Read Lashi 1 TIMOTHI 6 Bible Online

1 TIMOTHI 6 - Lashi bible

1 TIMOTHI 6

¹Join, koid nyid bang: gi nyang: nya: d a" yhoem: seing: ri phau" myang: moin: bang: nghoid ein: kham: yu ca" nyid boem- houg: lang" hang" we' Mangso myeing khyang" yo' ngoonu" da" jhoug" myeing" jhoug" thui: ri age khyo" juang" yi goo" wa zi anghoid.

²Khristain join, seing: yi da" lo, khoug: moo nyid da" join, yi gi nyang: nya: da" yhoem: seing: biri- dakhyoo" te" da" mang: nhung" yi nghoid ein: aphoug" akhyoid age koid. Khasu" wim gari nyang: zei: byid: jang" mo akyu" shau" kham: zoo: mo, gi nyang: tu: nyang: loem khau: jheddab nyid bang: nghoid yoomo nyangnu" ri lang" je" wigi pang" dei: byid: ge nyid. Nang gi he: khyoo: ri jhau" mho' kho" kyo" nyid ca"

³Hang" nghoid loug we' adu go" khyo" atoug" khyo" shoid vhang: khyoo: ri jhoug" byid: nyid su: gi ngoonu" Aseing: Yeesu Khristu da" deingmain" joeb, byeung" da" mungdang: joem yo' ngoonu" loem" jeung" da" khyoo: jhoug" byid: ziri abo cang soo" loo za:

⁴Nya: gung ri nyang: nghoid boin: phau: khuang lho: wigi ci" asi su: nghoid. Nyang: gi dang: tid jang" moo ngei goo" wa shid re" myeing" myo: lho: byo, goo" wa shid re" age nheigloem: boo su: nghoid. Hau: tho' moo gootu: houg: su" koid yoomo noo" goo" zoo, go" da" khyoo:- phung kho' go" khyoo:- anoo: ayab, loo: ngeug byo, go" khyoo:- aphoug" amyang: loo: gei, yu" go" khyoo:- age da" aloem" atho: khyoo: ze thu' loo nhang: nyid.

⁵Hau: tho' moo gootu:- nheig abo ziyo' deingmain" khyoo: ri amyang ase' bang: jang" mo ngeig goo" byo, go" da" khyoo: gi daso' so' bue" thu lo nyid. loem, khau: da" noku thung" eing: zigi yoo" zoo: yoo" shug da" de lo khyoo: nghoid- ga: nyangnu" myid yu ago".

⁶Gyeing" nyang: ga: rigi nyang: nyang: yo" gu: ri nheig se' deug nghoid rigi leom khau: noku thung" gi byu dayug ri yo" loo de loo nhang: wa zi nghoid nyid.

⁷Khasu" wim gari ngoonu" gi he: mougmyid' moo ci" we' aci: loo vang re" boem- he: mougmyid mo deom, thu' lo" ri we' ce" noem ci: thu' loo" wa lha". ci" we' ayo" ci: thu loo".

⁸Houg: su" nghoid yoomo ngoonu" gi zoo: noem, yo' voidmi void, byi: yoo" lang" gi hau: gu: yo' nheig deug nyid ge, boem bye.

⁹Nghoid loug we' yoo" noug di noug mo, gi mhoid" jhu, phyo' da" zi shau" boem ziyo' akoo" afang: koid boem ziyo' shid: gyoin, noogyoin, ze" bui" nhang: da" vhoo: boo myo, no, da" khyo: myoo" sho' ja: mo joem: duang: khuang" moo gyoo" loo" se' boem ago". Hau: zigi nyangnu" ri byo, yoin" soem" lo" joem: duang: khyoo: she: vang lo" boem abye: go.

¹⁰Khasu" wim ga: ri ngei myo, no, da" khyoo: gi akhyeing" ashoeb, khyoo: aja: ja: ri bue" thu' loo nhang: da" nei yang: nyang: nghoid bye. Byu dayham" bang: gi hau" ngei ri yoo" wa shid re" nheigloem: gye" zhu: vho: ngei nyid boem yoomo loem" jeung" khyoo: mo vhang: lo" boem ziyo' koug shu: khyoo: aja: ja: yo' nyangnu" da" nheigloem: ri gyau: moin" loo" nhang: nyid boem ago".

