Read Lashi PHILIMON 1 Bible Online

PHILIMON 1 - Lashi bible

PHILIMON 1

¹Yesu Khristu da" moo" voinvu, yoomo thung: loung" jo, da" ngoo Polu yo' ngoonu" da" mang: nhung" phoo Timothi gi nga" eig youg da" bidnoem yo' moo" dage" zoem" voin da" Philimon jhang khyoo: we'

²Nga" eig youg da" nham" moo" aphia ri we' nga" eig youg da" gyizoo: byen cang" Arkhipo jhang khyoo: we' re" da" yhoem: moo noku nyid da- Phung: byu yi jhang khyoo: we' mougsoug" lhid" kaid.

³Ngoonu" da" nya: phoo Mangsoo yo' ASEING Yesu jang" mo jeju" yo' ngei pyo: da" khyoo: gi nanu" yo' dage" dajo, jo, baja" o".

⁴Nga" da" akyu mho' da" ayo, khang" moo" moo re" da" khyoo: ri tid wigi nga" Mangso jhang jeju" ri coung" byid: nyid.

⁵Khasu" wim ga: ri nang gi Mangso byumyu" dangain" bang: ri jheddab nyid wigi Khristu Yesu ri loem" jeung" nyid da" khyoo: ri ngoo shau" gyo: nyid.

⁶Ngoonu" gi nang yo' loem" jeung" da" byu yi nyang: cang" shau" zoem" khoug: wigi nyhang" gi Khristu yo' dadeing: za: bue" loo yoomo kangso dei da" khyoo: moo yo" yu da" jeju" dangain" ri je" no, khyo" se' gyo: loo wa shid' mo ngoo akyu" mho' nyid.

⁷Mang: nhung" phoo we"- re" da" jheddab nheigloem: gi ngoori gye" gau yi nhang: lho: nheigloem: yoem: vhoo" azeing yo" yu nhang: nyid. Nang gi Mangso byu yi da" nheigloem: ung: khoug: dangain" ri shangei shapyoo: byid: abye:.

⁸Khyoo" he: khaid yoomo Khristain mang: nhung" dayoug khyo" wigi nang zei: ca" da" moo" ri zei: wa shid re" asho' agyug loo za: zei: nhang: da" dang: pyeung: kaid.

⁹Ngoo giKhristu Yesu da" lagyoo: lamang: nghoid nyid ziyo' akhid" uri nyang: yoomo thung: lung" su: Polu nghoid nyid nghoid loug we' ngoo gi nang ri jheddab yoomo mho' tungpain: kaid.

¹⁰Khristu moo nga" da" zoo: gyeing" nghoid nyid da" Onesimo shid re" ngoo nang ri mho' tungpain: kaid. Khasu" wim ga: ri ngoo thung: loung" jo, jang" moo nya: da" Venyi shoid mo, nya: phoo bue" loo bye.

¹¹Dalheing: rigi nya: shid re" ce" akyu" aboo nghoid loug we' akhid" gi re" da" shid' re" we' nga" shid re" we' akyu" boo su: bue" loo bye.

¹²Akhid" ngoo nyang: ri re" jhang khyoo: nhang: kaid' bye- nga" jheddab myid we' nyang: yo' dage" bo re" loo bye.

¹³hau: ngeibu: ludang: yoomo thung: loung" jang" moo nyang: gi re" da" shid re" ngoori pang" thoug dei byid: wa shid re" nyang: ri he: jang" moo ngoo shu" nyid nau.

¹⁴Nghoidsho loug we' ngoori pang" thoug yu wa shid re" nang ri nhang: khyo" ngoo akoid noug nanyang: gye" myid pyo: ziyo' bo pang" thoug wa ziri ngoo vho: ngei nyid. Houg: yoomo nang myid aveung" zi ce" noem we' ngoo akoid wa.

¹⁵Onesimo gi khanham we' nang yo' doem yo" nyid wa shid re" nang yo' dayo, daboin: za: gang: go" lo" zi date: nghoid wa

¹⁶Akhid" gi join, za: we' anghoid loo- join, tho' moo je" jain" da" jheddab da" Khristain mang: nhung" dayug bue" loo bye. Nyang: gi nga" da" shid re" khayhi' gyeing" phoug" dab, su: bue" loo bye: lha! Re" shid re" join dayug khyo" we' Khristu moo mang: nhung" dayug khyo" we' re" shid re" we' khayhi' gyeing" phoug" dab, su: bue" loo wa lha!

¹⁷Houg: su" nghoid yoomo nang gi ngoori re" da" nheig dab, byen cang" phoo yhang: ti"- shau" ngham" yu nghoid rigi ngoori yhang: ti" nyang: ri lhoem doem, kham: yu we'.

¹⁸Nyang: gi nang ri daja: ja: shoid vhang" to"- hougsu" anghoid lang" gi jhen: dab, jo, nghoid ri we' hau: zi gi nga" jhen: khyo" soin: yu byid: we'.

¹⁹Ngoo Polu gi hau: jhen: ri xab, byid: wa"- ein; wigi ngoo nya: lo, yo' nyang: lhid" kaid' bye. Nghoid loug we' nanyang:-re" da" kangso shid shid re" ngoori jhen: ein: wigi atid thu noo" loo.

²⁰Hougsu" nghoid yoomo nga" mang: nhung" phoo we"- hau: Aseing; da' myonhoo: ri tu: lho: wigi jeju" yo' hid: ngoo mo, tid kaid da" khyoo: ri zei: bui" byid: we' Khristu moo mang: nhung nyang: cang" khyo" wigi nga" nheigloem: e" myed ri shangei shapyoo: byid: we'.

²¹Nang gi ngoo mho' tungpain: yang: ti"- zei: byid: wam: bye"- ein: loem khau: zoo re" he: mougsoug" ri lhid" nyid zi nghoid. Gyeing" nyang: ngoo tid nyid tho' ri jain" sho' koid wam: bye: ein: ngoo se' nyid.

²²Hau: tho' moo je" wigi nga" shid re" joyoo daloem: ri bo nyheung too" byid: we'. Khasu" wim ga: ri Mangsoo gi nanu" dangain" mo, da" akyu" mho' da" dang: ri tam" gyoo: byid: wigi nanu" jhang khyoo; ngoori doem yo" ju" ri" nhang: wa ziri ngoo nheig byu nyid.

²³Khristu Yesu da" khyoo: ri kho" kyoo" yoomo ngoo yo' dage" thung: loung" jo, da" nga" byen cang" Epaphra gi nang ri vhu" kaid da.

²⁴Houg: yo' dakhyoo: ri kho" kyoo" yoomo ngoo yo' dage" thung: loung" jo, da" nga byen cang" Epaphra gi nang ri vhu" kaid da.

²⁵ASEING Yesu Khristu da" jeju" gi nanu" dangain" bang: yo' dage" dabo jo, baja" o".