Read Lashi Ephesu 5 Bible Online

Ephesu 5 - Lashi bible

Ephesu 5

¹Nanu" gi Mangso da" jheddab nya: zooyi nghoid boem bye: yoomo nyang: yo' du goo" sho' yoem: kaid' loo" ca" nyid boem bye.

²Khritstu gi nanu" ri jheddab ziyo' nanu" da" shid re" nya: da" gung ri Mangsoo vho: ngei da" nam, pyo: xoin" to' pyam wigi ab, nung" byid: pyam yhang: ti"- nanu" da kangso' khyoo: ri jheddab da" nheigloem: yo' vhoeb khang" nyid ge'.

³Nanu" gi Mangso da" byumyu" yi nghoid beom bye: yoomo youg: shoo: go" da" moozoo"- ayung" alho, da" asam" aved joem yo' vhoo: boo myo, no, da" khyoo: ri nanu" da" nhoid yo' lang" atid' nyid goo.

⁴Aved avhu: da" khoin" co' dang- anyhoin: athoung" da" dang: co, joem- kyang: da" dang: ri tid wa shid re" we' nanu" shid re" adu nghoid da- hau: gung khoo: nanu" gi Mangsoo ri jeju" daboin: nyid ge'.

⁵aco' ajhoid da" nheigloem: boo su- sho' ase' ziyo' phoug" shoid, yen" su- vhoo: boo: loug gyi: su- hang" nghoid loug we' Khristu yo' Mangso da" mungdain mo agyid aso: gam, boem" ri khanham we' yo" kham: yu boem wa anghoid ziri nanu" se' too" ge'- Khasu" wim gari vhoo: boo myo, no' loug gyi: da" khyoo: gi soolhoo: no" da" khyoo: daja: nghoid.

⁶Hang" wigi we' adu: adam: wim, da" dang: nanu" ri ayo" jhu, phyo' pyam' nhang: goo"- Khasu" wim gari hau" khyoo: joem yoomo Mangso nheig khoo" yo: da" khoo: gi atam" gyoo: acang loo" mo, da" atho' moo gyoo" loo wa zi nghoid.

⁷Hougsu" nghoid yoomo houg: yhang: te" da" byu yi yo' dajhi' we' azoem" goo".

⁸Shid' phyang" gi nanu" we' moug: coid' khoug: moo nyid lid lo yu" boem bye- Nghoid loug we' akhid" gi Aseing: da" byumyu" yi bue" lo boem bye: yoomo bidbang khoug: moo ju" vang lo boem bye- hougsu" nghoid yoomo nanu" gi bidbang da" nya: zooyi yhang: ti" zei: so' nyid yab, loo: ge'.

⁹Khasu" wim gari hau: bidbang gi ge da" khyoo: aja: ja: deing byeung" ziyo' deingmain" khyoo: ri myoo" sho' bue" loo nhang: nyid.

¹⁰Aseing: vho: ngei nyid zigi ce: noem nghoid nyid ziri yoem: kaid' lho: jhau" kham: yu nyid ge'.

¹¹Byu yi koid nyid da" moug: coid yo' sen: da" akyu" abo ce" ja: moozoo" moo we' dajhi' lang" abo zei: loo: za: houg: yhang: te" da" moozoo" ri bidbang moo pang shug nyid ge'.

¹²(Khasu" wim gari nyangnu" amyang afu' gau" koid da" moozoo" joem ri khyag tid thu shang ein: rigi tid thu' wa zi lang" gye" sho' cang bo da" moozoo" nghoid nyid.)

¹³Hau: khyoo: joem jo, moo jo, ri bidbang moo to ci: thu' kaid' nghoid rigi nyangnu" asam" aved agung ri bang bang nyang: myang loo wa nghoid.

¹⁴Khasu" wimg gari bidbang gi dangain" ziri pang shug byid: nyid houg: yoomo jhoeom: mungdang: moo tid to" ziri Yhoeb, jo, su: we" too, re'- shid: jo, jang" mo too, re'- houg: lang" Khirstu gi re" tho' moo thoin" pang byid: wa nghoid. ga: wigi tid to.

¹⁵Hougsu" nghoid yoomo nanu" gi khasu" koid lho: kangso' dei so" yen" boem zigi jid" jid" myid yu" nyid ge'- phajhi" abo da" koo" fang: joem yhang: ti" akoid loo: za: phajhi" bo da" byu yi yhang: ti" daso" yen" ge'.

¹⁶Khasu" wim gari akhid" da" bidnyid ayo, joem gi akhyeing" ashoeb, da" bidnyid nghoid nyid yoomo nanu" yo" da" ayo, gi ri goolhoo: za: akyu" boo sho' ci: yhoung: nyid ge'.

¹⁷Hougsu" nghoid yoomo akoo" afang: akoid nyid goo"- hau: Aseing: nang ri zei: nhang: nau da" khyoo: ri yoem: kaid' lho: phoid: sho: zei: so nyid ge'.

