Read Lashi TARHA" AGYI 17 Bible Online

TARHA" AGYI 17 - Lashi bible

TARHA" AGYI 17

¹Dalheing: ri Ephrim boem moug: moo Mikha ga: da" byu dayug nyid.

²Nyang: gi nya: myhi' ri «Byu dayug yug re" ngei dakhyeing" dashoo: pyi" ri khau" lo" byug uri nang gi hau: khausu ri nheing" da:. Nang hougsu" nheing" ziri ngoo shau" gyo:. Yu" we' ngei ngoo yo" da:. Hau: ziri yu su: ngoo nghoid» ga: tid. Nya: myhi' gi «Nga" zoo: we"- ASEING nang ri mainkaid byid: baja"» ga: tid da:.

³Nyang: gi hau: ngei ri nya: myhi' lo, khyoo: doem tau" byid: da:. Houg: lang" nya: myhi' gi «Nga" zoo: ri nheing" khoin" azang" wa shid re" hau: ngei ri ngoo nyang: ASEING ri shugbyid: wa. Seig yo' koid da" yu phara" soolhoo: ri ngei yo' thoeb da" jang" moo ci: wa shid re" nghoid da:. Hau: ngei nang ri doem tau" byid: wa» ga: tid.

⁴Hau: thang: hau: ngei joem nya: myhi' ri doem tau" byid: da:. Nya: myhi' gi hau: ngei mo eig shoo: pyi" ri yu lho: jo, to" lo, moo" zei: su: ri byid: da:. Houg: yug ri seig yo' yu phara" soolhoo: koid lho: ngei yo' thoeb nhang: da:. Hau: ziri Mikha da" yhoem: moo to" to" da:.

⁵He: Mikha ga: su: gi nyang: nya: noku wa joyoo yoo" su: nghoid. Nyang: gi yu phara" soolhoo: dayham" yo' xoin" ngei" byizuang dakhyab ri koid lho: nya: yuggi zoo: yi mo dayug ri khainjung khyo" moo" foin: to" da:.

⁶Hau: ayo, moo Israela mung" moo khokham anyid nghoid da:. Yugkhang" moo" nyang: nyang: vho: da" khyo" koid ago".

⁷Hau: ayo, moo Yuda mung" mo Bedlehem voogung moo Levi zoolu: dayug nyid da:.

⁸Nyang: gi Bedlehem mo to' yhe: lo" wigi nyid joyoo gootu: yhe: sho: da:. Nyang: gyung: so" lo" ri Ephrim boem moug mo Mikha da" yhoem: khyoo: ju" lo" da:.

⁹Mikha gi nyang: ri «Nang kha: moug: mo ju" re" zi nghoid» ga: myid:. Nyang: gi «Ngoo gi Yuda mung" Bedlehem voogung mo Levi byu dayug nghoid. Ngoo gi nyid wa joyoo sho: yen" yug nghoid» ga: tid da:.

¹⁰Mikha gi «Ngoo yo' dage" nyid shang. Nga" da" phajhi" byid: su: yo' khainjung koid we'. Houg: lho: ngoo gi nang ri dazain ri ngei daxi: pyi"- byimi dayham" yo' zoo: noem byid: wa» ga: tid lhung: da:.

¹¹Hau: Levi zoolu: gi Mikha yo' dage" nyid wa myid veing" lho: nya: zoo: yo' dakhyo" bue" lo" da:.

¹²Mikha gi nyang: ri nya: da" khainjung koid nhang: wigi nyang: gi Mikha yhoem: moo: nyid da:.

¹³Mikha gi «Akhid" ngoo khainjung khyo" Levi byu dayug yoo" bye:- ASEING ngoo ri gi koid byid: wa ziri ngoo si' bye:» ga: tid da:.