Read Lashi 1THESALONI 2 Bible Online

1THESALONI 2 - Lashi bible

1THESALONI 2

¹Mang nhung" yi we"- nanu" jhang khyoo: ngoonu" re" da" khyoo: gi-akoem: be" be, anghoid khyoo: ri nanu' nyang: si' gu nghoid abye: go.

²Ngoonu" gi nanu" nyid da" Thesaloni voogung khyoo: ari" shi" uri Philipi voo gung moo ngoonu" ri khayhi' shen" yhen da" khyoo: yo' juang" yi shau" ziri nanu" se' nyid bye- houg: yhang: ti" adu aveing" go" da" thoutheung khyoo: myoo" sho' boo nghoid loug we' nanu" ri Mangso jang" mo ngeibu: lu dang: yo" tid kyoo" wa shid re" ngoonu" da" Mangsoo gi ngoonu" ri asho' agyug da" yoem: moo" byid: too" bye.

³Ngoonu" gi shoid da" khyoo: yo' asain asen" khyo" khoug: lhung: lhoung: ziyo' yug khang" moo" ri mhoug noug fain" nau myid' yo' nanu" ri tid poin" tid kyeing" nau zi anghoid.

⁴Hougsu" koid wa gung khoo:- ngoonu" gi Mangsoo tid nhang": ziyo' dakhyoo" ti"- khanham we' da tid nyid boem-khasu" wim gari Mangsoo gi-nanu" gi moin: yi" mo, nghoid bye: ziri soeb, myang bye: mo, nghoid yoomo hau" ngei bu: lu dang: kho" kyoo" wa shid mo loem, too" bye- ngoonu" gi byu yi vho: ngei boem wa khyo" yoem: kaid' nyid mo, anghoid- nanu" myid soin: da" khyoo: joem ri phoid: sho: pe: yu" se' da" Mangsoo ri vho: ngei nhang: wa shid re" yoem: dakaid' nyid boem.

⁵Khasu" wim ga: ri nanu" goo" lhoo: za: se' nyid boem bye: ziyo' dakhyoo" ti"- ngoonu" gi nanu" jhang khyoo: adeung amain" khyo" mhau' mhoin" da" dang: tid zoore"- houg: su" anghoid lang" gi vhoo: boo myo, no, khyoo: ri nghoeb, to" lho: ju" re" boem, zi anghoid- hau: khyoo: moo Mangsoo nyang: sagsi: nghoid nyid.

⁶Ngoonu" gi sube" wigicoung" nghei byid: da" khyoo:- nanu" jang" mo, we' goo" tu: byu yi jang" mo we' yo" yu sho' yoem: kaid' nyid zi anghoid.

⁷Ngoonu' gi Khristu da" lagyoo: yi nghoid ziyo' dakhyoo" ti"- nanu" jang" mo akho: akhang" yo' mho' wa ga: riyo" mho' nghoid loug we' ngoonu" gi nanu" yo' dage" nyid nyid shi" ayo, moo nya: zooyi ri yu" goin' yu" coung: da" nya: myhi' yhang: ti"- nu" nham ziyo' yu" goin' yu" coung: boem bye.

⁸Nanu" gi ngoonu" da" atho' tid loo: sho' jheddab bang: bue" lo boem bye- Mangso jang" mo ngei bu: lu dang:- we' anghoid- ngoonu" da" kangso rilang" gam byid: pyam wa zigi jen" jen" nghoid nyid boem.

⁹mang nhung" yi we"- ngoonu" khayhi' moozoo" zei lid loo bye: khyoo: ri gyeing" nyang: nanu" boin: so" nyid boem- nanu" ri ce" yoolid: we' afoin:- ajoin, zoo: baja"- ngoonu" gi ngoonu" nya: da" voem: doug: khu: moozoo" ri nyid" ri myen" ri yoem: kaid' zei: so' wigi Mangso ngei bu: lu dang: ri kho" kyo" lo boem bye.

¹⁰Loem" jeung" nyid mo, nanu" da" shid khoin" moo ngoonu" da" aved asam" joem gi gyeungshang: wigi deingmain" ziyo' ce" yooboo we' abo zigi nanu" shid' re" nanu" nyang: sagsi: nghoid boem bye- houg: yo' dakhyoo" ti" Mangsoo we' sagsi: nghoid nyid bye.

