Read Lashi GALATI 5 Bible Online

GALATI 5 - Lashi bible

GALATI 5

¹Khristu gi ngoonu" ri join, bue" jo, jang" mo lhoid, kaid' bye: nghoid yoomo nyhang" gi loid byoin yoo" bang: nghoid boem bye houg: yoomo loid byoin, yoo" bye: bang: yhang: ti" yab, jo, ge'- join, da" dabu" khoug: moo adoem vang loo" goo".

²Tam" gyoo: ge' nanu" athang: yham" boem bye: nghoid rigi Khristu gi nanu" shid' re" ce" akyu" we' aboo- ein: ngoo Polu nyang: nanu" ri tid kyoo" ba'.

³Hau: tho' moo gootu: athang: shau" yham" kham, bye: su: gi toung: to" tarha" dangain" ziri cang pyeing ca"- ein: wigi athang: yham" kham: ci: bye: bang: ri ngoo dalheing" doem tid poin" nyid.

⁴Toung: to" da" tarha" ri cang pyeung khyo" wigi Mangso shid khoin" moo deing byeung" khyoo: yo" yu wa ga: yoem: kaid' nyid bang: nanu" gi Khristu yo' gang: lain lo" lho: Mangso da" jeju" ri ci: foid pyam' abye: go.

⁵Ngoonu" koem gi Mangso da" venyi yoem: vhoo" yo' Khristu ri loem" jeung" da" khoug: mo Mangso da" shid khoin" moo deing byeung" ga: soin: yu byid: wa shid' re" myid byu lho: dalang" nyid boem.

⁶Khasu" wim gari ngoonu" gi Khristu Yesu moo nyid nyid beom nghoid rigi athang: yham" ziri kham, akham' ein: zigi ce: ayhoug: gyen:- yhoug: gyen: da" khyoo: gi jheddab myid ri ci: lho: loem" jeung moo" zei: khyoo: nghoid.

⁷Shid phyang" nanu" gi gye" yhoug: gyen: khyo" zei: so' yoem: kaid lo yu" boem bye- hau: deungmain" khyoo: ri atam" gyoo: goo" baja" ga: nanu" ri hang" toem, too" go"

⁸Nanu" ri nyang: kha: khyo" joug jhoin" yu" la". Houg: yhang: ti" jhoug jhoin" da" khyoo: gi nanu" ri khe: yu da" Mangso jang" mo ju" re" zi anghoid.

⁹Zooyho' dangain" ziri do loo nhang: wa shid re" gi doo cid" dajhi' za date: vho:,, ga: da" dang: khyang" jo,.

¹⁰Nghoid loug we' ngoo gi akhid" ju" sho' nanu" ri khanham we' damyid loem nyid ngoo yo' nanu" gi hau: Aseing: moo daloem: za: nghoid nyid yoomo nanu" gi ngoo myid khyoo: yo' adu goo" lho: gi akham: yu goo" wa ein: ngoo myid loem, nyid nanu" da" nheigloem: ri ze" shoin, ze" phyo' mo, hang" ri nghoid loug we' Mangso wigi shen" yhen loo wa.

¹¹Nghoid loug we' mang nhung yi we"- athang: dayham" ca" ein:- ngoo daxo, kho" nyid nghoid rigi ci: yoomo shen" yhen khyoo: ri ngoo shau" zo: nyid shi" wa la". Hougsu" kho" kyo" ga: zi dadeung nghoid rigi Khristu da" pyang" zeing khyoo: ri ngoo kho" kyo" jang" moo ngoo yau: khe jam jau zi shau" loo wa anghod.

¹²Nanu" ri nheigloem: ze" nhung ze" phyo' nyid mo, gi athang: yham" zi za: we' anghoid- nyang: tu: nyang: yham" phyed' pyam' goo" baja".

¹³Nanu" koem gi mang nhung" yi we"- loid byoin, da" akhang" yoo" goo" baja" ga: khe: yu zi shau" boem bye- nghoid loug we' hau: loid byoin, da" akhang" ri goo koid lho: wigi gung sho" da" vhoo: boo: loug gyi: nheigloem: ri nheig shid: said' wa shid re" agoo, ashoo: goo"- hougsu" koid wa gung khoo:- nanu" gi jheddab ziyo' nyang: cang" nyang: pang" thoug go" nyid ge'.

