Read Lashi HEBRE 10 Bible Online

HEBRE 10 - Lashi bible

HEBRE 10

¹Yuda yi da" tarha" gi gyeing" nyang: agyeing" nghoid da" khyoo:- deingmain" joeb, byeung" da" akhyoo" again anghoid loo: za: ju" loo wa da" shau" void' shau" zoo: wa da" khyoo: mo amyang abang da" khyoo: za: date: nghoid nyid.Nyangnu" gi khanham we' to' byid: nyid da" xoin" daja: riza:- zain khang" moo" xoin" to' byid: boem ago". Hougsu" wigi he: da" mungdang: yo' Mangso jhang khyoo: yu: vang lo" da" byu yi ri hau: toung: to" da" tarha" gi khasu" wim gi joeb, byeung" mo, yo" bue" loo nhang: wa lha".

²Mangsoo ri loem, khau: noku nyid mo, ri yooboo mo dayo" to ced" yung" ced" shang: byid: nghoid rigi nyangnu" gi yooboo yoo" mo nghoid ein:- khanham we' amyid jho: nyid byid: lho: xoin" to' byid: khyoo: we' dangain" no: pyam' byid: ca" loo wa zi nghoid.

³Akhid" gi zain khang" moo" to' byid: da" xoin" du: joem gi byu yi ri nyangnu" da" youg: noo yooboo rimyid boin: nhang: nyid wa shid mo nghoid nyid.

⁴Khasu" wim garinushain: lo da" suid" yo' shoobaid' suid" gi youg: noo yooboo ri khanham we' yo" ced" shang: pyam' byid: wa zi anghoid.

⁵Hougsu" nghoid yoomo Khristu gi he: mougmyid mooju" ri" wa ga: soin' nyid da uri Mangsoo ri Nang gi xoin" du: joem yo' jhung: shug ri vho: ngei nyid zi anghoid, nga" shid re" gung du: ri nang nyheung too" byid: abye:.

⁶Phoin: tho' mo gung du: goin" ngei" to" da" gougnyhoug xoin" yo' yooboo khyoid' pyam' da" xoin" ri nang vho: ngei zi nghoid.

⁷Houg: lang" ngoo gi phoo Mangsoo we"- tarha" mougsoug" joem moo nga" da" khyoo: lhid" to" nyid ziyo' dakhyoo" ti"- nang myid vho: khyo" koid wa akhid" ngoo hid: moo ju" ri" bye- ein: tid bye"- ga: wigi tid.

⁸Hau: lho: nyang: gi " To' byid: da" xoin" du: joem yo' jhung: shug joem ri we' phoin: tho' moo nghe, to' ngei" byid: da" myinghi, xoin" ri we' yooboo khyoid da" xoin" joem ri we' Hau: tung: to" tarha" yo' dakhyoo" ti" xoin" to' ngei" byid: nghoid loug we' hau: xoin" du: joem ri Aseing: nang gi vho: ngei nyid zi anghoid, ga: wigi nyang: shid' re tid too" bye.

⁹Hau: thang: ri nyang: gi Mangsoo we"- nang vho: khyo" cang koid wa shid re" ngoo hid: moo nyid nyid, ga: wigi tid. Houg: yoomo Mangsoo gi xang: shed" to' byid: da" xoin" axoug" dangain" ri yoeb shoung pyam lho: Khristu to' byid: da" xoin" ri houg: bang: da" joo yoo moo gung thid' kaid' byid: bye.

¹⁰Yesu Khristu gi Mangsoo myid vho: lho: koid nhang: ziyo' dakhyoo" ti"- nya: gung du: ri pyaid mo too: mo shid re" dalheing: za: yo' bain' sho' xoin" ri to' pyam byid: bye: yoomo nyang: nu: dangain" bang: gi youg: noo yoo boo mo yo" ced" kyeing ced" shang: yu zi shau" boem bye.

¹¹Yuda Khain: jung yi yug khang" moo" gi nyang: to' byid: da" xoin" to' khyoo ri nyid" khang" moo" zei: nyid lho: xoin" du: daja: riza: myoo" sho' lheing: koid nyid nghoid loug we' hid: su" to' byid: nyid da" xoin" du: joem gi youg: noo yooboo joem ri khanham we' yo" shoem" shoung: pyam da" khyoo: ajo.

¹²Khristu koem gi youg: noo yooboo ri khyoid pyam byid: wa shid' mo pyaid didu moo akyu" bo da' xoin" daja: yo' za: bain to' byid: pyam' thang: ri Mangso lo, yo shoid moo lo" zhoung: jo, bye.

