Read Lashi 1YOHAN 3 Bible Online

1YOHAN 3 - Lashi bible

1YOHAN 3

¹Yu" ge' Mangsoo gi ngoonu" ri khayhi' jheddab nyid lha". Nya: da" jheddab nheigloem: gi gye" gyi: zi nghoid wigi ngoonu" ri Mangso nya: zoo: yi ga: myeing byid: bye: ziyo' dakhyoo" ti"- gyeing" nyang: ngoonu" gi Mangso nya: zoo: yi nghoid boem bye- Nghoid loug we' mougmyid gi Mangsoo ri asi yoomo ngoonu" ri we' asi nghoid da.

²jheddab bang: we"- ngoonu" akhid: gi Mangso nya: zoo: yi nghoid boem bye- Nghoid loug we' nyhang" thang: phyang" cibui" wa zi gi bain' sho' ase' boem shi". Nghoid loug we' Khristu nyang: doem thu' lo da" bidnyid rigi ngoonu" gi nyang: yo' du, goo" wam: bye"- Khasu" wim gari nya: gung doem: ri nyang: ngoonu" shau" myang boem wam: bye.

³Khristu moo hau: nheig byu jang: yoo" bang: gi Khristu nyang: gyeungshang: nyid ziyo' dakhyoo" ti"- nyang: tu: nya: gung ri we' cid" yung" cid" shang: to" abye: go.

⁴Yooboo koid nyid su: gi hang" nghoid loug we' tarha" ri peug phue da" moo" ri zei: nyid su: nghoid. Khasu" wim ga: ri yooboo gitarha" ri peug rhue, da" moo" nghoid nyid.

⁵Khristu gi xang: su: byu yi da" yooboo ri ced" shang: pyam' byid: wa shid re" thu' myhang re" da" khyoo: ri nanu" se' nyid gu nghoid- nyang: moo gi ce" yooboo daja: we' aboo.

⁶Houg: su" nghoid yoomo Khristu moo nyid bang: hang" Nghoid loug we' yooboo ri axo, koid loo: nghoid da- yooboo ri daxo, nyhen" koid loo" su: hang" nghoid loug we' Yesu ri amyang asi shi" su: nghoid.

⁷Nga" zoo: yi we"- nanu" ri hang" wigi we' khyoo: ayo" shu" vhang: loo" goo" baja"- Khristu gi deing byeung" nyid ziyo' dakhyoo" ti"- deing byeung" da" moo" zei: bang: hang Nghoid loug we' deing byeung" nyid.

⁸Yooboo ri za: daxo, nyhen" zei: loo" su: hang" nghoid loug we' yu satan yo' sen: su: nghoid nyid. Khasu" wim gari yu satan gi xang: shed" mo nyang: yooboo koid su: nghoid nyid. Houg: yoomo yu da" moozoo" ri phyo' shoin, pyam wa shid re" Mangso da" nya: zoo: gi po" thu' loo bye.

⁹Mangso da" nya: zoo: bui' bye: su: gi yooboo ri axo, koid loo- Khasu" wim gari hau: yug moo gi Mangso da" alhoo: aved, bo nyid bye. Mangso nya: zoo: bui" bye: bang: gi yooboo ri axo, koid loo nghoid da.

¹⁰Hau: khyoo: gi Mangso da" nya: myid: nya: zoo: yi yo' yu satan da" nya: myid: nya: zoo: yi gi gyi" sho' shai" go" da" khyoo: ri bang bang nyang: myang se' da" khyoo: nghoid. Hang" nghoid loug we' deing byeung" da" moo" ri azei: ziyo' houg: su" anghoid lang" gi - nya: mang: nya: nhung" yi ri ajheddab bang: gi Mangsoo da" nya: zoo: yi anghoid.

¹¹Xang: shed" mo nanu" shau" gyo: yu" bye: da" dang: soo" khoin" gi nanu" nyang: cang" jheddab goo" ge'. ga: da" mungdang: nyang: nghoid bye.

¹²Ngoonu" gi Ka-in yhang: ti" age koid- nyang: gi satan yu shoid mo byu bue" lo" lho: nya: nhung" Abela ri said' pyam bye Ka-in gi Abela ri ce: noem, koid said pyam lha". Nyang: zei: da" moozoo" gi shoid khyoo: nghoid nyid nya: nhung" zei: da" moozoo" gi jo nyid yoomo nghoid nyid.