¹¹Nya: phoo gi nya: zooyi ri yu" goin, coung: nyid yhang: ti"- nanu" yug khang" moo" ri ngoonu" yu" goin, coung: lid loo bye: khyoo: ri nanu" nyang: se' nyid gu nghoid boem bye.

¹²Ngoonu" gi nanu" ri yoem: byid: khyoo: yo' nheig teing byid: khyoo: koid lid lo yu" boem bye- nya: da" mungdain moo yo" bo vang zoo: wa ziyo' myonhoo: phung yoeb, yo" bo kham: yu goo" baja" ga- nanu' ri khe: yu da" Mangsoo ri vho: ngei nhang: da" kangso' dei khyoo: moo daso" lo" nyid wa shid re" ngoonu" gi xo loo: xo' jhoug" byid: nyid boem bye.

¹³Hau: lho: wigi Mangso jeju" ri anoo: atheing: loo- coung" nghei byid: nyid wa da" khyoo:- gootu: dakhaid bo jo, shi"- nanu" jang" moo ngoonu" hau: Mangso da" mungdang: ri re" kho" kyo" da" uri byu yi da" mungdang: ri yhang: ti" anghoid- Mangso mungdang: nghoid deung nyid ziyo' dakhyoo" ti"- nanu" shau" gyo: wigi loem" jeung" ziyo' lhoem: kham: yu boem bye- hau: mungdang ri loem" jeung" bang: nanu" da" nheigloem: ung: khoug: moo moo" zei: nyid.

¹⁴Mang nhung" yi we"- nanu" moo bue" lo da" thoung" shau" khyoo: joem gi Yuda mung" mo Mangso phung nghoid da" Khristu da" byu yi moo we' thoung" shau" nyid boem- nanu" gi nyhang" nya: moug: mo byu yi da" lo, moo shen" yhen khyoo: thoung" shau" yhang: ti" ngoonu" we' Yuda byumyu" yi da" lo, moo thoung" shau" nyid boem bye.

¹⁵Yuda byu yi ein: bang: gi ASEING Yesu ri we' Lapi: yi ri we' said' pyam nyid bang: nghoid wigi ngoonu" ri we' shen" yhen nyid bang: nyid nyangnu" gi Mangsoo vho: ngei khyo" akoid boem- yug khang" mo" da" aveing" go" da" gyi bue" nyid boem.

¹⁶Tung: bau byumyu" yi khyoid yu zi shau" wa shid re" houg: yo' sen: da" mungdang: ngoonu" dakho" kyo" ri lang" nyangnu" gi toung: nghoed, pyam wa shid re" yoem: kaid' lo boem ago- he: lid khyo" nyangnu" shoid vhang: lid lo yu" bye: da" yooboo joem ri joeb, sho' koid boem abye: go"- Houg: yoomo lo thang jang" moo gi Mangsoo nheig yo: da" khyoo: gi nyangnu" da" atho' moo ju" gyo" loo bye.

¹⁷Ngoonu' we' mang nhung" yi we"- nheig" loem: ung: khoug: khyo" anghoid- gung du: khyo" za: dayo, daboin: nanu" rigye" myid boin: nyid boem ziyo' doem yo" shau" goo" wa shid re" gye' yoem: kaid' nyid boem.

¹⁸Ngoonu" gi nanu" jhang khyoo: gye" loo nau, boem- ngoo nya: gung nyang: nanu" jang" moo doem ju" ri" wa shid re" dalheing: za: anghoid yoem: gye" kaid' yu" bye- nghoid loug we' satan gi ngoonu" ri baid' toem nyid bye.

¹⁹Ngoonu" da" ASEING Yesu doem ju" re" uri nya: shid' khoin" moo gooji hang" we' anghoid- nanu" kyeing" za: ngoonu" da" nheig byu gau yi joyoo yo' oung: doid lo" da" phau: khuang bidmug nghoid nyid.

²⁰Gyeing" nyang: nanu" gi ngoonu" da" myonhoo: phung yoeb yo' gau, yi ngei pyo: joyoo nyang: nghoid bye.