Read Lashi 2PETRU 2 Bible Online

2PETRU 2 - Lashi bible

2PETRU 2

¹Lai: lo" bye: da" ayo' moo byu yi jang" moo mhau' da" lapi: yi thu' lo boem ziyo' dakhyoo" ti"- nanu" jang" moo we' mhau' da" sara yi thu' loo boem nghoid. Nyangnu" gi lhu: phyo' lhu: shoin, khyoo: adeung amain" jhau" mho' da" khyoo: joem ri shu" vang lo wigi nyang: tu: nyang: ri khyien: yu bye: da" Aseing: ri ngeug pyam boem wa zi nghoid. Hougsu" koid yoomo nyangnu" gi nyangnu" da" atho' moo byo, yoin" lo" khyoo: gi myab myab, ju" loo nhang: boem wa zi nghoid.

²Hougsu" danghoid sho' loug we' byu myoo" sho' bang: gi nyangnu" da" age aved asam" khyoo: moo bo cang lo" boem wa zi nghoid. Nyangnu" houg: su" koid boem yoomo hau: deungmain" da" akhyoo" ri byu gooji bang: gi age khyoo" gei sang: juang" yi pyam boem wa nghoid.

³He: da" mhau' sara yi gi-nyangnu" da" vhooo: boo myo, no' da" nheugloem: yo' nyheung phain" yu da" mhoo: myed: joem ri tid kyo" zoore"-amyaid sho: lo boem wa nghoid. Goonham, mo wigi nyangnu" ri dang: phyed' said pyam wa da" tarha" agyi phoo gi jen" nyid gu: nghoid ziyo' nyangnu" ri lhu: phyo' lhu: shoin' pyam wa sugi- yhoeb' nau lho: yhoeb, nghui" nghue" nyid zi anghoid.

⁴Mangsoo gi yooboo koid da" moug: lagyoo: yi ri lang" gi khyam" sa: abyid: loo: za: ngarai khyoo: khyo' pyam lho: wigi hau: joyoo mo moug: coid khoug: moo myeug" tei" to" wigi tarha" dang: phyed' wa da" bidnyid ri dalang" nyid nhang.

⁵Mangsoo gi shid phyang" mo da" moug: myed byu xangsu yi ri we'-khyamsa: abyid: loo: za: tarha" aphau" cang da" moug: myed byu xangsu: yi da" moug: myed ri tigyid shi, pyam bye. deung byeung" khyoo: ri tid kyoo" su:- Noa yo" gootu: byu nyhed yug ri za nyang: khyoid yu bye.

⁶Mangsoo gi Sodom yo' gomora, eig voo ri we' myi: nghe' shoin pyam wigi tarha" anau cang bang: moo khasu" bue" loo: wa da" akhyoo" again daloem: ri toin" shid' too" bye.

⁷Nyang: gi tarha" aci: aved asam" byo, yoin" nyid da" byu yi yoomo nheugloem: gye" byo, yoin" nyid bye da" byu ri za: nyang: khyoid yu bye.

⁸Hau: deungbyeung" da" byu gi nyangnu" da" akhoug: moo nyid nyid shi" uri nyid" khang" moo" nyangnu" nya: da" akhyeung" ashoeb da" moozoo" ri-bo myang bo shau" gyo: nyid yoomo nheugloem: moo atho tid loo sho' jamjau jamkhi" shau" nyid.

⁹Hougsu" nghoid yoomo Mangsoo gi-tarha" phau" cang nyid bang: ri-nyangnu" thoung" shau" nyid da" jham" cau" da" akoug: mo wigi-khakhyo" khyoid yu wa ziyo'-akhyeung" ashoeb bang: ri tarha" dang: phyed' da" bidnyid ju" sho' khakhyo" wigi shen" yhen wa khyoo: ri we' nyang: se' nyid.

¹⁰Je" wigi gungsho" da" aco' ajhoid- nyam, da" khyoo: mo: zheung: cang nyid boem wigi Mangso da" amyeung" akhang" ri aphoug" akhyoid koid nyid bang: gi houg: yhang: te" khyoo: deung" deung shug wa zi nghoid. He: da" mhau' sara yi gi gye" ngi thu' boem wigi-nghoid boin: boem ziyo' tho' phung" yoeb boo bang: ri phau" myang: khyoo: atoin" loo: za: nyangnu" ri juang" yi geisang: boem da.

¹¹He: da" mhau' yen" sara yi tho' moo-yoem: je bo da" moug khung: lagyoo: yi lang" Aseing: da" shid moo nyangnu" ri rue" juang" yi ziyo' yooboo foin: khyoo: akoid yu".