¹³Akhid" nyang: gi hau: jang" moo nya: gyivoo joem ri nya: da" khoovoo: khoug: moo khyid: nang: tang khug khyo" Mangsoo too" byid: jang" moo ju" sho' lang" zoore" danyid nyid.

¹⁴Khasu" wim gari nyang: gi to' byid: da" xoin" daja: yo' za: ced" yung" ced" shang: yu zi shau" bye: mo, ri Pyaid' didu mo shid re" joeb, byeung" nhang: bye.

¹⁵Hau: gyeungshang: da" Venyi we' ngoonu" ri sagsi: bo kham byid: bye- xang: shed" ri nyang: gi

¹⁶Khyoo: he: zigi ju" loo wa da" bidnyid joem moo " Nyangnu" yo' ngoo too" goo" wa dang: thang" cab, nghoid nyid. Nyangnu" da" nheigloem: ung: khoug: joem moo nga" da" tarha" joem too" wa zi nghoid, ga: wigi hau" Aseing: tid nyid.

¹⁷Hau: thang: ri nyang: gi " Nyang: nu" da" youg: noo: yooboo ri we' nyangnu" da" akhyeing" ashoeb khyoo: joem ri we' ngoo doem boin: loo: wa zi anghoid, ga: tid.

¹⁸Houg: su" wigi youg: noo yooboo ri khyoid pyam' byid: zi shau" bye: nghoid rigi youg: noo yooboo khyoid pyam byid: zi shau" wa shid' mo xoin" gootu: ngei" byid: anoo" loo.

¹⁹Houg: su" nghoid nyid yoomo nga" da" mang: nhung" yi we"- Yesu gi shid: kham: byid: bye: yoomo ngoonu" gi hau: gyeungshang: thang da" joyoo khyoo: vang lo" boem wa shid re" joeb, byeung" da" amyeing" yoo" mo, nghoid nyid boem bye.

²⁰Nyang: gi nya: gung du: ga: da" Mangso yhoem: moo" khoug: mo pain" xiyam, ri lid vang lo" wigi Mangso da" shid' khoin" khyoo: khyang: lo" da" kang: so' khyoo: seig dakhaid ngoonu" shid re" phang too" byid: bye.

²¹Ngoonu" moo Mangso da" yhoem: ikoin deungkhu: ri vhoeb, khang" zung" lhug nyid wa da" khainjung agyi moo" dayug yo" boem bye.

²²Houg: su" nghoid yoomo ngoonu" gi yooboo yoo" boin: da" nheigloem: ung: khoug: joem ri ced" yung" ced' shang: pyam' lho: ngoonu" da" gung doem: ri we' gyeungshang: da" gyid yo' bain' ced" shang: pyam' lang" ashoid' avhang: loo:- jhug zug da" loem" jeung" nheigloem: yo' Mangso jhang khyoo: yu: tain" vang lo" boem shang.

²³Ngoonu" yhen: yu lho: loem" jeung" da" loem, khau: nheig byu khyoo: moo aloeb, adei loo: nyhang" geung: teung jo, loo: shang. Khasu" wim gari Mangsoo gi nyang: dang: soo" to" da' khyoo: moo kyed, da" dang: zung" su: nghoid khyoo: ri ngoonu" loem, jeung" nyid boem.

²⁴Ngoonu" gi ngoonu" nyang: cang"- pang" goo" thug goo" wa shid re" nyhang" nyang: cang" jheddab da" nheigloem: toin" shid' go" zoore"- ge da" moozoo" rizei: wa shid mo nheigloem: tu: to' lho: pang" goo" thug go" nyid shang.

²⁵Nyhang" nyang: cang" zeung: foem: da" thung" ri ri dayham" gi she: pyam' nyid boem ago". Nyhang" gi houg: su" akoid boem loo: za: hau: Aseing: doem ju" ri" wa da" bidnyid jhang loo bye: ziri se' nyid boem bye: yoomo nyang: cang" nyang: je" wigi yoem: byid: go" nyid boem shang.

²⁶Khasu" wim gari nyangnu" gi hau deingmain" khyoo: ri bain' se' gyo: kham: yu thang: ri yooboo ri zhoogyi: gyi: dadoem koid nyid boem nghoid rigi ngoonu" da" yoobo shid re" to' byid: wa da" xoin" gootu: jo, loo: wa zi anghoid.

