Read Lashi YOSHU 10 Bible Online

YOSHU 10 - Lashi bible

YOSHU 10

¹Yerusalem khokham Adonizedeg gi Yoshu Yerikho voomoo" yo' houg: mo khokham ri koid bye: yhang: ti" nyang: gi Ai voomoo" ri seing: yu wigi voomoo" ri bain sho' phyo' soin' pyam lho: khokham phoo ri we' said pyam khyoo: ri shau" gyo: da:. Nyang: gi Gibeon byu yi Israela byumyu" yi yo' yug yo khyoo: koid wigi nyangnu" phung moo: nyid nyid boem ziri we' shau" gyoo: bye:.

²Khokham zhung: da" voomoo" joem mo Gibeon voomoo" yhi gyi: da" voomoo" daloem we' ajo. Hougsu" nghoid yoomo Yerusalem voobyu yigi gye" gyoug nyid boem ago". Gibeon gi Ai voomoo" tho' je gyi: wigi Ai mo byu yigi gyi khaid sarhi: gi yi nghoid ago".

³Houg: yoomo Adonizedeg gi Hebron khokham Hoham- Yamud khokham Piran- Lakhisha khokham Yaphia- Eglon khokham Debira bang: jhang khyoo: vhoo: mo mungdang: foin: kaid da:.

⁴Hau: zigi «Gibeon voomoo" ri ngoo gyi yhe: khaid zain: wa re" bo pang" ge'. Ciwim gari hau: voobyu yigi Yoshu yo' Israela byumyu" yi yo' yug yo khyoo: koid to" abye: go"» ga: zi nghoid.

⁵Hau: Amori khokham wim: yug nghoid da" Yerusalem- Hebron- Yamud- Lakhisha- Eglon khokham yigi gyi yoem: shoin" wigi Gibeon ri re" vang: ziyo' hau: voomoo" ri gyi zain: abye: go".

⁶Gibeon byumyu" yigi Gigala joyoo moo dab koid wigi nyid da" Yoshu jang khyoo: «Ludaid phoo we"- ngoonu" ri ashe: pyam too". Akhid" nyang: ngoonu" ri re" pang" yu we'. Ngoonu" ri re" khyoid yu we'. Boem moug: moo nyid boem da" Amori khokham dangain" gi gyi yoem: shoin" lho: ngoonu" ri gyi re" zain: abye: go"» ga: dang: pyeung: kaid da:.

⁷Houg: yoomo Yoshu yo' nya: gyidab goin"- ge thang da" gyizoo: yi we' bo wigi Gigala mo to' yhe: lo" ago".

⁸Aseing gi Yoshu ri «Houg bang: ri agyug goo". Ngoo gi nang ri oung: doid wa ziri byid: too" gu nghoid bye:. Nyangnu" mo dayug we' nanu" ri gyi ayo" khaid goo" wa» ga: tid da:.

⁹Yoshu yo' nya: gyizoo: yigi myen goin" Gigala mo Gibeon khyoo: yhe: lo" ago". Houg: lho: nyangnu" gi Amori byu yiri nyeigdain tung" gyi yhe: zain: ago".

¹⁰ASEING gi Amori byu yiri Israela gyidab da" myo, jang moo: byoo dain byooshoo" bui" nhang: pyam da:. Israela byumyu" yigi Gibeon moo: nyangnu" ri said pyam wigi nyangnu" ri Bed Horon boem gyoo: bau gyoo" cang lho: mougpyi: shoid Azeka yo' Makeda ju" sho' xo' lho: cang khaid zain: da:.

¹¹Amori byu yi Israela gyidab mo boem gyoo: khyo" tang" phang: gyoo" lo" nyid boem uri ASEING gi Azeka khyoo: ju" sho' nyangnu" adang moo Leigvoo cab khayhi' yhi zi gyo" zang" nhang: da:. Israela byu yi lo, mo tho' leigvoo wigi said pyam zi je myo: da:.

¹²Israela byu yi Amori byumyu" yi adang moo: ASEING wigi oung: doid nhang: da" bidnyid moo: Yoshu gi ASEING ri dang: ji da:. Nyang: gi Israela byumyu" yi shidkhoin" moo: «Bid we"- Gibeon adang moo: theing: jo, we' Lhammoo" we"- Aiyalon janggyoin: adang moo: theing: jo, we"» ga: tid da:.