¹²Nghoid loug we' he: da" byu yi gi kuang myheug yu lho:-said' pyam wa shid re" nyid yen" da" goug: nyhoug lam: joem yhang: ti"- nyangnu" lang" ase' da" khyoo: ri ung: khoug: nheugloem: yo' juang" yi rue" nyid moo" zei: ago". Nyangnu" gi kyang: da" goug: nyhoug lam" joem ri yhang: ti"- lhu: phyo' lhu: shoin' pyam zi shau" boem wa nghoid.

¹³Nyangnu" gi soobi" ri thoung" shau" nhang: da" kyi" khyeug sho" jhen: khyoo: gi nyangnu" nyang: moo we' latoo: doem phug zi shau" zo: boem wa nghoid. Nyangnu" gi bidnyid" dang: gung rilang" nyangnu" da" gungshoo" nheugloem: yoo: pei" wa shid re"-nyangnu" nheug shid: jang: koid ago" Nyangnu" yo' dage" zo; shug mo, phung: moo dage" yhe: vang boo yoomo nyangnu shid re" asho' ashid: ziyo' myonhoo: ngilang: gyoeb khyoo: bue" nhang: nyid. Nyangnu" gi khanham fain" vo, khyoo: moo gye" pyoo: thui: gyo: boem.

¹⁴Nyangnu" gi gootu: ce" ja: riwe'- ayu" noug nghoid ago". Akyang" byo, ci: da" myiyi: yi riza:- date: yu" nau ago". Nyangnu" yooboo koid lho: yo" shau" kham: yu da" myo' no, khyoo: gi atho' thang nghoid ago". Nyangnu" gi loem khau: khyoo: moo yoem: nu: bang: ri nyangnu" da" lhid' moo myhi" sho' yo" mhe' yu ago". Nyangnu" da" nheugloem: e" myid joem ri aco' ajhoid khyoo: moo vhoo: boo myono loo wa shid re:- zei: zhang: nhang: nyid boem.Nyangnu" ri gi Mangso tarha" dang: phyed' nheung" khoin" zang" nyid boem abye: go".

¹⁵Nyangnu" gi dain: da" khyoo" ri too" pyam' lho: khyoo: vhang" lo" boem abye:. Nyangnu" gi Beora da" nya: zoo: Balam cang da" khyoo: moo cang lo" byug boem abye: go". Balam gi adeung amain" da" moo" zei: lho: yo" da" ngei ri myo, no, su: nghoid nyid

¹⁶Nyang: gi nyang: zei: da" yooboo yoomo yooboo foin: zi shug bye. Nya: da" loozei: gi byu thui: khyo" dang: tid lo wigi Lapi: pho, da" ko" agyeung" moo" ri no: pyam' nhang: bye.

¹⁷He: da" byu gi kyoug kain" byug bye: gyid bug yo" we' ug lid wigi houg tang" yen" da" jhoem: moug" yo" we' du nyid boem. Mangsoo gi nyangnu" shid' re" moug: coid' no, thang da" jang" moo joyoo daloem: nyheung too" byid: bye.

¹⁸Nyangnu" gi shoid vang: khyoo: dam: dam: lo" byu phung: khoug: mo aseig shi" daloid thu' loo bang: ri ce: akyu" abo da" nghoid boin: dang: tid lho gungshoo" aco' ajhoid da" nheig" loem: yo' lhoem: tau, yu lho: khyoo shu" vhang: lo" boem.

¹⁹Nyangnu" gi nyangnu" nyang byo yoin" lo" da" aved' asam: yi da" join zheung nghoid wigi gootu: byu yi ri lhoid' pyoin' kaid wa dang: soo" byid: boem ago". Khasu" wim ga: ri nyang nyang ri-ung: sho' vhoeb, khang" pyam da" ziyoo join yi: nghoid nyid.

²⁰Byu yi gi ngoonu" da" khyoid yu ASEING Yesu Khristu ri se' wigi moug: myed mo aco' ajhoid da" yoem: vhoo" khoug: mo loid lo" thang: ri hau: aco' ajhoid khyo: wigi doem oung: pyam zi shau" nghoid rigi Houg: bang: da thang: mo bue" lo akhyoo" gi-xang: she" tho' moo je" yau: loo" wa bye.

²¹Deung byeung" khyoo: ri bain se' yu lho: nyangnu" ri ab byid: too" bye- hau: gyeungshang: da" amyeung" mungdang: mo ve: gang: loo" wa tho' moo hau: khyoo: ri dajhi' we' asi loo: nyid rigi je ge nyid.

²²Lakhuid" gi nyang: doug boem to" zi doem geug zo:- Hau: lho: vu, gi bain cid" byid: thang: ri thoem" boeb, moo doem lhu" nyid. ga: da" dang: zhoem gi nanu" shid re" deung" nyid zi nghoid.