Read Lashi 1THESALONI 3 Bible Online

1THESALONI 3 - Lashi bible

1THESALONI 3

¹Houg: su" nghoid yoomo ngoonu" gi ayo" zeung: nyid boem loo yoomo Athen voogung moongoonu" nyang: kyeing"- nyid gyoo" khoo, wa ein: myid' phyed' boem lho.

²Khristu da" ngei bu: lu dang: kho" kyo" jang" moo ngoonu" dage" za: moozoo" ri voin, vu, nyid da" ngoonu" da" mang nhung" phoo Timothi ri nhang: kaid' boem bye.

³Nanu" mo hang" nghoid loug we' hid: akhid" thoung shau" nyid da" shen" yhen jam, jau khyoo: yoomo loem" jeung" khyoo: moo adei aloeb, goo" baja"- nanu" ri nheig teing ung: teung yoem: byid: wa shid re" nanu" jhang khyoo: nyang: ri nhang: kaid' boem- hid: su" shen" yhen nyid da" khyoo: joem ri ngoonu" thoung" shau" nyid boem zigi yha" shid' re" Mangsoo nyang: myid' soin: to" da" khyoo:- dakhyam" dayam, nghoid nyid ein: wigi nanu" nyang: se' nyid boem bye.

⁴Khasu" wim gari goonu" gi-shen" yhen, pyi: sho: zi shau" ca" boem da" khyoo: nanu" yo' dage' ngoonu" nyid nyid shi" re nyang- nanu" ri lhid' ca" khyoo: tid poin" too" khoo, bye- houg: yo' dakhyoo" ti" akhid" khyag nyang: thoung" shau" nyid bye: ziri nanu" gi goo" lhoo: za: se' nyid boem bye.

⁵Ngoo gi xo' lho: atho' lang" nyid loo: yoomo nanu" da" loem" jeung" khyoo: khasu" bue" nyid da" khyoo: ri se' yu wa shid re" Timothi ri ngoo nhang: kaid' bye- gyeing" nyang: nanu" gi yu zhadain gung" lau" jang" moo bo cang lo" byug boem wigi ngoonu" da" yoem: kaid' loo bye: khyoo: joem gi akoem: be: be: abue" loo" nhang: noug.

⁶Akhid" Timothi gi nanu" jang" moo doem ju" loo bye: nghoid rigi nanu" moo loem" jeung" khyoo: yo' jheddab khyoo: gi je myo: loo bye: ziri gau, kham: yu ge da" lu dang: ri voin, ju" loo bye-nanu" gi ngoonu" ri khanham nghoid loug we' goolhoo: za: myid' boin: jheddab nyid boem tho' moo agoo"- nanu" ri ngoonu" gye" shau" goo" nau, ziyo' dakhyoo" ti" nanu" we' ngoonu" ri shau" myang goo: nau nyid boem da" khyoo: ri lo tid kyoo" bye.

⁷Hougsu" nghoid yoomo mang nhung" yi we"- ngoonu" gi yau: khe" jam jau ziyo' kyi" kyeung zi shau" nyid da" ayo, moo nanu" da" khyoo: ri yo" shaug" gyoo: yoomo yoem: vhoo" yo" yu nyid boem bye- hau: zigi nanu" da" loem" jeung" nheigloem: yoomo yoem: yo" yu khyoo: nghoid.

⁸Khasu" wim ga: ri nanu" gi Aseing: moo dadeing: daloem: za: bue" wigi kangso dei khyoo: moo geing: geing: teing teing yab, jo, yoomo ngoonu" nheig shid: khyo" yo" dei nyid boem bye.

⁹Akhid" koem gi nanu" yoomo ngoonu" da" Mangsoo ri jeju" boin: coung" byid: nyid boem bye- nanu" yoomo Aseung: da" shid' khoin" moo ngoonu" yo" yu da" ngei bu: khyo: shid' re" ngoonu" nyang: ri jeju" yo" boin: coung" ngei nyid boem bye.

¹⁰Ngoonu" gi nanu" yo' myo, moo gyo, nyang: shau" myang goo" wa ziyo' nanu" da" loem" jeung" khyoo: moo ca" nyid shi" gu: ri joeb, byeung" loo nhang: wa shid re" ngoonu" da" e" myed, dangain" ziyo' nya: jhang mho' nyid boem.

¹¹Ngoonu" da" phoo mangsoo nyang: yo' ASEING Yesu Khristu gi ngoonu" ri nanu" jhang khyoo: yo" re" loo wa khyoo: ri nyheing byid: baja".

¹²Nyang: cang" nyang: da" atho' moo we' byu gooji yi dangain" bang: da" atho' moo we' nanu" to" to" da" jheddab nheigloem: gi je je gyi: lo wigi Hau: da" jheddab nheigloem: gi nanu" da" atho' moo ngoonu" to" to" da" jheddab nheigloem: yo' dakhyoo" ti"- gyi: loo wa shid' re" - Aseing: gi nanu" ri pang" thoug byid: baja" o.

¹³He: khyoo: khyo" wigi nyang: gi nanu" ri pang" thoug geung: teing loo nhang: wa zi nghoid- yha" da" Aseing: yesu gi nya: d a" gyeungshang: bang: yo' dage" doem, ju" re" da" uri nanu" gi yha" phoo Mangso da" shid' khoin" moo joeb, byeung" lho: gyeungshang: moin: yi" mo, bue" lo boem wa zi nghoid.