Read Lashi YOSHU 22 Bible Online

YOSHU 22 - Lashi bible

YOSHU 22

¹Hau: thang: Yoshu gi Ruben- Gad- Bid thu shoid mo Manashe byumyu" kung: yiri dage" khe: zheing" to" da:.

²Nyang: houg: bang: ri «Nanu" gi ASEING da" deizoo: Moshe nanu" ri amyeing" byid: da" gu: ja: khang" moo" ri bain koid yu bye:. Houg: lho: nga" amyeing" dang: dangain" ri we' nanu" tam" gyoo: bye:.

³Nanu" gi ayo, akhyeing: dangain" moo nanu" da" Israela mang: nhung" yiri khanham we' ashe: pyam too" nghoid ago". Nanu" gi nanu" da" ASEING Mangso amyeing" dang: joem ri nyeing" za: tam" gyo: cang yhi: bye:.

⁴Akhid" nyang: dangsoo" byid: to" ziyo' dakhyo" nanu" ASEING Mangsoo gi nanu" da" Israela mang: nhung" yiri ngei pyoo: yug yo' zi byid: too" bye:. Houg: yoomo ASEING da" dei zoo: Moshe wigi nanu" ri byid: bye: da" Yodan gyid lang bidthu shoid mo nanu" nya: mougmyid ga: tid seing: yu da" yhoem: moug: khyoo: doem loo" loo: ge'.

⁵Moshe wigi nanu" ri byid: to" da" tarha" ri tam" gyo: cang yhe: nyid wa zi boin: nyid ge'. Nanu" ASEING Mangsoo ri jheddab- nyang: myid vho: ziri cang- nya: Dang: theing khoin" ri tam" gyo:- nyang: ri jhug zug nyid lho: nanu" da" emyed nheigloem: dangain" yo' nyang: ri dei byid: nyid ge'» ga: tid da:.

⁶Yoshu gi nya: pyeing: dang: yo' hid su" ga: mainkaid byid: wigi houg: bang: ri yhoem: moug: khyoo: loo" nhang: kaid da:. Nyangnu" ri «Nanu" gi yhoem: gougnyhoug myoo" sho' ngei- sheing:- gyid: mid"- joto' yo' byimi myo" sho' yo' yoo" zoo yoo" shug lho: yhoem: moug: khyoo: tau" lo" ago". Nanu" da" gyivoo joem mo shau" yu da" ziyoo joem ri nanu" da" byumyu" mang: nhung" yiri gam byid: ge'» ga: mainkaid byid: kaid da:. Hau: thang: nyangnu" gi yhoem: khyoo: tau" lo" ago". Moshe gi Yodan gyid lang bidthu shoid mo mougmyid Manashe byumyu" agung dayhi" ri byid: too" kho' da:. Nghoid loug we' gootu: agung dayhi" gu: rigi Yoshu wigi gootu: byumyu" yi yo' dage" Yodan gyid lang bidvang shoid mo mougmyid ri byid: da:.

⁷

⁸

⁹Houg: yoomo Ruben- Gad- bidthu shoid mo Manashe byumyu" kung: yigi yhoem: khyoo: lo" boem ago". Deing da" Israela byumyu" yiri Khanan mung" Shilo moo nyhid: too" kho' wigi Moshe khyo" nyangnu" ri ASEING wigi amyeing" byid: to" ziyo' dakhyo" nyangnu" yu to" da" Gilead mung" nyangnu" moug: khyoo: to' yhe: lo" ago".

¹⁰Ruben- Gad yo' bidthu shoid mo Manashe byumyu" yigi Yodan gyid lang bidvang shoid gyid lang nam moo: jo, da" Gelilod khyoo: ju" lang" nyangnu" gi gyid yam moo: nheig tei" da" xoin" ngei" phoin: moo" zeing daloem: koid ago".

¹¹Deing da" Israela byumyu" yigi «Tam" gyoo: ge'. Ruben- Gad- bidthu shoid Manashe byumyu" yi Yodan gyid lang he: tab Gelilod moo: phoin: daloem: koid boem bye:» ga: shau" gyo: da:.

¹²Israela byumyu" yi he: ziri shau" gyoo: lang" bidthu shoid mo nyid da" byumyu" kung: yiri gyi khaid thougtheung wa shid re" shava phung goin" Shilo khyoo: zeing: yhe: ago".