¹³Byumyu" yi nyangnu" gyivoo yiri oung: pyam sho' bid gi theing: jo, wigi lhammoo" gi ayu: nghoid da:. He: khyoo: ri Yoshara da" soug" pug moo: lhid" to" da:. Bid gi moug: gung moo: theing: jo, wigi danyid" goin" avang nghoid da:.

¹⁴ASEING gi xangsu: byu da" dang: gyo: byid: wigi shid phyang" we' abue" yu"- thang: phyang" we' abue" da" hid yhang: te" bidnyid ri bui" nhang: bye:. ASEING gi Israela byumyu" yi shoid khyo" meing: bo zain: byid: da:.

¹⁵Hau: zi bain thang: ri Yoshu yo' nya: gyidab gi Gilgala mo dab khyoo: doem tau" lo" ago".

¹⁶Nghoid loug we' Amori khokham wim: yug gi phang: loid lo" wigi Makeda lug khyung: moo gau" nyid boem ago".

¹⁷Nyangnu" ri byu dayug yug yhe: myang wigi nyangnu" gau" jo, da" joyoo ri Yoshu ri tid kyo" da:.

¹⁸Nyang: gi «Hau: lug khyung: nhoid moo lugzeing moo" joem yo' yhe: doin: lheing: jhid too" we'. Goem loem bang: dayham" ri hougmoo: nyhid: too" ge'.

¹⁹Nghoid loug we' nanyang: gi houg moo anyid nyid. Gyivoo yi thang: xo' wigi cang khaid lho: nungthang khyo" nyangnu" ri khaid zain we'. Nyangnu" ri nyangnu" voomoo" joem khyoo: aloo" nhang: goo". Nanu" ASEING Mangsoo gi nanu" ri nyangnu" adang moo: oung: doid nhang: bye:» ga: tid.

²⁰Yoshu yo' Israela byumyu" yigi nyangnu" ri said pyam ago". Nghoid loug we' dayham" gi nyangnu" voomoo" vang khyam khoug: moo: gau" nyid boem yoomo said pyam zi ashau" nghoid ago".

²¹Hau: thang: Yoshu da" byu yi dangain" bang: gi Makeda mo dab khyoo: nya: jhang goem loem tung" tau" ju" lo ago". Hau: mung" moo: nyid mo, dayug we' Israela byu yiri yooboo foin: da" dang: lang" avoem" tid goo" nghoid da:.

²²Hau: thang: Yoshu gi «Lug khyung: nhoid ri phang wigi hau: khokham wim: yug ri nga" jhang shu" loo ge'» ga: tid.

²³Houg: yoomo lug khyung: nhoid ri phang wigi Yerusalem- Hebron- Yamud- Lakhisha yo' Eglon khokham yiri shu" thu lo wigi

²⁴Yoshu jang" khyoo: shu" lo" ago". Hau: thang: Yoshu gi Israela byu dangain" ri nya: jhang khe: yu wigi nyang: yo' dage" meing: zain: re" da" gyizoug: yiri re" lho: nyangnu" khyid: wigi khokham yi da" leung zeung: moo nang: wa shid re" amyeing" byid: da:. Nyangnu" we' hougsu" koid bye:.

²⁵Hau: thang: Yoshu gi nya: gyizoug: yiri «Agyug goo"- yoem: ashoin: goo". Myid phyed wigi loem jeing" nyid ge'. Ciwim gari: he: zigi nanu" gyivoo joem dangain" ri ASEING hid su" koid wa da" khyoo: nghoid da» ga: tid.

²⁶Hau: thang: Yoshu gi khokham yiri said pyam wigi seiggam wim gam moo houg bang: ri lhang" to" da:. Nyangnu" manggung gi houg moo myen" thang: ju" sho' jo, jo, da:.

²⁷Bidvang yo, ri Yoshu gi nyangnu" manggung ri yu khyo' lho: akhang: nyangnu" gau" nyid da" lug khyung: moo nyangnu" ri du" zei pyam wa amyeing" byid: da:. Lug khyung: nhoid mo lugboem moo" zeing joem yo' myhid" pyam wigi akhid nyid" ju" sho' hau: zigi hougmoo: jo, da:.

²⁸Yoshu gi hau: bidnyid moo: Makela yo' houg mo khokham ri gyi zain: wigi seing: yu pyam da:. Nyang: gi hau: voomoo" moo: nyid da" yugkhang" moo" ri said pyam da:. Dei zi dayug we' adeing loo: nghoid da:. Nyang: gi Yerikho khokham ri koid lid loo bye: khyo" Makela khokham ri koid bye:.

