Read Lashi Ephesu 4 Bible Online

Ephesu 4 - Lashi bible

Ephesu 4

¹Hougsu" nghoid yoomo hau: Aseing: da" moo" voin vu, da" gang mo thung: oung" jo, su: ngo Polu gi Mangso wigi nanu" ri nyang: khe: yu da" bidnyid moo nyang: ke' too" byid: da" laleig laki, azhang myhi: da" kangso dei khyoo: moo kangso dei so" loo" wa shid re" ngoo nanu" ri joug jhoin" nyid.

²Khanham we' khyo' nyhoem: lho: wigi nu" nham, ziyo' kham, zeung: nyid ge'- nanu" nyang: cang" zeung: kham, go" lho: jheddab emyid ri toin" shid go" nyid ge'.

³Nanu" ri myeug deung: to" ngei pyo: myenjham" khyoo: yo' hau: Venyi: wigi byid: lo da" nheigloem: shikain" shoin" zheung" shoin" deung: foem: khyoo: ri zoem: too" wa shid re" yoem: so' thang sho' kaid' nyid ge'.

⁴Mangsoo nanu" ri khe: yu da" khyoo: gi nheig byu khyoo: dakhaid moo za: nghoid nyid ziyo' dakhyoo" ti"- gung du: daloem: za: yo' venyi we' daloem: za: nghoid nyid.

⁵Aseing: dayug za: loem" jeung" khyoo: dakhaid za: Babtisma khyoo: dakhaid za: nghoid nyid.

⁶Byumyu" bain' sho' bang: da" nya: phoo yo' Mangsoo we' dayug za: nghoid- nyang: gi dangain" da" Aseing: nghoid wigi dangain" bang: da" atho' moo we' dangain" bang: da" akhoug: moo we' yo" bo nyid

⁷Nyhang" dangain" bang: gi goozu: xen, da" mainkaid jeju" jhung: shug- Khristu da" laleig laki, yo" dakhyoo" ti"- yo" yu boem bye.

⁸Joem mungdang: moo tid ziyo' dakyoo" ti"- Nyang: gi myhang: da" joyoo khyoo: do, lo" ri nyang: yo' dage" thung: byu yi myoo" sho' ri shu" do, lo"- nyang: gi byu yi ri jhung: shug joem gam, byid:- ga: tid to.

⁹akhid" nyang: do, lo" ein: da" khyoo: gi ce: noem ri tid lha". Aseing: gi nyhoem: thang da" myidjang: moo-xang: shid" gyoo" loo" bye: ga: tid nau zi nghoid.

¹⁰Hougsu" gyoo" loo" su: gi nya: da" phung: nghoid bye.

¹¹Nyang: gi byu yi ri jeju" jhung: shug joem ri gam, byid: su: nyang: nghoid bye- nyang: gi dayham" bang: ri lagyoo- dayham" bang: rigi lapi- dayham" bang: rigi ngei bu: lu dang: gi, kho" kyo" yen" mo, dayham" rigi phung vhoeb yi yo' sara yi bui" wa shid mo zheung: nyheung too" bye.

¹²Nyang: hougsu" koid da" khyoo: gi Khristu da" gung doem: ri so' koid nyheung zhoug too" baja"- ga: Khristain moozoo" yo" zei: sho' Mangsoo gi nya: zooyi dangain" bang: ri soin' nyheing wa shid re" nghoid nyid.

¹³Hougsu" nghoid yoomo ngoonu" da" loem" jeung" khyoo: khyo" we' hau: Mangso nya: zoo: ri se' loo bye: khyo" we' ngoonu" nyid, moo nyid bang: dangain" gi dagung dashoo" za: bue" lo wigi ngoonu" gi Khristu da" joeb, byeung"- myhang: thang da" gung du: laki, moo myhi: sho' nheig boo ung: gyeung: gyi: myhang: loo mo, bue" lo" boem bye.

¹⁴Hougsu" nghoid lang" ngoonu" gi subi" ri nyangnu" da" phajhi" khyau" ziyo' khyoo: shu" vhang: mo, da" jhau" mhau' khyoo: ein: da" being: mhoid' ug lig zo" wigi moid' tang" loo" shau nyid da" zoonu" yi yhang: ti" abue" nyid boem loo: wa.

¹⁵Hau: gung khoo: jheddab da" emyid yo' deingmain" da" dang: ri tid nyid khyo" vhuloem nghoid da" Khristu moo khyoo: khaid khang" moo" moo gyi: sheung: to' loo ca" nyid boem.

¹⁶Hau" vhuloem da" vhoeb, khang" lo" da" akhoug: moo nyang: cang" adu go" da" gung shoo" akung: ako'' joem gi daloem: yo' daloem: tei" xo' go" ziyo' gung du: goin" ziri youg: xeig youg: myo, mo wigi tei" xo' go" to"- hougsu" nghoid yoomo adu go" da" akung: ako'' gi nyang: tu: nya: da" moozoo" ri voin vu, nyid nghoid rigi jheddab da" nheigloem: yo' dagung goin" ziri zhoug to' gyi: sheung: loo" nhang: nyid.

