Read Lashi YOSHU 18 Bible Online

YOSHU 18 - Lashi bible

YOSHU 18

¹Nyangnu" hau: mung" ri oung: pyam thang: ri Israela byu phung: goin" Shilo joyoo moo foem: phung: nyid wigi ASEING shidkhoin" moo Zoem" ri zhug to" ago".

²Hougmoo: nyangnu" mougmyid gamboem akho' byid: shi" da" Israela byumyu" nyhed kung: nyid boem ashi".

³Houg: yoomo Yoshu gi Israela byumyu" yiri «Nanu" phoug" phyid" yi da" ASEING Mangsoo nanu" ri byid: to" da" mung" ri yhe seing: yu wa ziri khamyhang ju" sho' lang" nyid shi goo" wa ein: la".

⁴Dakung: mo byu soem" yug yug ngoo ri khyen: byid: ge'. Ngoo gi houg: bang: ri nyangnu" mougmyid jonu" khyo" nyangnu" vho: da" mougmyid ri yhe: kho' yu goo" wa shid re" mung" goin" khyoo: nyangnu" ri ngoo nhang: kaid wa. Hau: thang: nyangnu" nga" jang" khyoo: doem tau" loo ca" wa zi nghoid.

⁵Hau: mougmyid ri nyangnu" akhoug: moo: nyhed du kho' gam wa zi nghoid. Yuda gi hau: da" mougpyi: shoid moo: yo' Yoseb gi hau: da" mougzhung: shoid mougmyid moo: theing: nyid wa.

⁶Hau: moug: du nyhed du ri gooloo: lhid" xoem" yu wigi nga" jang" khyoo: ci: loo ge'. Houg: lang" ngoo gi nanu" shid re" ngoonu" ASEING Mangsoo moo: me" lab khyo" wigi tid kyeing byid: wa.

⁷Nghoid loug we' Levi byumyu" yigi deing da" nanu" yhang: ti" mungdain: gamboem ri shau" seing: yu wa zi anghoid. Ciwim gari: nyangnu" gamboem gi ASEING da" khainjung yi khyo" dei byid: wa zi nghoid da:. Houg: lho: Gad- Ruben yo' bidthu shoid Manashe byumyu" yigi nyangnu" mougmyid ri Yodan bidthu shoid moo shau" yu too" bye: zi nghoid da:. Hau: zigi ASEING da" dei zoo: Moshe wigi nyangnu" ri byid: to" zi nghoid» ga: tid.

⁸Hau: byu yiri Yoshu gi «Mungdain: goin" khyoo: khyang: sho' yhe: wigi mougkyoo" yhe: xoem" to" lho: nga" jhang khyoo: doem tau" loo ge'. Houg: lang" he: Shilo joyoo moo: me" lab khyo" wigi nanu" shid re" ASEING ri ngoo tid kyeing byid: wa» ga bain pyeing: thang: ri mungdain: mougkyoo" dangain" ri yhe: lhid" xoem" wa shid re" to' lo" ago".

⁹Houg: yoomo hau: byu yigi mung" goin" khyoo: yhe: wigi voogung myeing zhayhen" joem ri lhid" xoem" yu lho: nyangnu" mougmyid ri nyhed du kho' gam da" khyoo: ri lhid" xoem" ago". Hau: thang: nyangnu" gi Shilo mo Yoshu nyid da" dab khyoo: doem tau" lo" ago".

¹⁰Yoshu gi houg: bang: shid re" me" lab khyo" wigi ASEING mo tid kyeing byid: lho: Israela byumyu" yi mo deing jo, da" byumyu" khang" moo" ri mungdain: mo mougmyid dadu du ri kho' gam byid: da:.

¹¹Benyamin kung: mo yhoemkhung: bang: seing: yu wa da" mougmyid ri xang: shi" kho' gam byid: da:. Nyangnu" mougmyid gi Yuda kung: yo' Yoseb kung: bang: agyoo: mo nghoid da:.

