Read Lashi 1 TIMOTHI 5 Bible Online

1 TIMOTHI 5 - Lashi bible

1 TIMOTHI 5

¹Apyaid' gyi: bye: da" ludaid' phoo ri agyikoid' re" phoo ri yhang: ti": khyo, nyhoem: ji sang" nyid we' apyaid' ngi shi" da" zoolu: yi ri gi re mang: re" nhoung" ri yhang: ti"- zoem" khau: nyid we'.

²Myhi, zeing yi rigi nya: myhi' ri yhang: ti"- gyeungshang: nheigloem: yo' tid poin" tid kyeung" nyid we'.

³Lo, ti" phyeug nyid da" coug: moo" myhi, yi ri phau" myang: nyid we'.

⁴Nghoid loug we' cougmoo" dayug yug gi zoo: myiyi yo" nghoid rigi nyangnu" gi nyang: nya: ikoin deungkhu: shid re" loem, khau: da" noku thung" yo' sen: lho: wigi zei: ca" da" yoovoin, joem ri xang: shed" moo jhau" yu nyid goo" baja". Hougsu" koid khyo" wigi nyang: nya: da" myhi, phoo phoug" phyid" yi ri jeju" toug" byid: goo" baja". Khasu" wim ga: ri hau: khyoo: gi Mangsoo ri vho: ngei nhang: da" khyoo: nghoid.

⁵Lo, ti" phyeug lhoo: nyang: ri yu" goin, coung: wa byu hang" aboo lo: da" cougmoo" myhi, gi Mangsoo ri myid' loin" nyid ziyo' nyid" ri myen" ri akyu mho' nyid wigi Mangso pang" thoug wa ziri vho: ngei nyid.

⁶Nghoid loug we' akyang" byo, yoin" lho: mougmyid' mo pyo: khyoo: riza: sho: nyid da" cougmoo" myhi, gi nyang: dei nyid shi" re lang" shid: mang danghoid nyid.

⁷Nyang: nu" ri hang" wigi we' yooboo foin: jang: ajo, baja"- hid: tid to" dang: yo' nyangnu" ri tid poin" tid kyeung" nyid we'.

⁸Nghoid loug we' byu dayug yug gi nyang: nya: da" byumyu" akung: ako''- je wigi ikoin deungkhu: byu yi ri yu" goin, coung: khyoo: aboo su: nghoid rigi hau: loem" jeung" khyoo: ri ngeug pyam' su: bue" nyid lho: aloem" jeung" da" byu dayug tho' mo je wigi akhyeing" ashoeb, su: bue" nyid.

⁹Apyaid' khyug xi: zain za: ajain" rigi coug moo" myhi, kha: yug ri we' cougmoo" zhayen" moo akaid' goo" baja" nyang: gi dalheing: za: loxo' e" koin qei" su: nghoid ca".

¹⁰Hau: tho' moo gootu: nyang: gi asam" avoid ge khyoo: moo we' myeing thu nmyid su- nya: myid: nya: zoo: yi ri we' voin: tang: se' shu" jhoug" shu" mho' nyid su- tungbau being" voo, yi ri nya: yhoem: moo goo" lhoo: zoo: kham: yu lho: doo" zhoo" doo" jhug su- Khristain mang: nhung" yi yo' sen: lho: zei: ca" da" khyoo: joem ri khyo, nyhoem: da" myid yo' zei: so' voin vu, si su- yau: khe" jam jau shau" nyid bang: ri-se' pang" thoug su- ge da" moozoo" joem ri voin, vu, xoin" yo" to' su: nghoid ca" nyid.

¹¹Nghoid loug we' pyaid ngi shi" da" cougmoo" myhi, yi rigi coug" mo" da" zheyen" moo akaid' shi" goo" baja"- khasu" wim ga: ri nyang: myid vho: da" nheigloem: wigi doin: jhen" loo yoomo lo, doem xo' lo" rigi Khristu jhang khyoo: doem, phoug loo se' nyid.

¹²Houg: su" nghoid yoomo nyangnu" gi Aseing: ri xang: shid' mo wigi byid: too" bye: da" dang: thang" cab, ri she: pyam yoomo yooboo yoo" bang: bue" loboem ago".

