Read Lashi TARHA" AGYI 19 Bible Online

TARHA" AGYI 19 - Lashi bible

TARHA" AGYI 19

¹Israela byumyu" yi khokham ayoo" shi" da" pyaid moo Ephrim boem moug: moo Levi byu dayug nyid da:. Nyang: gi nya: dangcang: myhi' koid wa shid re" Yuda mung" Bedlehem voogung mo myiyi: nu" dayug ri yu da:.

²Nghoid loug we' hau: myiyi: nu" gi nyang: ri nheig yo: lho: Bedlehem mo nya: pho yhoem: khyoo: phang: lo" byug da:. Houg: lho: nyang: gi houg: moo: lhammoo" myid: khyab nyid da:.

³Hau: thang: hau: yug gi nya: thang: khyoo: cang yhi: wa myid phyed lho: nya: jhang doem cang tau" loo wa shid re" yhe: mhid" shu" wa soin' da:. Nyang: gi nya: dei zoo: yo' loo zei: eig du: ri nyang: yo' dage" shu" yhe: da:. Hau: myiyi: myhi' gi Levi byu ri nya: pho yhoem: khyoo: shu" vang yhe: lho: nya: pho hau: yug ri myang lang" ngei bu tung" lhoem: tau yu da:.

⁴Nya: pho toem' wigi nyang: gi houg: moo: soem" nyid" theing: nyid da:. Nya: eig tang: gi zoo: noem zo: lho: myen" ayo, ri lid loo" nhang: da:.

⁵Myid: nyid" ein: nyid" nab soin: no' mo to' lho: loo" wa soin' jen" ago". Nghoid loug we' hau: myiyi: nu" nya: phoo gi Levi byu ri «Daja: ja: zoo: kho' shi" ge'. Re" eig yug zhang" zhang" ga: wa. Hau: thang: re" eig tang: yo" yhe: loo" wa» ga: tid.

⁶Houg: yoomo nya: eig yug gi gyo" zhung: lho: dage" zoo: shug da:. Hau: thang: myiyi: nu" nya: phoo gi nyang: ri «Jeju" khyo" damyen yhoeb shi" lho: pyoo: pyoo: nyid we'» ga: tid.

⁷Levi byu gi yhe: loo" wa to' ri" nghoid loug we' nya: yug phoo gi nyang: ri doem theing: shi" wa toem' yoomo nyang: gi houg: moo damyen doem theing: nyid da:.

⁸Wim: nyid" ein: nyid" nab soin: no' re nyang: gi to' yhe: lo" nyid da:. Nghoid loug we' myiyi: nu" nya: phoo gi «Jeju" khyo" daja: ja: zoo: ge'. Myen" thang: bidvang sho' lang" shi" we'» ga: tid da:. Houg: yoomo nya: eig yug dage" zoo: shug da:.

⁹Hau: yuggi phoo- nya: dangcang: myhi' yo' dei zoo: phoo bang: yhe: loo" wa dalheing: doem soin' uri nya: yug phoo gi «Yu" ge'. Akhid" gi myen" thang: moug: coid lo" nyid abye:. Akhamyen we' theing: shi" ge'. Amyang" ri moug: coid loo: wa. Hid: moo theing: lho: pyoo: pyoo: nyid we'. Nab yo nyid" nab soin: no' to' lho: yhoem: khyoo: loo" ge'» ga: tid da:.

¹⁰Nghoid loug we' hau: yug gi houg: moo gootu: damyen adoem theing: noug lho: yoomo nyang: yo' nya: dangcang: myhi' gi gyung: so" shid" lo" da:. Nyangnu" dei zoo: phoo yo' myang: too: tho' da" loo zei: eig du: bo da:. Nyangnu" Yebusi nam khyoo: ju" lo" boem uri bidvang yo, nghoid bye: (Yebusi gi Yerusalem nghoid da). Houg: yoomo dei zoo: phoo gi nya: aseing: ri «Ngoonu" he: Yebusi voomoo" moo myen" ri theing: boem shang» ga: tid.

¹²Nghoid loug we' nya: aseing: gi «Israela byu yi anghoid boem da" bang: voomoo" moo ngoonu" atheing: wa. Ngoonu" dadoin: zoo: lid yhe: lho: Gibea anghoid lang" Rama moo yhe: yhoeb zi nghoid» ga: tid da:.

¹⁴Houg: yoomo nyangnu" gi Yebusi lid yhe: lho: gyung: xo' so" lo" ago". Nyangnu" gi Benyamin byumyu" kung: yi da" moug:- Gibea khyoo: ju" yhe: boem uri bidvang lo" byug da:.

¹⁵Nyangnu" gi houg: moo yhe: yhoeb wa khyoo: thung vang yhe: lo" ago". Nyangnu" gi voogung khyoo: vang yhe: lho: voogung shava joyoo moo yhe: zhung: jo, ago". Nghoid loug we' hau: myen shid re" nyangnu" ri hang" we' being" are" tau yu nghoid ago".

