Read Lashi YOSHU 5 Bible Online

YOSHU 5 - Lashi bible

YOSHU 5

¹Yodan gyid lang bidvang shoid mo Amori khokham dangain" yo' Meing: gung panglai: cang mo Khanan khokham dangain" gi ‹Israela byumyu" yi bain gu: dab sho' Yodan gyid lang ri ASEING gi kyug hei loo" nhang: da:› ga: ziri shau" gyo: ago". Nyangnu" gi Israela byumyu" yi yoomo gyoug lo boem wigi nyangnu" da" nheigloem: gyau: khare" boem ago".

²Hau: thang: ASEING gi Yoshu ri «Baid lug mo sham: thoo" koid yu wigi Israela byumyu" yiri shooyid thang: yham" byid: we'» ga: tid.

³Houg: yoomo Yoshu gi ASEING amyeing: byid: to" ziyo' dakhyoo" ti" koid da:. Nyang: gi shooyid thang: yham" bouggung ga: myheing da" joyoo moo Israela byumyu" yiri shooyid thang: yham" khyoo: ri koid byid: bye:.

⁴Israela byumyu" yi Egutu mo thu lo uri yuggi dangain" mo, shooyid thang: yham" gu nghoid bye:. Nghoid loug we' byumyu" yi dain" pyoid yoo moo: so" lid: loo" go" da" myid: xi: zain gyoo: moo: yuggi zoo: yi dayug ri we' shooyid thang: yham" khyoo: akoid goo" nghoid da:. Hau: ayo, thang lo" uri nyangnu" Egutu mo thu loo go" da" yo, moo: gyi khaid gi" nghoid mo, yuggi dangain" ri nyangnu" ASEING da" tid dang: agyoo: boem yoomo shid: byug: ago". Nyang: jham' tang: to" ziyo' dakhyoo" ti" nyangnu" phoug" phyid: ri byid: wa dangsoo" byid: to" da" moug: myid nu" ri shau" myang wa da" akhang" nyangnu" ri abyid: nghoid da:.

⁷Hid: bang: da" yuggi zoo: yiri gi khanham we' shooyid thang: ayham" nghoid da:. He: byuxeig aseig ri Yoshu shooyid thang: yham" byid: khyoo: koid byid: zi nghoid.

⁸Shooyid thang: yham" khyoo: ri bain sho' koid thang: ri dam joem: gi sho' byumyu" dangain" bang: dab moo: theing: nyid boem ago".

⁹ASEING gi Yoshu ri «Egutu mung" moo join bue" khyo" asho' ashid: bue" khyoo: ri akhid nyid" ngoo nanu" mo yu pyam byid: bye:» ga: tid. Hougsu" yoomo hau: joyoo ri Gilgala ga: myheing to" ago". Hau: myeing gi akhid" ju" sho' jo, shi" da:.

¹⁰Israela byumyu" Yerikho nam jang: pa: mo Gilgala moo: dab koid nyid da" ayo, moo: nyangnu" gi hau: lhammoo" khyab daxe: myid: nyid" myen" thang: ri lhid: kaid pui" koid ago".

¹¹Thang: nyid" ri Khanan mung" moo thu da" zoo: shug ri xang: shi" lheing: zo: shed" ago". Nyangnu" gi hau: cen: moin" ri kang: wigi moin" abo da" zooyho' koid da:.

¹²Houg: lang" Manna gyo" zi theing: lo" byug wigi Israela byumyu" yi ashau" zoo: loogoo" nghoid da:. Hau: ayo, mo nyangnu" gi Khanan mung" moo thu da" zoo: noem ri zo: ago".

¹³Yoshu Yerikho nam moo nyid nyid ayo, moo: nyang: gi nyeigdain tung" nya: shidkhoin" moo shamcoin" ci: wigi byu dayug yab jo, ziri myang da:. Yoshu gi nya: jang" khyoo: tab yhe: wigi «Nang gi ngoonu" gyizoo: yi mo dayug nghoid rhe" anghoid lang" gyivoo nghoid rhe"» ga: myid: da:.

¹⁴Byu hau: yug gi «Eig ja: goin" anghoid. Ngoo gi hid: moo: ASEING da" gyidab mo gyizoug: dayug khyo" nyid nyid zi nghoid» ga: tu" da:. Yoshu gi nyang: nya: gung ri myidjang khyoo: goeb khyo' noku wigi «ASEING we" ngoo gi re" dei zoo: nghoid. Nang ngoo ri cikoid nhang: nau la"» ga: tid.

¹⁵Houg: lho: ASEING da" gyidab mo zoug: pho gi nyang: ri «Re" khyid: baid ri khyoid pyam we'. Nang gi gyeung" shang: da" myidgung moo: yab jo, da» ga: tid. Yoshu gi nyang: tid ziyo' dakhyo" koid bye:.