Read Lashi TARHA" AGYI 14 Bible Online

TARHA" AGYI 14 - Lashi bible

TARHA" AGYI 14

¹Danyid" ri Samson gi Timna voo khyoo: gyoo" yhe: lho: nyang: gi houg: moo Philisti zoomyi: zoo: dayug ri yhe: myang da:.

²Nyang: gi yhoem: khyoo: tau" lo" wigi nya: phoo yo' nya: myhi' tang: ri «Timna moo ngoo yu" ngei da" Philisti zoomyi: zoo: dayug nyid da:. Nyang: ri nga" shid re" yu byid: ge'. Ngoo nyang: ri lo, xo' yu nau da» ga: tid da:.

³Nghoid loug we' nya: phoo yo' nya" myhi' tang: gi nyang: ri «Nang ciwim yoomo adu: adam: da" Philisti bang: jang khyoo: yhe: lho: yhoem: seing: myhi' yhe: shoo: ca" rhe". Ngoonu" byumyu" phung: mo ngoonu" nya: byumyu" kung: mo myiyi: nu" dayug ri ayu" vhoo: rhe"» ga: myid: ago". Nghoid loug we' Samson gi nya: phoo ri «Hau: myiyi: nu" ri nga" shid re" nang ngoo ri yu byid: wa ziri ngoo vho:. Ngoo nyang: ri jheddab» ga: tid.

⁴Nya: phoo yo' nya: myhi' tang: gi Samson ri ASEING gi hid: su" koid nhang: nyid ziri asi' goo" nghoid da:. Ciwim gari ASEING gi Philisti byu yiri gyi khaid wa shid re" akhyoo" sho: nyid da:. Houg: ayo, moo Philisti byu yigi Israela ri vhoeb nyid ago".

⁵Houg: yoomo Samson gi nya: phoo nya: myhi' tang: yo' dage" Timna khyoo: gyoo" yhe: ago". Zabyid khyam: da khyam: khyo" so" lid: yhe: lo" boem uri Samson gi khangkhyi dadu: hung: thui: shau" gyo: da:.

⁶ASEING da" yoem: so' gi nyeigdain tung" Samson ri yoem: boo nhang: wigi nyang: gi hau: khangkhyi ri coidbaid nu" dadu: ri yhang: ti" nya: lo, cen: yo' adu du lang: kho' sain" pyam da:. Nghoid loug we' nyang: cikoid bye: ziri nya: phoo nya: myhi' tang: ri atid kyoo" nghoid da:.

⁷Hau: thang: nyang: gi hau: myiyi: nu" jhang khyoo: yhe: lho: nyang: ri vho: ngei khyoo: yhe: tid da:.

⁸Dayo, zoo: myang" thang: ri Samson gi nyang: ri lo, xo' yu wa shid re" doem yhe: lo" da:. Gyung: khyoo: moo nyang: gi nyang: said too" kho' da" khangkhyi ri yhe: yu" wa shid re" khyoo: mo khyoo: thung" vang yhe: da:. Hau: khangkhyi shid: mang khoug: moo byoo: zei: wigi byooyhid: dajhi bo jo, ziri nyang: yhe: myang yoomo mau" da:.

⁹Nyang: gi nya: lo, yo' byooyhid: ri lab yu lho: dakhyoo: moo" goin" zo: da:. Hau: thang: nyang: gi nya: phoo yo' nya: myhi' jhang lo" lho: nyangnu" ri dayham" byid: da:. Nya: tang: hau: ziri zo: da:. Nghoid loug we' Samson gi nyang: hau: khangkhyi manggung mo byooyhid: lab yu da" khyoo: ri nyangnu" ri atid kyoo" nghoid da:.

¹⁰Nya: phoo gi myiyi: nu" da" yhoem: khyoo: yhe: lho: Samson gi houg: moo zooshug pui" dapui" soin' byid: da:. He: zigi zoolu yi phung: moo koid da" thung" ri: daloem: nghoid da:.

¹¹Philisti byumyu" yi nyang: ri myang lang" nyangnu" gi nyang: yo' nyid wa shid re" zoolu: soem" xi: yug ri nhang: kaid ago".

