Read Lashi YOSHU 9 Bible Online

YOSHU 9 - Lashi bible

YOSHU 9

¹Israela byumyu" yi da" oung: doid khyoo: gi Yodan gyid lang bidvang shoid mo boem moug:- Boem khyid:- mougzhung: shoid khyoo: Lebanon ju" sho' da" Meing: gung panglai: yam cang wigi jang: dam dangain" moo nyid boem da" Hiti- Amori- Khanan- Perizi- Hivi- Yebusi khokham yi dangain" mo, jang khyoo: fu" lo" khari" bye:.

²Nyangnu" dangain" dage" zeing: foem: re" wigi Yoshu yo' Israela byumyu" yiri meing: zain: wa shid re" gyi yoem: shoin" nyid boem ago".

³Nghoid loug we' Hivi byumyu" mo Gibeon kung: bang: gi Yerikho yo' Ai voomoo" ri Yoshu koid lid lo da" khyoo: ri shau" gyo: boem ago".

⁴Houg: lho: nyangnu" gi nyang: ri mhoid" jhoem" wa shid re" myid phyed pyam ago". Nyangnu" gi zoo: noem joem ri thung: joid moo kaid- pho zeing" to" da" zabyid yhid: shooyid thung joem ri loo zei: doo: moo: lo" soin ago".

⁵Nyangnu" gi byimi joid ri koid: void- pho: to" da" khyid: baid joid ri koid: zhung" ci: ago". Nyangnu" voin da" zooyho' joem gi kyug ziyo' mhau" jung" to' bye: zi nghoid ago".

⁶Hau: thang: nyangnu" gi Gigala mo dab khyoo: yhe: wigi Yoshu yo' Israela byumyu" yiri «Ngoonu" gi gye" ve: mung" mo ju" loo bang: nghoid. Ngoonu" gi nanu" yo' ngoonu" myid veing" thang" cab koid wa ziri vho: da» ga: tid ago".

⁷Nghoid loug we' Israela byu yigi «Ngoonu" yo' nanu" ciwim yoomo myid veing" thang" cab koid ca" eung: la". Nanu" gi ajhang moo za nyid bang: ge nghoid» ga: tid.

⁸Nyangnu" gi Yoshu ri «Ngoonu" gi re" dei zoo: yi danghoid» ga: tid. Yoshu gi nyangnu" ri «Nanu" hang" bang: nghoid go" la". Khamo ju" loo go" la".» ga myid:

⁹Hau: thang: nyangnu" gi nyang: ri he: mhoomyid: ri tid kyo" ago". «Ludaid phoo we" ngoonu" gi nanu" ASEING Mangso khyoo: ri shau" gyoo: yoomo gye" ve: da" mung" mo re" lo zi nghoid. Nyang: Egutu mung" moo: koid lid loo bye: da" khyoo: ja: khang" moo" ri ngoonu" shau" gyoo: bye:.

¹⁰Yodan gyid lang bidthu shoid mo Amori khokham yi nghoid da Heshbon khokham Sihon yo' Ashtarod moo nyid da" Bashan khokham Oga eig yug ri nyang: cisu" koid lid loo bye: ziri shau" gyoo: bye:.

¹¹Ngoonu" vhujhung: yi yo' ngoonu" mung" moo: nyid boem da" mung" byu yi dangain" bang: gi gyung: khyoo: shid re" zoo: noem dajhi soin voin wigi nanu" ri yhe: shau" wa shid re" ngoonu" ri tid ago". Ngoonu" ri nanu" da" dei zoo: khyo" koid wa shid re" tid kaid boem wigi ngoonu" ri nanu" yo' myid veing" thang" cab koid wa shid re" myid: nhang: kaid.

¹²Ngoonu" zooyho' ri yu" we'. Nanu" yo' shau" goo" wa shid re" yhoem: mo to' lo uri hau: joem gi loem loem za: danghoid ashi". Nghoid loug we' yu" ge'. Akhid" gi kyug wigi mhau" jung" to' byug abye:.

¹³Ngoonu" zabyid yhid: shooyid thung: moo: zabyid yhid: kaid uri he: joem gi aseig nghoid da:. Nghoid loug we' yu" ge'. he: joem gi jeig byug abye:. Ngoonu" da" byimi yo' khyid: baid joem gi gyung khyoo: sung vi: yoomo jeig byug abye:» ga: tid boem.

¹⁴Israela byu yigi nyangnu" jang mo zoo: noem dayham" ri khab yu ago". Nghoid loug we' hau: khyoo: ri ASEING yo' asham: goo" nghoid ago".