¹³Hau: thang: Israela byumyu" yigi khainjung Eleaza da" nya: yuggi: zoo: Phineha ri Gilead mung" moo nyid boem da" Ruben- Gad- bidthu shoid Manashe byumyu" yi jang khyoo: nhang: kaid da:.

¹⁴Phineha yo' dage" bidvang shoid byumyu" damyu" mo dayug yo' byumyu" kung: joem mo dayug wigi vhujhung: daxi: yug cang yhe: ago".

¹⁵Nyangnu" Gilead mung" khyoo: Ruben- Gad- bidthu shoid mo Manashe byumyu" yi jhang ju" yhe: wigi

¹⁶Nyangnu" gi ASEING da" shava byu phung: goin" shid re" houg: bang: ri «Nanu" ciwim yoomo Israela da" Mangsoo ri thougtheung da" he: akhyeing" da" moo" ri koid boem ago" lha". Nanu" nyang: shid re" he: phoin: ri zhug da" khyo" ASEING ri thougtheung gyi koid abye:. Nanu" gi nya: thang: khyoo: acang loo: goo" nghoid da:.

¹⁷ASEING gi nya: byumyu" yiri lang: yoem" gyoo" nhang: wigi yooboo dam byid: uri Peora mo ngoonu" da" yooboo ri myid boin: ge'. Ngoonu" akhid nyid" ju sho' hau: gang mo yau: khi" kham zo: nyid ashi". Hau: yooboo agi" shi" goo" rhe".

¹⁸Akhid" nanu" gi nya: thang: cang wa shid re" he: pyam wa ein: go" rhe". Akhid" nyid" nanu" ASEING ri thougtheung gyi koid nghoid rigi nyang: gi nab yo nyid" Israela byumyu" yugkhang" moo" ri nheig yo: loo wa.

¹⁹Akhid" nanu" mougmyid gi noku wa joyoo aeung: nghoid rigi nya: Zoem" jo, da" ASEING mougmyid khyoo: re" lo boem ge'. Ngoonu" phung: mo mougmyid dayham" lo mho' ge'. Nghoid loug we' ngoonu" ASEING Mangso da" phoin: moo: pug lung: wigi phoin: daloem: koid lung: da" khyo" ASEING ri thougtheung gyi akoid goo" anghoid lang" nanu" da" gyi koid thougtheung khyoo: moo: ngoonu" ri abo loem nhang:.

²⁰Phyo' shoin: pyam wa dang: phyed to" da" zi joem khyoo: yo' sen: wigi amyeing" byid: da" dang: ri atam" gyoo: he: pyam da" Zera da" yuggi zoo: Akhan khasu" bue" ziri myid boin: ge'. Hau: gang mo Israela byu phung: goin" yooboo dam byid: zi shau" ago". Akhan gi nya: yooboo gang moo: nyang: dayug khyeing" shid: zi anghoid» ga: zi nghoid.

²¹Houg: lang" Ruben- Gad- bidthu shoid mo Manashe byumyu" yigi bidvang shoid mo byumyu" kung: yhoemkhung: yi da" vhujhung: yiri

²²«Myhang: thang zigi Mangsoo nghoid. Nyang: gi ASEING nghoid da:. Myhang: thang zigi Mangsoo nghoid. Nyang: gi ASEING nghoid da:. Nyang: hau: ziri ciwim koid lid lo ziri nyang: se'. Houg: lho: ngoonu" we' nanu" ri si' nhang: nau da:. Ngoonu" gyi koid wigi ASEING ri loem khau myid abo nghoid rigi ngoonu" ri adei anyid nhang: loo: goo".

²³Ngoonu" ASEING ri tid dang: atam" gyoo: wigi hau: adang moo: xoin" nghe' ngei" wa anghoid lang" shivoo: xoin" to' wa anghoid lang" zoem" khau: xoin" to' wa shid re" ngoonu" nya: phoin: ri koid nghoid rigi ASEING wigi nyang: ngoonu" ri yooboo dam byid: baja".

²⁴Hougsu" anghoid. Ngoonu" hid su" koid zigi thang: phyang" nanu" amyed ashen yigi ngoonu" amyed ashen yiri hidsu" ga: tid wa ziri gyoug yoomo nghoid. Hau: zigi ‹Israela ASEING Mangsoo yo' nanu" cisen: go" lha".

