Read Lashi TARHA" AGYI 10 Bible Online

TARHA" AGYI 10 - Lashi bible

TARHA" AGYI 10

¹Abimeleg shid: thang: ri Pua da" nya: yuggi zoo: nghoid lho: Dodo da" nya: myid: zoo: Tola gi Israela byumyu" yiri loid byoin nhang: wa ju" lo da:. Nyang: gi Ishakha kung: mo nghoid wigi Ephrim boem moug: Shamira moo nyid su: nghoid.

²Nyang: gi eig xe: soem" zain Israela byumyu" yi da" vhujhung: koid wigi nyid da:. Hau: thang: nyang: shid: lo" lho: Shamira moo myhoeb pyam ago".

³Tola thang: moo Yaira gi Gilead moo nyid thu re" da:. Nyang: gi eig xe: eig zain Israela byumyu" yiri vhu" she: nyid da:.

⁴Nyang: gi loo zei: soem" xi: moo zhung: da" nya: yuggi zoo: soem" xi: yug yo" da:. Nyangnu" gi Gilead mung" moo voomoo" soem" xi: yo" ago". Hau: joem ri Yaira da" voozoo: joem ga: myheing nyid shi".

⁵Yaira shid: lo" wigi Kamon moo myhoeb pyam ago".

⁶Israela byumyu" yigi Bala yo' Astarte yu phara" joem ri Suri mo yu phara"- Sidon mo yu phara"- Moba mo yu phara"- Amon mo yu phara"- Philisti mo yu phara" joem ri no' yhang: ti" nyang: no' wigi ASEING ri thougtheung yooboo dalheing: doem shoid ago". Nyangnu" gi ASEING ri she: pyam lho: nyang: ri noku jang" mo theing: pyam boem.

⁷Houg: yoomo ASEING gi Israela byumyu" yiri nheig yo: da:. Houg: lho: Philisti yo' Amon byumyu" yiri nyangnu" adang moo oung: pyam nhang: da:.

⁸Gilead mung" Yodan gyid lang bidthu shoid Amori moug: moo nyid da" Israela byumyu" yi dangain" bang: ri daxe: shed zain nyang: doin: zeig zo: wigi shen" lo ago".

⁹Amon byumyu" yigi Yuda- Benyamin- Ephrim byumyu" kung: yiri khaid zain: wa shid re" Yodan gyid lang rilang" gu: dab ago". Israela byumyu" yigi gye" kyi" khyeug zi shau" boem.

¹⁰Hau: thang: Israela byumyu" yigi ASEING ri mho' yoid wigi «Ngoonu" gi nang ri thougtheung yooboo shoid boem bye:. Ciwim gari ngoonu" da" Mangsoo nang ri ngoonu" too" kho' lho: Bala yu phara" joem ri no' boem bye:» ga: tid ago".

¹¹ASEING gi nyangnu" ri hidsu" dang: phuid: byid: da:. Houg: zigi «Egutu- Amori- Amon- Philisti

¹²Sidon- Amaleg- Maon byumyu" yi wigi lid lo da" ayo, ri nanu" ri zeig zo: loo yoomo nanu" ngoo ri mho' yoid ago". Nanu" ri nyangnu" lo, mo ngoo akhyoid yu loo rhe".

¹³Nghoid loug we' nanu" gi ngoo ri to" pyam lho: gootu: yu phara" joem ri no' boem ashi". Houg: yoomo nanu" ri ngoo adoem khyoid yu loo: wa.

¹⁴Nanu" khyen: yu da" yu phara" joem jhang khyoo: yhe: wigi yhe: mho' yoid ge'. Nanu" yau: khi" shoug" lang" nyangnu" ri khyoid yu nhang: ge'» ga: tid da:.

¹⁵Nghoid loug we' Israela byumyu" yigi ASEING ri «Ngoonu" yooboo shoid bye:. Nang vho: khyo" koid we'. Nghoid loug we' akhid" nyid" ngoonu" ri khyoid yu la» ga: mho' ago".

¹⁶Houg: yoomo nyangnu" gi nyangnu" da" tungbau yu phara" joem ri yu pyam lho: ASEING ri noku ago". Nyang: gi Israela byumyu" yi da" yau: khe" kyi" khyeug ziri nheig yo" khyeug byid: da:.

¹⁷Hau: thang: Amon gyi dab gi gyi khaid pui" shid re" nyheing soin' lho: Gilead moo dab re" koid nyid ago". Israela byumyu" yigi zeing: foem: lho: Gilead mo Mizpa moo dab koid nyid ago".

¹⁸Houg moo Gilead mo byumyu" yi da" vhujhung: yo' Israela byumyu" kung: yi da" vhujhung: yigi nyang: cang" «Hang" vhu" she: wigi Amon byumyu" yiri gyi shu" khaid zain: wa la". Hang" koid nghoid loug we' Gilead moo nyid da" bang: dangain" da" vhujhung: nghoid ri" wa» ga: tid ago".