¹³Houg: su" nghoid yoomo mang nhung" yi we"- moug: myid byu yi gi nanu" ri anoug angei koid lo khyoo: ri amhoug" goo".

¹⁴Ngoonu" gi mang nhung" yi ri jheddab nyid bye yoomo ngoonu" gi shid: jo, jang" mo dei nyid shoid khyoo: yo" rhue, lid loo" bye: ziri ngoonu" se' boem bye nya: mang nya: nhung" ri ase' jheddab su: gi hau: shid: lo" da" yoem: so' khoug: moo danyid nyid shi" su nghoid.

¹⁵Nya mang nyanhung" ri anoug angei su: hang" nghoid loug we' byu ri said pyam nyid su nghoid. Byu ri said pyam nyid su gi nyang: moo apyaid ato: kang so' ayo" yu ziri nanu" se nyid.

¹⁶Khristu gi yha" da" gung leig xoin" khyo" - nya: kangso' ri xoin" to' pyam byid: bye yoomo jheddab nheigloem: gyeung" zigi cite" zi nghoid ein: ziri gi ngoonu" se' boem bye. Houg su" nghoid yoomo ngoonu" we' mang nhung" yi shid re" ngoonu" kangso' xoin" to' pyam wa zi gi ge byid bye.

¹⁷Soid gain ziyoo yoo" su: nghoid nyid lho: wigi nya: da" nheig khyeug nheigloem: ri khyoo jhed' pyam byid su: gi Mangsoo ri jheddab ein: khasu" se tid wa lha".

¹⁸Nga" zoo: yi we"- ngoonu" jheddab da" khyoo gi nhoid' yhoo: khoin" thui: yo' za: anghoid- moozoo" yo' yo" toin" shid da" jheddab nheigloem: nghoid ca.

¹⁹Houg: yhang: ti" he: khyo" wigi ngoonu" gi hau: deingmain" da" khyoo ri cang yhi: mo, nghoid ziri yo" se' yu boem wa zi nghoid. Mangso da" shid' khoin" moo we' nheig shid: nheig deug khyo" yo" nyid wa da" amyeing" akhang" yo" yu boem wa zi nghoid.

²⁰Ngoonu" da" phug soo" lheig se' myid yu" da" nheigloem: gi juang" yi pyam zi shau" boem wa zi nghoid rigi mangsoo gi yha" da" phug soo" lheug da" nheigloem: tho' moo je gyi: su: nghoid ziri ngoonu" se' tho' moo agoo- nyang: gi nyid moo nyid jo, moo jo, ri se' thang su: nghoid ziri ngonu" se' nyid boem.

²¹Houg: yoomo jheddab bang: we"- ngoonu" da" phug soo" lheug da" nheig leom gi ngoonu" ri juang" yi yooboo foin: khyoo: akoid nghoid rigi ngoonu" gi Mangso shid khoin" moo asho' agyug loo: yo" vang lo" boem wa zi nghoid.

²²Ngoonu" gi Mangso amyeing" tarha" ri tam" gyo: lho wigi nyang vho ngei da" moozoo" ri zei: nyid boem bye: yoomo ngoonu" mho' nyid da" khyoo: dangain" ri ngoonu" yo" yu boem wa zi nghoid.

²³Nyang: ngoonu" ri byid: to" da" amyeing" tarha" khyoo: gi ngoonu" gi nya: zoo: Yesu Khristu ri loem" jeung" wigi Khristu gi ngoonu" ri byid: to" da" amyeing" tarha" yo' dakhyoo" ti"- nyang: cang" nyang: jheddab goo" ca" khyoo: nghoid.

²⁴Mangso amyeing" tarha" ri cang pyeing bang: hang" Nghoid loug we' Mangsoo yo' dadeing: daloem za: nghoid nyid wigi Mangsoo we' hau yug yo' dadeing: daloem za: danyid nyid. Houg: su" yo" bue" da" khyoo: gi Mangsoo nyang: byid: kaid' da" gyeungshang: Venyi yoomo ngoonu" se' nyid.