²⁵ASEING gi ngoonu" yo' nanu" Ruben- Gad byumyu" yi agyoo: moo: Yodan gyid lang ri mougkyoo" koid too" bye:. ASEING yo' nanu" ciwe' asen: nghoid da› ga: wa. Houg: lho: nanu" amyed ashen yigi ngoonu" da" amyed ashen yiri ASEING ri noku jang" mo yo" toem" pyam goo" wa nghoid.

²⁶Houg: yoomo ngoonu" phoin: daloem: koid bye:. Hau: jang" mo xoin" nghe' ngei" wa yo' xoin" to' wa zi anghoid.

²⁷Nghoid loug we' hau: gungthid he: zigi sagse: asoo" daloem: nghoid. Houg: sagse: asoo" gi ngoonu" da" amyed ashen yi yo' nanu" da" amyed ashen yiri tid poin" loo wa. Ngoonu" we' ASEING ri nya: da" gyeung" shang: Zoem" moo xoin" joem nghe' ngei" xoin" to' ziyo' zoem" khau: xoin" ngei" byid: wigi gyeing" nyang: yo" noku wa akho: akhang" jo, da:. Hau: thang: nanu" da" amyed ashen yigi ngoonu" da" amyed ashen yiri nanu" gi ASEING yo' ci: asen: ga: yo" tid wa zi anghoid.

²⁸Hid su" nyangnu" tid uri ngoonu" da" amyed ashen yigi ‹Yu" ge'. Ngoonu" phoug" phyid" yigi ASEING da" phoin: yo' du da" phoin: daloem: koid to" ago". Hau: zigi xoin" nghe' ngei" anghoid lang" xoin" to' wa shid re" anghoid. Nghoid loug we' ngoonu" byumyu" yo' nanu" byumyu" yi shid re" asoo" khyo" koid zi nghoid› ga yo" tid wa zi nghoid.

²⁹Ngoonu" gi hau: adang moo: xoin" nghe' ngei" wa shivoo xoin" shugbyid: wa xoin" to' byid: wa shid re" phoin: ri koid khyo" gyeing" nyang: ASEING ri thougtheung gyi koid zi akhid" nya: thang: cang jang" mo theing: pyam zi anghoid. Ngoonu" gi nya: shidkhoin" Zoem" shid vhu" moo: jo, da" ngoonu" ASEING Mangso da" phoin: mo lid wigi phoin: gootu: daloem: ri we' akoid noug" ga:» phoug tid.

³⁰Khainjung Phineha yo' nyang: yo' dage" bo cang boem da" shava byu phung: mo vhujhung: daxi: yug- bidvang shoid byumyu" yi da" yhoemkhung: yi mo vhujhung: yigi Ruben- Gad- Bid thu shoid mo Manashe byumyu" yi tid boem da" dang: ri shau" gyo: wigi nyangnu" nheig gyo: shid: ago".

³¹Khainjung Eleaza da" yuggi zoo: Phineha gi nyangnu" ri «Akhid" ASEING gi ngoonu" yo' dage" nyid ziri ngoonu" si bye:. Nanu" gi ASEING ri thougtheung gyi koid zi anghoid. Ciwim gari: nanu" gi Israela byumyu" yiri ASEING jang" mo shau" wa da" yooboo dam mo khyoid yu bye: nhung» ga: tid da:.

³²Hau: thang: Phineha yo' vhujhung: yigi Ruben- Gad byumyu" yiri Gilead mung" moo: nyhid: too" kho' wigi Khanan mung" Israela byumyu" yi jang khyoo: tau" lo" lho: nyangnu" ri lu dang: lo kyo" ago".

³³Israela byumyu" yigi nheugshid: ziyo' Mangsoo ri coung" ago". Ruben yo' Gad byumyu" yi de: nyid boem da" mougmyid ri phyo' shoin" pyam wa da" gyi khaid wa yo' sen: wigi nyangnu" atid loogoo" nghoid da:.

³⁴Ruben yo' Gad byumyu" yigi «He: phoin: gi ASEING gi Mangsoo nghoid da" khyoo: ngoonu" dangain" bang: shid re" sagse: nghoid da» ga: tid ago". Houg: yoomo nyangnu" gi hau: ziri «Sagse:» ga myheing ago".