Read Lashi 1THESALONI 1 Bible Online

1THESALONI 1 - Lashi bible

1THESALONI 1

¹Polu- Sila (Silas) Sivanu (Silvanus) he: da" myeing eig ja: gi Greek mying: mo nghoid wigi dakhyoo" ti" nghoid. Kha: ja: ci: nghoid loug we' ashoid da- Polu yo' Timothi mo wigi Phoo, Mangsoo yo' ASEING Yesu nghoid da" Thesaloni voogung mo phung: byu yi jhang khyoo: mougsoug" lhid" foin: kaid. Jeju" yo' ngeo pyo da" khyoo: gi nanu" moo dajo, jo, baja" o".

²Ngoonu" gi nanu" dangain" bang: shid mo khanham we' jeju" ri dacoung" nghei nyid boem ziyo' ngoonu" da" akyu" mho' dang: moo nanu" da" myeing ri dabo kaid' mho' nyid boem.

³Khasu" wim ga: ri nanu" da" loem" jeung" khyoo: moo zei: nyang: khasu" zei: yhe: lo" nyid boem ziri we' nanu" da" jheddab e" myed yo' khayhi' gyeing" - moozoo" ri zei: so' nyid boem bye: ziri we' ASEING Yesu Khirstu moo nanu" da"

⁴Mang nhung" yi we' Mangsoo nanu" ri jheddab wigi nya: byumyu" yi bue" lo boem wa shid re" khe: yu bye: khyoo: ri nanu" se' nyid boem bye.

⁵Khasu" wim gari-ngoonu" gi hau" ngei bu: lu dang: gi, ri-mung dang: khyo" za: we' anghoid- yoem: vhoo" khyo" we' gyeungshang: da" venyi khyo" we' hau" ngei bu: lu dang: da" deingmain" khyoo: ri bain" sho' nyang: loem" jeung" da" myid' yo" we' nanu" jhang khyoo: ci: re" lho: kho" kyo" boem bye.Ngoonu" gi nanu" yo' dage" nyid nyid da" ayo, moo nanu" ge, loo wa shid re" ngoonu" khasu" koid lho: kangso' dei so" yen" bye: da" khyoo:- nanu" nyang: se' nyid boem bye.

⁶Nanu" gi ngoonu" da" khoo" shid: yo' Aseing: da" khoo" shid: ri yu" yu cang lo" nyid boem bye- nanu" gi kyi" khyeug shen" yhen da" jam jau, myoo" sho' shau" boem nghoid loug we' hau: ngei bu: lu dang: ri gyeungshang: venyi khyo" yo" yu da" gau, yi ngei bu: kang: lung bu, ziyo' lhoem: yu boem abye:.

⁷Houg: su nghoid yoomo nanu" gi Makedoni mung" yo' Akhaia mung" mo loem" jeung" da" byu yi shid khoin" moo akhyoo" again da" khoo" shid: daloem" bue" lo boem bye.

⁸Khasu" wim ga: ri nanu" jang" mo wigi hau" Aseung: da" mungdang: gi Makedoni mung" yo' Akhaia mung" goin" jang" moo fu" nheung lo" ziza: we' anghoid loo- Mangsoo moo nanu" da" loem" jeung" loem, khau: khyoo: ri we' joyoo khyi khang" moo" moo byo ngam, loo" bye- Koug: su" nghoid yoomo nanu" ri citid' cang aboo loo.

⁹Nanu" jang" moo ngoonu" ju" re" da" uri nanu" gi kha: khyo" ngoonu" ri lhoem: tau yu boem bye: da" khyoo: ri we' nanu" gi dadei nyid ziyo' deingmain" nyid da" Mangsoo ri noku loem, khoug: wa shid' re" gug ngu soolhoo: joem rinung phoug pyam lho: Mangso jhang khyoo: khasu" phoug leung: lo boem khyoo: ri we'.

¹⁰Moug: khung: moug: di khyo" ju" ri" wa da" Mangso nya: zoo: ri dalang" nyid boem ziri we' hau" byu yi dangain" mo, gi tid fu" nyid boem abye: go- Hau: nya: zoo: Yesu gi shid: bye: jang" mo Mangso wigi doem dei to'' loo nhang: yoomo ju" loo wa da" Mangso nheig yo: lo bidnyid mo, nanu" ri khyoid khyi: yu su: nghoid nyid.