Read Lashi YOSHU 17 Bible Online

YOSHU 17 - Lashi bible

YOSHU 17

¹Yodan gyid lang bidvang shoid mung" dadu ri Yoseb da" zooshid" yuggi zoo: Manashe da" amyed ashen yi dayham" ri kho' gam byid: da:. Yodan gyid lang bidthu shoid mo Gilead yo' Bashan mougmyid ri Makhira yhoemkhung: ri byid: da:. Ciwim gari: nyang: gi gyi khaid sarhi' nghoid da:. Makhira gi Manashe da" zooshid" yuggi zoo: nghoid wigi nyang: gi Gilead da" nya: phoo nghoid da:.

²Yodan gyid lang bidvang shoid mougmyid ri gi deing da" Manashe byumyu" yhoemkhung: yiri gam byid da:. Houg: bang: gi Abieza- Heleg- Asriela- Shekhem- Hephera yo' Shemida bang: nghoid. Hid: bang: gi Yoseb da" yuggi zoo: Manashe da" amyed ashen yuggi zoo: yi nghoid. Nyangnu" gi yhoemkhung: vhujhung: yi nghoid.

³Manashe nya: yuggi zoo: Markhira- Markhira nya: yuggi zoo: Gilead- Gilead nya: yuggi zoo: Hephera- Hephera da" nya: yuggi zoo: Zelopha gi yuggi zoo: dayug we' ayo" nghoid da:. Nghoid loug myiyi: zoo: yi za: yo" da:. Nyangnu" da" myeing joem gi Mala- Noa- Hogla- Mikha- Tirza bang: nghoid ago".

⁴Nyangnu" gi khainjung Eleaza- Num da" nya: yuggi zoo: Yoshu yo" vhujhung: yi jang" khyoo: yhe: wigi «Ngoonu" da" yuggi bidnoem yi yhang: ti" mougmyid dadu ri seing: yu wa shid re" ngoonu" ri byid: wa khyo" ASEING gi Moshe ri amyeing" byid: to" da» ga: tid boem. Hougsu" ASEING amyeing" byid: to" ziyo' dakhyo" nyangnu" ri nyangnu" da" yuggi bidnoem yi yo' dage" mougmyid ri kho' gam byid: da:.

⁵Manashe byumyu" mo yuggi amyed ashen yi yo' dayhang: ti" myiyi: amyed ashen yiri we' mougmyid kho' gam byid: zi shau" yoomo Manashe byumyu" yigi Yodan bidthu shoid mo Gilead yo' Bashan we' wigi gootu: gamboem daxi: loem: shau" kham: yu ago". Gilead moug: gi gootu: deing da" Manashe da" amyed ashen yiri kho' gam byid: da:.

⁷Manashe byumyu" yi da" mougmyid gi Ashera mo zi Shekhem bidthu shoid Mikmetha ju" sho' nghoid da:. Houg: lho: mougkyoo" gi mougpyi: shoid Entapua byumyu" yi nyid boem da" moug: khyoo: ju" lo" da:.

⁸Tapua lheing khoem mo mougmyid joem ri Manashe bang: seing: da:. Nghoid loug we' mougkyoo" mo Tapua voogung rigi Ephrim da" amyed ashen yi seing: ago".

⁹Houg: lho: mougkyoo" gi Kana gyid lang zoo: khyoo: gyoo" lo" da:. Hau: mougmyid gi Manashe bang: da" mougmyid moo: boo nghoid loug we' gyid lang zoo: mougpyi: shoid mo voomoo" joem gi Ephrim bang: seing: ago". Manashe bang: da" mougkyoo" gi gyid lang zoo: mougzhung: shoid khyoo: cang lo" wigi Meing: gung panglai: moo: lo" thang da:.

¹⁰Ephrim gi mougpyi: shoid- Manashe gi mougzhung: shoid Meing: gung panglai: gi nya: tang: da" bidvang shoid mougkyoo" nghoid da:. Ashera gi mougzhung: bidvang shoid- Isakha gi mougzhung: bidthu shoid moo: jo, da:.

¹¹Manashe gi Isakha yo' Ashera mougmyid agyoo: mo Bed Shan yo' Ibleam- hau: voomoo" eig loem ri lheing khoem to" da" voogung joem yo' dage" Dora (gyid yam moo jo,) Endora- Tanag- Megido yo' hau: joem ri lheing khoem mo voogung joem ri we' seing: ago".

¹²Nghoid loug we' Manashe byumyu" yigi hau: voomoo" joem moo nyid boem da" byu yiri ayo" khaid thu pyam nghoid ago". Houg: yoomo Khanan byumyu" yigi houg moo xo' nyid boem ago".

¹³Israela byumyu" yi yoem: je bo re" da" ayo, rilang" nyangnu" gi Khanan byumyu" yi dangain" ri akhaid thu nghoid da:. Nghoid loug we' nyangnu" gi houg: bang: ri nyangnu" shid re" moo" doin: zeig zei: nhang: da:.

¹⁴Yoseb da" amyed ashen yigi Yoshu ri «Ngoonu" da" mougmyid khyo" hau: moug: dadu za: nang ngoonu" ri ciwim byid: la". ASEING wigi ngoonu" ri mainkaid byid: yoomo ngoonu" gi gye" myo: ri" bye:» ga: tid.

¹⁵Yoshu gi «Nanu" gye" myoo: yoomo Ephrim boem moug: gi nanu" shid re" nge nghoid rigi seig moo" yoo khyoo: vang yhe: wigi Perizi yo' Rephim byu yi mougmyid ri nanu" shid re" lo" byen yu ge'» ga: phoug tid.

¹⁶Nyangnu" gi «Boem moug: gi ngoonu" nyid wa shid re" agyi: shi" nghoid da:. Nghoid loug we' Bed Shan yo' Yezerela janggyoin: lheing khoem to" da" jang: pa: joem moo: nyid boem da" Khanan byu yigi joto' gyi myang: rheing" yo" ago"» ga: tid.

¹⁷Yoshu gi Ephrim yo' bidvang shoid mo Manashe kung: bang: ri «Gyeing" nyang: nanu" gi gye" myo: ziyo' nanu" gi yoem we' gye" bo lo ago". Nanu" gi gamboem daboem tho' je yoo" wa zi nghoid.

¹⁸Boem moug: gi nanu" moug: nghoid ri" goo" wa. Hau: zigi seig moo" yoo nghoid loug we' nanu" gi hau: ziri byen pyam wigi dashoid mo thang: dashoid dangain" ri seing: yu ri" goo" wa. Khanan byumyu" yiri gi nyangnu" joto' gyi myang rheing" yo" wigi yoem: bo da" byumyu" yi nghoid loug we' nanu" gi houg: bang: ri khaid thu' pyam ri" goo" wa» ga: tid.