¹⁶Nyangnu" hougmoo nyid boem uri mangzoo: phoug" dayug myen" thang: yoothung" khyo" lo da:. Nyang: gi Ephrim boem moug: moo nyid re" yug nghoid da:. Nghoid loug we' akhid" nyang: Gibea moo nyid da:. (Hougmoo nyid boem da" gootu: bang: gi Benyamin byumyu" kung: mo bang: nghoid ago".)

¹⁷Mangzoo: phoug" gi voomoo" shava joyoo mo hau: gyung: soo" su: ri myang lho: nyang: ri «Nang khamo re" su: nghoid. Nang khakhyoo: yhi: wa lha"» ga: myid: da:.

¹⁸Levi gi «Ngoonu" gi Yuda mung" Bedlehem mo lo zi nghoid. Akhid" ngoonu" gi ngoonu" yhoem: jo, da" Ephrim boem moug: lang no, khyoo: yhe: lo" zi nghoid. Akhamyen hang" we' ngoonu" ri being" alhoem: tau yu nghoid da:.

¹⁹Ngoonu" da" loo zei: shid re" khoofoo:- ngoo yo' nga" dangcang: myhi'- nga" dei zoo: shid re" zooyho' yo' zabyid yhid: ngoonu" yo". Ngoonu" moo ca" gu: ngoonu" dangain" ci:» ga: tid da:.

²⁰Hau: mangzoo: phoug" gi «Nanu" ri nga" yhoem: moo theing: nhang: wa. Nanu" ri ngoo goin coung: byid: wa. Voomoo" shava joyoo moo nanu" atheing: ca"» ga: tid.

²¹Houg: yoomo nyang: gi nyangnu" ri nyang: yo' dage" yhoem: khyoo: shu" lo" lho: houg: bang: da" loo zei: joem ri zoo zho" da:. Nya: being" voo yigi khyid: cid" pyam lho: zoo: noem zo: ago".

²²Nyangnu" hougsu" zoo: pyo: shug pyo: nyid boem uri hau: voomoo" mo gung shoo" zoem" khyoo: ri anghoid akhuang koid da" bang: dangain" gi nyeigdain tung" hau: yhoem: ri re" vang: wigi khoem" zeing ri re" ko' nyid ago". Nyangnu" gi mangzoo: phoug" ri «Nang yo' dage" yhoem: khyoo: vang lo da" su: ri shu" thu ri" byid: la. Ngoonu" nyang: yo' gung shoo" zoem" nau da» ga: tid ago".

²³Nghoid loug we' mangzoo: phoug" gi tunggung khyoo: thu yhe: wigi nyangnu" ri «Nga" byencang" yi we"- jeju" khyo" houg: ti" akhyeing" ashoeb moo" ri akoid goo". He: yug gi nga" being" danghoid.

²⁴Yu" ge'. hid: moo nya: dangcang: myhi' yo' nga" zoo: zoomyi: gyeing" nyid ago". Nya: eig yug ri akhid" ngoo shu" thu re" byid: wa. Nanu" nya: eig yug yo' zoem" ge'. Nanu" vho: khyo" koid ge'. Nghoid loug we' he: yug rigi houg: yhang: te" akhyeing" moo" ri akoid goo"» ga: tid.

²⁵Nghoid loug we' nyangnu" gi nya: dang: ri atam" gyoo: goo" nghoid da:. Houg: yoomo Levi byu gi nya: dangcang: myhi' ri shu" yu wigi tunggung khyoo: yhe: nyhid: byid: da:. Nyangnu" gi nyang: ri damyen goin" moug: boo" sho' atheing: lho: rue" wigi nyang: ri anghoid akhuang koid ago".

²⁶Moug: boo" zoo" ri hau: myiyi: myi' gi nya: yhoem: seing: phoo nyid da" mangzoo: phoug" da" yhoem: khoem" duang: moo lo jhang" jo, da:. Nyang: gi myo, myang sho' houg: moo leung jo, da:.

²⁷Nya: yhoem: seing: phoo gi hau: nyid" nab soin: to' re" lho: nya: gyung: khyoo: khyoo: so" yhe: loo" wa shid re" khoem" phang kaid uri nya: dangcang: myhi' gi yhoem: pain' moo nya: lo, khoem" duang: khyoo: yeing wigi leung jo, ziri yhe: myang da:.

²⁸Nyang: gi «Too' we' loo" loo: shang» ga: tid. Nghoid loug we' atu" nghoid da:. Houg: yoomo nyang: gi hau: manggung ri loo zei: dang moo apyi: khyo" dang ke" lho: nya: yhoem: khyoo: lo" da:.

²⁹Nyang: gi ju" lang" yhoem: khyoo: vang lo" wigi shamcoin" dacam" lo" yu da:. Nya: dangcang: myhi' da" mang ri yu lho: daxe: eig du khyo' lho: jab phyid da:. Israela byumyu" kung: khang" moo" khyoo: dadu du foin: kaid da:.

³⁰Hau: ziri myang da" bang: yugkhang" moo" gi «Ngoonu" hid: yhang: te" zi khanham we' ashoug" gyo: yu". Israela byumyu" yi Egutu mung" mo thu lo da" ayo, mo akhid" ju" sho' hid: yhang: te" zi abue" yu"- he: khyoo: yo' sen: wigi daja: ja: koid ca" da:. Ci: koid wa lha"» ga: tid ago".