Khristu yo' daloem: za: bui" wa shid re" Babtisma ri kham: yu boem bye: nghoid yoomo Khristu ri void byi: void mi yhang: ti"- void ci: abye: go.

²⁸Hougsu" nghoid yoomo Yuda byumyu" yi yo' Grid byumyu" ein: zi aboo- join, yo' loid byoin mo, ga: zi we' aboo- myiyi: yo' yug gi ein: zi we' aboo- nanu" dangain" bang: gi Khristu moo dayug za: danghoid nyid boem lo.

²⁹Akhid" nanu" gi Khristu yo' sen: mo, nghoid nyid boem rigi Abraham da" amyed ashen yi nghoid nyid boem ziyo' hau: dang: soo" bo ziyo' dakhyoo" Mangso jang" mo agyid asoo: yo" kham: yu wa mo, nghoid nyid boem bye.