¹²Mougzhung: shoid mo nyangnu" da" mougkyoo" gi Yodan gyid lang mo zi Yerikho mougzhung: shoid boem zoin" khyoo: do, lo" lho: bidvang shoid khyoo: boem moug: khyoo" lid phyed yhe: lho: Bethaven dain" phyoid yoo ju" sho' nghoid da:.

¹³Mougkyoo" gi xo' lho: Luza (Bethela ga: we' myheing da") mougpyi: shoid boem zoin" khyo" yhe: lo" wigi Bed Heron vho: du mougpyi: shoid boem tho' mo jo, da" Atarod Adara khyoo: gyoo" lo" da:.

¹⁴Hau: thang: mougkyoo" gi goo" shoid khyoo: doem lo" da:. Hau: boem bidvang shoid mo zi mougpyi: shoid khyoo: lheing: lo" wigi Yuda kung: bang: seing: da" Kiriad Bala (Kiriad Yarim) khyoo lo" da:. He: zigi bidvang shoid mo mougkyoo" nghoid.

¹⁵Mougpyi: shoid mo mougkyoo" gi Kiriad Yarim voo yam mo zi: Neptho gyid pug khyoo: ju" lo" da:.

¹⁶houg: lho: hau: zigi Rephim janggyoin: mougzhung: shoid athang: moo jo, lho: Hinnom janggyoin: ri yo" myang da" boem mo boem khyid: khyoo: gyoo" lo" da:. Xo' lho: hau: zigi Yebusi byu yi da" gyeing: gung mougpyi: shoid mo Hinnom janggyoin: khyo" lid phyed lo" wigi Enrogela khyoo: ju" lo" da:.

¹⁷Hau: thang: mougzhung: shoid khyoo: lheing: lo" wigi Ensheme ju" lho: xo' wigi Adumim boem gyoo: tu tab nghoid da" Gelilod khyoo: lo" da:. Hau: thang: houg: mougkyoo" gi Bohan lug moo" zeing khyoo: gyoo" lo" da (Bohan gi Ruben da" yuggi zoo: nghoid da).

¹⁸Mougkyoo" gi houg: mo zi Yodan janggyoin: ri yo" myang da" gyeing: gung mougzhung: shoid khyoo: lid lo" da:. Hau: thang: hau: zigi janggyoin: khyoo: gyoo" lo" wigi

¹⁹Bed Hogla gyeing: gung mougzhung: shoid khyoo: lid lo" da:. Houg: lho: Yodan gyid lang yau vang da" Thoem" Shid: mougzhung: shoid gyid zoeb moo: lo" thang da:. He: zigi mougpyi: shoid mo mougkyoo" nghoid.

²⁰Yodan gyid lang gi bidthu shoid mo mougkyoo" nghoid. He: zigi Benyamin kung: mo yhoemkhung: yi nyangnu" mougmyid jonu" khyo" yo" seing: yu da" mougmyid mougkyoo" joem nghoid da:.

²¹Benyamin kung: mo yhoemkhung: bang: seing: da" voomoo" joem gi Yerikho- Bed Hogla- Emeg Kezi

²²Bed Araba- Zemarim- Bethela-

²³Avim- Para- Ophra

²⁴Khepharamoni- Ophni- Geba voomoo" joem nghoid. hau: joem dangain" gi daxe: eig loem: nghoid wigi hau: aqei: ayam mo voogung joem we' bo da:.

²⁵Houg: lho: Gibeon- Rama- Berod

²⁶Mizpa- Khephira- Moza-

²⁷Rekem- Irapela- Tarala

²⁸Zela- Haeleph- Yebusi (Yerusalem)- Gibea- Kiriad Yarim voomoo" joem nghoid. hau: joem dangain" gi daxe: myid: loem: nghoid wigi hau: aqei: ayam mo voogung joem we' bo da:. He: zigi Benyamin kung: yhoemkhung: yi nyangnu" da" mougmyid jonu" khyo" shau" kham: yu da" mougmyid nghoid da:.