Read Lashi TIT 2 Bible Online

TIT 2 - Lashi bible

TIT 2

¹Nghoidloug we' nang koem' gi jo da" loem" jeung" khyoo: yo" du veing" go" da" laloem lakhoug: nheigloem: sham: shoin" goo" wa khyoo: ri kho" kyo" jhoug" byid: ca" nyid.

²Apyaid gyi: bye: da" phoug" mang: yi ri yhid: ri nheig atei" loo: zed" lhid' nyid wa shid re" yug yoo sam" dab ri young" nyid wa shid re" nyang: nya: da" gung ri yo" vhoeb khang" nyid wa shid re" we' jo da" laloem, lakhoug: bo nyid a shid re" jheddab myid yo' kham zeung: da" nheigloem: bo jo, wa shid re" jhoug" byid: we'.

³Houg: yo' dakhyoo" ti" apyaid gyi: bye: da" phyid" mang: yi we' loem" jeung" wigi tarha" ri phau" cang mo, lu wim gei sang: da" dang: atid wa ziyo' yhid: join abui" loo: za: ge lho, da" khyoo: ri se' jhau" mhoo, mo, nghoid nyid goo" baja"- nang gi nyangnu" ri jhoug" byid: ca" nyid.

⁴Mangso da" mungdang: gi juang" yi gei sang: zi ashug" baja"- nyangnu" ri we' nyang: tu: nyang: mo pyaid ngi shi" da" myhi' zeing yi gi nyang: nya: da" yhoem: seing: phoo yo' zooshang: mi" ri jheddab se' nyid wa shid re" we' nyang: nya: da" gung ri se' vhoeb khang" nyid wa shid re" we' nyang: nya: da" yhoem: seing: phoo yi vhoeb, khang" khyoo:- se' cang nyid da" yhoem: seing: myhi' zeing gi yo" bui" wa shid re" jhoug" byid: mhoo, byid: nyid we'.

⁶Houg: yo' dakhyoo" ti"-zoolu: yi we' nyang: nya: gung du: ri se' vhoeb khang" lho: nyid goo" baja" tid poin" tid kyeung" nyid we'.

⁷Khyoo: khaid gu: khang" moo" zei: so' lo" da" jang" moo nyang: gung nyang: yu" yu ge, da" khyoo shid: bue" nyid we' Dain: da" nheigloem: yo' abui" atho'- thain" thain: yhoug: gyen: khyo" jhau" poin" khoo" kyeung" nyid we'.

⁸Nang ri thougtheung loo mo, gi ngoonu" ri ce: khyoo: moo we' ce: yooboo we' ashau" shoo: lo: yoomo sho' thu goo" baja" nang gi sube" wigi yooboo foin: zi ashug" loo: sho' deingmain" da" dang: joem yo' jhoug" byid: mhoo, byid: nyid we'.

⁹Join, yi gi nyang nya: da" yhoem: seing: yi vhoo: moo tam" gyo: nyid wigi khyoo: khaid gu: khang" moo" moo nyangnu" da' shid khoin" moo myonhoo: rua jo, sho' dang: aphug tu" loo: za:

¹⁰Khoug" soo" lanyham" daja: we' akoid loo: za: houg: su" koid wa gung khoo: gi nyangnu" gi khanham we' ge reung: kyed koeb ziyo' dang: zung" bang: nghoid khyoo: ri toin" shid nyid boem ca". He: da" akhyoo" azoo" khyo" wigi nyangnu" gi nyang tu: nyang: zei: ca" da" moozoo" jo, moojo, ri Yhada" khyoid khyi: yu Aseing: Mangso da" bidbang ri yo" thoin" pang shug boem wa zi nghoid.

¹¹Khasu" wim ga: ri Mangsoo gi byumyu" bain sho' bang: ri nya: da" khyoid' yu jeju" ri thoin" pang ci: shug bye.

¹²Ngoonu" gi ngoonu" nya: da- gyi: myhang: da" Mangsoo ein: da" khyoid yu ASEING Yesu Khristu da" myonhoo: phung yoeb, doug bang thu loo wa ngi lho, da" bidnyid ri dalang" nyid Tarha" ri aphau" cang nau da" nheigloem: yo" mougmyid ri vhoo: boo: myo, no, da" nheugloem: ri she: pyam' wa shid re" we' sam" dab, ri young" ziyo' phyoo: phyoo: nghoid nyid wa khyoo:- deingmain" wigi tarha" phau" cang da" kangso' dei khyoo: yo' he: da" mougmyid tho' moo shau" nyid wa shid re" we: hau: jeju" tarha" gi ngoonu" ri jhoug" byid: nyid.

¹⁴Ngoonu" ri tarha" do, rhue, da" akhyeing" ashoeb yooboo dangain" jang" mo-khyoid khyi: yu wa shid re" ngoonu" gi nheigloem: e" myed gyeungshang: wigi nyang: yo' za: te: sen: da" byumyu" bue" lo lho-ge, lho da" moozoo" ri zei: soo, wa nheigloem: vho: ngei byumyu" bui" wa shid re" Khristu gi ngoonu" da" shid mo nya: gung du: nyang: ab byid: pyam' bye.

¹⁵Nang gi he: da" khyoo: joem ri kho" kyo" jhoug" byid: nyid we'. Nang yoem: byid: tid kyeing" tid poin" jhoug" byid: nyid da" uri - nang yo" da" amyeing" akhang" dangain" ri ci: we'. Hang" nghoid loug we' nang ri aphoug" akhyoid, ayu' nge pyam baja".