Read Lashi YOSHU 7 Bible Online

YOSHU 7 - Lashi bible

YOSHU 7

¹Phyo' shoin' pyam wa nghoid da" zi joem daja: ri we' Yerikho voomoo" mo ayu goo" ga: Israela byumyu" yiri byid: da" ASEING amyeing" dang: ri atam" gyoo: goo" nghoid da:. Hau: amyeing" dang: ri Akhan ga: su: atam" gyoo: nghoid da:. Houg: yoomo ASEING gi Israela byumyu" yiri nheig joem: yo: da:. (Akhan gi Yuda byumyu" Zerab kung: mo Kharimi da" nya: yuggi zoo: nghoid wigi Zabdi da" nya: myid: zoo: nghoid da:.)

²Yoshu gi Yerikho mo byu dayham" ri Bethela bidthu shoid Bethaven voo nam mo Ai voomoo" khyoo: hau: mougmyid ri yhe: jooyu" wa shid re" amyeing" byid: lho: nhang: kaid da:. Nyangnu" hougsu" bain koid lang"

³nyangnu" gi Yoshu ri «Ai voomoo" ri yugkhang" moo" ayhe: zain: ca". Byu eig soem: khyeing" koo: za: nhang: kaid we'. Hougmoo: gyi zain: wa shid re" gyidab goin" anhang kaid ca". Hau: zigi voomoo" zeing anghoid» ga: pyeung: kaid.

⁴Houg: yoomo soem: khyeing" koo: bo da" Israela byu yi gyi yhe: zain: ago". Nghoid loug we' nyangnu" gi lhoem: zain: tau" kaid zi shau" bye: ago".

⁵Ai voomoo" mo byu yigi nyangnu" ri voomoo" khoem" moo" duang mo zi: lug kho' jang: joem moo: ju" sho' cang khaid boem wigi hau: boug gyoo" cang byu soem" xe: khyug yug ri said pyam ago". Houg: lho: Israela byumyu" yigi byoo lam" sho' gyoug boem ago".

⁶Yoshu yo' Israela vhujhung yigi koug wigi nyangnu" byimi lang: ceig lho: ASEING Dang: Theing Kuid: shidkhoin" myidjang moo: nyangnu" nya: gung jhang" jo, ago". Nyangnu" gi kougshu: ziri ci: shug wa shid re" nyangnu" vhuloem moo: zhoo" phei" geig shoin" wigi myen" thang: ju" sho' hougmoo: jhang" jo, ago".

⁷Houg: lho: Yoshu gi «Myhang: thang ASEING we"- Yodan gyid lang he: tab khyoo: ngoonu" ri ciwim shu" dab re" lha". Amori byu yi lo, khyoo ab byid: pyam wa ein: rhe". Ngoonu" ri said pyam wa ein: rhe". Yodan gyid lang thei: tab moo ciwim anyid nhang: lha".

⁸O" ASEING we"- akhid" Israela byumyu" yigi gyivoo yi mo nung zoid zoid loo bye: yoomo ngoo ciyo" tid loo wa lha".

⁹Khanan byumyu" yi yo' mungdain: mo gootu: yugkhang" moo" gi hau: khyoo: ri shau" gyo: ri" goo" wa. Nyangnu" gi ngoonu" ri re" vang: lheing wigi ngoonu" yugkhang" moo" ri re" said pyam ri" goo" wa. Houg: lang" re" ngi: ri goem loem wa shid re" nang cikoid wa lha"» ga: tid.

¹⁰ASEING gi Yoshu ri «Too' we' nang myidjang moo: hid: su" cikoid jhang" jo, lha".

¹¹Israela byumyu" yi yooboo shoid abye:. Ngoo nyangnu" ri tam" gyo: cang yhi: wa shid re" amyeing" byid: to" da" myid veing" khyoo: ri phyo' pyam abye: go". Nyangnu" gi phyo' shoin pyam wa dang: phyed to" da" zi joem mo dayham" ri yu pyam abye: go". Nyangnu" gi hau: joem ri khau" yu wigi hau: khyoo: ri mhau' tid ago". Houg: lho: hau: joem ri nyangnu" da" zi joem yo' dage" to" to" ago".

¹²He: gang yoomo Israela byumyu" yigi nyangnu" da" gyivoo yiri ayo" kaid said zi nghoid. Nyangnu" gi nyangnu" da" gyivoo yi jang" mo nung zoid zoid phang: ago". Ciwim gari akhid" nyangnu" nyang: byo, yoin" loo" wa dang: phyed zi shau" abye: go". Nanu" ri ayu wa shid re" ngoo amyeing" byid: to" da" zi joem ri nanu" aphyo' shoin' pyam pyam gi ngoo nanu" yo' dage" khanham we' anyid loo: wa.

¹³Too' we'. Byumyu" yiri younglho' pyam nhang: wigi nga" shidkhoin" khyoo: ri" wa shid re" nyangnu" ri soin nhang: we'. Nab kyoo' jen" jen" koid too" wa shid re" nyangnu" ri tid we'. Israela byumyu" yi da" ASEING Mangsoo ngoo gi he: dang: ri «Israela byumyu" yi we"- ngoo phyo' shoin pyam wa shid re" amyeing" byid: to" da" zi joem mo dayham" nanu" jonu" moo bo kaid to" ago". Nanu" hau: joem ri ayu pyam pyam gi nanu" gi nanu" da" gyivoo joem ri gyi ayo" kaid goo" wa.