¹⁸Yhid: ashug yed, nyid goo"- hau: zigi nanyang: ri lhu: phyo' shoin pyam wa zi nghoid nyid. Hau: gung khoo: venyi: yo' joeb byeung" nyid ge'.

¹⁹Nanu" nyang: cang" nyang- coung" nghei da" jikhoin" dang- venyi loem" jeung" khyoo: yo' sen: da"-gyeungshang: da" lid' jhoem" dang: yo' tid go" nyid lho: nanu" da" emyid khoug: moo Mangsoo ri jikhoin" khoin" wigi coung" nghei nyid boem ge'.

²⁰Nanu" da" ASEING Yesu Khristu da" myeing ri lang: lho: khyoo: khaid gu: khang" moo" moo phoo Mangsoo gi khanham we' jeju" boin: coung" nghei nyid ge'.

²¹Nanu" gi Khirstu ri gyoug phau" da" nheigloem: yoomo nyang: cang" nya: vhoo: moo tam" gyoo: go" nyid ge'.

²²Yhoem: seing: myhi' yi we"- nanu" gi Mangso da" vhoeb khang" khyoo: ri tam" gyo: nyid boem ziyo' dakhyoo" ti"- nanu" yhoem: seing: phoo yi da" vhoeb, khang" khyoo: moo tam" gyo: nyid ge'.

²³Khristu gi hau: phung: da" atho' moo vhuloem bui" wa da" amyeing" akhang" yo" ziyo' dakhyoo" ti"- hau" yhoem: seing: phoo we' yhoem: seing: myhi' da" atho' moo vhuloem bui" wa da" akhang" yo"- Khristu gi nya: gung doem: nghoid nyid da" hau: phoung: da" khyoid yu Aseing: we' nghoid nyid.

²⁴Hau: phung: gi Khristu da" vhoeb da" khyoo: ri kham: yu nyid yhang: ti"- yhoem: seing: myhi' we' yhoem: seing: phoo yi vhoeb khang" da" khyoo: ri bain sho' kham: yu ca" nyid boem.

²⁵Yhoem: seing: pho, we"- Khristu gi hau: phung: ri jheddab yoomo hau: shid re" kangso' ab, noung" pyam byid: yhang: ti"- nanu" da" yhoem: seing: myhi' yi ri hougsu" jheddab nyid ge'.

²⁶Nyang: hougsu" koid da" khyoo: gi phung ri gyid yo' bain ced" kyeung pyam thang: moo nya: mungdang: yo' hau" phung: ri Mangso jhang khyoo: ab, nung" byid: khyoo: nghoid.

²⁷Hougsu" nyang: gi hau" phung: ri yung" lho' gyeungshang: nhang: ziyo' ca" yo da" khyoo: ci" we' aboo- atug atuang akoin: ajoeb, zi anghoid loo: za: joeb byeung" ce" yoo, aboo loo: sho' nya: shid re" ced" young" kyeung shang: yu da" khyoo: nghoid.

²⁸Hougsu" nghoid yoomo yhoem: seing: pho, gi nyang: tu: nya: da" gung du: ri jheddab nyid yhang: ti" nya: da" yhoem: seing: myhi' ri jheddab nyid wa zigi young" du da" khyoo: nghoid- nya: yhoem: seing: myhi' ri jheddab su: gi nya: gung ri nyang: jheddab nyid su: nghoid.

²⁹Hang" nghoid loug we' nyang: nya: da" gung du: ri anoug angei koid nyid su: gi hang" anyid- Khristu gi hau: phung ri coung: goin nyid yhang: ti"- nyhang" gi nyhang" nya: da" gung du: ri coung: goin nyid.

³⁰Hougsu" wigi nyhang" gi nya: da" gung du: mo da" akung: ako'' joem nghoid nyid boem.

³¹Hau" jhoem: mungdang: moo tid to" ziyo' dakhyoo" ti"- He: khyoo: yoomo yug gi zoo: gi nya: myhi' nya: phoo ri to" pyam' kho' lho: nya: yhoem: seing: myhi' yo' shoin" nyid lo" wigi nya: eig yug gidagung dashoo" za: bue" loo wa zi nghoid.

³²He: khyoo: gi jhoem: mungdang: moo tid shed to" da" deingmain" khyoo: dakhaid nghoid wigi Khristu yo' phung: da" khyoo: ri yeung lho: tid zi nghoid ein: ngoo se' gyoo: bye.

³³Nghoid loug we' hau: zigi nanu" yo' we' sen: nyid yhoem: seing: pho, yug khang" moo" gi nya: yheom: seing: myhi, ri nya: gung ri yhang: ti" jheddab nyid ca" wigi yhoem: seing: myhi' yi yug khang" moo" we' nya: yheom: seing: phoo ri gyoug phau" nyid ca".