¹²Samson gi nyangnu" ri «Ngoo nanu" ri qei" shoem' daloem: tid kyoo" ba. Hau: dang: kang: ri lo, xo' pui" nyhed nyid" abyeung" shi" ri ngoo ri nanu" yo" tid kyo" nghoid rigi ngoo nanu" ri zin: yung" pain" gi dayug dakhyab khyab yo' byimi dayug dazuang zuang byid: wa.

¹³He: pui" gyoo: moo: nanu" ayo" tid boem rigi nanu" yugkhang" moo" mo zin: yung" pain" gi soem" xi: yo' byimi soem" xi: zuang ngoo ri byid: ca" wa» ga: tid da:. Nyangnu" gi «Re" qei" shoem' ngoonu" ri tid kyoo" la. Hau: ziri ngoonu" gyo: yu" wa» ga: tid.

¹⁴Nyang: gi «Zoo: su: mo zoo: noem thu re" da:. Yoem: bo jang" mo cau: ja: thu re" da» ga: tid. Soem" nyid" thang: ri nyangnu" hau: qei" shoem' da" dang: kang: ri ayo" tid thu shigoo" nghoid da:.

¹⁵Myid: nyid" ein: nyid" ri nyangnu" gi Samson da" yhoem: seing: myhi' ri «Hau: qei" shoem' ngoonu" ri tid kyoo" sho' re" yhoem: seing: phoo ri mhid" we'. Nang hougsu" akoid rigi re" pho yhoem: ri nang yo' dage" nghe' khyo' pyam wa. Ngoonu" ri ziyoo lhoid yu wa shid re" re" eig tang: ngoonu" ri khe: yu anghoid rhe"» ga: tid ago".

¹⁶Houg: yoomo Samson da" yhoem: seing: myhi' gi nya: jhang yhe: wigi ngoug byid yo' «Nang gi ngoo ri ajheddab nghoid da:. Nang ngoo ri ngheing" da:. Nang gi nga" byencang" yiri qei" shoem' tid lho: hau: dang: kang: nang ngoo ri atid kyoo" nghoid da» ga: tid. Nyang: gi «Yu" we' hau: khyoo: ri nga" phoo yo' nga" myhi' tang: rilang" ngoo atid kyoo" shi". Ciwim yoomo nang ri ngoo tid kyoo" wa la"» ga: tid da:.

¹⁷Nyang: gi hau: khyoo: yo' sen: lho: pui" nyhed nyid" goin" nyang: ngau da:. Nghoid loug we' nyhed nyid ein: nyid" moo hau: khyoo: yo' sen: wigi nyang: sung nu nyid yoomo Samson gi qei" shoem' dang: kang: nyang: ri tid kyo" pyam da:.

¹⁸Houg: yoomo nyhed nyid" ein: nyid" moo Samson yhoeb yoo avang shi" ri hau: voomoo" mo zoolu: yigi «Byoo: yhid: tho' cije cau: la". Khangkhyi tho' cije yoem: bo la"» ga: tid ago". Samson gi «Nanu" nga" nu: yo' aphug nghoid rigi akhid" nanu" nga" qei" shoem' ri yo" phuid: wa anghoid» ga: phug tid da:.

¹⁹ASEING da" yoem: so' gi nyeigdain tung" nyang: ri yoem: kaid byid: lho: nyang: gi Ashkelon khyoo: gyoo" yhe: wigi houg: mo byu soem" xi: yug ri yhe: said pyam lho: nyangnu" byimi ri yhe: khyoid yu da:. Houg: lho: houg: bang: byimi ri nya: qei" shoem' ri yo" phuid: bang: ri byid: da:. Hau: thang: nyang: gi yhoem: khyoo: tau" lo" da:. Hougsu" bue" da" khyoo: ri nheig joem: yo: da:.

²⁰Lo, xo' pui" moo: nya: yhoem: seing: myhi' rigi nya: byencang" gyeing" koid yug ri byid: zho" pyam da:.