Read Lashi Ephesu 3 Bible Online

Ephesu 3 - Lashi bible

Ephesu 3

¹He: da" khyoo: yoomo nanu" ngi zain byumyu" yi shid re" Khristu Yesu da" thung: byu ngoo Polu gi Mangso jang" moo akyu" mho' nyid.

²Nanu" da" ge, lho khyo: shid re" Mangsoo gi nya: jeju" yo' ngoori- he: da" moo" ab, byid: bye: da" khyoo: ri gyeing" nyang: nanu" shau" gyo: yu" boem bye.

³Mangsoo gi nya: da" no, thang khyo" nyheung soin' to" khyoo: ri toin" shid' lho: wigi hau: khyoo: ngoori si' nhang: bye- leung" khyo" lhid" kaid' bye.

⁴Nanu" gi houg: ngoo lhid" kaid' da" khyoo: ri nghab yu" boem nghoid rigi Khristu yo' sen: da" no, thang khyoo: ri ngoo khasu" se' gyo: da" khyoo: ri nanu" we' se' gyo: boem wa nghoid.

⁵Lai loo" bye: da" ayo, joem moo he: no, thang da" khyoo: byu xangsu: yi ri atid kyo" yu" shi"- Nghoid loug we' Mangsoo gi akhid" nya: da" gyeungshang: lagyoo: yi yo' Lapi: yi ri hau: venyi khyo" wigi pang shug byid: bye.

⁶Hau: no, thang da" khyoo: gi ngei bu: lu dang: yoomo nghi: zain' byumyu" yi gi Mangso da" mainkaid jeju" joem ri Yuda byumyu" yi yo" kham: yu da" akhang" ri yo" yu loo bye: khyoo: nghoid. Nyang: nu" yo' Yuda byumyu" yi gi gung shoo" daloem: za: mo akung: ako'' nghoid nyid wigi Khristu Yesu khyo" wigi Mangsoo byid: to" da" dang: soo" khoin" mo akyu" ri kham: yu da" akhang" yo" boem bye.

⁷Nya: da" yoem: so' khyo" wigi ngoori byid: to" da" goozu: xen' nghoid da" Mangso jeju" yo' ngei bu: lu dang: ge, da" dei zoo: ngoori bue" loo nhang: bye.

⁸Ngoo gi Mangso byu yi dangain" bang: mo nge thang su: tho' moo lang" je" ngi su nghoid- Nghoid loug we' Mangsoo gi Khristu da" athang agoin soidgain da" khyoo: ngei bu: lu dang: gi, ri nghi: zain' byumyu" yi jhang khyoo: ci: yhe: wa akhang" ngo ri byid: bye.

⁹xo' lho: wigi Mangso da: no, thang myid soin' to" khyoo: khasu" bue" thu' loo wa da" khyoo: xangsu: byu dangain" bang: ri myang se' loo nhang: wa shid re" we' Mangsoo gi hau" amyeing" akhang" ngoori byid: bye- jo, moo jo, ri phain" so: to" da" nya: da" no, thang khyoo: ri lid loo" bye: da" pyaid dangain" jang" moo yhoem" to" gyo" loo bye.

¹⁰Hougsu" koid da" khyoo: gi akhid" pyaid moo vhoeb khang" nyid da" moug: lagyoo: yi yo' moug: khung: moug di mo yoem: so' yoo" mo, gi Mangso phajhi" aja: ja: ri noku phung mo se' yu wa shid re" nghoid.

¹¹Mangsoo gi ngoonu" da" ASEING Yesu Khristu khyo" wigi bain zei: too" bye: da" nya: apyaid atoo: mo soin nyheung to" da" khyoo: yo' dakhyoo" ti"- nyang: gi he: da" khyoo: ri bain zei: bye.

¹²Khristu yo' dadeing: daloem: za: yo" bue" lo zoore"- nyang: ri loem" jeung" da" ngoonu" laloem, lakhau: gang mo ngoonu" gi nheig shid: nheig deug ziyo' Mangso da" shid khoin" khyoo: agyug avoem loo: yo" vang nyid boem bye.

¹³Hougsu" nghoid yoomo ngoo nanu" ri mho' sang: nau- ngoo gi nanu" shid re" sho" jhen: jam jau kham nyid yoomo nheigloem: moo agyug yoem: ashoin:- hau: khyoo: joem dangain" zigi nanu" da" akyu" shid re" danghoid nyid.

¹⁴He: da" khyoo: yoomo moug: khung: moug di mougmyid yooso" tho' moo nyid da" cang: joeb bang: ri myeing khyang" byid: su- phoo Mangso shid khoin" moo ngoo poid thug thoug nyid.

¹⁶Nanu" da" akhoug: mo byu ein: da" nheigloem: ung: khoug: yoem: bo loo goo" baja"- Mangsoo gi nya: myo: tham: da" myonhoo: phung yoeb, mo nya: venyi: nanu" ri yoem: so' byid: nyid baja"- ngoo gi Mangsoo moo akyu" mho' nyid.

¹⁷Hau: lho: loem" jeung" khyoo: khyo" Khristu gi nanu" da" nheigloem: ung: khoug: joem moo nyang: nyid nyid' wa ziyo' jheddab da" emyid moo agyi: zug lho: ayang: ri zhoug too" wa shid mo ngoo akyu" mho' nyid.

¹⁸Hougsu" nghoid lang" nanu" gi Khristu da" jheddab nheigloem: gi khayhi' gyi: lam: zi khayhi' gyi: sheung: lho: khamyhang myhang:- khayhi' no, da" khyoo: ri Mangso da" byumyu" yi yo' dage" yo" se' lo da" yoem: vhoo" ri yo" yu boem wa zi nghoid.

¹⁹Nghoid bye"- nya: da" jheddab nheigloem: rigi khanham we' bain si wa zi anghoid- Nghoid loug we' nanu" gi nya: da" jheddab nheigloem: ri se' lo wigi nanu" moo we' dabo jo, baja" ein: akyu" mho' nyid.

²⁰Ngoonu" da" akhoug: moo moo" zei: nyid da" nya: yoem: so' khyo" wigi ngoonu" se' mho' khyoo: dangain" yo' myid soin' da" tho' moo jain" sho' yo" koid nhang: da".

²¹Mangsoo gi phung: tho' moo we' Khristu Yesu da" tho' moo we' apyaid' atoo: moo phung" yoeb, dabo jo, baja" o"- Amen.