¹⁴Hougsu" yoomo nab soin: ri nyangnu" dakung: thang: dakung: shid vhu" khyoo: re" goo" wa shid re" nyangnu" ri tid we'. Ngoo khyen: yu da" akung: bang: gi dako' thang: dako' shid vhu" khyoo: ri" goo" wa zi nghoid. Ngoo khyen: yu da" ako' mo yhoemkhung: daloem: thang: daloem: shid vhu" khyoo: ri" goo" wa zi nghoid. Ngoo khyen: yu da" yhoemkhung: mo dayug thang: dayug shid vhu" khyoo: ri" goo" wa zi nghoid.

¹⁵Hougsu" dang: phyed zi shau" da" zi joem yo' dage" khyen: yu da" su: gi nya: yhoem: byu- nyang: seing: da" zi ja: khang" moo" yo' dalheing: dam nghe' pyam zi shau" wa. Ciwim gari: nyang: gi: Israela byumyu" yi adang moo: xoo: sho' sho' phu" nhang: wigi nga" dang: theing ri we' phyo' pyam abye:» ga: wa zi nghoid.

¹⁶Thang: nyid" nab soin: no' Yoshu gi Israela byumyu" yiri dakung: thang: dakung: shid vhu" khyoo: shu" re" da:. Houg: lho: Yuda akung: ri khyen: yu da:.

¹⁷Nyang: gi Yuda akung: ri dako' thang: dako' shid vhu" khyoo: shu" re" da:. Houg: lho: Zerah ako' ri khyen: yu bye:. Hau: thang: nyang: gi Zerah ako' mo yhoemkhung: daloem: thang: daloem: shid vhu" khyoo: shu" re" da:. Houg: lho: Zabdi yhoemkhung: ri khyen: yu bye:.

¹⁸Hau: thang: nyang: gi Zabdi da" yhoemkhung: mo dayug thang: dayug shid vhu" khyoo: shu" thu ri" bye:. Houg: lho: Akhan ri khyen: yu bye:. Nyang: gi Khami da" nya: yuggi zoo: nghoid wigi Zabdi da" nya: myid: nghoid da:.

¹⁹Yoshu gi nyang: ri «Nga" zoo: we"- Israela byumyu" yi da" ASEING Mangso shidkhoin" he: joyoo moo jo da" khyoo: ri tid wigi yen: yu we'. Nang cikoid bye: ziri akhid" ngoo ri ateing too" loo: tid kyoo" we'. Ngoo ri hau: khyoo: ri azau" too"» ga: tid.

²⁰Akhan gi «Joo bye:. Ngoo gi Israela byumyu" yi da" ASEING Mangsoo ri yooboo shoid bye:. Ngoo hid su" koid lid loo bye:.

²¹Ngoonu" shau" shoem" yu da" zi joem mo yung" da" Babelon byisheing: dakhyab- ngei soem: kyen" koo: yo' daxe: darung koo: bo da" sheing: thung" dathung" ri myang. Hau: joem ri ngoo gye" vhoo: yoomo yu pyam bye:. Hau: joem ri nga" zoem" akhoug: moo: myhoeb to" wigi ngei ri athi" moo kaid to" ziri nanu" shau" myang wa» ga: tid da:.

²²Houg: yoomo Yoshu gi byu dayham" ri nhang: lho: houg: bang: gi Akhan da" zoem" khyoo: tang" yhe: lo" ago". Khau" to" da" zi joem ri hougmoo: ngei ri athi" moo kaid wigi gyeing" nyang: myhoeb to" ziri myang boem da:.

²³Nyangnu" gi hau: joem ri zoem" mo yu thu lo wigi Yoshu yo' Israela byumyu" yi dangain" bang jang khyoo: ci: lo boem ago". Hau: joem ri ASEING shidkhoin" moo: lo boem to" da:.

²⁴Yoshu yo' Israela byumyu" yi dangain" bang: gi Akhan- ngei- byisheing:- sheing: thung" yo' dage" Akhan da" nya: yuggi zoo: yi myiyi: zoo: yi nya: nu: joem loo zei: joem yang joem nya: zoem" yo' nyang: seing: da" ja: khang" moo" ri myheig shoem" yu ago". Houg: lho: nyangnu" gi houg: bang: ri yau: khe" lang: khung" khyoo: shu" yhe: ago".

²⁵Hau: thang: Yoshu gi «Ciwim yoomo nang gi houg: yhang: te" da" yau: khi" ngoonu" atho' moo: ju" nhang: bye: la". Akhid" ASEING gi re" atho' moo: yau: khi" ju" nhang: ri" wa» ga: tid da:. Hau: thang: byumyu" yi dangain" bang: Akhan ri lugboem yo' coem' du" said pyam ago". Nyangnu" gi nyangnu" yhoem: byu yi yo' jonu" joem ri we' lugboem yo' du" nghoeb pyam ago".

²⁶Nyangnu" gi nya: adang moo lugboem boem moo" zeing du" boem to" ago". Hau: zigi akhid nyid" ju" sho' jo, da:. Houg: yoomo hau: joyoo ri akhid" ju" sho' yau: khe" lang: khung" ga: myheing ago". Hau: thang: ASEING nheig ayoo: loo: nghoid da:.