Read Lashi 1YOHAN 2 Bible Online

1YOHAN 2 - Lashi bible

1YOHAN 2

¹Nga" zoo: yi we"- nanu" gi yooboo akoid loo: goo" baja" ein:- he: mougsoug" ri nanu" jhang khyoo: ngoo lhid" kaid' bye. Nghoid loug we' byu dayug yug gi yooboo doem shau" koid nghoid rigi hau: pho, da" shid khoin" moo ngoonu" shid re" mho' tung" pain: byid: su:- Yesu Khristu ein: da" deing byeung" Aseing: gi ngoonu" yoo" shi".

²ASEING Yesu nyang:- ngoonu" da" gung leig xoin" nghoid nyid wigi nyang: yoomo ngoonu" da" youg: noo yooboo joem ri khyoid' khyu: pyam' byid: tho' moo gootu- byu yug khang" moo' da" yooboo ri we' khyoid pyam byid: bye.

³Nyang: byid: to" da" amyeing" dang: ri ngoonu" tam" gyo: lho: cang lo" boem nghoid rigi ngoonu" gi nyang: ri si' bang: nghoid da" khyoo: ri khyag nyang: yo" se' yu boem wam: bye.

⁴Ngoo gi nyang: ri si' bye: ga: byu dayug yug tid nyid nghoid ' loug we' nyang: tid to" da" amyeing" dang: ri atam" gyoo: acang lo" nghoid rigi hau" yug gi mhoug su: nghoid ziyo' hau: deingmain" khyoo: gi nyang: moo ci: we' aboo.

⁵Hang" nghoid loug we' nya: amyeing" dang: ri tam" gyo: lho: cang lo nghoid rigi gyeing" nyang: nya: Mangsoo ri jheddab zi nyang: moo joeb, byeung" su: nghoid bye- He: khyoo: gi ngoonu" Mangsoo yo' kha: khyo" wigi dadeing: daloem: za: bue" loo bye: khyoo: ri khyag nyang: si' nhang: da" khyoo: nghoid bye.

⁶Khristu zei: so' kangso' dei lo yhang: ti"- zei: so' kang: so' dei su: za: Mangsoo yo' dadeing: daloem: za: bue" wigi kangso' dei nyid su: nghoid ein: dayo" tid.

⁷Nga" jheddab bang: we"- akhid" hid: ngoo tid kaid' da" amyeing" tarha" gi aseig anghoid loo. xang: shed" mo nanu" yo" yu too" bye: da" amyeing" tarha" xoug" nghoid. hau: da" tarha" xoug" gi nanu" shau" gyo: yu" bye: da" mungdang: nyang: nghoid bye.

⁸Nghoid loug we' akhid" ngoo nanu" jhang khyoo: lhid" kaid' da" amyeing" tarha" gi dashoid khyo" tid shang ein: rigi aseig nghoid. Hau: tarha" aseig nghoid khyoo: deung zigi Khristu da" kangso' dei lo khyoo: moo we' nanu" thoung" shau" yu" loo bye: da" khyoo: mo we' yo" myang yu boem bye. Khasu" wim gari he: da" moug coid' gi bei: lo" byug lho: hau: deingmain" da" bidbang gi akhid" nyang: lang" doug bang jo, bye.

⁹Hang" nghoid loug we' ngoo gi bidbang moo nyid su: nghoid ga: yhen: tid lho: wigi nya: mang: nya: no, ri anoug angei zi dakoid nyid shi" rigi akhid" ju" sho' moug: coid moo danyid nyid shi" su: nghoid nyid.

¹⁰Hang" nghoid loug we' nya: mang: nya: nhung" ri se' jheddab su: gi hau: bidbang moo nyid nyid su: nghoid lho: wigi nyang: moo gi byu dayug yug ri yooboo koid nhang: wa khyoo: ci" we' aboo.

