Read Lashi YOSHU 11 Bible Online

YOSHU 11 - Lashi bible

YOSHU 11

¹Israela yi da" oung: doid da" khyoo: lu dang: ri Hazora khokham Yabin shau" gyoo: lang" nyang: gi Madon khokham Yobab- Shimron khokham- Akhashab khokham yo'

²mougzhung: shoid boem moug: cang- Galile thoem" mougpyi: shoid Yodan janggyoin: cang- boem khyid: cang- Dora nham mo gyid yam cang mo khokham yiri dang: pyeung: kaid da:.

³Nyang: gi Yodan gyid lang eig shoid goin" moo nyid da" Khanan byu- Amori byu- Hiti byu- Perizi yo' boem moug: mo Yebusi- Mizpa mung" mo Hermon boem khyid: moo: nyid boem da" Hivi byu yiri we' dang: pyeung: kaid da:.

⁴Nyangnu" gi nyangnu" gyizoo: yi dangain" yo' ju" re" da:. Hau: gyizoo: yigi panglai: gyid yam mo midcoo: myoo' myo: da:. Nyangnu" gi myang: yo' gyi myang rheing" we' myoo" sho' yo" da:.

⁵Hau: khokham dangain" gi gyi yoem: shoin" wigi Israela byumyu" yiri meing: zain: wa shid re" Merom gyid gyung: zoo: moo dab koid wigi nyid boem ago".

⁶ASEING gi Yoshu ri «Houg: bang: ri agyug goo". Nab yo nyid" he: ayo, ri ngoo gi Israela shid re" houg bang: dangain" bang: ri said pyam byid: wa. Nanu" gi nyangnu" da" myang: joem ri khyid: gyi: khyau" pyam byid: wigi nyangnu" gyi myang rheing" ri nghe' pyam goo" wa zi nghoid» ga: tid.

⁷Houg: yoomo Yoshu yo' nya: byu yi dangain gi Merom gyid gyung: zoo: moo nyangnu" ri nyeigdain tung" meing: yhe: zain: da:.

⁸ASEING gi Israela byumyu" yiri houg: bang: adang moo: oung: doid pyam nhang: da:. Israela byumyu" yigi houg: bang: ri meing: zain: wigi mougzhung: shoid Misrephod Maim yo' Sidon fi' ju" sho' yo' bidthu shoid Misapha janggyoin: ju" sho' cang khaid zain: ago". Meing: zain: zigi gyivoo yi adei hang" we' adeing loo: sho' xo' khaid ago".

⁹Yoshu gi ASEING amyeing" byid: to" da" khyo" houg: bang: ri koid bye:. Nyang: gi nyangnu" myang: ri khyid: gyi: phyed pyam lho: nyangnu" da" gyi myang: rheing" ri nghe' pyam da:.

¹⁰Hau: thang: Yoshu doem tau" lo wigi Hazora ri lo seing: pyam lho: houg: mo khokham ri said pyam da:. (Hau: pyaid mo Hazora gi hau: khokham mungdain: joem dangain" mo yoem: bo thang zi nghoid da:.)

¹¹Nyangnu" gi houg mo yugkhang" moo" ri said pyam ago". Dayug ri we' adei ateing too" nghoid ago". Voomoo" ri we' nghe' pyam ago".

¹²Yoshu gi hau: voomoo" dangain" yo' khokham yiri seing: pyam wigi ASEING da" dei zoo: Moshe amyeing" byid: to" ziyo' dakhyo" yugkhang" moo" ri said pyam bye:.

¹³Nghoid loug we' Israela byumyu" yigi Yoshu nghe' pyam da" Hazora voomoo" mo lid wigi myid boem" tho' moo: koid to" da" voomoo" daloem: ri we' anghe' pyam nghoid ago".

¹⁴Israela byumyu" yigi phoug" dab ja: dangain" hau: voomoo" mo yhoem: gougnyhoug dangain" ri nyangnu" nya: shid re" seing: yu ago". Nghoid loug we' byu yugkhang" moo" rigi said pyam ago". Dayug ri we' adei ateing too" loo: nghoid ago".

¹⁵ASEING gi nya: amyeing" dang: ri nya: dei zoo: Moshe ri byid: to" lho: Moshe gi Yoshu ri byid: da:. Yoshu gi hau: joem ri tam" gyoo: cang yhe: da:. Nyang: gi ASEING wigi Moshe ri amyeing" byid: to" da" ja: khang" moo" ri cang koid da:.

¹⁶Yoshu gi mung" dangain" ziri seing: yu da:. Hau: zigi boem moug: yo' boem khyid: jang: dam joem mougzhung: mougpyi: eig shoid goin"- Goshen mougmyid dangain" yo' houg: mo mougpyi: shoid moug: kyug- Yodan gyid lang janggyoin: ju" sho' da" mougmyid dangain" nghoid da:.

¹⁷Mougpyi: shoid Edom nam moo: jo, da" Halag boem mo mougzhung: shoid Balgad ju" sho' Hermon boem da" mougpyi: shoid Lebanon janggyoin: ju" sho' rua da:. Yoshu gi he: mougmyid mo khokham yi yo' ayo, myang" sho' meing: khaid zain: ago". Nghoid loug we' nyangnu" dangain" bang: ri meing: zain: oung: pyam wigi houg: bang: ri said pyam da:.

¹⁹Israela byu yi yo' yug yo khyoo: koid da" voomoo" gi Hivi byu yi dayham" bang: nyid boem da" Gibeon voomoo" daloem kyeing" nghoid da:. Gootu: dangain" rigi meing: zain: pui" moo: oung: yu zi nghoid da:.

²⁰ASEING gi nyangnu" ri Israela byumyu" yi adang moo: meing: zain: wa nheigloem: yoem: kaid byid: da:. Houg: yoomo nyangnu" bain sho' phyo' shoin' pyam lho: nheig khyeug myid aboo loo: dangain" ri said pyam shau" wa dang: phyed zi shau" ago". He: zigi ASEING wigi Moshe ri amyeing" byid: to" zi nghoid da:.

²¹Hau: ayo, moo Yoshu gi yhe: lho: boem moug: nghoid da" Hebron- Debira- Anab- Yuda yo' Israela mo boem moug: dangain" jang" moo nyid da" Anakim ga: da" byu zeing byumyu" joem ri we' said toem" pyam da:. Yoshu gi houg: bang: yo' nyangnu" voomoo" joem ri said toem" phyo' shoin' pyam byid: da:.

²²Israela mung" moo: Anakim byu yi dayug we' anyid loo goo" nghoid da:. Nghoid loug we' Gaza- Gad yo' Ashdod moo: dajhi zoo: nyid deing jo, shi" ago".

²³Yoshu gi ASEING wigi Moshe ri amyeing" byid: to" ziyo' dakhyo" da mungdain: goin" ziri seing: pyam bye: da:. Yoshu gi Israela byumyu" yiri nyangnu" mougmyid khyo" hau: mungdain: ri: byukung: khyo" cang lho: kho' byid: da:. Houg: yoomo byumyu" yigi gyi zain: go" jang" moo theing: nyid boem ago".