¹⁷Ce" phoug" adab da" nheig byu khyoo: yo" da" tungbau byu yi yhang" ti"- kangso' adei nyid wa shid re" Aseing: da" myeing khyang" yo' ngoo nanu" ri zed" lhid' nhang: nyid bye.

¹⁸Nyang: nu" da" se' yeug nyain: phajhi" gi moug: coid nghoid nyid wigi bain sho' nyang: akoo" afang: nghoid nyid nheigloem: thain: nyid boem yoomo Mangsoo byid: da" kangso' gam boem' moo nyangnu" gi aboo bang: nghoid nyid ago".

¹⁹Nyang: nu" moo gi gyoug sho' ga: da" nheigloem: dangain" ci: phyoug pyam boem bye: yoomo nyangnu" gi aco' ajhoid da" khyoo: moo cang zoore"- aved avhu: anyhoin: athoung" da" moo" aja: ja: yo' noug moo noug koid wa shid re" nyang: nya: da" gung ri ab byid: too" bye: mo, nghoid.

²⁰Khirstu da" khyoo: ri nanu" gi hougsu" jhau" yu boem zi anghoid.

²¹Nya: khyoo: ri nanu" gyeing" nyang: shau" gyo: yu" boem bye: wigi nya: thang: moo cang soo" mo, nghoid boem yoomo Yesu moo bo da" hau: deingmain" khyoo: ri nanu" shau" jhau" kham: yu boem bye.

²²Hougsu" nghoid nyid yoomo nanu" gi shid phyang" nanu" nyang: cang lo yu" bye: da" kangso' dei khyoo: mo byu xoug" ri we' mougmyid pyo: khyoo: ri vhoo: boo myo, no, yoomo mhoug zoo: fain" zoo: nau da" nheugloem: yoomo byo, yoin" loo" bye: da" byuxoug" ri she: pyam loo ge'.

²³Nanu" da" ung: khoug: nheigloem: yo' myid soin: khyoo: dangain" gi aseig bue" loo nhang: ca" bye.

²⁴Nanu" gi Mangso da" ved, du gung du: yo' phain" to" lho: deing byeung" ziyo' gyeungshang: da" kangso' ein: da" kangso' dei khyoo: aseig moo soo" ge'.

²⁵Houg: yoomo mhau' da" dang: ri atid nyid goo"- yug khang" moo" gi nyang: nya: da" loem" jeung" phung byu mang nhung" phoo ri deingmain" da" dang: za: da tid nyid goo" baja"- Khasu" wim gari ngoonu" dangain" bang: gi Khristu da" gung du: mo akung: ako'' joem za: nghoid nyid boem.

²⁶Nanu" nheig yo: ri hau: yoo: nau da" nheigloem: yo' yooboo akoid nhang: goo"- bidvang sho' we' nheig ayo: nyid goo".

²⁷Yu ri we' vang wa akhang" abyid: nyid goo".

²⁸Lhoung khau" yu" su: gi khau" da" moozoo" ri to" pyam' lho: adoem khoug" loo goo"- ca" yo nyid bang: ri yo" pang" thoug sho' nyang: nya: da" lo, yo' deingmain" da" voem: doug: khu: da" moozoo" ri zei: shid" lo" boem loo: ge'.

²⁹Subi" ri noo, nhang: da" dang: dakhoin" we' nanu" da" nhoid mo athu' nhang: goo"- tam" gyo: nyid bang: akyu" yoo" sho' byu yi ri yo" se' koid so' nyheing byid: ziyo' ca" yo nyid mo, ri yo" pang" thoug byid: da" dang: gi, riza: da tid nyid ge'.

³⁰Hau: tho' moo gootu- gyeungshang: da" venyi ri nheig akug nhang: goo"- Khasu" wim gari hau: gyeungshang: da" venyi gi nanu" ri Mangso seung: nyid khyoo-sagsi: dazid' nghoid lho: Mangso wigi nanu" ri lhoid pyoin kaid' shau" da" bidnyid ju" loo wa ziri koo" kham: kham: byid: su: nghoid nyid.

³¹Houg: yoomo nheigloem: moo no khyoo: nheig khoo" yo: khyoo: nyho: yoid phau: nheung" ziyo' aphoug" akhyoid koid zi anoug angei da" nheigloem: aja: ja: yo' houg: yo' du go" da" khyoo: joem dangain" ziri shoem" shoung: pyam ge'.

³²Hougsu" koid wa da" gung khoo: gi nanu" nyang: cang" nyang: nheig khyeig go" khyoo: nheigloem: nu" nham, ziri toin" shid go" nyid wigi Mangsoo gi Khristu khyo" wigi nanu" da" yooboo ri khyoid pyam byid: bye: ziyo' dakhyoo" ti"- nanu" we' nyang: cang" nya: da" yooboo ri khyoid pyam' byid: go" nyid ge'.