²⁹Hau: thang: Yoshu yo' nya: gyidab gi Makeda mo zi Libna khyoo: yhe: lo" wigi hau: ziri meing: yhe: zain: bye:.

³⁰ASEING gi he: voomoo" yo' khokham adang moo we' Israela byumyu" yiri oung: doid nhang: bye:. Nyangnu" dayug ri we' ateing too" loo: za: houg moo nyid da" yugkhang" moo" ri said pyam ago". Nyangnu" Yerikho khokham ri koid yhang: ti" nyang: hau: khokham ri we' koid bye:.

³¹Hau: thang: Yoshu yo' nya: gyidab gi Libna mo zi Lakhisha khyoo: xo' yhe: lo" wigi hau: ziri yhe: vang: zain: abye: go".

³²ASEING gi meing: zain: pui" eig nyid" ein: nyid" mo: Lakhisha bang: adang moo: Israela byumyu" yiri oung: doid nhang: bye:. Nyangnu" gi Libna moo koid lid loo bye: ziyo' dakhyo" adei hang" ri we' ateing too" loo za: hau: voomoo" mo byu yugkhang" moo" ri said pyam bye:.

³³Gezera khokham Horam gi Lakhisha ri pang" wa ju" re" da:. Nghoid loug we' Yoshu gi nyang: yo' nya: gyidab ri khaid zain: oung: pyam wigi nyangnu" mo adei dayug we' adeing loo nghoid ago".

³⁴Hau: thang: Yoshu yo' nya: gyidab gi Lakhisha mo zi: Eglon khyoo: yhe: wigi hau: ziri vang: lheing to" lho: meing: zain: bye:.

³⁵Nyangnu" gi hau: nyid" ri hau: voomoo" ri seing: yu wigi Lakhisha ri nyangnu" koid lid loo bye: yhang: ti" houg mo yugkhang" moo" ri we' said pyam bye:.

³⁶Hau: thang: Yoshu yo' nya: gyidab gi Eglon mo zi boem moug: Hebron khyoo: do, yhe: lho: meing: yhe: zain: wigi

³⁷Hau: ziri seing: yu pyam bye:. Nyangnu" gi khokham phoo ri we' voomoo" moo: nyid bang: we' voomoo" aqei ayam moo: nyid bang: ri we' yugkhang" moo" ri said pyam ago". Yoshu gi Eglon ri koid bye: ziyo' dakhyo" hau: voomoo" ri bain sho' phyo' shoin pyam bye:. Hougmoo: nyid bang: dayug we' adei adeing: loo nghoid ago".

³⁸Hau: thang: Yoshu yo' nya: gyidab bang: gi Debira khyoo: doem tau" lo wigi hau: ziri meing: lo zain: ago".

³⁹Nyang: gi hau: voomoo" ri we' khokham ri we' hau: voomoo" da" aqei: ayam moo: jo, da" voogung dangain" ri we' seing: yu pyam' da:. Nyangnu" houg mo yugkhang" moo" ri said pyam da:. Yoshu gi Hebron- Libna yo' hau: mo khokham phoo ri koid bye: ziyo' dakhyo" Debira yo' houg mo khokham ri koid bye:.

⁴⁰Yoshu gi mung" goin" ri oung: pyam da:. Nyang: gi boem moug:- bidthu shoid boug zoin" joem bidvang shoid boem khyid: joem yo' hau: mung" da" mougpyi: shoid moug: kyug meing: joem mo khokham yiri khaid oung: pyam da:. Nyang: gi dayug ri we' ateing too" loo: yugkhang" moo" ri said pyam da:. He: zigi Israela da" ASEING Mangsoo byid: to" da" amyeing" dang: yo' dakhyo" nghoid da:.

⁴¹Yoshu da" gyi khaid so" yen" zigi mougpyi: shoid Kadesha Barnea mo gyid yam mo Gaza ju" sho' Goshen mougmyid dangain" bo wigi mougzhung: shoid Gibeon ju" sho' nghoid da:.

⁴²Yoshu gi hau: khokham yi dangain" yo' nyangnu" mougmyid joem ri gyi dalheing: so" khaid lheing: yen" ri oung: pyam da:. Ciwim gari Israela da" ASEING Mangsoo gi Israela shid re" gyi khaid byid: wigi nghoid da:.

⁴³Hau: thang: Yoshu yo' nya: gyidab gi Gilgala mo dab khyoo: doem tau" lo" ago".