Read Lashi YOSHU 14 Bible Online

YOSHU 14 - Lashi bible

YOSHU 14

¹Yodan gyid lang bidvang shoid Khanan mung" ri Israela byumyu" akhoug: moo khasu" kho' gam byid: ein: da" zhayhen" nghoid. Khainjung Eleaza- Num da" nya: yuggi zoo: Yoshu yo' Israela byumyu" kung: yi yhoemkhung: vhujhung: yigi hau: mougmyid ri byumyu" yi akhoug: moo kho' gam byid: ago".

²ASEING gi Moshe ri amyeing" byid: to" ziyo' dakhyo" Yodan gyid lang bidvang shoid mo byumyu" goug: myu" yo' damyu" gi agung dayi" yi" da" mougmyid joem ri me" lab lho: kho' gam wa shid re" myid phyed ago".

³Moshe gi Yodan gyid lang bidthu shoid mo mougmyid rigi gootu: eig myu" dakhyam" da" bang: ri kho' gam byid: gu nghoid bye:. (Yoseb da" amyed ashen yigi Manashe yo' Ephrim ga: eig myu" kho' to" ago"). Nghoid loug we' Moshe gi Levi byumyu" yiri mougmyid abyid: nghoid da:. Hau: gungthid nyangnu" gi nyid wa voomoo" joem yo' nyangnu" nu: kyung yang kyung shid re" pa: dain" shau" kham: yu ago".

⁵Israela byumyu" yigi ASEING wigi Moshe ri amyeing" byid: to" ziyo' dakhyo" mougmyid ri kho' yu ago".

⁶Danyid" ri Yuda kung: mo byu dayham" gi Gilgala khyoo: Yoshu jhang re" lo ago". Nyangnu" mo dayug nghoid da" Kenizi kung: mo Yephune da" yuggi zoo: Khaleb gi Yoshu ri «Kadesha Barnea moo nang yo' nga" khyoo: yo' sen: wigi Mangso byu Moshe ri ASEING citid ziri nang si gu nghoid da:.

⁷Ngoo gi he: mung" khyoo: jooyu" wa shid re" Kadesha Barnea mo ASEING da" dei zoo: Moshe wigi ngoo ri nhang: kaid uri apyaid myid: xi: zain nghoid bye:. Ngoo gi nyang: ri lu dang: deingmain" jo ziri lo tid kyoo" bye:.

⁸Nghoid loug we' ngoo yo' dage" cang da" bang: gi ngoonu" da" byumyu" yiri gyoug nhang: ago". Nghoid loug we' ngoo gi nga" ASEING Mangsoo ri jhug zug tung" tam" gyo: cang yhi: bye:.

⁹Ngoo hougsu" koid yoomo ngoo yo' nga" zoo: yigi ngoonu" da" mougmyid jonu" khyo" ngoo so" lid lo" da" mougmyid ri gyeing" nyang: yo" kham: yu wa ga: Moshe gi ngoo ri dangsoo" byid: too" bye:.

¹⁰Nghoid loug we' akhid" yu" we'. ASEING Moshe ri tid jang" mo myid: xe: wim: zain nghoid loo" bye:. Israela byumyu" yi dain" pyoid yoo moo: lid phyed lo" uri ASEING wigi dangsoo" byid: ziyo' dakhyo" ngoo ri akhid nyid" ju" sho' nyang: kangso' dei nhang: da:. Ngoo ri yu" we' ngoo gi shid xe: wim: zain nghoid bye:.

¹¹Ngoo gi Moshe ngoo ri nhang: kaid uri yo' dakhyo" akhid" nyid" yoem: bo yang" nyid shi". Ngoo gi gyi khaid pui" shid re" we' gootu: ce: ja: shid re" we' yoem: bo nyid ashi".

¹²Akhid" ngoo yo' nga" byu yi lu dang: lo kyo" da" bidnyid moo: ASEING ngoo ri dangsoo" byid: da" hau: boem moug: ngoo ri byid: we'. Anag ga: da" byu zeing damyu" gi hougmoo: vang khyam gye" gyi: da" voomoo" moo: nyid boem da" khyoo: ri nang ri ngoonu" tid kyoo" bye:. ASEING gi ngoo yo' dage" nyid wigi ASEING tid to" ziyo' dakhyo" ngoo gi nyangnu" ri khaid thu' pyam wa» ga: tid da:.

¹³Yoshu gi Yephune da" nya: yuggi zoo: Khaleb ri mainkaid byid: wigi nya: mougmyid jonu" khyo" nyang: ri Hebron voomoo" byid: da:.

¹⁴Hebron gi Kenizi kung: mo Yephune da" nya: yuggi zoo: Khaleb da" amyed ashen yi seing: nyid boem ashi". Ciwim gari: nyang: gi Israela ASEING Mangsoo ri jhug zug tung" tam" gyo: cang yhi: yoomo nghoid da:.

¹⁵Hebron ri shid phyang" gi Arba voomoo" ga: myheing ago". (Arba gi Anag da" zoo: mo gyi: thang yug nghoid.) Akhid" mungdain: moo meing: pyo: nyid da:.