Read Lashi TARHA" AGYI 13 Bible Online

TARHA" AGYI 13 - Lashi bible

TARHA" AGYI 13

¹Israela byumyu" yigi ASEING ri thougtheung yooboo dalheing: doem shoid ago". Houg: yoomo nyang: gi Philisti byumyu" yi wigi nyangnu" adang moo myid: xi: zain vhoeb nhang: da:.

²Hau: ayo, moo Zora voogung mo Mano ga: myheing da" byu dayug nyid da:. Nyang: gi Dan byumyu" kung: moo bo boo: su: nghoid da:. Nya: yhoem: seing: myhi' gi khanham we' zoo: akhu: yu" nghoid da:.

³ASEING da" moug: lagyoo: gi nyang: ri re" thu shug lho: «Nang gi khanham we' zoo: akhu: yu" nghoid da:. Nghoid loug we' nang gi atung" myang" ri zoonu" gung bue" re" lho: yuggi zoo: dayug khu: wa.

⁴Zabyid yhid:- yhid: shed- toem' to" da" zoo: noem daja: ri we' azoo: ashug wa shid re" lhid we'.

⁵Re" zooshang: yuggi zoo: khu: re" thang: ri nya: xam: ri khanham we' age phyed wa zi nghoid. Ciwim ga ri nyang: khu: re" da" bidnyid mo zi Naziri dayug khyo" Mangsoo ri shugbyid: too" shoug" yug nghoid ri" wa. Nyang: gi Israela byumyu" yiri Philisti byumyu" yi lo, mo khyoid yu da" moo" ri zei: loo wa» ga: tid da:.

⁶Hau: thang: hau: myiyi: gi nya: yhoem: seing: pho jhang yhe: lho: «Mangso byu dayug nga" jhang khyoo: ju" re" da:. Nyang: gi yu" gyoug sho' da" Mangso moug: lagyoo: dayug nghoid da:. Nyang: khamo ju" re" ziri ngoo nyang: ri ashoug" myid:. Houg: lho: ngoo ri nya: myeing atid kyoo" nghoid da:.

⁷Nghoid loug we' ngoo gi zoonu" gung bue" re" lho: yuggi zoo: dayug khu: wa ga: zi koem' gi nyang: ngoo ri tid da:. Nyang: gi ngoo ri zabyid yhid:- yhid: shed- toem' to" da" zoo: noem daja: ri we' azoo: ashug- ciwim ga: ri nyang: kangso' dei nyid da" ayo, moo Naziri dayug khyo" Mangsoo ri shugbyid: too" ca" yoomo nghoid» ga: tid da:.

⁸Hau: thang: Mano gi ASEING ri «ASEING we" jeju" khyo" nang nhang: kaid byid: wigi hau: yuggi zoo: khu: re" uri nga" eig tang: cikoid ca" ziri tid kyoo" nhang: la» ga: akyu" mho' da:.

⁹Mangsoo gi Mano mho' ziri koid byid: wigi hau: myiyi: yoo moo zhung: jo, uri nya: moug: lagyoo: hau: myiyi: jhang doem ju" re" da:. Nya: yhoem: seing: phoo Mano gi nyang: yo' dage" anyid nghoid da:.

¹⁰Houg: yoomo nyang: gi dalheing: dam tang" lo" wigi nyang: ri «Yu" we' Akhayo, nga" jhang ju" re" da" su: nga" jhang re" doem thu shug abye:» ga: tid kyo" da:.

¹¹Mano gi to' wigi nya: yhoem: seing: myhi' thang: cang yhe: da:. Nyang: gi byu hau: yug jhang yhe: wigi «Nga" yhoem: seing: myhi' ri dang: ji yug nang nghoid rhe"» ga: myid: da:. Nyang: gi «Nghoid» ga: tid.

¹²Hau: thang: Mano gi «Akhid" re" dang: joo lang" hau: yuggi zoo: cikoid ca" wa lha". Nyang: khasu" kangso' dei ca" wa lha"» ga: myid: da:.

¹³ASEING da" moug: lagyoo: gi «Re" yhoem: seing: myhi' gi ngoo wigi nyang: ri tid to" zi ja: khang" moo" ri zid" wigi koid ca" wa.

¹⁴Nyang: gi zabyid nei mo zei: re" jang" mo ci: we' age zoo: wa. Nyang: gi zabyid yhid:- yhid: shed yo' toem' to" da" zoo: noem ciri: we' age zoo: wa. Nyang: gi nyang: ri ngoo tid to" da" ja: khang" moo" ri koid ca" wa» ga: tid da:.

¹⁵Mano gi moug: lagyoo: nghoid ziri asi' lho: nyang: ri «Jeju" khyo" ajen" loo" shi". Re" shid re" coidbaid nu" dadu: said wigi nga" tang: ri yhung nhang: la» ga: tid da:. Nghoid loug we' moug: lagyoo: gi «Ngoo theing: nghoid rigi re" zoo: noem ri ngoo azoo: wa. Nghoid loug we' nang soin' byid: nau nghoid rigi ASEING ri shugbyid: da" xoin" khyo" nghe' ngei" byid: we'» ga: tid da:.

¹⁷Mano gi «Re" mungdang: joem joo lang" nga" eig tang: nang ri ngi: yo" shab byid: sho' re" myeing ri nga" eig tang: ri tid kyoo" la» ga: phug tid da:.

¹⁸Moug: lagyoo: gi «Nang nga" myeing ri ciwim si' nau la". Hau: zigi mau" pho" myeing danghoid» ga: tid da:.

¹⁹Houg: yoomo Mano gi coidbaid nu" dadu: yo' shivoo: dajhi' ri yu lho: hau: joem ri lug phoin: dang moo ke" wigi mau" pho" moo" joem ri koid yug nghoid da" ASEING ri ngei" byid: da:.

²⁰Phoin: mo myiyham: joem dab thu ri" lang" Mano yo' nya: yhoem: seing: myhi' gi ASEING da" moug: lagyoo: ri myiyham: khoug: mo mougkhung: khyoo: do, lo" ziri myang ago". Houg: lang" Mano gi byu hau: yug gi ASEING da" moug: lagyoo: nghoid ziri boin: re" wigi nyang: yo' nya: yhoem: seing: myhi' gi myidgung khyoo: goeb pid boem ago". Nya: eig tang: gi moug: lagyoo: ri khanham we' amyang yu" boem loo: nghoid ago".

²²Mano gi yhoem: seing: myhi' ri «Nga" eig tang: gi Mangsoo ri myang bye: yoomo gyeing" nyang: shid: wa bye:» ga: tid da:.

²³Nghoid loug we' nya: yhoem: seing: myhi' gi «ASEING gi nga" eig yug ri said pyam nau nghoid rigi nyang: gi nga" eig tang: da" xoin" ri khab yu wa zi anghoid. He: gu: dangain" ri nyha" eig tang: ri nyang: ci: shug zi anghoid. He: ayo, moo houg: yhang: ti" khyoo: nyha" eig tang: ri tid wa zi anghoid» ga: tid.

²⁴Hau: myiyi: myhi' gi yuggi zoo: dayug khu: lho: nyang: ri Samson ga: myheing byid: ago". Hau: zooshang: gi gyi: re" lho: ASEING gi nyang: ri mainkaid byid: da:.

²⁵Zora yo' Eshtaola agyoo: mo Dan byumyu" kung: yi da" dab mo nyang: nyid uri ASEING da" yoem: so' gi nyang: ri yoem: boo nhang: da:.