¹⁴Khasu" wim gari re" yhoem: kyoo" cang" ri nanya: gung yo' dakhyoo" ti" jheddab we' ga: byid: to" da" dang: dakhoin" ricang pyeung ziyo' toung: to" da" tarha" dangain" ri bain' cang zi bui" bye.

¹⁵Nghoid loug we' kyang: da" gougnyhoug lam" joem yhang: ti"- nanu" nyang cang" nyang: dangaid' zoo: go" nyid nghoid rigi nanu" nyang: cang" nyang: tu- jhoem" pyam' goo" wa ziri ze" lhid' nyid ge'.

¹⁶He: khyoo: ri ngoo tid nyid zigi" nanu" gi venyi wigi khyoo" shed' ziyo' dakhyoo" ti"- cang zei: nyid yab, yhe: lo" rigi gung sho" da" vhoo: boo myo, no, khyoo: ri nanu" yo" cang pyeing wa zi anghoid.

¹⁷Khasu" wim gari gung sho" da" aco' ajhoid khyoo: yi gi venyi da" vho: ngei khyoo: yo' shai jo,- gung sho" da" vhoo: boo myo, no khyoo: yo' venyi da" vho: ngei da" khyoo: he: eig khaid gi gyi bui" go" nyid - hougsu" nghoid yoomo nanu" gi nyang: nya: myid vho: ziyo' dakhyoo" ti"- ayo" koid boem.

¹⁸Hau: venyi gi nanu" ri shu" vhu" she: lo" nghoid rigi nanu" gi hau: toung: to" da" tarha" khoug: moo nyid mo, anghoid loo.

¹⁹Gung sho" da" moozoo" gi bang bang nyang: nghoid nyid wigi hau: gu: gi youg: shoo: go" moo"- avoid avhu: koid da" moo"- aco' ajhoid da" moo".

²⁰Goug ngu soolhoo: no' khyoo:- maintain khyau" fa" lung khyoo: join: yu kau" phajhi" - anoug angei ziyo' myeing" myoo: yhoo: she: khyoo:- noo" goo" zoo go"- nheig yoo ung: jhen:- nyang: nya: da" akyu" te: sho: zi gang: loo" lain' lo" da" khyoo:- phung kho' go" lo" khyoo:-

²¹Aloem" athoo: koid khyoo:- yhid: shug yhed khyoo: zoo: pyoo: shug bu zoo" re" youg: sho: avoid avhu: koid khyoo: yo' houg: yo" du go" da" khyoo: nghoid nyid Hidsu" koid nyid bang: gi Mangso mungdain da" agyid asoo: ri yo" kham: yu wa zi anghoid- ein: shid' phyang" tid kyoo" bye: ziyo' dakhyoo" ti"- akhid" we' nanu" ri ngoo tid nyid.

²²Nghoid loug we' hau: venyi da" ashi" koem gi jheddab zi gau yi zi ngei bu khyoo: nheigloem: sheung: khyoo: nheig khyeug khyoo:- ge, lho, khyoo:- dang sadi zung" khyoo: nghoid.

²³Khyo, nyhoem: ziyo' nyang: nya: da" nheigloem: ri yo" khang" khyoo: nghoid - he: khyoo: ri yo" toem, too" wa zigi ce" tarha" moo we' aboo.

²⁴Khristu Yesu yo' sen: bang: koem gi nyang: tu: nya: gung sho" nheigloem: yo' aco' ajhoid khyoo: ri vhoo: boo myo, no, khyoo: yo' dage" pyang" zeing moo bo baid' jen" too" bye.

²⁵Ngoonu" gi venyi moo kangso dei nyid boem nghoid rigi hau" venyi wigi shu" vhu" she: khyoo: shed ziyo' dakhyoo" ti"- cang so" nyid boem shang.

²⁶Ngoonu" gi nghoid boin: khyoo:- nyang: cang" nyang: pyi: shoo: go" khyo" yooboo foin: ziyo' nyang: cang" nyang: noo" goo" zoo go" da" khyoo: joem ri to" pyam' ca" boem bye.