¹¹Nghoid loug we' nya: mang: nya: nhung" ri anoug angei koid nyid su: koem gi hau: moug: coid moo danyid nyid shi" su: nghoid lho: wigi nyang: gi moug coid' khoug: moo so" loo" yoomo nyang: khakhyoo: lo" nyid zi ashi, Khasu" wim gari hau: moug: coid gi nya: myojid" ri lhu: ced' pyam' byid: bye.

¹²Nga" zoo: yi we"- Khristu yoomo nanu" da" youg: noo: yooboo ri khyoid khyu: pyam' byid: bye: zi shau" boem bye: yoomo ngoo nanu" jhang lhid" foin: kaid zi nghoid.

¹³Pho, phi" yi we"- xang: shed" mo wigi nyid nyid bye: su: ri nanu" se' nyid boem bye: yoomo ngoo nanu" jhang khyoo: lhid" kaid. Zoolu: yi we"- hau: akhyeung" da" yu satan ri-nanu" oung: pyam bye: yoomo nanu" jhang khyoo: mougsoug" lhid" kaid' zi nghoid.

¹⁴Nga" zoo: yi we"- hau: nya: phoo ri nanu" zheung: se' nyid boem bye: yoomo ngoo nanu" jhang khyoo: mougsoug" lhid" kaid. Pho, phi" yi we"- xang: shed" mo nyid nyid su: ri nanu" se' nyid bye: yoomo ngoo nanu" jhang khyoo: lhid" kaid. Zoolu: yi we" nanu" yoem: bo nyid boem yoomo Mangso mungdang: gi nanu" moo bo jo, ziyo' hau: akhyeung" da" yu satan ri oung: pyam' boem bye: yoomo ngoo nanu" jhang khyoo: lhid" kaid zi nghoid.

¹⁵Moug: myid ri we' mougmyid moo jo, da" zi joem ri we' ajheddab nyid goo"- nanu" mougmyid ri jheddab nyid boem nghoid rigi nanu" da" nya: phoo ri ajheddab mo, nghoid.

¹⁶Moug: myid' yo' sen: da" ziyoo jo, moo jo,- gung shoo" moo nyam, da" nheigloem: joem- byu myojid" mo myang lho: myo, no, vhoo: boo loug gyi: lo ja:- he: mougmyid byu yi da" nghoid boin: phau: khuang da" khyoo: joem yo' ngeig go" phoug tu" go" da" khyoo: khaid khang" moo" gi kha: zi we' Mangso jang" mo thu' lo zi anghoid- hau: khyoo: dangain" gi mougmyid mo thu' lo da" khyoo: joem za: danghoid nyid.

¹⁷Moug: myid yo' dage" houg: mo da" xang: su: byu yi vhoo: boo myo, no, da" khyoo: ja: khang" moo" gi lid lo" byug nyid bye. Nghoid loug we' Mangsoo vho: ngei khyo" cang: koid loo" su: koem gi apyaid' atoo: moo danyid nyid.

¹⁸Nga" zoo: yi we"- lo" thang bidnyid jhang loo, bye. Nanu" ritid kyoo" bye: ziyo' dakhyoo" ti"- Khristu da" gyivoo phoo ein: su: gi ju" nyid bye: nghoid yoomo akhid" lang" gi Khristu da" gyivoo myoo" sho' thu' loo: bye: zi nghoid wigi lo" thang bidnyid jhang bye: ziri ngoonu" se' nyid boem bye.

¹⁹He: da" byu yi gi khanham we' ngoonu" yo' zoem" khoug: wa zi ci: asen: mo, nghoid nyid boem yoomo ngoonu" jang" mo nyangnu" thu' lo" byug ago- ngoonu" yo' zoem" khoug: wa zi sen: mo, nghoid boem rikoem gi nyangnu" gi ngoonu" yo' dage" nyid nyid boem wa zi nghoid. Nghoid we' nyangnu" dangain" mo, gi ngoonu" yo' gyeing" nyang: asen: da" khyoo: bang bang myang thu' loo baja" ga: nyangnu" thu' lo" byug boem bye.