¹¹Nang koem gi Mangso da" byu phoo we"- he: khyoo: dangain" ziri yoem: kaid' nyid we'. Deing byeung" khyoo:- tarha" phau" cang khyoo:- loem" jeung" khyoo: jheddab khyoo: moo yoem: kaid' lho: thoug shang" ziyo' nu" nham, da" nheigloem: yo" yu sho' yoem: kaid' nyid we'.

¹²Loem" jeung khyoo: yo" sen: da" tang" shi, go" pui" moo yoem: bain' sho' kaid' lho: gei lo" wigi apyaid' ato: da" kangso' ein: da" jhung: shug yo" yu sho' tang" we'. Khasu" wim ga: ri hau: kangso' dei nyid da" khyoo: moo nang ri mangsoo khe: yu da" uri nang gi sagsi: myo" sho' bang: da" shid' moo yhen: yu abye:.

¹³Jo, moo jo, ri kangso' yo" kaid' byid: da" phoo Mangso shid' khoin" moo we' Pilaid' da" shid' khoin" moo we' nyang: loem" jeung da" khyoo: ri geing: geing: teing teing yhen: yu bye: da"Khristu da" shid' khoin" moo we' He: da" moozoo" yoovoin, ri voin, vu, wa shid mo ngoo nang ri amyeing" byid: kaid.

¹⁴Nang gi nang ri amyeing" byid: to" da" khyoo: ri tam" gyo: wigi Khristu doem, thu myang loo wa da" ayo, bidnyid ju" sho' kyed, kyed za: cang pyeung nyid we'.

¹⁵Dayug kyeing" nghoid lho: myonhoo: phung" yoeb, bo wigi vhoeb, khang" nyid da" kho: kham" yi tho' mo khokham" Aseing: yi tho' mo Aseing:- Mangsoo gi ayo, akhyeing: ju" lang" ASEING Yesu ri dalheing: doem thu' myang: loo wa zi nghoid nyid.

¹⁶Nyang: kyeing" za: ashid: abyug su: nghoid wigi nyang: gi hang" we' ayo" tain" tab yhe: da" bidbang moo loung" jo. hang" we' nyang: ri amyang yu" ziyo' hang" we' nyang: ri age myang. Nyang: moo myonhoo: phung yoeb, yo' apyaid' atoo: moo ashoem: apyang: zi dajo, jo, baja" o"- Amen.

¹⁷He: mougmyid' moo kangso' dei nyid shi" baja"- ageing: ateung da" sudgain' yo' nyid gi nyid de da" khyoo: moo nanu" da" nheig nhei: joyoo akoid loo: za: ngoonu" goug goug yi yi yo" kham: yu wa shid re" ziyoo soidgain' dangain" ri yo" byid: da" Mangsoo moo nheig nhei: jang: geung: teung jo, wa shid re" amyeing" byid: nyid we'.

¹⁸Ge, lho, da" moo" ri zei: nyid wa shid re" ge, da' moozoo" mo, yo" de loo wa shid' re" we' byu gooji yi ri gam, byid: myhoo, byid: vho, lo" khyoo: moo we' amyug ashi loo: yo" gam, byid: wa shid re" jen" jen" koid nyid goo' baja"- nyangnu" ri jhoug" byid: nyid we'.

¹⁹Hid: khyo" wigi nyangnu" gi thang: phyang" pyaid shid' re" geung: teung da" apoem: ayan: bue" nyid goo" baja"- phoug" dab, da" soidgain' ri nyangnu" shau" young: to" lho: Kangso' dei khyoo: gyeing" nyang: shau" yu to" boem wa zi nghoid.

²⁰Timothi we"- nang ri ab, byid: to" da" aya: ri goolhoo: za: zoem: shoung: too" we'. Aco' ajhoid da" khoin" co, loeb, khyoo: ri we' phajhi" dang: nghoid ga:. byu jha" bang: tid shoid' myid da" akoo" afang: ga: ngeig goo" yang: go" dang: ri we' jang" pyam' nyid we'.

²¹Khasu" wim ga: ri byu dayham" bang: gi hau: ja" phajhi" si' bang: nghoid ga: boem lho: wigi hau: loem" jeung khyoo: mo vhang: lo" boem ago". Mangso da" jeju" gi nanu" dangain" mo, yo' dage" dajo, jo, baja" o".