Read Lashi HEBRE 5 Bible Online

HEBRE 5 - Lashi bible

HEBRE 5

¹Khainjung agyi yug khang" moo" gi yooboo yoomo xoin" du: yo' jhung: shug jhung: lang: ngei" byid: baja"- byumyu" yi mo khyen: yu lho: xang: su" byu yi dangain" mo, shid re" Mangsoo ri noku coung" nghei wa shid' mo nyheung to" zi shau" su: nghoid nyid.

²Nya: gung du: nyang: we' khyoo: ja: khang" moo" moo yoem: nu: su: nghoid yoomo ci" we' asi abui" mo, shoid vhang: khyoo: dam: dam: loo" mo, ri gyi: sheung: da" nheigloem: yo" toin" shid' su nghoid.

³Nyang: nya: da" gung du: yoem: nu: su anghoid nyid yoomo byu gootu: yi da" youg: noo yoobo shid re" za: we' anghoid- nya: yoobo shid re" we' xoin" to' yu ca".

⁴Hang" nghoid loug we' nya: gung ri khainjung agyi moo" bui" wa myonhoo: ngeilang: mo yo" khyen: tang: to" zi anghoid.Arun ri yhang: ti" Mangsoo khyen: yu yug za: khainjung agyi moo" dayo" bue" lo.

⁵Houg: yo' dakhyoo" ti"- Khristu gi khain: jung agyi zeing bue" da" myonhoo: aya: yo' nya: gung du: ri nyang: phau: khuang tu: to' zi anghoid.Houg: su" koid wa gung khoo: gi nang gi nga" zoo: nghoid da- Akhid" nyid" gi ngoo re" phoo bue" loo bye ga: tid nyid da" Mangsoo wigi nyang: ri coung" nghei tu: to' byid: zi nghoid.

⁶Goo tu: da" joyoo moo we tid nang gi Melkhizedeg da" aya: rikhyoid zhoung" yu da" apyaid' atoKhain: jung zeing bui" wa nghoid.

⁷Yesu gi mougmyid tho' moo kang: so' dei nyid shi" ayo, - Nyang: ri shid: jang" mo yo" khyoid yu da" Mangso jhang thui: zeing yo' ngoug byid' ngoug nhab, thu' wigi akyu" mho' toung" pain zi koid yu" bye. Mangsoo we' Yesu da" mho' toung" pain: da" thui: ri tam" gyo: yu bye- Khasu" wim gari ASEING Yesu gi nyhoem: khyo, goeb, vang ziyo' ab, noung" xoin" to' zi nghoid yoomo lhoem: kham: yu bye.

⁸Nyang: gi Mangso nya: zoo: gyeing" nyang: nghoid nyid loug we' kyi" khyeug sho" jhen: khyoo: ri kham lho: tam" gyo: khyoo: ri jhau" yu bye.

⁹Nyang: ri joeb, byeung" su: ga: bain koid yu thang: ri nyang: gi tam" gyo: nyid mo, dangain" shid re" apyaid' ato: da" khyoid yu khyoo: mo apoem: ayang: bue" loo" bye.

¹⁰Mangsoo we' nyang: ri Melkhizedeg da" khainjung aya: ri khyoid zhoung" yu da" khainjung agyi moo" nghoid ga- Mangsoo gi nyang ri tid fu" byid: bye.

¹¹He: da" khyoo: yo' sen: lho: wigi ngoonu" tid wa joyoo myoo" sho' boo shi"- nghoid loug we' nanu" gi myab, ase' gyo: yu mo, nghoid nyid boem yoomo nanu" ri tid phoid kyoo" wa zi yau: nyid.

¹²Ayo, akhyeing: khyo" soin: yu" rigi nanu" gi sara bui" moin: yo, nghoid boem bye- nghoid loug we' Mangso da" apoem: ayang: mungdang: ri lang" gi byu dayug yug wigi nanu" ri dajhoug" byid: ca" shi"- nanu" gi thain: da" zoo: noem ri zoo: wa shid mo noug" za: dashug ca" nyid boem shi".

¹³Noug" za: dashug ca" nyid mo, hang" we' jo: ziyo' shoid da" khyoo: ri ci" we' ase' kho' yu" shi" da" zoonu" danghoid nyid shi".

¹⁴Thain: da" zoo: noem, koem gi ludaid' yi shid' re" nghoid nyid wigi nyangnu" gi cang zei: jhau" lo" khyo" ge: ziyo' age zi ri se' soin: se' kho' mo, nghoid nyid boem. .