²⁰Nghoid loug we' Yesu Khristu gi nanu" da" atho' moo hau: gyeungshang: da" Venyi ri foid shoin" byid: zi shau" boem bye: wigi nanu" dangain" bang: gi hau: deingmain" khyoo: ri yo" se' yu boem bye.

²¹Nanu" jhang khyoo: ngoo mougsoug" lhid" kaid da" khyoo: gi hau: deingmain" da" dang: ri nanu" asi yoomo anghoid- hau: deingmain" da" dang: ri we' mhau' da" dang: gi deingmain" da" dang: yo' ci: asen: nyid ziri we' nanu" se' nyid bye: yoomo lhid" kaid zi nghoid.

²²Yesu gi Meshia anghoid ga: wigi ngeug pyam' su: za: anghoid rigi mhoug su: ga: zigi hang" nghoid wa lha". Hau: nya: phoo yo' nya: zoo: ringeug pyam su: nyang:- Khristu da" gyivoo nghoid nyid.

²³Hau: nya: zoo: ri ngeug pya, su: hang" nghoid loug we' hau: nya: phoo ri we' bo ngeug pyam su: nghoid bye. Nya: zoo: ri lhoem: kham: yu su: gi nya: phoo ri we' lhoem: kham: yu zi nghoid bye.

²⁴Nanu" gi xang: shed" mo nyang:- shaug" gyoo: bye: da" mungdang: ri nanu" da" nheig: loem: khoug: moo kaid too" loo: ge'- hau: mungdang: nanu" moo bo jo, nghoid rigi nanu" gi nya: zoo: yo' we' nya: phoo yo' daeung: daloem: za: khanham" we' bue" nyid goo" wam: bye.

²⁵He: khyoo: gi Khristu nyang: ngoonu" ri dang: soo" khoin" byid: too" khare" da" atoo: moo kang: so' ri yo" yu khyoo: nyang: nghoid bye.

²⁶Nanu" gi mhau' fain" vo khyo" wigi khyoo: shu" vhang: loo" wa ga: yoem: kaid' nyid mo da" khyoo: ri ngoo shaug" gyoo: yoomo lhid" kaid zi nghoid nyid.

²⁷Nghoid loug we' nanu" koem gi Khristu da" Venyi ri nanu" da" atho' moo foid shoin" byid: ziri shau" kham: yu boem bye: yoomo nanu" moo hau" Venyi danyid nyid gi hang" we' nanu" ri jhoug" byid: mhoo, byid: aca" loo. Khasu" wim gari nya: da" Venyi gi nanu" ri khyoo: khaid khang" moo" moo jhau" mhoo, byid: nyid bye: yoomo nyang: jhoug" byid: da" khyoo: gi deingmain" da" khyoo: nghoid bye- mhau' fain" vo khyoo: gi ci" we' aboo loo:- houg: su" nghoid yoomo nanu" gi hau: Venyi wigi jhoug" byid: bye: ziyo' dakhyoo" ti"- tam" gyo: cang lo" lho: Khirstu yo' dadeing: daloem: za: bue" nyid ge'.

²⁸Nghoid bye"- myi: yi: zoo: yi we"- nyang: thu' myhang lo da" bidnyid ri nanu" gi sho' gyoug lho: phang: gau" yen" anoo" wa shid' re" nya: shid' khoin" moo asho' agyug loo: yo" yab, jo, sho' nyang: yo' daloem: za: dakoid nyid ge'.

²⁹Khristu gi deing byeung" su: nghoid ziri nanu" se' nyid boem nghoid rigi houg: su" deing byeung" khyo' zei: so' nyid yab, yen" bang: gi Mangso da" nya: zoo: nghoid nyid ziri si' eung: nyid boem bye.