²⁷Ngoonu" gi ju" loo wa nghoid da" tarha" dang: phyed khyoo: yo' Mangsoo yo' aveing" goo" mo, ri nghe, jhoem" pyam' wa da" atho' tid loo: sho' gyoug pho" ngarai myi: ri gyoug nain" zoore" lang nyid wa zi za: danghoid lo.

²⁸Moshe da" tarha" ri atam" gyoo: loo: shoid vhang: mo, hang" ri nghoid loug we' sagsi: eig soem" youg dang: yo' yooboo yo" ga: dang: phyed zi shau" nghoid rigi nheig akhyeig loo: said' pyam nyid boem.

²⁹Houg: su" nghoid rigi Mangso da" nya: zoo: ri aphoug" akhyoid' koid su: gi ngoonu" gi nyang: ri youg: noo yooboo mo ced" gyeing ced" shang: yu da" Mangso dang: theing khoin" yo' sen: da" suid" ri ci: asoin: cishu: anhang: su: gi jeju" byid: nyid da' Venyi ri aphoug" zoo: wa da" shid: gyoin, noo gyoin gi khayhi' je" no, wa lha". damyid yu" ge'.

³⁰Khasu" wim gari ngoo latoo: phoug wigi yoobo da" jhen: ri ngoo do' wa"- ga: wigi we' Hau: lho: hau" Aseing: gi nya: byumyu" yi ri tarha" dang: phyed' wa ga: wigi we' tid nyid su: gi hang" nghoid ziri ngoonu" se' nyid.

³¹Dei nyid da" Mangso lo, moo gyo" vhang lo" ein: zigi atho' tid loo: sho' gyoug ca" da" khyoo: nghoid.

³²Lai loo" bye: da" bidnyid joem moo nanu" gi khayhang: te" mo, nghoid nyid boem ziri doem boin: so" nyid ge'. Hau: bidnyid joem moo Mangso bidbang ri zheung: yo" kham: yu ci: boem lho: shid: gyoin, noogyoin, myoo" sho' ri shau" kham, zo: lid lo boem bye- nghoid loug we' nanu" yoem: kaid thoug shang" lo boem yoomo hau: shid: gyoin, noo gyoin gi nanu" riyo" oung: lo" khyoo: ajo.

³³Nanu" nyang:- mung" byu yi da" shid' moo juang" yi gei sang: ziyo' shen" yhen khyoo: ri daso' so' thoung" shau" lid lo boem bye. Hau: lho: goo tu: da" ayo, joem moo gi nanu" yhang: ti" shen" yhen ziri thoung" shau" nyid da" byen cang" yi tab khyoo: bo nyid lho: wigi sho" jhen: jamjau ri bo kham, zo: khyo" yoem: byid: pang" thoug go" lid lo boem bye.

³⁴Nanu" gi thung: lung" mo, ri we' nheig khyeug ago- nanu" da" soid gain ziyoo joem ri lhoid yu zi shau" lo da" uri gau yi ziyo' kham zo: boem bye- Khasu" wim gari abyo, abei lo da" soid gain daja: yoo" shi" zigi nanu" se' ago".

³⁵Houg: su" nghoid yoomo nanu" da" yoem: vhoo" ri ashe: pyam- aci: phyug goo. Houg: lang" gi nanu" da" vhu" kung: phoug" azeing yo" yu goo" wa zi nghoid.

³⁶Mangsoo myid vho: khyoo: ri cang zei: wa ziyo' nya: da" dang: soo" khoin" joem yo' dakhyoo" ti"- akyu" yo" kham: yu boem sho' nanu" gi gyi: sheung: nheigloem: yo' zeung: kham, ca" nyid boem.

³⁷Khasu" wim gari jhoem: mungdang: moo " daso' ri ju" ri" wa su: gi ayo, daso' lang" ju" ri" wam: bye- Nyang: gi no: nyid theung: nyid wa zi anghoid.

³⁸Nga" da" deing byeung" byu yi koem gi loem" jeung" ziyo' dei nyid boem wa zi nghoid. Nghoid loug we' nyangnu" mo dayug yug- thang: khyoo: doem tau" thu' byam, lo" nghoid rigi ngoo gi nyang: ri vho: ngei loo: wa zi anghoid- ga: wigi tid nyid.

³⁹Ngoonu" gi doem tau" zoid phang: lo" da" byu yi anghoid loo: za: loem" jeung" lho: khyoid yu shau" da" byu yi nghoid nyid boem bye.