Read Lashi TARHA" AGYI 2 Bible Online

TARHA" AGYI 2 - Lashi bible

TARHA" AGYI 2

¹ASEING da" moug: lagyoo: gi Gilgala mo zi Bokhim khyoo: yhe: wigi Israela byu yiri «Ngoo gi nanu" ri Egutu mung" mo shu" thu lo wigi nanu" phoug" phyid" yiri dangsoo" byid: to" da" mung" khyoo: nanu" ri shu" loo bye:. Ngoo gi Nanu" yo' to" to" da" dang: theing ri khanham we' aphyo' pyam wa.

²He: mung" moo nyid boem da" bang: yo' dang: theing daja: we' nanu" age too" nghoid ago". Nanu" gi nyangnu" da" phoin: joem ri phyo' khyo' pyam ca" ago" da» ga: tid. Nghoid loug we' nanu" gi ngoo tid to" ziri akoid goo" nghoid da:. Nanu" gi atau" khyo" koid abye: go".

³Houg: yoomo akhid" ngoo gi nanu" shid vhu" khyoo: yhe: lo" ri he: byumyu" yiri akhid thu pyam wa zi nghoid da" khyoo: nanu" ri tid kyo". Nyangnu" gi nanu" da" gyivoo yi bue" loo wa. Nanu" gi nyangnu" da" yu phara" joem ri noku da" moo" zoo" wigi lhid' moo myi" ri" goo" wa» ga: tid.

⁴Moug: lagyoo: he: dang: ri bain tid lang" Israela byu yi dangain" kyi: ngau ago".

⁵He: gang mo hau: joyoo ri Bokhim ga: myheing ago" zi nghoid. Nyangnu" gi hau: joyoo moo ASEING ri xoin" to' byid: ago".

⁶Yoshu gi Israela byumyu" yiri nyangnu" nya: khyoo: khyoo: nhang: kaid wigi yugkhang" moo" gi hau: nya: gamboem mougmyid ri yhe: seing: yu ago".

⁷Yoshu dei nyid gu: moo Israela byumyu" yigi ASEING ri dei byid: nyid ago". Nyang: shid: byug thang: rilang" Israela byu yi shid re" ASEING koid da" gyi: sheung: da" moo" zoo" dangain" ri nyangnu" nya: myo, yo' shau" myang boem da" vhujhung: yi dadei nyid nyid gi nyangnu" hougsu" xo' lho: dei byid: nyid ago".

⁸Nun da" yuggi zoo:- ASEING dei zoo: Yoshu gi apyaid dasho: daxi: zain ri shid: lo" da:.

⁹Gasha mougzhung: Ephrim boem moug: mo nya: gamboem mougmyid Timnad Sera joyoo moo nyang: ri myhoeb to" da:.

¹⁰Yoshu pyaid mo byu daxeig goin' zi shid: lo" lho: thang: xeig mo byu yigi ASEING yo' Israela byumyu" yi shid re" ASEING koid da" moo" ri to" myhed pyam ago".

¹¹Israela byumyu" yigi ASEING ri yooboo shoid thougtheung wigi Bala ri dei byid: boem ago".

¹²Nyangnu" gi nyangnu" phoug" phyid" yi da" Mangsoo- Egutu mung" mo nyangnu" ri shu" thu lo da" Mangsoo nghoid da" ASEING ri noku khyoo: theing: byug ago". Houg: lho: nyangnu" gi nyangnu" lheing: khoem moo nyid da" byu yi yu phara" joem nghoid da" gootu: yu phara" joem ri no' lo ago". Nyangnu" houg joem ri goeb pid byid: lho: ASEING ri nheig yoo: nhang: ago".

¹³Nyangnu" gi ASEING ri noku ziri theing: pyam wigi Bala yu phara" joem yo' Astarte ri dei byid: ago".

¹⁴Houg: yoomo ASEING gi Israela byumyu" yiri nheig joem: yo: lho: gyivoo yiri khaid zain: nhang: wigi nyangnu" ri lhoid zoo: nhang: ago". Nyang: gi houg bang: lheing khoem mo gyivoo yiri nyangnu" ri oung: nhang: wigi Israela byumyu" yigi nyangnu" nya: gung ri ayo" goem loem loo: nghoid ago".

¹⁵Nyangnu" gyi khaid pui" yhi: khang" moo" nyang: khasu" koid wa tid ziyo' dakhyo" ASEING gi nyangnu" ri thougtheung da:. Nyangnu" gye" myid myo: nyid boem ago".

¹⁶Hau: thang: ASEING gi nyangnu" ri phyo' zoo: bang: da" lo, mo khyoid yu wa shid re" Israela byumyu" vhujhung: yiri byid: da:.

¹⁷Nghoid loug we' Israela byumyu" yigi nyangnu" da" vhujhung: yi dang: ri atam" gyoo: goo" nghoid da:. Israela byumyu" yigi ASEING ri jhug azug loo: za: yu phara" gootu: ri no' boem ago". Nyangnu" phoug" phyid" yi ASEING da" dang: ri tam" gyo: ago". Nghoid loug we' he: byuxeig aseig bang: gi hougsu" koid wa shid re" toem' pyam bye: ago".

¹⁸ASEING gi Israela byumyu" yiri vhujhung: byid: khang" moo" ASEING gi nyang: ri pang" thoug wigi hau: vhujhung: dei nyid da" ayo, cang gyivoo yi lo, mo byumyu" yiri khyoid yu da:. Nyangnu" kyi" khyeug shoug" ziyo' doin: zeig zo: akhoug: moo nyangnu" kyi" khyeug ngau boem yoomo ASEING gi nyangnu" ri nheig khyeug yu da:.

¹⁹Nghoid loug we' vhujhung: shid: loo" lang" byumyu" yigi khyoo: xau" khyoo: doem tau" lo" wigi lid loo bye: da" byuxeig tho' je xo: lo, moo" ri koid ago". Nyangnu" gi yu phara" joem gootu: ri dei byid: lho: no' ago". Houg: lho: nyangnu" nya: akhyeing" da" khyoo: ri nheigloem: thain: lho: xo' yhe: lo" ago".

²⁰Hau: thang: ASEING gi Israela byumyu" yiri nheig joem: yo: wigi «He: byumyu" yigi nyangnu" phoug" phyid" yiri cang pyeing wa ngoo amyeing" byid: to" da" dang: theing ri phyo' pyam abye: go". Nyangnu" nga" dang: ri atam" gyoo: yoomo nghoid.

²¹Yoshu shid: da" uri he: mung" moo nyid boem shi" go" da" ce: byumyu" yiri we' ngoo akhaid thu loo: wa.

²²Nyangnu" phoug" phyid" yi koid boem ziyo' dakhyoo" ti" he: Israela byumyu" yi nga" khyoo: moo: cang go" la- acang goo" la- ein: ziri he: byumyu" yiri ci: wigi koid wa zi nghoid» ga: tid.

²³Houg: yoomo ASEING gi hau: byumyu" yiri hau: mungdain: moo nyid deing jo, nhang: da:. Nyang: gi Yoshu ri houg: bang: adang moo aoung: pyam nhang: nghoid da:. Yoshu shid: thang: ri we' nyangnu" ri nyang: myab akhaid thu pyam nghoid da:.