¹³Hau: tho' mo gootu: nyangnu" gi dayhoem: mo dayhoem: khyoo: cangv ang lam" yen" lho: ayo, ri thang loo" nhang: se' nyid boem. Hau: tho' mo, aje ge da" khyoo: gi nyangnu" atid' eung: da" dang: ri cang tid- gei sang: lu wum, yen" boem ziyo' nyang: yo' ci" we' asen: khyoo: moo cang‹ vang lhu: lheug yen" boem.

¹⁴Houg: yoomo gyivoo yi gi ngoonu" da" khyoo: ri age khyo" tid wa joyoo ajo, loo: sho' apyaid' ngi shi" da" cougmoo" myhi, yi gi lo, doem xo' lho: zookhu: du, yau ziyo' nyangnu" da" e" koin, ikoin deungkhu: ri-yu" nyheung goin, coung: nyid wa ziri ngoo je" vho: nyid.

¹⁵Khasu" wim gari akhid" lhang" ri cougmoo" myhi, yi dayham" bang: gi satan thang: khyoo: cang loo" wa shid re" byamphoug lo" boem abye: go.

¹⁶Loem" jeung" da" phung byu myi: yi dayug gi nyang: nya: da" ikoin deungkhu: moo cougmoo" bue" lo" nghoid rigi nyangnu" ri yu" goin, coung: zei: zho" da" khyoo: koid boem ca, nyangnu" shid re" phung mo yoolid gootu: age byid- houg: su" ri she' phung gi gyeing" nyang: nghe: khoug: jang: aboo lo da" cougmoo" myhi, yi ri yo" pang" thoug wa zi nghoid.

¹⁷Shu" vhu" shu" she: da" moozoo" ri goolhoo: shu" vhu" she: da" phung shu" vhu" bang: gi laga' aphoug" eig zhang kham: yu moin: ein:- soin: yu ge nyid. Je" wigi mungdang: jhoug" byid: da" khyoo: moo yoem: kaid' voinvu, bang: gi houg: su" kham: yu moin: mo, nghoid nyid.

¹⁸Khasu" wim ga: ri jhoem: mungdang: moo gug nang: nyid da" nu: nhoid moo mhang" kho' yo" zhung" byid: zi anghoid- hau: lho moo" zei: su: gi nya: vhukung: phoug" shau" kham: yu wa zi nghoid. ga: wigi tid nyid.

¹⁹Sagsi: kham, mo, atham: thang- eig soem" yug abo ri phung shu" vhu" shi: su: ri yooboo foin: dang: ri age loem".

²⁰Byu gooji yu" gyoug goo" baja"- yooboo koid bang: dangain" ri shava byu yi dangain" mo, shid khoin" moo yau, jhoug" byid: ge'.

²¹Hid: su" tid to" khyoo: ri myonhoo: akhyen: loo nang zei: so' yhe: lo" jang" moo dashoid' shoid khyoo: abo dab, loo: za: tam" gyo: cang loo" wa shid mo ASEING Yesu Khrisru yo' Mangso da" shid' moo we' gyeungshang: da" moug: lagyoo: yi shid' moo we' ngoo nang ri amyeing" byid: kaid.

²²Aseing: da" moozoo" voin, vu, wa shid re" hang" ri nghoid loug we' lo, ke" lho: aya: tang: byid: wa ziri akhang:- subi" dakoid da" yooboo moo aye: bo vang lhu"- nang nyang: we' yooboo adab sho' gyeungshang: nyid we'.

²³Nang daso' dadam no loo loo wim nyid yoomo am: pham" zo: pyeug jang" moo bo pang" wa shid re" gyid za: ashug loo: za: zabyid yhid: ri dajhi' jhi, dashug nyid we'.

²⁴Byu dayham" bang: da" yooboo dayham" gi bang bang myang nyid zi nghoid wigi nyangnu" da" youg: noo yooboo joem gi nyangnu" da" shid' khyoo:- dang: phyed' wa joyoo moo yhe: lo" nyid bye- nghoid loug we' dayham" bang: da" youg: noo yooboo joem gi thang: ri she' bang bang myang lo.

²⁵Houg: yo' dakhyoo" ti"- ge, da" moozoo" ri we' bang bang za: yo" myang nyid amyang ase' ri lang- yo" nghoeb yo" yhoem" too" wa zi anghoid.