¹⁵Yoshu gi Gibeon byu yi yo' bidnoem khyo" myid veing" thang" cab koid wigi nyangnu" ri nyid wa akhang" byid: ago". Israela byu phung: goin" da" vhujhung: yigi hau: myid veing" thang" cab ri cang wa khyo" geing: teing da" dangsoo" byid: ago".

¹⁶Hau: myid veing" thang" cab bain koid thang: soem" nyid" ri hau: byu yigi gyeing" nyang: hau: anam moo za: nyid bang: nghoid ziri Israela byu yi se' boem ago".

¹⁷Houg: yoomo Israela byu yigi hau: byu yi nyid da" voomoo" joem khyoo: to' yhe: lo" lho: soem" nyid" ri ju" yhe: ago". Hau: voomoo" joem gi Gibeon- Khephira- Berod- Kiriad Yerim gu: nghoid da:.

¹⁸Nghoid loug we' Israela byu yigi houg bang: ri ayo" said nghoid ago". Ciwim gari nyangnu" da" vhujhung: yigi Israela da" ASEING Mangso myeing ri lang: wigi dangsoo" koid too" bye: yoomo nghoid ago". Byumyu" yi dangain" bang: gi he: khyoo: yo' sen: wigi vhujhung: yiri myeing" myo: ago".

¹⁹Nghoid loug we' nyangnu" gi «Ngoonu" gi Israela ASEING Mangso da" myeing ri lang: wigi nyangnu" ri geing: teing da" dangsoo" koid byid: too" bye:. Akhid ngoonu" gi nyangnu" ri dam age tab nghoid da:.

²⁰Ngoonu" da" dangsoo" yoomo ngoonu" gi nyangnu" ri nyid nhang: ca" da:. Ngoonu" hougsu" akoid lang" Mangsoo gi ngoonu" ri yooboo dam byid: wa zi nghoid.

²¹Nyangnu" nyid nyid goo" baja". Nghoid loug we' nyangnu" gi ngoonu" shid re" thang" shoo: gyid kham: byid: ri" goo" wa» ga: tu" ago". He: zigi vhujhung: yi phajhi" byid: da" dang: nghoid da:.

²²Yoshu gi Gibeon byu yiri nya: jang shu" ri" wa shid re" amyeing" byid: da:. Houg: lho: nyang: gi nyangnu" ri «Nanu" hid: moo: za: nyid mo, danghoid boem ri ngoonu" ri mhid" jhoem" wigi nanu" gi vi: mo bang: nghoid boem ein: ciwim yoomo ngoonu" ri mhoug go" la".

²³Nanu" hid: su" koid bye: yoomo Mangsoo gi nanu" ri yooboo dam byid: bye:. Nanu" byumyu" yigi Nga" Mangso gyeung" shang: joyoo shid re" thang" sho: gyid kham da" join ajang" bui" wa zi nghoid» ga: tid.

²⁴Nyangnu" gi «Ngoonu" hau: ziri koid bye: ludaid phoo we". Ciwim gari: mung" goin" nanu" ri byid: wa nghoid wigi nanu" shid khyoo: jhen" yhe: lo" uri hau: mung" moo nyid da" bang: dangain" ri said pyam wa nanu" ASEING Mangsoo gi nya: dei zoo: Moshe ri gyeing" nyang: amyeing" byid: too" bye: ziri ngoonu" si bye: yoomo nghoid da:. Ngoonu" gi nanu" ri gyoug yoomo he: ziri koid bye: zi nghoid. Ngoonu" kangso' shid re" ngoonu" gyoug da:.

²⁵Akhid" ngoonu" gi re" lo, khoug: moo: nghoid bye:. Nang jo ein: myid da" khyo" ngoonu" ri koid we'» ga: phoug tid.

²⁶Houg: yoomo he: zigi Yoshu koid da" zi nghoid. Nyang: gi nyangnu" ri goem loem byid: wigi houg bang: ri Israela byu yi wigi said wa akhang" abyid: nghoid da:.

²⁷Nghoid loug we' nyang: gi hau: uri nyang: nyangnu" ri Israela byumyu" yi yo' ASEING da" phoin: shid re" thang" shoo: gyid kham: nhang: wa da" join koid pyam da:. Akhid" nyid" ju" sho' nyangnu" gi noku wa shid re" ASEING wigi khyen: to" da" joyoo moo: he: moo" ri xo' wigi voin vu, nyid ago".