Read Lashi HEBRE 2 Bible Online

HEBRE 2 - Lashi bible

HEBRE 2

¹Houg su" nghoid yoomo ngoonu" gi khyoo: avhang: loo" baja"-ngoonu" nyang: shaug" gyoo: bye: da" hau deungmain" da" khyoo: moo je" wigi gyed gyed pu" lhang" too' shang.

²Mouglagyoo: yi da" nhoid mo ngoonu" da" phoug" phyid" yi ri mungdang: tid to" zigi deingmain" da" mungdang: nghoid wigi_ hau" mungdang: ri atam" gyoo: loo za: do, rhui, mo, gi nyang: tu: nyang: yo' moin: yi" da" yooboo dam, ri shau" kham: zo: boem wa zi nghoid. Houg: khyo" dadeung nghoid rigi

³Hid: yhi' gyi sheung: da" jeju" mungdang: ri-ngoonu" gi ci: asoin: loo: koid pyam boem nghoid rigi ngoonu" gi khakhyo" wigi yooboo dang: phyed jang" mo khasu" koid se' loid byoin, loo" wa lha". Hau: khyoid yu khyoo: ri xang: shed" moo Aseung da" nhoid mo nyang: tid kyo" lho: shaug" gyoo: bang: gi hau" mungdang: gi deungmain" nyid ziri sagsi: toin" shid nyid boem bye.

⁴Houg: mo xo' lho: Mangsoo gi nyang: nya: alhoo: again joem- mau" pho" moozoo" aja: ja: toin" shid khyo" we' gyeungshang: da" venyi yo' sen: da" jeju" jhung: shug joem ri nyang: vho: ngei ziyo' dakhyoo" ti"- gam byid: khyo" we' nyangnu" da" sagsi: joem moo poug lung: byid: khyo" we' toin" shid nyid.

⁵mangsoo gi akhid" nyhang" tid nyid da" ju" loo wa da" mougmyid seig ti: we' moug: lagyoo: yi vhoeb khang" da" akhoug: moo too" byid: wa zi anghoid.

⁶Jhoem: mougsoug" dakhyi, moo tid to" zigi " phoo Mangsoo we"- Byu xang: su: ga: zigi khayhang: te" su: nghoid wigi nang nyang: ri myid boin: nyid la". byu gi khayhang: te" su: nghoid- nang nyang: ri pang" thoug goin coung: koem" yu" nyid la".

⁷Nang gi nyang: ri - moug: lagyoo: yi tho' moo dajhi' khyo, lho: phain" too" bye. Nghoid loug we' myonhoo: phung" yoeb, bug thu sheing" jhu" zigi nya: tho' moo bidmug zhung" byid: bye.

⁸Jo, moo jo, nyid moo nyid ri vhoeb khang" da" akhang" we' nang nyang: ri byid: too" bye ga: wigi da tid nyid. Joem: mungdang: moo Mangsoo gi byu xang: su: yi ri phain" so: to" lho: wigi dangain" tho' moo vhoeb, wa akhang" byid: too" bye.,, ga: da" dang: gi jo, moo jo, dangain" ri vhoeb khang" nhang: ga: tid nau, zi nghoid. Nghoid loug we' zi yoo jo, moo jo, ri nya: da" vhoo: moo to" pyam' ga: zi gi ngoonu" akhid" amyang boem shi".

⁹Nghoid loug we' ngoonu" shau" myang su: gi Mangsoo jeju" yoomo dangain" bang: shid' re" yo" kham" shid: sho' ayo, aboin: daso' za: uri moug: lagyoo: yi vhoo: moo khyo, nyhoem: pyam' shau" da" Yesu Khristu nyang: nghoid nyid. Hau Aseing koem gi shid: loo" no lo" da" kyi" khyeug khyoo: ri kham : yu bye yoomo Akhid" gi myonhoo: phung" yoeb da" bidmug zhung" byid: too" bye: ziri ngoonu" shau" myang boem bye.

¹⁰Nya: zoo: yi myoo" sho' we' myonhoo: phung" yoeb, ri shau" kham: yu wa shid re" Jo, moo jo, ri phain" to" lho: yu goin yu" coung: zung" loug nyid da" Mangsoo gi Yesu Khristu ri kyi" khyeug jamjau shau" nhang: khyo" wigi joeb, byeung" su: bue" loo nhang: da" khyoo: gi yu" du, jo eung: da" khyoo: nghoid. Khasu" wim gari Yesu gi nyangnu" ri khyoid yu da" khyoo: khyoo"- shu" yhe: loo" su: nghoid nyid.

¹¹Yesu gi byu xang: su yi nyangnu" da" youg: noo yooboo mo ced" kyeung ced" shang: yu bye- nyang: yo' dage" ced" shang: yu bye: bang: gi nya: phoo dayug za: yoo" yoomo nyangnu" ri mang nhung" yi ga: wa ziri nyang: sho' wa zi anghoid.

¹²Yesu gi " Nang zei: da" moo" zo" khyoo: nga" mang: nhung" yi ri ngoo tid kyoo" wa nyangnu" da" mo, phung: gung moo Nang ri ngoo jikhoin" yo' coung" nghei byid: wa,, ga: wigi Mangsoo ritid bye.

¹³Hau: lho: Yesu doem tid zigi " Ngoo gi Mangsoo ri loem" jeung" khau: nghe: nyid wa nghoid,, ga: wigi we' Mangsoo ngoori byid: too" bye: da" nya: myid: nya: zoo: yi yo' dage" He: joyoo moo nyid nyid,, ga: wigi we' tid nyid.

¹⁴Nya: zoo: yi ga: nyang: nyangnu" ri myheung byid: ziyo' dakhyoo" ti"- suid" shoo" kham: voin, da" byu yi nghoid ago- Yesu nyang: we' suid" shoo" kham: voin, da" xang: su: byugung re" kham: yu bye. Hougsu" kham: yu khyoo: gi shid: loo" no lo" da" khyoo: ri vhoeb khang" nyid da- yu join: da" yoem: vho" ri lhu: phyo' lhu: shoin, pyam byid: wa shid re" nghoid nyid.

¹⁵Hid: khyo" wigi shid: loo" no lo" khyoo: ri gyoug wigi pyaid goin" join, koid nyid bang: ri lhoid pyoin kaid' bye.

¹⁶Khasu" wim gari nyang: gi moug: lagyoo: yi ri pang" thoug wa shid' mo re" zi anghoid- Jhoem: mougsoug" moo tid nyid ziyo' dakhyoo" te"- Abraham da" amyed, ashen, yi ri pang" thoug wa shid re" ju" re" khyoo: ri thoin" pang byid: nyid.

¹⁷Hougsu" nghoid yoomo nyang: gi byu yi da" yooboo ri yo" khyoid pyam byid: wa shid re" nheig se' khyeug deung byeung" da" khainjung moo" bue" lo khyo" Mangsoo moozoo" ri yo" voin, vu, baja"- khyoo: khaid zoo: khang" moo" moo Nya: mang: nya: nhung" yi thoung" shau" zo: nyid da" khyoo: ri nyangnu" yo' dage" bo shau" kham zoo: bye.

¹⁸Akhid" nyang: gi Lahung" thoung" shau" zoore- nya: gung nyang: kyi" khyeug khyoo: shau" kham: yu bye: yoomo lahung" thoung" shau" mo, yo' kyi" khyeug zi shau" nyid mo, ri yo" pang" thoug nyid. .